Мф 12

12 ГЛАВА

1-8 Христос да шуматкече. 9-14 Кошкышо кидан айдеме. 15-21 Ойырен налме тарзе. 22-32 Иисус ден веельзевул. 33-37 Пушеҥге да тудын саскаже. 38-42 Палым ончыкташ йодмаш. 43-45 Осал шӱлышын пӧртылмыжӧ. 46-50 Иисусын аваже да иза-шольыжо-влак.

1Тиде жапыште Иисус икана шурно пасу гоч шуматкечын каен. Тунемшыж-влак шуженыт, сандене шурно парчам кӱраш да кочкаш тӱҥалыныт. 2Фарисей-влак тидым ужыныт да Иисуслан каласеныт: «Теве, шуматкечын мом ышташ чарыме, тунемшет-влак тудым ыштат». 3Иисус нунылан вашештен: «Пеленже лийше-влак дене пырля шужымеке, Давид мом ыштыме нерген те лудын огыдал мо? 4Давид Юмын пӧртыш пурен да нунын дене пырля надыр киндым кочкын. Тиде киндым Давидланат, еҥже-влакланат кочкаш ок лий улмаш, тидыжым иерей-влак веле ыштен кертыныт. 5Але законышто лудын огыдал: иерей-влак шуматкече еда храмыште шуматкече законым пудыртат гынат, тиде титаклан ок шотлалт. 6Но тыланда каласем: тыште храм деч Кугурак шога. 7”Надырым огыл, а чаманымым ужмем шуэш” манын возымым те умыледа ыле гын, титакдыме-влакым титаканыш огыда лук ыле.#12:7 Ос 6:6. 8Вет Айдеме Эрге шуматкечыланат Оза».

9Тушечын кораҥмеке, Иисус нунын синагогышкышт пурен. 10Тушто ик еҥын пел кидше кошкышо улмаш. Титаклаш амалым кычалын, Иисус деч йодыныт: «Шуматкечын черлым паремдаш лиеш мо?» 11Иисус нунылан каласен: «Тендан кокла гыч иктаж-кӧн ик шорыкшо уло да шуматкечын шорыкшо вынемыш пурен кая гын, але ок лук? 12Айдеме шорык деч мыняр пачаш шерге! Тыгеже, шуматкечын порым ышташ лиеш». 13Вара черле еҥлан ойлен: «Кидетым шуялте». Тудыжо шуялтен, кидше тӧрланен да весыж гаяк таза лийын. 14Фарисей-влак лектыныт да Иисусым кузе пушташ манын каҥашаш тӱҥалыныт.

Но Иисус тидын нерген пален налын да тушечын каен. 15Почешыже шуко калык миен, Тудо чылам паремден, 16но Шкенжын нерген еҥ ончылно каласкалаш чарен. 17Тыге Исаия пророк гоч каласыме шомак шукталтын. Тудо ойлен:

18«Теве Мыйын ойырен налме Шочшем, Мыйын Йӧратымем,

Тудын дене Мыйын поро кумылем.

Мый Тудын ӱмбаке Шӱлышем пыштем,

да Тудо порын судитлымем калык-влаклан увертара.

19Тудо ок ӱчаше, ок кычкыре,

йӱкшым уремлаште нигӧ ок кол.

20Порын судитлымым сеҥымашке лукмешке,

тодылалтше омыжым ок пудырто,

эҥын кийыше йытын рӱдым ок йӧртӧ.

21Калык-влак Тудын лӱмжылан ӱшаным пыштат».#12:18-21 Ис 42:1-4.

22Тунам ия кучыман сокыр да йылмыдыме еҥым Иисус деке вӱден конденыт. Иисус тудым паремден, тиде еҥ ынде мутланенат, ужынат кертын. 23Уло калык чот ӧрын да ойлен: «Паремдышыже Давидын Эргыже огыл дыр?» 24Фарисей-влак тидым колынытат, каласеныт: «Тудо ия-влакым вес семын огыл, а веельзевулын, ия тӧран, вийже дене поктен луктеш».

25Но Иисус нунын шонымыштым пален да ойлен: «Кеч-могай кугыжаныш кӧргыштӧ шке коклаштышт сар тӱҥалеш гын, тудо пустаҥеш, да кеч-могай олаште але суртышто шелалтмаш лиеш гын, шоген ок сеҥе. 26А сатана сатанам поктен луктеш гын, тудо шке ваштарешыже шогалын, тыгеже кузе тудын кугыжанышыже шоген кертеш? 27Мый иям веельзевулын вийже дене поктен луктам гын, тендан эргыда-влак кӧн вийже дене поктен луктыт? Сандене нуно тендам судитлыше лийыт. 28А Мый Юмын Шӱлыш дене ия-влакым поктен луктам гын, тыгеже Юмын Кугыжаныш тендан деке ынде шуын.

