Mark 11
11
Yesu n'ayooso Serusalem
(Májiye 21.1-11; Luk 19.28-40; Saaŋ 12.12-19)
1Yesu n'eriboora yeene ni kaja ayak abin áami kalohena Serusalem. H'aamo hu bokondu inde kikinu kite Befase ni Betani, kaagoroor ni hirij hite *Ñúolifiye ñu, n'aboñ bákasuba tu boko hágila. 2N'aaniin:
—Arija ti hikinu hondu heeemo hii hágilauun. Af'ariyooso te ho kep, aruun kajuku ambam t'akobee, abe an ámusut birabo te o. Árijendino, abe n'aribin ne o. 3Ake af'ákandijenuun aanuun: «Iŋi naŋ n'árihin fii?» arieno: «Anahaan u asawulasawulo ambam u; memee n'aŋ'ábatikanno.»
4Ni kaja. Kareeŋ, ni kajuk ambam t'akobee tíyaŋ t'éhuhu i kaagoroor ni karuŋ. Káyemia ti kájendin koone, 5bakaake kéeyemie toko ni kaaniin:
—Héyi! Áriijendin ambam ondu iŋi naŋ?
6Ni kásafiniin naane Yesu asokiin i. Bákayin ku ni kawasiin keeja. 7Ni kaja n'ambam u bija ti Yesu. Kareeŋ, ni kanuutan bífartuus booniin kanaŋ t'ambam u, abe Yesu n'arabo te o. 8Bakaake úkaan yooŋ ni katan bífartuus booniin ti bítim bu, bakaaku buŋoy beeleebejane bi káhinina tu bujal bu#11.8 Iyu e Esuwif i ifi káhin kane an ómbokun aja ti hikinu hooniin.. 9Kéeyemie ku hágila Yesu, ni kéeyemie ku inde hiñaawio n'iŋi kataŋk t'etiir kaane:
«Atambatun ánikanee#11.9 Atambatun ánikanee: kirim kondu kasokasok ko ti *kiarameyeŋ. Kaanaan: «Osana».!
Awe eebin ii tu huruwu hite Atemit a̱ja á̱soniyanee#11.9 Élookiin i 118.25-26.!
10Atambatun ásoniyan yooŋ *Jáyi ju jeebin ju,
Jáyi naane jite ju faaf úne *Dafit!
Atambatun asalee t'etiir bufor bu!»
11Yesu areeŋa Serusalem, n'ayooso *t'Enuuf ite Atambatun, abe n'áheelinool toko areyi fe. Bare makamu to ti bija kajonu, n'anuut toko abe n'aja Betani n'eriboora i sumoŋu ni bákasuba ku.
Yesu ni nífigiye neebukut nu
(Májiye 21.18-19)
12Tifiit, Yesu ti kanuutu ku Betani n'eriboora yeene, bujoñjol nu bujoko. 13N'aŋandan *nífigiye káahoojin bib nu búsuus. N'aja kaanuku man n'ajuk toko miriyaay. Bare h'areeŋe hu no, búsuus taŋ b'ajuke fu, ábuki ñífigiye ñu húbukin hite te ño ti hireeŋoorut. 14Náami eeene nífigiye nu:
—An yooŋ aroŋut kateŋu ti miriyaay múuwe!
Eriboora yeene ni kajam.
Yesu n'ákutoor éjulaata i t'Enuuf ite Atambatun
(Májiye 21.12-17; Luk 19.45-48; Saaŋ 2.13-22)
15Yesu n'eriboora yeene ni kareeŋ Serusalem. N'ayooso ti haanas hu *t'Enuuf ite Atambatun, abe n'áyemi toko ti kákutoor éjulaata i, ni kiŋki kabin hujoohen hu. N'ajok sitaabul site etita yite sírirem su#11.15 etita yite sírirem su: kóŋkeyin, kiŋki kabin *t'Enuuf ite Atambatun káhinu kite *wusarah wu iŋi katit sírirem sooniin ni site su t'Enuuf ite Atambatun, ábuki ne so taŋ ni káyinie fu kajoohen sunuk site wusarah wu. áfiiten, ni siriikeey site ejoohena yite kúleebaan kite *wusarah wu. 16Awasut yooŋ an eeyite dike doon eeŋaas t'Enuuf ite Atambatun. 17N'aŋ'aliikeniin aaniin:
—Eeman busokeesok ti *Míkiñjin mu kaanuku Atambatun aane: «Enuuf íima kaaniee *báalawum bija ti bakate ku t'etaam ye fe#11.17 Esayi 56.7.»? Bare aruun árihina yo báanuuseima bite búkuw. #11.17 Seremi 7.11.
