Luk 9
9
Yesu n'aboñ eriboora i sumoŋu ni bákasuba ku
(Májiye 10.5-15; Mark 6.7-13)
1Yesu n'áruwin eriboora i sumoŋu ni bákasuba ku, abe n'awuniin sembe site kákutoor saama náami erab, ni karitan yooŋ kéesomute ku. 2Ahaban, n'aboñiin kawaare mite *Jáyi jite Atambatun, ni káhinu kéesomute ku kéekoyi. 3Bala kaja, n'aaniin:
—Atum'arija nu doon fe: hútaŋkariiit, hísaakosiit, dóoniit dite buñoofo, síriremiit, abe atum'arija yooŋ nu wújufa wúsuba. 4T'arija du kawanan, atum'arikañj t'ake bija naane ariyak i kanuutu ti hikinu hu. 5T'arije fe, abe ni kafin kateñekouun, arihaŋk hafor heeemo hu tu wuwotuun#9.5 Kahaŋku hafor hite tu wuwot wu aamo fu ariyihoora, aŋkut arikol ni bakate ku ti hikinu hondu keeteñekee ku hirim heesoke hu iŋ'ite hu Yesu., abe n'arinuut ti hikinu hooniin, keejuk ni ñíkiniin kaanuku Atambatun ondu ti kanahaniin.
6Eriboora i ni kaja. Iŋi kanuut ti hikinu heehe, ni kaja ti hike. Tánotan ti kaje fe, iŋi kawaare Hirim Heetoofe hu, abe ni karitan yooŋ kéesomute ku.
Erod ajokut tuf
(Májiye 14.1-12; Mark 6.14-29)
7*Erod, áyi ite *Gálile n'ajam bi Yesu n'eriboora yeene bimbi káhin fe. Bare ajokut tuf, ábuki bakaake iŋi kaane:
—Sambatiis fu áriteina fii t'eket i!
8Bakaaku ni kaane:
—*Eli ásooñina fii!
Bakaaku ni kaane:
—Ake *t'eyiŋana yite Atambatun bakate ku kóŋkeyin áriteina fii t'eket i!
9Bare Erod n'aŋ'afin aane:
—An ondu Sáaŋiit, ábuki íñje inoŋke fu iiboñ keefaran hikawo. Náami an ondu ii ijam ii moone mu, aañ fíya?
Náami eeŋes kaanuku man n'ajuk Yesu.
Yesu n'awun háyine kaamo súñjune hutok keeñoofo
(Májiye 14.13-21; Mark 6.30-44; Saaŋ 6.1-14)
10*Epotor i ni kábatikein, abe ni kasok Yesu bi káhine bu fe. Yesu n'aaniin kasao ti hiñaawu, abe n'aja nu boko t'an anooto, inde eke ésuk iŋi kaane yo Betsayida. 11Bare bakan keehooje ni kajam bo, ni kanabano. Yesu n'áhamin nu boko. N'asokiin mite *Jáyi jite Atambatun, abe n'aritan kéesomute ku.
12To ti bija búlumo bu, eriboora i sumoŋu ni bákasuba ku ni kátofin kálohin Yesu abe ni kaano:
—An akinut beebe. A̱ane hahooja hondu kabatuko, man ni kaja tu músuk mu, ni mikinu meeemo mu nere, kéeyini kabaju doon dite buñoofo, ni ti kaware du kaŋotu.
13Bare Yesu n'aaniin:
—Ariwuniin keeñoofo aruun kumuumuun!
Ni kaano:
—Kumburu keemo hutok taŋ k'iribaje fu, ni misaan músuba. Butum kaanuku iriija írijoohenn doon dite buñoofo bija ti hahooja hondu fe?
14(Múniyo háyine hu barebare kareeŋareeŋ súñjune hutok.) Yesu n'aane eriboora yeene:
—Árihiniin keeriiko, diye bakan bákasuba nu sumoŋu, diye bakan bákasuba nu sumoŋu, ayak abin áami kahabanaa.
