Мф 23

23 ГЛАВА

1-36 Фарисей ден закон туныктышо-влаклан шижтарымаш. 37-39 Иерусалим верч ойгырымаш.

1Тунам Иисус калыклан да тунемшыж-влаклан ойлаш тӱҥалын: 2«Закон туныктышо ден фарисей-влак Моисейын лӱмжӧ дене ойлат. 3Тыгеракын, мом нуно тыланда шукташ кӱштат, чыла шуктыза, но нунын семын ида ыште, вет нуно ойлат, а огыт ыште. 4Закон туныктышо ден фарисей-влак неле, нумалаш йӧсӧ нумалтышым пидыт да еҥ-влакын вачӱмбакышт пыштат, а шкешт тудым парняшт денат ынешт тарвате. 5Чыла ыштымыштым еҥ-влак ужышт манын веле ыштат. Шкаланышт Возымаш ойым пыштыме поснак кугу калтам, вургемысе пешак кужу йолвам налыт.#23:5 Иудей пӧръеҥ-влак тыгай калтам саҥгаштышт да шола кидыштышт, кынервуй деч кӱшнӧ, пижыктеныт. А йолваже-влак Юмылан ойырымым ончыктеныт, да нуным ӱмбал вургемын луклашкыже верландареныт. Ончо Числ 15:37-41, Втор 6:6-8. 6Пайрем годым эн пагалыме верым налаш да синагоглаште ончылно шинчаш йӧратат, 7еҥ-влакын калык погынымо верлаште саламлымышт, ”Равви, равви” манын ойлымышт нунылан келша.

8А тендам еҥ-влак равви манын ынышт лӱмдӧ, вет тендан Туныктышыда икте, тиде – Христос, теже чыланат изак-шоляк гае улыда. 9Мландӱмбалне нигӧмат Ача манын ида лӱмдӧ. Тендан Ачада икте, Тудо пылпомышто. 10Тендам еҥ-влак ”илыш корным ончыктышо” манын ынышт лӱмдӧ. Тендан илыш корным Ончыктышыда икте веле – Христос. 11Тек тендан кокла гыч эн кугужо тарзыда лиеш, 12вет кӧ шкенжым кӱшкӧ шында, волтымо лиеш, а кӧ шкенжым ӱлыкӧ шында, нӧлталтеш.

13Ойго тыланда, закон туныктышо ден фарисей-влак, сайла кояш тӧчышӧ-влак! Пылпомыш Кугыжанышым айдемылан петыреда; шкежат тушко огыда пуро, пураш шонышыжымат огыда пурто. 14Ойго тыланда, закон туныктышо ден фарисей-влак, сайла кояш тӧчышӧ-влак! Те тулык ӱдырамаш-влакын суртыштым йорлештареда да лӱмжылан гына кужу жап кумалыда. Тидлан тендам поснак пеҥгыде суд вуча. 15Ойго тыланда, закон туныктышо ден фарисей-влак, сайла кояш тӧчышӧ-влак! Кеч иктым шкендан ӱшанымашкыда савыраш манын, теҥызымат, мландымат эртеда, а савырымекыда, тудым тамыкын эргыжым, шкендан деч кок пачаш ударакым, ыштеда.

16Ойго тыланда, вӱден коштыктышо сокыр-влак! Те ойледа: ”Кӧ храм дене товатла, товатлымыже нимом ок шого, а кӧ храмысе шӧртньӧ дене товатла, тудо товатлымыжым шуктышаш”. 17Ушдымо да сокыр-влак! Можо кугурак: шӧртньӧ але шӧртньым святитлыше храм? 18Тыгак те ойледа: ”Кӧ жертвенник дене товатла, товатлымыже нимом ок шого, а кӧ жертвенникыште кийыше надыр дене товатла, тудо товатлымыжым шуктышаш”. 19Ушдымо да сокыр-влак! Можо кугурак: надырже але тудым святитлыше жертвенникше? 20Тыгеже, жертвенник дене товатлыше тудын дене да жертвенникыште мо уло, чылаж денат товатла. 21Храм дене товатлыше тудын дене да тушто Илыше дене товатла. 22Пылпомыш дене товатлыше Юмын престолжо да тушто Шинчыше дене товатла.

