Luk 3
3
Sambatiis n'awaare ésuk i
(Májiye 3.1-12; Mark 1.1-8; Saaŋ 1.19-28)
1-2Hirim hite Atambatun ni híreeŋin Saaŋ, añi ite Sakari, o t'akine du t'eramba i. Kóŋkeyin, Tibeer áyemie fu *áyi ómbokun ite u Rom, emito yendu éhin sumoŋu nu hutok. Eseef bakabaakiir ni kásein te o: Poons *Pilat, águwernoor ite *Súde; *Erod, ite u *Gálile; at'o Filip, ite u Iture bija Tirakonit fe; Lisaniyas, ite u Abileen. Aan ni Kayif ni káyemi *esaraha i kómbokun ku. 3Saaŋ n'añaahoor kikinu keeemo ku inde kaayelu kite *Surdeŋ fe aŋ'awaare aane:
—Ariwatanooro kinij koonuun keejakut ku, abe n'árihin *ariibostee, áriiwufoor kaanuku ariwayaa, aŋkut áriyemi naane hítiyar hu. Abe Atambatun n'aŋ'aboŋketuun wuhoofoor wu.
4Bondu bibajabaj naane *Esayi *ayiŋana ite Atambatun akiñje i bo ti kaawiit koone aane:
«O aamo fu an u aa ataŋk t'eramba i aŋ'aane:
“Arifare bítim bu bija t'Anahaan u;
árihino búhuhu beejoŋoore!
5Kikan ku fe kasiiwiee,
kirij ku fe katereranee;
ñítim ñeejoŋoorut ñu kajoŋooranee,
ñeewakarooree ñu karewooranee.
6Abe kúŋgowulan ku fe kajuku *Afakana u
a Atambatun aja u káboñina#3.6 Esayi 40.3-5..”»
7Hahooja hu n'iŋi hibin ti Saaŋ kaanuku eebosteiin. N'aŋ'aaniin:
—Ñuroon ñondu! Aañ me aanuun fu árinooni kateyi Atambatun, makamu hunak hoone hite Kajoonan ku húlohenno? 8Arinij ajakee, áriiwufoor kaanuku ariwatanooraa kinij koonuun keejakut ku, ariiraan kaanu ku: «Uni fu bakañi *Aburaham#3.8 A̱juk Saaŋ 8.33,37,39..» Arijuka bujuju bondu? Íñje isok fee n'aruun: Atambatun áyinooni káhinu bo béeyemi biñi Aburaham! 9Hineemak hu hifaraa bija kafiitu ñunukanuk ñu ti kíjiŋ ku. Nunukanuk fe neebukut miriyaay meejake, no kafiitiee, abe ni nífiitenee ti sineemak su.
10Hahooja hu ni heeno:
—Náami naŋ n'iriware fu káhinu?
11N'aaniin:
—Ake t'aruun af'abaj wújufa wúsuba, awarawar kawunu kike an eebajut u. Abe an eebaje eeñoofo, awarawar káruboor n'an eebajut u.
12Bakaake ti *kiŋki kasa búhal bu ni kabin yooŋ kaanuku keebostee. Ni kaane Saaŋ:
—Ámuse u, naŋ n'iriware fu káhinu?
13N'aaniin:
—Atum'árihin ésuk i keejaam búhal bu kahahan.
14Esulaan yooŋ ni kaano:
—Náami uni, naŋ n'iriware fu káhinu?
N'aaniin:
—Atum'ariram sírirem site an, abe atum'árikolinan ake eesaanuun sírirem soone, bare arijoŋoor ni bajaam boonuun.
15Hahooja hu ti kanahan, káayakarin dómbokun: huruw fe aanaan ti hikawo man Saaŋ aamo fu Afakana u. 16Náami Saaŋ eeeniin kareyi fe:
—Íñje, ibosteuunboste nu móhujo. Bare ake bibin eehaŋam sembe. Ihaŋahaŋ káteti te o kaanuku íijendin sikaku soone. O kabosteuun nu Búwejet Beenabe bu, ni sineemak. 17Ondu ni káwuranu ku tu sumoŋio, abe o káwaajin bajal bu n'éhaafiin i. O kanaŋu bajal bu ti níhindaa noone. Bare éhaafiin i, o kásufu yo ti sineemak séeketaariit.