15Eriboora i ni káhin naane Yesu asokiin i; ni kariikan ésuk i kareyi fe. 16Yesu n'ayit kumburu ku hutok hu ni misaan músuba mu, abe n'áheelin t'etiir. N'aane Atambatun eyeehen. Ahaban, n'afiitar kumburu ku ni misaan mu, abe n'asaan eriboora yeene aaniin káruboor hahooja hu. 17Kareyi fe ni kateŋ kayak kabir bib. Eriboora i ni kahoojan wutekel sumoŋu nu wúsuba ni mifiit meeŋeñene mu#9.17 A̱juk yooŋ 2 Bákayi ku 4.42-44..
Piyeer n'asok kaanuku Yesu aamo fu Afakana u
(Májiye 16.13-19; Mark 8.27-31)
18Hike hunak, Yesu n'áyemi ti kalawu unoono, abe eriboora yeene naane iyu. N'aaniin:
—Kame ésuk i, iŋi kaane íñj'eemo fu aañ?
19Ni kaano:
—Bakaake kaane awe a̱amo fu Sambatiis, bakaaku ni kaane *Eli, bakaaku n'iŋi kafin kaane ake *t'eyiŋana yite Atambatun bakate ku kóŋkeyin áriteina fii t'eket i.
20Yesu n'aaniin:
—Náami aruun, aŋ'ariene íñj'eemo fu aañ?
Piyeer n'ásafino aano:
—Awe a̱amo fu *Afakana u a Atambatun aane u o káboñina.
21Yesu n'áhaminiin toko ayan, aaniin itim kasok bo an. 22Abe n'áwutiyen aaniin:
—*Añi ute Húŋgowulan hu awarawar kajuku sílaam sómbokun. *Sifaaf su biteñekoo, n'eseef ite *esaraha i, *n'émuse yite Eluwa yite Moyis. Boko káhinu ésuk i keeyoolo, bare hunak híhaajiyan hu, n'aŋ'aritanee t'eket i.
Buŋ b'an aware fu káhinu eesa Yesu ti hiñaawu
(Májiye 16.24-28; Mark 8.34-9.1)
23Ahaban, Yesu n'aane kéeyemie ku toko kareyi:
—An af'ámaŋi kariboor n'íñje, atum'aŋk'ákini buroŋ boone. Akando *ekuruwa yeene#9.23 Bikando bite ekuruwa beemo fu an u afaraa kajuku sílaam, man yooŋ kaketu iŋ'ite hu Yesu. húnakonak fe éeseinam ti hiñaawu. 24Ábuki an af'ámaŋi kafakan síhiinio, o bútowuto. An n'afin aket uŋu húuma hu, o karoŋu. 25An af'aja ayak abin áami ákinia ebaj ite t'etaam ye fe, abe abajut buroŋ bu#9.25 buroŋ bu: diye, buroŋ béehabanaariit bu., man yooŋ n'ábujooro, yo fíya káñjeriŋo? Aaa! 26Ábuki ake af'aane ífuñinanafuñinani te o, íñje ni kirim kúuma, *Añi ute Húŋgowulan hu yooŋ kaanu áfuñinanafuñinani te o kane aja abin ti kániku koone, ni kite ku Faafo, ni kite k'emalaka i keenabe ku. 27Iisokuun bifeeneŋ bu: bakaake ti keeemo kee diye iti kaket ti kajukut Atambatun n'asiiŋan Jáyi joone.