23Ойго тыланда, закон туныктышо ден фарисей-влак, сайла кояш тӧчышӧ-влак! Те пӱртньыкын, укропын да каламбырын лектыш гыч луымшо ужашыжым Юмылан пуэда, а законысо эн кӱлешанжым: порын судитлымым, чаманымым, ӱшанле улмым ӧрдыжеш кодеда. Тидыжымат ышташ кӱлеш ыле, весыжымат ӧрдыжеш кодыман огыл. 24Вӱден коштыктышо сокыр-влак, те шыҥам шӱрен кодеда, а верблюдым нелыда!

25Ойго тыланда, закон туныктышо ден фарисей-влак, сайла кояш тӧчышӧ-влак! Те корка ден кӱмыжын тӱжвал могыржым эрыктеда, туге гынат кӧргышт агымаш да чын огыл денак темын. 26Сокыр фарисей! Корка ден кӱмыжын тӱжвал могырышт ару лийже манын, ондак кӧргӧ могырыштым эрыкте.

27Ойго тыланда, закон туныктышо ден фарисей-влак, сайла кояш тӧчышӧ-влак! Те ошемдыме тойымо вер гай улыда: тӱжвач ончымаште моторын койыт, а кӧргышт колышо-влакын лулегышт да тӱрлӧ йырнык дене темыныт. 28Тӱжвал могырым теат еҥ ончылно чын ыштышыла койыда, а чонда сайын кояш тӧчымӧ да закондымылык дене темын.

29Ойго тыланда, закон туныктышо ден фарисей-влак, сайла кояш тӧчышӧ-влак! Пророк-влаклан чапле шӱгарым ямдыледа, чын ыштыше-влакын шарныктыш кӱыштым сӧрастареда 30да ойледа: ”Ме ачана-влакын#23:30 Ача-влак – тиде мут дене Библийыште чӱчкыдынак ожно илыше кугезе-влакым але ача-коча-влакым ончыктат. илымышт годым илена ыле гын, пророк-влакын вӱрыштым йоктарымаште нунын дене пырля огына лий ыле”. 31Тыгеракын, шкендан ваштареш шке таныкледа: те пророкым пуштедыше-влакын эргышт улыда. 32Ынде ачада-влакын ыштымыштым мучашыш шуктыза.

33Кишке-влак, шем кишкын шочшыж-влак! Титаканыш лукмо да тамыкыш колтымо деч кузе куржын утледа ыле? 34Мый тендан деке теве пророк-шамычым, ушан еҥ да туныктышо-влакым колтем, а те иктыштым пуштыда, пудален сакеда, весыштым синагоглаштыда сола дене кыраш да ола гыч олашке поктылаш тӱҥалыда. 35Тыгеракын, мландӱмбалне йоктарыме чыла титакдыме вӱр тендан ӱмбакыда возеш. Чын ыштыше Авельын вӱржӧ гыч тӱҥалын, храм ден жертвенник коклаш тендан пуштмо Захарийын, Варахийын эргыжын, вӱржӧ марте те чыла вӱр верч мутым кучеда. 36Тыланда чынак ойлем: тиде тукымлан чыла тидын верч мутым кучаш логалеш.

37Иерусалим, Иерусалим! Тый пророк-влакым пуштедет, тый декет колтымо-влакым кӱм кышкен пытарет. Кайык шке шулдыржо йымаке игыж-влакым погымо семын мыняр гана Мый тыйын шочшет-влакым погынем ыле, но те тореш лийында! 38А ынде тендан пӧртда яра кодеш. 39Тыланда ойлем: ”Господьын лӱмжӧ дене Толшо тек моктымо лиеш”#23:39 Пс 117:26. манмешкыда, те Мыйым огыда уж».

Currently Selected:

Мф 23: УС

Highlight

Copy