Májiye 6

Yesu n'awaare ti naane keebajut ku kawaree i káyokunan

1—Bamb'árihin bite ti bítim bite Atambatun, áriwasiyoor ti káhinu kite te bo tu buhooŋu ésuk i kaanuku keejukuun. Af'aŋ'árihin bo hágilaiin, at'aribaj hisiibanu ti Faafuun eeemo u t'etiir.

2«Af'á̱yemi ti kasarah an eebajut, atum'a̱heñjoor ésuk i kéeheelini, naane ñatuuk ñu ii káhin ti *ñáalawum ñite ñ'úne, nu tu búhuhu bu. Iŋi káhin iyu kaanuku ésuk i keesokorooriin. Iisokuun bifeeneŋ bu: kaheeka keebaj hisiibanu hooniin. 3Bare awe af'á̱yemi ti kasarah keebajut ku, emoŋii yaamay i etum'émeyi doon d'emoŋii yaatos i eemo du ti káhinu, 4man kawunu kondu ni kíyemi kawunu kéenuusee. Abe Faafi aa ajuk bamb'á̱hin béenuusee bu n'aŋ'asiibani.

Yesu n'awaare ti kalawu ku

(Luk 11.2-4)

5—Af'áriyemi ti kalawu, atum'aŋ'árihin naane ñatuuk ñu. Iŋi kámaŋi bisiiŋo keelaw ti *ñáalawum ñite ñ'úne, man yooŋ ti sifiñjan su#6.5 A̱juk yooŋ Luk 18.10-14., t'ésuk i eyino kajukiiin. Iisokuun bifeeneŋ bu: kaheeka keebaj hisiibanu hooniin. 6Bare awe af'á̱maŋi kalawu, a̱yooso t'eŋotu íiwe, a̱feŋk karuŋ ku, abe n'a̱law Faafi eeemo u toko t'ánuusee du. Abe Faafi aa ajuk bamb'á̱hin béenuusee bu n'aŋ'asiibani.

7«Af'áriyemi ti kalawu, atum'arisok kirim keehooje keeñunut naane *kéemeyiit ku Atambatun. Iŋi kaane man akina kájeŋginiin ábuki káhaminahamin afiyee. 8Atum'ariliikool nu boko, ábuki t'arilawoorut yooŋ, Atambatun ámeyia esawula yeenuun. 9Iye a ariware fu kalawu:

“Faaf uni eeemo u t'etiir,

á̱hin ésuk i kéemeyi kaanuku

awe a̱amo fu Atambatun eenabe u;

10á̱hin Jáyi júuwe jeebin;

á̱hin b'á̱maŋie bu beebaj t'etaam ye

naane bibaje i t'etiir.

11A̱wun uni húnakonak fe buñoofo b'irisawulee bu.

12A̱boŋket uni wuhoofoor w'írihine wu,

naane ii iriboŋket yooŋ kiŋki kahoofoor uni.

13Abe atum'a̱was uni iriiñakee ti kaahoofoor,

bare a̱ram uni ti Setani.#6.13 Wike wuwiit uŋu wúwutiyen kirim konde: Ábuki awe a̱kino fu hiraanu jáyi ju, sembe su, ni meejaaŋe mu! Amiin. ”

14«Af'ariboŋket ésuk i kane kahoofooruun, Faafuun eeemo u t'etiir kaboŋketuun yooŋ. 15Bare afut'aŋ'ariboŋket ésuk i kane kahoofooruun, Faafuun at'aboŋketuun yooŋ wuhoofoor woonuun.

Yesu n'awaare ti baawoor bu

16—*Af'ariwoor, atum'áritaañian ñuhooŋuuun naane ñatuuk ñu. Iŋi kákojian ñuhooŋiiin, kéewufoor ésuk i kaanuku bokondu ti baawoor. Iisokuun bifeeneŋ bu: kaheeka keebaj hisiibanu hooniin. 17Bare awe af'a̱woor, á̱buyino, abe n'a̱feñe hikawi, 18an atum'abin ámeyi kaanuku aw'ondu ti baawoor, kane arko taŋ Atambatun Faafi eeemo u toko t'ánuusee du. Abe Faafi aa ajuk bamb'á̱hin béenuusee bu n'aŋ'asiibani.