Buhooŋu bite Yesu nu buhosanooro
(Májiye 17.1-8; Mark 9.2-8)
28Hi Yesu asoke hii bondu ahaban, abaj kunak hutok ni kíhaaji, n'ariboor ni Piyeer, ni Saaŋ, ni Saak ti hike hirij kaanuku eelaw. 29Ondu ti kalawu ku, buhooŋio nu buhosanooro, abe wañ woone nu wútumb wufañj wusooñen n'uŋu wusilan#9.29 A̱juk yooŋ 2 Piyeer 1.16-18.. 30Náami háyine bákasuba bokondu, ti báhamin ne o: kame fu *Moyis *n'Eli#9.30 *Moyis a Atambatun asaane fu Eluwa i eebin eesaan yo bakate ku *Israyel. *Eli afine fu ajokee naane ayiŋana ómbombokun ite u Atambatun. Bákasuba kondu kaamo fu butum *kaajamoor kítiyar ku k'Atambatun asiiŋane ku t'etuto akina ni bakan koone., 31abe Atambatun n'ánikaniin naane. Kámoomi ti báhamin ni Yesu ti naane aja i kaketu Serusalem, t'áami ahabana béekinineŋe bu n'abin. 32Piyeer ni bakano t'ésubaiin káaŋotin his. Bare ni kániyo, ni kajuk naane Yesu asilane i, abe háyine hu t'ésubaiin ti kasiiŋee kaagoroor ne o#9.32 A̱juk yooŋ 2 Piyeer 1.16-18.. 33Háyine hondu káyemia ti kawasoor ku ni Yesu, Piyeer n'aano:
—Anahaan u, ajakeejak naane iriemo i diye. Iriirok múwuureey míhaaji, ake bija t'awe, ake bija tu Moyis, ake bija t'Eli.
(Áhaminahamin t'ayinoorut.) 34Ondu ti báhamin bu, náami kaafor ni kíŋaasin, abe ni kímifeniin. Eriboora i ni kákoleyi dómbokun hi kaafor ku kúkumbalooliin hu. 35Kaaji ni kíhaminn ti kaafor ku iŋi keene:
—An onde aamo fu Añi úuma i ijifane u. Arijamatano jak#9.35 A̱juk yooŋ Esayi 42.1; Luk 3.22.!
36Hi kaaji ku kíhamine hii kihaban, eriboora i ni kajuk, náami Yesu unoono. Kóŋkeyin, ni kakoowan kem, kasokut mayet an doon di kajuke du.
Yesu n'ákutoor erab t'ake añi
(Májiye 17.14-18; Mark 9.14-27)
37Tifiit, Yesu n'eriboora i bákahaaji ku káwaneino hirij hu, bakan keehooje ni kaja kéefimboor. 38Ake ániine n'áhaminn t'etiir toko ti hahooja hu aane:
—Ámuse u, waasi, a̱yubiyen añi úuma. O i ibaje fu unoono taŋ. 39Erab eŋ'ejoko, abe n'eŋ'éhino eekileen toko-toko. Yo kayoŋoŋano ni sembe, abe n'eŋ'éhin yooŋ butumo béefuj. Yo káhihinooro, abe bala ewasano, burok. 40Íwasiyanawasiyan eriboora íiwe kaanuku man ni kákutoor yo, bare kayinaat.
41Yesu n'aane:
—Áribajaatia teereŋ káyilen! Ariyaŋgayaŋg faa kikaw, aruun bakate ku hahiye! Bija kaakaŋ n'ija fu iŋki biriiko n'aruun? Íñj'endu ti kajoku hikawam kep bija kaakaŋ?
N'aane faaf ite añi u:
—A̱bin diye n'añi úuwe.
42Añi u ondu ti kátofina ku, erab i n'ekaloo t'etaam, abe n'eyoŋoŋano ni sembe. Bare Yesu n'akamoor t'erab i; n'áhin añi u éekoyi, abe n'abatikano faafo. 43Kareyi fe ni kajahale naane ti sembe sondu seehahe sii site s'Atambatun.
Yesu n'asooñ áhamin iŋ'ite eket yeene
(Májiye 17.22-23; Mark 9.30-32)
Náami huruw fe ondu toko káaroŋin n'ajahale tu buroon bi Yesu bamb'áhin. Akina n'afin aane eriboora yeene:
44—Arinaŋ ti kikawuun b'ija bee kasokuuun: *Añi ute Húŋgowulan hu kásikiee asaanee ésuk i.
45Bare eriboora i kajokut naŋ n'ámaŋie fu kasoku. Atambatun ánuusiinnuus naane hirim hondu hije i kaanuku itim kánandin ho, abe yooŋ kákolakoleyi kákandijen Yesu.
