Мф 14

14 ГЛАВА

1-12 Тынеш Пуртышо Иоаннын колымыжо. 13-21 Вич тӱжем еҥым пукшымаш. 22-33 Иисус вӱд ӱмбач кая. 34-36 Геннисаретыште черле-влакым паремдымаш.

1Тудо жапыште Иисус нерген Ирод тетрарх колын. 2Тудо тарзыж-влаклан каласен: «Тиде Тынеш Пуртышо Иоанн. Тудо колымаш гыч ылыж кынелын, сандене чудым ыштыше вийже уло». 3Вет Ирод шкенжын Филипп изажын Иродиада ватыж верч Иоанным кучыктен да, шинчырлен, казаматыш шындыктен улмаш. 4Иоанн тудлан ойлен: «Тыланет Иродиада дене илаш ок лий». 5Ирод Иоанным пуштнеже улмаш, но калык деч лӱдын, вет Иоанным пророклан шотленыт.

6Иродын шочмо кечыжым палемдыме годым Иродиадан ӱдыржӧ уна-влак ончылно куштен да Иродлан пешак келшен, 7сандене ӱдыр шкаланже мом йодеш, тудым пуаш Ирод товатлен сӧрен. 8Аважын кӱштымыж почеш ӱдыр ойлен: «Тынеш Пуртышо Иоаннын вуйжым мыланем кызытак кӱмыжыш пыштен пу». 9Кугыжа ойганен, но уна-влак ончылно товатленат, ӱдырын йодымыжым шукташ кӱштен 10да казаматышке Иоаннын вуйжым руал ойыраш колтен. 11Тудын вуйжым кӱмыжыш пыштен конденыт да ӱдырлан пуэныт, а тудыжо аважлан наҥгаен. 12Иоаннын тунемшыж-влак толыныт, капшым налыныт да тоеныт, вара каеныт да Иисуслан увертареныт.

13Тидын нерген колмеке, Иисус пушыш шинчын да тымык верыш шкетын каен. Калык тидын нерген пален налын, олала гыч йолын почешыже миен. 14Серыш лекмеке, пеш шуко калыкым ужынат, Иисус еҥ-влакым чаманен да нунын кокласе черле-влакым паремден.

15Кас шумеке, тунемшыж-влак Тудын деке миеныт да ойленыт: «Тиде – калык илыдыме вер, жап шуко эртен. Еҥ-влак, яллаш каен, шкаланышт кочкышым налын кертышт манын, нуным колто». 16Но Иисус каласен: «Кайымышт ок кӱл, те нунылан кочкаш пуыза». 17Тунемшыж-влак Тудлан ойленыт: «Мемнан тыште вич сукыр кинде да кок кол веле». 18Иисус каласен: «Тидым Мый декем кондыза». 19Калыклан шудо ӱмбаке шинчаш кӱштен, вич сукыр кинде ден кок колым налын да, пылпомышко ончалын, благословитлен. Вара, киндым тодылын, тунемшыж-влаклан пуэн, а тунемшыж-влак – калыклан. 20Чылан теммешке кочкыныт, да кодшо катыш дене латкок комдым теменыт. 21Йоча ден ӱдырамашым шотлаш огыл гын, чылаже вич тӱжем наре еҥ кочкын.

22Тунамак Иисус тунемшыж-влаклан пушыш шинчаш, Тудын деч ондак вес серыш вончаш кӱштен, а Шкеже калыкым ужаташ кодын. 23Калыкым ужатен колтымеке, Иисус шкет кумалаш курыкыш кӱзен. Кастене тушто шкет лийын. 24А пуш ынде теҥыз покшелне улмаш, ваштареш мардеж лийынат, тудым виян толкын кырен.

25Йӱдым, нылымше орол годым, Иисус тунемшыж-влак деке теҥыз ӱмбач ошкеден миен. 26Тудын теҥыз ӱмбач ошкеден толмыжым ужын, нуно ӧрткеныт да ойленыт: «Тиде шинчаш койшо!» Лӱдмышт дене кычкыреныт. 27Но Иисус тунамак нунылан каласен: «Чулым лийза, ида лӱд. Тиде Мый улам». 28Петр Тудлан вашештен: «Господь, тиде Тый улат гын, мылам Тый декет вӱд ӱмбач ошкеден мияш шӱдӧ». 29«Тол», – каласен Иисус. Иисус деке каяш манын, Петр пуш гыч лектын да вӱд ӱмбач ошкеден каяш тӱҥалын, 30но виян мардеж пуымым шижын да лӱдынат, пурен каяш тӱҥалын да кычкырен: «Господь, мыйым утаре!» 31Иисус тунамак кидшым шуялтен, Петрым руалтен кучен да ойлен: «Шагал ӱшаныше! Молан тый кокыте шонаш тӱҥальыч?» 32Пушыш шичмекышт, мардеж чарнен. 33Пушышто шинчыше-влак лишемыныт, Иисус ончылно вуйым савеныт да Тудлан каласеныт: «Тый чынжымак Юмын Эрге улат».

34Теҥызым вончымеке, Геннисарет кундемыш толыныт. 35Тудо верыште илыше-влак, Иисусым палымеке, чыла лишыл верлашке уверым колтеныт, да Тудын деке чыла черле-влакым конденыт. 36Нуно Иисусын вургем урвалтыжым гына тӱкалташ йодыныт, да кӧ тӱкнен, паремын.

Currently Selected:

Мф 14: УС

Highlight

Copy