Epotor i 9

Sóol n'áyilen ti Yesu

(Epotor i 22.6-16; 26.12-18)

1Tu kunak kondu, Sóol ti kanuuru kep aane eeyool kéeyilene ku t'Anahaan u. N'aja ajuk *asaraha ómbokun u, 2eelawo eesaano bileetar bija t'eseef ite *ñáalawum ñite Damas, kaanuku af'ajuk toko háyine man yooŋ haare keejoke ti Bítim bite Anahaan u, n'ajokiin eeja nu boko Serusalem.

3Ondu ti bija bu ayak abin áami alohena Damas, ajaja kajuku, náami meejaaŋe méenuutina t'etiir mijaaŋana t'áyemie du fe. 4N'aney, abe n'ajam kaaji ni keeno:

—Sóol, Sóol, iŋi naŋ n'á̱hihinoor fee n'íñje?

5Sóol n'ákandijen aane:

—Awe a̱amo fu aañ Anahaan u?

Kaaji ku ni keeno:

—Íñj'eemo fu Yesu aa á̱hihinoor. 6Bare a̱rito a̱ayooso hikinu hu. Ake kasokii bo naŋ n'a̱ware fu káhinu.

7Háyine hu keeriboore ku nu Sóol ni kasiiŋo, abe kátumbut kakañen káhamin. Iŋi kajam kaaji ku, bare kajukut an. 8Sóol n'arito, bare h'áheeline hu ñíkino, ayinaat kajuku doon fe. Ni kajoko t'emoŋu keeja ne o bija Damas. 9N'ariiko kunak kíhaaji t'ayinaat kajuku, áñoofaariit, abe áhujaariit yooŋ.

10Abajeebaj Damas ake ariboora huruwu hoone Anañas. Anahaan u n'áŋaasin te o abe n'aano:

—Anañas!

Anañas n'aano:

—Íñj'ende, Anahaan u.

11Anahaan u n'aano:

—A̱ja t'enuuf ite *Suda yeeemo i ti bítim bu bimbi kaane «Bítim Beejoŋoore bu». Á̱kandijen toko ániine ii kaane Sóol, ite Taris. Ondu ti kalawu, 12abe ajukajuk ti bike beefeeño ake ániine huruwio Anañas tu búyooseina, abe n'ásit te o sumoŋio kaanuku éeyini kasooñu ajuk.

13Anañas n'aano:

—Anahaan u, ijamajam ti bakan keehooje mite m'ániine ondu, abe kasokamsok yooŋ naane álaamane i bakan kúuwe Serusalem. 14Abe h'abine hii beebe, eseef ite esaraha i kawunowun sembe site kajoku ésuk i fe kiŋki kalaw tu huruwu húuwe.

15Bare Anahaan u n'aano:

—A̱ja, ábuki ijifanajifan ániine ondu kaanuku eebin éewufoor keenooto ku Esuwif, ni bákayi kooniin, ni bakate ku *Israyel íñj'eemo fu aañ. 16Abe íñje yooŋ káwufooro sílaam su fe s'aja su kajuku uŋu húuma hu.

17Náami Anañas eeja. H'areeŋe hu t'enuuf i, n'ayooso, n'ásit sumoŋio tu Sóol abe n'aano:

—Isaafi átoom. Anahaan u Yesu éeŋaasina u t'awe ti bítim b'a̱bine bu, áboñinamboñin kaanuku a̱asooñ a̱juk, abe n'a̱hoojanee bib nu Búwejet Beenabe bu.

18Toko-toko yooŋ, náami dike doon díneyino dúnuutin ti ñíkin ñite Sóol, aŋ'a̱juk kite buwes. Náami asooña ajuk. N'arito, abe n'abostee. 19H'añoofee hu ahaban, enio n'eŋk'ebin.

Sóol n'awaare Damas

Sóol n'ariiko kike kunak ni bakate ku Damas *kéeyilene ku. 20N'ásit yooŋ toko-toko kawaare ti *ñáalawum ñu, aŋ'aane Yesu aamo fu Añi ite Atambatun. 21Keejamo ku fe ni kajahale, abe n'iŋi kaanoor:

—Ániine óndiiit kereŋ áyemie fu Serusalem ti káhihinoor kite kiŋki kalaw tu huruwu hite Yesu? Kajoku kóoniiniit k'abine fu beebe kaanuku eeja nu boko t'eseef ite *esaraha i?

22Bare Sóol ti kahaŋu káñiŋkaan kep ti kawaare ku. Aŋ'áwufoor Esuwif i keekine ku Damas akuur but kaanuku Yesu aamo fu *Afakana u, kasooñen kámeyiit yooŋ naŋ ni kawaro fu kásafin.