Aañ aamo fu átiyar u?
(Májiye 18.1-5; Mark 9.33-37)
46Eriboora yite Yesu ni káyemi ti síjeeŋoor kaanuku kéemeyi aañ tu boko aamo fu átiyar u, butum eehaŋe u bakano. 47Yesu n'ámeyi beeemo bu ti kikawiin. Náami éejokin ake añi, eesiiŋano kaagoroor ne o 48abe n'aaniin:
—An af'ajok áwariee añi naane onde uŋu húuma hu, íñje humuumam a ajoke fu áwariee. Abe an af'ajokam áwariee, ajoka yooŋ áwariee an éeboñinam u. Ábuki an eeemo u biraanu boonuun tej, an ondu aamo fu átiyar u.
An eeteñekeituun, an ondu aruun
(Mark 9.38-40)
49Náami Saaŋ eeene Yesu:
—Ámuse u, irijukajuk ake ániine aŋ'ákutoor sirab tu huruwu húuwe. N'irieno atum'aŋk'áhin bondu, ábuki eriboor úneiit.
50Bare Yesu n'aano:
—Atum'arieno awas, ábuki an eeteñekeituun, an ondu aruun.
Bakate t'eke ésuk ite Samari ni kateñeko kajoku Yesu áwariee
51H'aamo hu hunak h'Atambatun aware hu kayitu Yesu t'etiir bufor bu hulohena, Yesu n'áhabanein aane eeja Serusalem. 52N'aboñ bakan kéegilano toko ti hike hikinu hite *Samari kaanuku keeŋeso t'aware kaŋotu. 53Bare bakate ku bo ni kateñeko kaanuku eeriiko tu boko, kaane ábuki Serusalem b'aane fu eeja#9.53 Esuwif i kafiyeit kajamoor ni bakate ku *Samari huta hu kóyin sifaaf. Náami bakate ku Samari iŋi kateñeko Esuwif i bakate ku *Gálile kéeŋaasin tu boko keeja Serusalem kalawu Atambatun.. 54H'eriboora i Saak ni Saaŋ kajame hu bondu, ni kaano:
—Anahaan u, á̱maŋamaŋi irilaw Atambatun éewanann sineemak éesufiin#9.54 A̱juk yooŋ 2 Bákayi ku 1.10-12.?
55Yesu n'áwuŋgan nu booniin abe n'akamoor tu boko#9.55 Wike wuwiit wútiyar wu uŋu wúwutiyen kirim konde: N'aaniin: «Árimeyiit biin búwejet beemo fu t'aruun. Ábuki Añi ute Húŋgowulan hu abinut kátowutan ésuk i, bare kafakaniin k'abine fu.» . 56Abe kareyi fe ni kaja ti hike hikinu.
Kéemaŋie ku kasayi Yesu ti hiñaawu
(Májiye 8.19-22)
57Yesu ondu ti bija bu n'eriboora yeene, ake ániine n'aano:
—Íñje káseini ti hiñaawu t'a̱yak fe bija.
58Yesu n'aano:
—Búlutoon bu bibajabaj wuyeen, bilele bu yooŋ bibajabaj búwuulu. Bare *Añi ute Húŋgowulan hu abajut tiŋ t'ayino buhuruso eeyihan enio.
59Ahaban, n'aane ake ániine:
—Á̱seinam ti hiñaawu.
Bare ániine u n'aano:
—Ámuse u, a̱wunam bonde: iija, iijab ihok faafam.
60Yesu n'aano:
—A̱was keekete ku keehok bakan kooniin keekete ku. Abe awe, a̱ja a̱waare *Jáyi jite Atambatun.
61Ake n'aane Yesu:
—Anahaan u, íñje káseini ti hiñaawu; bare a̱wunam bonde: iija ísokin bakanam t'uni.
62Yesu n'aano:
—An af'áñuf buwañ, abe n'aŋ'anewen, an ondu ayinaat karoku ti *Jáyi jite Atambatun.
Currently Selected:
Luk 9: cwt
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