29Виян еҥым ондак пидын пыштыде, иктаж-кӧ кузе тудын суртышкыжо пурен да погыжым аген кертеш? Пидын пыштымеке веле суртшым агаш лиеш. 30Кӧ Мый денем пырля огыл, тудо – Мыйын ваштареш, да кӧ Мый денем пырля ок пого, тудо шалатылеш. 31Сандене тыланда ойлем: айдемын кеч-могай языкше да мыскылымыже касаралтеш, но Святой Шӱлышым мыскылымаш ок касаралт. 32Кӧ Айдеме Эрге ваштареш мутым ойла, тудлан тиде касаралтеш, но кӧ Святой Шӱлыш ваштареш ойла гын, кызытсе курымыштат, шушаш курымыштат титакше ок касаралт.

33Але пушеҥгыжымат, саскажымат сайлан шотлыза, але пушеҥгымат, саскажымат йӧрдымылан шотлыза, вет пушеҥгым саскаж дене палат. 34Шем кишкын шочшыж-влак! Тендан мутда кузе поро лийын кертеш, кунам те шкеже осал улыда? Вет айдемын шӱмжӧ мо дене темын, тудак йылмыж гыч лектеш. 35Поро еҥ шӱм поянлыкше гыч порым луктеш, а осал еҥ шӱм осалже гыч осалым луктеш. 36Тыланда ойлем: арам каласыме кажне мутыштлан еҥ-влак суд кечын мутым кучаш тӱҥалыт. 37Мутетлан кӧра тый чыныш лектат, да мутетлан кӧрак титаканыш лектат».

38Тунам закон туныктышо ден фарисей-влак кокла гыч икмынярышт каласеныт: «Туныктышо! Ме палдарыше палым ончыктыметым ужнена». 39Но Тудо вашештен: «Юмо деч кораҥше да осал тукым палдарыше палым кычалеш, но Иона пророкын палыж деч моло тудлан ок пуалт. 40Кузе Иона китын кӧргыштыжӧ кум кече да кум йӱд лийын, тугак Айдеме Эргат кум кече да кум йӱд мланде кӧргыштӧ лиеш. 41Ниневий олаште илыше-влак суд кечын тиде тукым дене пырля кынелыт да тудым титаканыш луктыт. Вет Ионан шижтарен ойлымыжым колмеке, нуно, языкыштым касарыктен, Юмо деке савырненыт. А тыште Иона деч Кугурак шога.#12:40-41 Иона 2:1, 3:5. 42Кечывалвел ӱдырамаш кугыжа суд кечын тиде тукым дене пырля кынелеш да тудым титаканыш луктеш, вет тудо Соломонын ушан мутшым колышташ мландын вес мучашыж гыч толын, а тыште Соломон деч Кугурак шога.#12:42 3 Цар 10:1-10.

43Айдеме кӧргӧ гыч лекмеке, каналташ верым кычалын, осал шӱлыш вӱддымӧ ир мландыште коштеш, но ок му. 44Тунам ойла: ”Кудалтен кодымо верышке мӧҥгеш пӧртылам”. Пӧртылмекыже ужеш: илыме верже яра, арун ӱштын да эрыктен шындыме. 45Вара кая, пеленже шкеж деч осал шым шӱлышым налеш, да чыланат айдемын кӧргыш илаш пурат. Тудлан мучаште тӱҥалтыш годсо деч ударак лиеш. Тиде осал тукым денат тыгак лиеш».

46Иисус калыклан але ойлен пытарен огыл, тиде жапыште Аваже да изаж-влак тӱжвалне шогеныт да Тудын дене кутырынешт улмаш. 47Иктыже Иисуслан каласен: «Ават ден изат-влак тӱнӧ шогат, нуно Тый денет мутланынешт». 48Ойлышылан Иисус вашештен: «Кӧ Мыйын авам да кӧ Мыйын иза-шольым улыт?» 49Вара кидше дене тунемшыж-влакым ончыктен да ойлен: «Теве Мыйын авам ден иза-шольым-влак. 50Кӧ Пылпомышсо Ачамын эрыкшым#12:50 Эрык – воля, желание. шукта, тудо Мыйын иза-шольым, ака-шӱжарем да авам».

Currently Selected:

Мф 12: УС

Highlight

Copy