Мф 18
18
18 ГЛАВА
1-11 Пылпомыш Кугыжаныште эн кугу. 12-14 Йомшо шорык нерген туштен ойлымаш. 15-20 Языкым ыштыше йолташ. 21-35 Титакым кудалташ тореш лийше тарзе нерген туштен ойлымаш.
1Изиш варарак Иисус деке тунемшыж-влак лишемыныт да каласеныт: «Пылпомыш Кугыжаныште кӧ эн кугу?» 2Иисус йочам ӱжын, тудым нунын коклашке шогалтен 3да каласен: «Тыланда чынак ойлем: те огыда вашталт да йоча гай огыда лий гын, Пылпомыш Кугыжанышыш пурен огыда керт. 4Тыгеже, кӧ шкенжым тиде йоча гай изилан шотла, тудо Пылпомыш Кугыжаныште эн кугу, 5а кӧ Мыйын лӱмемлан кӧра ик тыгай икшывым йӧратен налеш, тудо Мыйымат йӧратен налеш.
6Но Мыланем ӱшаныше тыгай изирак-влак кокла гыч иктыжым чын корно гыч кӧ кораҥда, тудын шӱйышкыжӧ вакшкӱм сакен, теҥыз пундашке пуртен колтат гын, тудлан сайрак лиеш ыле. 7Алгаштарымаш шукылан кӧра тӱнялан ойго! Алгаштарымаш толде огеш керт, но кӧн гоч толеш, тудо еҥлан ойго. 8Тыйым кидет але йолет алгаштарынеже гын, тудым руал ойыро да шке дечет ӧрдыжкӧ кудалте: курымаш тулыш кок кидан але кок йолан кудалтыме лиймешке, илышыш чолак але окшак лийын пураш тыланет сайрак. 9Шинчат тыйым алгаштарынеже гын, тудым луктын шу: тулан тамыкыш кок шинча ончен кудалтыме лиймешке, илышыш пел шинчан пураш тыланет сайрак. 10Шекланыза, нине изирак-влак кокла гыч чыланыштымат пагалыза. Тыланда ойлем: пылпомышто нунын Суксышт Пылпомышсо Ачамын чурийжым эреак ужын шогат. 11Айдеме Эрге йомшо-влакым кычал муаш да утараш толын.
12Те кузе шонеда? Иктаж-кӧн шӱдӧ шорыкшо уло да иктыже йомеш гын, индешле индешыжым курыкеш коден, йомшыжым кычалаш ок кай мо? 13Тыланда чынак ойлем: кычал муэш гын, йомдымо индешле индеш шорыкшылан куаныме деч утларак тудлан куана. 14Тыгак тендан Пылпомышсо Ачаданат нине изирак-влак кокла гыч иктыжымат йомдарымыже ок шу.
15Лишылет тыйын ваштареш языкым ыштен гын, титакше нерген тудын дене посна мутлане. Тыйым колыштеш гын, лишылетым пӧртылтенат. 16А огеш колышт гын, пырля эше ик еҥым але кокытым нал. ”Тек кок але кум таныклышын ойлымышт дене чыла титаклыме мут пеҥгыдемдыме лиеш”.#18:16 Втор 19:15. 17Нунымат огеш колышт гын, черке погынымаш ончылно каласе. Черке погынымаште ойлымымат шотыш ок нал гын, тек тудо тыланет чын Юмым палыдыме але йозак погышо гай лиеш.
18Тыланда чынак ойлем: мом те мландӱмбалне пидыда, тудак пылпомыштат пидме лиеш; мом мландӱмбалне рудеда, пылпомыштат рудымо лиеш. 19Тыгак тыланда чынак ойлем: тендан кокла гыч кокытшо мланде ӱмбалне иктаж-мо нерген сӧрвалаш мутланен келша гын, Пылпомышсо Ачам мом йодмыштым чылажымат шукта, 20вет кушто Мыйын лӱмемлан кӧра коктын але кумытын погынат, тушто Мый нунын коклаште лиям».
21Тунам Иисус деке Петр миен да каласен: «Господь! Мыйын ваштареш языкым ыштылше лишылемын титакшым мыняр гана кудалтышаш улам? Шым гана марте мо?» 22Иисус тудлан ойлен: «Шым гана марте манын, тылат ом ойло, а шым гана шымле пачаш марте.
23Пылпомыш Кугыжанышым шке тарзыж-влакын оксам кучылтмыштым тергаш шонышо кугыжа дене таҥастараш лиеш. 24Тергаш тӱҥалмекыже, тудын деке лу тӱжем талант#18:24 Ик талант – латвич ияш пашадар. парыман ик еҥым конденыт. 25Парымжым пӧртылтен кертын огылат, кугыжа тудым шкенжымат, ватыжымат, йочаж-влакымат, уло погыжымат ужалаш да парымжым пӧртылташ шӱден. 26Тунам тарзе тудын ончылан кумык возын сӧрвален: ”Оза, мыйым чамане, чыталте, чыла тӱлем”. 27Кугыжа тиде тарзым чаманен, тудым эрыкыш колтен да уло парымжым кудалтен.
28Тиде тарзе, уремыш лекмекыже, вес тарзым вашлийын. Тудыжо тудлан шӱдӧ динарийым#18:28 Динарий – ик кечаш пашадар. пуышаш улмаш. Тиде еҥым кучен да пикташ тӱҥалын. ”Мыланем парыметым пӧртылтӧ!” – ойлен. 29Тунам йолташыже, тудын ончылан кумык возын, сӧрвалаш тӱҥалын: ”Мыйым чамане, чыталте, мый чыла тӱлем”. 30Но тудо келшен огыл, каен да, парымым тӱлымешкыже, казаматыш петырыктен шынден.
31Мо лиймым вес тарзе-влак ужыныт да пешак ойганеныт, нуно кугыжа деке каеныт да чыла каласкаленыт. 32Тунам кугыжа тудым ӱжыктен да ойлен: ”Осал тарзе! Мыйым сӧрвалышыч да чыла пуышашетым кудалтышым. 33Тугеже, тыйым чаманымем семынак шке йолташетым чаманышаш отыл ыле мо?” 34Чот шыдешкыше кугыжа, парымжым тӱлен пытарымешке, тудым орландарыше-влак кидыш пуэн.
35Тендан кокла гыч кажныже лишылже-влакын титакыштым уло кумылын ок кудалте гын, Пылпомышсо Ачамат тендан дене тыгак ышта».
Currently Selected:
Мф 18: УС
Highlight
Share
Copy
Want to have your highlights saved across all your devices? Sign up or sign in
Библийым кусарыше институт, Хельсинки 2007
