Májiye 28

Yesu n'áritein t'eket i

(Mark 16.1-10; Luk 24.1-12; Saaŋ 20.1-10)

1Ti dimaas i, hunak héeseina hu *t'erimaas ite Esuwif i, Mari ite u Magdala, ni Mari aau#28.1 A̱juk Májiye 27.56. ni kasoŋk kániyo, abe ni kaja kajuku élum ite Yesu. 2Kaja kajuku, náami etaam i eyoŋoŋanooraa ni sembe, abe ake amalaka ite Atemit n'áwanein, ánuutin tu bufor bu. N'aja t'élum i; n'arindiŋooran ejuju yómbokun i yéefibe i karuŋ kite élum i, abe n'ariiko te yo. 3Átumb asilan kajuku n'aŋ'a̱ane etiir i esibe, abe wañ woone aŋ'afañj daŋ. 4Esulaan i n'iŋi kábit toko, ekoloowe taŋ, abe ni kasooñ kanokoor ni bakan keekete. 5Bare amalaka u n'aane haare hu:

—Atum'árikoleyi. Ímoomi kaanuku Yesu eeyoolee u *t'ekuruwa i a ariŋes fii. 6Anooto diye, ábuki aritanee t'eket i naane asoke i. Aribin ariijuk t'ehunuŋ yeene enaŋee du yéeni. 7Hahiyu arimoken ariija ariene eriboora yeene: «Aritanee t'eket i, abe ágilanuun toko bija *Gálile. Bo b'arija fu kajukio.» Bonde b'ibaje fu yéeni bite kasokuuun.

8Haare hu ni kamoken keenuut t'élum i keeja. Kátumb kákoleyi naane, bare kikawiin nu kutoof yooŋ. Ni katey kaanuku keeja keesok bo eriboora yeene. 9Kaja kajuku, Yesu n'abin kéefimboor abe n'aane:

—Íhamin n'aruun!

Ni katof kaloho, keegor wuwoto abe ni kásukaayo. 10Náami Yesu eeeniin:

—Atum'árikoleyi. Arija ariene eriboora íima kaja Gálile. Bo bi kayakam fu kajuku.

Esulaan i ni kasok beebaje bu

11Hi haare hu káyemie hu ti bija bu t'eriboora i, bakaake t'esulaan i kéeyemie ku ti kajukar kite élum i ni kábatikein ti hikinu hu, abe ni kasok eseef ite *esaraha i beebaje bu fe. 12Náami eseef ite esaraha i ni *sifaaf su ni kakuukanooro. Kajamoora kahaban, ni kawun esulaan i sírirem seefame-fam 13abe ni kaaniin:

—Bonde b'arija fu kasoku ésuk i; aruun kaaniiin eriboora yeene kabinabin nu huhuk hu, abe ni kákuwat ehunuŋ yeene aruun t'ariŋote. 14Abe águwernoor u af'ajam bo, n'iŋ'iribuutoor ne o kaanuku atum'aribaj sílaam.

15Esulaan i ni kásik sírirem su, abe ni káhin naane kasokee i. Náami báhamin bondu ni bijamo t'Esuwif i bija yooŋ tu hunak hite úmiye.

Yesu n'áŋaasin t'eriboora yeene

(Mark 16.14-18; Luk 24.36-49; Saaŋ 20.19-23; Epotor i 1.6-8)

16Eriboora i sumoŋu n'afeeneŋ u ni kaja *Gálile ti hirij hu hi Yesu asokiin hu. 17Hi kajuko hu toko, ni kásukaayo. Bare bakaake tu boko kajeeŋajeeŋ kaanuku múniyo akina. 18Yesu n'átofin abe n'aaniin:

—Iwuneewun sembe tu buroon bu fe t'etiir bufor bu ni t'etaam i. 19Náami arija tánotan fe t'etaam ye, abe n'árihin ésuk i kéeyemi eriboora íima#28.19 A̱juk yooŋ Epotor i 1.8.: *aribosteiin tu huruwu hite Faaf u, n'Añi u, nu Búwejet Beenabe bu, 20abe n'ariliikeniin kéehin buroon b'isokuun bu fe. Abe n'árimeyi bonde: íñje káyemi n'aruun ko kireyi fe, ayak abin áami yooŋ etaam i emoosena.

Currently Selected:

Májiye 28: cwt

Highlight

Copy