18Báhamin beehooje naane bondu bi Saaŋ af'áhamin ésuk i, eewaareiin Hirim Heetoofe hu. 19Bare akamoorakamoor t'aseef u Erod aŋarkeyi naane árutinarutin Erojad, anaare ite at'o, abe yooŋ áhinahin buroon beehooje beejakut. 20Náami Erod éehin beehaŋe bu kájakaati fe: n'aboñ keejok Saaŋ kakul.
Kaboste kite Yesu
(Májiye 3.13-17; Mark 1.9-11)
21Saaŋ *n'aboste hahooja héeyemie hu toko fe. N'aboste yooŋ Yesu. Yesu áyemia ti kalawu ku, bufor bu ni bífeŋgino, 22abe Búwejet Beenabe bu nu búwanein te o naane búnokoorum bite húleebaan. Abe kaaji ni kíhaminn t'etiir bufor bu keene:
—Awe a̱amo fu añi úuma i ímaŋie u. T'awe ti hikawam hutoofe fu#3.22 A̱juk yooŋ Élookiin i 2.7; Esayi 42.1..
Noota nite Yesu
(Májiye 1.1-17)
23Yesu ajaja ayak abin áami abaja inde simit butuman nu sumoŋu, n'atik ajab kawaare koone. Ti kaayinoor kite ésuk i, n'aŋ'áami Siseef aamo fu faafo.
Siseef añi ite Eli, 24Eli añi ite Matat,
Matat añi ite Lefi, Lefi añi ite Melki,
Melki añi ite Sanayi, Sanayi añi ite Siseef,
25Siseef añi ite Matatiyas, Matatiyas añi ite Amos,
Amos añi ite Nahom, Nahom añi ite Esli,
Esli añi ite Nagayi, 26Nagayi añi ite Maat,
Maat añi ite Matatiyas, Matatiyas añi ite Semeyin,
Semeyin añi ite Sosek, Sosek añi ite Soda,
27Soda añi ite Sowanaŋ, Sowanaŋ añi ite Resa,
Resa añi ite Sorobabel, Sorobabel añi ite Salasiyel,
Salasiyel añi ite Neeri, 28Neeri añi ite Melki,
Melki añi ite Adi, Adi añi ite Koosam,
Koosam añi ite Elimadam, Elimadam añi ite Eer,
29Eer añi ite Yesu, Yesu añi ite Eliyeseer,
Eliyeseer añi ite Soorim, Soorim añi ite Matat,
Matat añi ite Lefi, 30Lefi añi ite Simiyoŋ,
Simiyoŋ añi ite Suda, Suda añi ite Siseef,
Siseef añi ite Sonam, Sonam añi ite Eliyakim,
31Eliyakim añi ite Meleya, Meleya añi ite Meena,
Meena añi ite Matata, Matata añi ite Natan,
Natan añi ite *Dafit, 32Dafit añi ite Seese,
Seese añi ite Obed, Obed añi ite Boos,
Boos añi ite Salmoŋ, Salmoŋ añi ite Naason,
33Naason añi ite Aminadab, Aminadab añi ite Adumiin,
Adumiin añi ite Aruni, Aruni añi ite Esrom,
Esrom añi ite Fares, Fares añi ite *Suda,
34Suda añi ite *Sakob, Sakob añi ite *Isak,
Isak añi ite *Aburaham, Aburaham añi ite Taara,
Taara añi ite Nakoor, 35Nakoor añi ite Seruk,
Seruk añi ite Ragawu, Ragawu añi ite Falek,
Falek añi ite Ebeer, Ebeer añi ite Sala,
36Sala añi ite Kayinam, Kayinam añi ite Arufakusad,
Arufakusad añi ite Sem, Sem añi ite *Nowe,
Nowe añi ite Lamek, 37Lamek añi ite Matusala,
Matusala añi ite Enok, Enok añi ite Sared,
Sared añi ite Malelel, Malelel añi ite Kayinam,
38Kayinam añi ite Enos, Enos añi ite Set,
Set añi ite *Adam, Adam añi ite Atambatun.
Currently Selected:
Luk 3: cwt
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
Free Reading Plans and Devotionals related to Luk 3
Faith & Love: A One Year Bible Reading Plan - Part 8
Prepare Him Room
The Gospels - Luke