18Eseef ite esaraha i, *n'émuse yite Eluwa yite Moyis ni kajam beebaje bu. Náami keeŋes naane kaja i káhinu kaanuku man ni kayool Yesu. Múniyo, kákoleyokoleyi, ábuki kirim koone uŋu kugor hahooja hu dómbokun.
19To ti bija kábaani ku, Yesu n'eriboora yeene ni kanuut hikinu hu.
Nífigiye nu neesaye nu
(Májiye 21.20-22)
20Tifiit nu bújom bu, Yesu ti bija bu n'eriboora yeene, ni kajuk *nífigiye nu#11.20 A̱juk Mark 11.12-14.. No káasayin kaŋ, bija yooŋ ti kíjiŋ ku. 21Piyeer n'ábaŋino naane bije i, n'aane Yesu:
—Ámuse u, á̱heelin fee ti nífigiye n'a̱ñaane nu, nútumba nisay kaŋ.
22Yesu n'aaniin:
—Áriyilen t'Atambatun! 23Iisokuun bifeeneŋ bu: an af'aane hirij hondu: «A̱nuut diyu a̱aja á̱tuuso káajuŋeey», abe áhinut sihel súsuba, bare n'áyilen kaanuku bo kabaju, akina kawuniee bo. 24Iŋ'ite ho h'eenuun fu: af'áriyemi ti kalawu Atambatun dike doon, áriyilen kaanuku aribaja do kep, n'aŋ'ariwunee do. 25-26Abe n'arisiiŋo kaanuku ariilaw, bakan keetine ku t'aruun fe ariboŋketiin, man Faafuun eeemo u t'etiir n'aboŋketuun yooŋ wuhoofoor woonuun.#11.25-26 Wike wuwiit wútiyar wu uŋu wúwutiyen eferse yende: 26Bare afut'aŋ'ariboŋket bakaaku, Atambatun, Faafuun eeemo u t'etiir at'aboŋketuun yooŋ wuhoofoor woonuun. A̱juk Májiye 6.15.
Sembe site Yesu, diin tu súnuutina fu?
(Májiye 21.23-27; Luk 20.1-8)
27Yesu n'eriboora yeene ni kasooñ kabatuko bija Serusalem. Áyemia ti kañaahoor ku *t'Enuuf ite Atambatun, eseef ite *esaraha i, *n'émuse yite Eluwa yite Moyis, ni *sifaaf su ni kaja kaŋaaboo. 28Ni kákandijeno kaano:
—Awe á̱tumbe fu á̱yemi aañ ayak á̱hin naane á̱hine i? Aañ yooŋ aani fu a̱bin á̱hin iyu?
29Yesu n'aaniin:
—Íñje yooŋ íikandijenuun bifeeneŋ. Af'árisafinam ajoŋooree, n'iŋ'isokuun aañ aanam fu ibin íhin bondu. 30Aañ aboñe fu Saaŋ *kaboste ku? Man Atambatun, man yooŋ kúŋgowulan ku? Arisokam fee.
31Ni káyemi toko ti báhamin boko kumuumiin iŋi kaanoor:
—Uf'úeno: «Atambatun aboñe fu Saaŋ», n'aŋ'aane úne: «Kame iŋi naŋ n'áriyilenuto fu?» 32N'úfin úeno: «Kúŋgowulan ku…»
(Kákolakoleyi hahooja hu, ábuki ésuk i fe kaanaan múniyo Saaŋ *ayiŋana ite Atambatun.)
33Náami keeene Yesu:
—Uni írimeyie?
Yesu n'aaniin:
—Íñje yooŋ, it'isokuun aañ aanam fu ibin íhin buroon bondu.
Currently Selected:
Mark 11: cwt
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