Ebaj i ti Jáyi jite Atambatun

(Luk 12.33-34)

19—Atum'arikuukan ebaj t'etaam ye, t'aamo du busobit bu uŋu búbuj, n'esem, abe búkuw bu iŋi káfuw kiñaan ku kéekuwat. 20Ho húkoyie n'arikuukan ebaj t'etiir, t'aamo du busobit bu biyinaat kábuju, ésemaariit yooŋ, abe búkuw bu kayinaat káfuwu kiñaan ku kéekuwat. 21Ábuki t'ebaj íiwe eemo du, toko yooŋ t'ehel íiwe eja fu káyemi.

Ñíkin ñu ñeemo fu sijaaŋana site eni i

(Luk 11.34-36)

22—Díkin aamo fu ejaaŋana yite eni i. Arko ñíkini ñijakajak, enii ereyi fe n'eŋ'éyemi ti meejaaŋe. 23Bare arko ñíkini ñijakut, enii ereyi fe n'eŋ'éyemi t'ébaani. Arko meejaaŋe munooto t'awe, t'áami ébaani barebare, efin eyak buŋ kahahu ébaani!

Arijifan: man Atambatun, man yooŋ sírirem

(Luk 16.13)

24—Abajut an éeyinie kájeŋgin kunahaan bákasuba y'afeeneŋ. O kahaŋu kámaŋi ake, o yooŋ kahaŋu kájeŋgin ake. Ariyinaat kajoku t'Atambatun, abe n'arijok yooŋ ti sírirem.

Kayakar ku t'Atambatun

(Luk 12.22-31)

25—Iŋ'ite ho h'eenuun fu: atum'ariyinoor uŋu buroŋ bu ni siniuun. Atum'ariyinoor uŋu doon d'ariware du buñoofo nu búhujo, nu wañ w'ariware wu bisiimo. Buroŋ bu biliikutee nu buñoofo bu, eni i yooŋ eliikutee nu wañ wu, bare me? 26Arijuk bilele bu: búyoosenaariit, búhotukanaariit, bínaŋaariit yooŋ ti ñíhindaa doon dite buhoofooro. Bare Faafuun eeemo u t'etiir aŋ'ákuuman bo! Ariliikeeliik ne bo? 27Aañ t'aruun ayino fu, naane aŋ'ayak kayinoor iŋ'ite te bo fe, káwutiyen ti diŋgiŋgilis kunak koone kite buroŋ bu?

28«Náami iŋi naŋ n'af'ariyinoor iŋi wañ w'ariware wu bisiimo? Arijondoman ti naane kibandaroofa ku uu kúlooñin: kúrokaariit, kíkiikaariit yooŋ wañ. 29Bare íñje isok fee n'aruun: humuum hite áyi u *Salomoŋ, n'ebaj yeene yómbokun i fe#6.29 A̱juk 1 Bákayi ku 10.4-7., ámusut bisiimo áwari areeŋ hifeeneŋ ti kibandaroofa ku. 30Atambatun af'asiim ii úmiye mahos meeemo mu ti kitaaŋaat ku, abe kuwaatu mo kásufiee. Buŋ b'atuf'asiimuun ahaŋ diyu ariike, aruun kumuumuun? Háayee, káyilen koonuun kítetia teereŋ! 31Náami ariraan biyinoor bu uŋu buñoofo boonuun, nu búhujo boonuun, nu wañ w'ariware wu bisiimo. 32Ábuki *kéemeyiit ku Atambatun ifi kaŋes buroon bondu bireyi fe. Bare aruun aribajabaj Faaf eeemo t'etiir, éemeyie kaanuku arisawulasawulo bo. 33Arijab ariŋes *Jáyi jite Atambatun ni b'ákandijene bu, abe n'aŋ'awunuun buroon bondu fe áriiwutiyen. 34Náami atum'ariyinoor iŋ'ite hu kuwaatu. Kuwaatu enoŋk yeeyinoor iŋ'ite te yo. Hunak fe ni bakola bite te ho.

Currently Selected:

Májiye 6: cwt

Highlight

Copy