23Abaj kunak iye, Esuwif i ni káhabanein kaanuku keeyoolo, 24bare Sóol n'ajam bo. Kaajiŋgan ni káajiim, iŋi káwufo tu wuruŋ wute hikinu hu kaanuku keeyoolo. 25Náami hike hunak nu huhuk hu, eriboora yeene ni kayito, abe ni kájaaŋanno ti hiñaan hu, éewanein ti katekel keekobee ñúruuk#9.25 Siferse su 23-25, a̱juk yooŋ 2 Korent 11.32-33..

Sóol n'aja Serusalem

26Hi Sóol areeŋe hu Serusalem, n'aŋes bija biŋaabo *kéeyilene ku. Bare kareyi fe kákoleyokoleyi, ábuki káyilenut kaanuku múniyo akina ariboora. 27Náami Barnabas éeyokunano, abe n'aja ne o *t'epotor i. N'asokiin naane Sóol ajuke i Anahaan u ti bítim bu, nu buŋ b'Anahaan u áhamine fu ne o. N'asokiin yooŋ buŋ bu Sóol awaaree fu Damas ariike tu huruwu hite Yesu ni hikaw heeyaŋge. 28Áfiitin tu hunak hondu, Sóol n'aŋaabeiin, n'aŋ'ariboor nu boko Serusalem naane hutoofo i, abe n'aŋ'awaare tu huruwu hite Anahaan u ni hikaw heeyaŋge. 29Aŋ'áhamin yooŋ, abe n'ajeeŋoor n'Esuwif i kiŋki káhamin *kigerekaay ku, bare bokondu ni kaŋeso kayoolu. 30Hi kéeyilene ku kajame hu bondu, ni kaja nu Sóol bija Sesare, abe ni káhino eeja Taris.

31Náami kéeyilene ku kabajabaj káasuumaay ti kikinu kite *Súde, ni *Gálile, ni *Samari. Káyilen kooniin ti kahaŋu kayanu kep, abe buroŋ booniin fe kájeŋgin Atambatun. Búwejet Beenabe bu nu búyokunaniin yooŋ keehaŋ kahooju.

Piyeer n'aritan Ene ti kásomut ku

32Piyeer áyemia ti kañaahoor kikinu ku kireyi kaanuku éehamin ni *kéeyilene ku, n'aja hike hunak ti keekine ku Lida. 33N'aŋaabo bo ake ániine huruwu hoone Ene t'ahurusee t'elal, ábuki ayinaat bija huta hu simit hutok ni síhaaji. 34Piyeer n'aano:

—Ene, Yesu *Kiris aritani ti kásomut ku! A̱rito, abe n'a̱tan elal íiwe.

Toko-toko yooŋ, Ene n'arito. 35Bakate ku Lida kareyi fe, ni keekine ku ti kaatend kite Saron ni kajuko, abe ni kajok ti bítim bite Anahaan u.

Piyeer n'aritan Dorkas t'eket i

36N'abaj ake anaare ti bakate ku Sope *kéeyilene ku, huruwu hoone Tabita (ti *kigerekaay iŋi kaane «Dorkas», aamo fu «huboŋk»). Anaare ondu, buroko káhinu meejake kep, ni káyokunan keebajut ku. 37Tu kunak kondu, bitiba nu bujondo, abe n'aket. Kañawa ehunuŋ i kahaban, ni kanaŋ yo t'ake anuuf tu sunuuf sitiira su. 38Bakate ku Sope kéeyilene ku ni kajam kaanuku Piyeer ondu Lida, abe Sope ekamboorut ni Lida. Náami keeboño háyine bákasuba ni hirim honde: «Uni íriwasiyani, waasi, a̱moken a̱abin t'uni.» 39Piyeer n'arito eeriboor nu boko. H'areeŋe hu, ni kaja ne o t'anuuf atiira u. Haare hu ki bákayiniin kakete ku ni kálohino ti biyiy kep. Ni káwufooro wújufa wu ni waawu wañ wu Dorkas aroke wu akina buroŋ.

40Piyeer n'anuutan ésuk i fe, n'ájiŋgitan, abe n'alaw Atambatun. Ahaban, n'aweteko inde ehunuŋ i abe n'aane:

—Tabita, a̱rito!

Anaare u n'áheelin ñíkino, abe h'ajuke hu Piyeer, n'arito ariiko. 41Piyeer n'ajoko t'emoŋu, abe n'áyokunano eesiiŋo. Ahaban, n'aruw haare hu ki bákayiniin kakete ku, ni bakaaku yooŋ kéeyilene ku, abe n'áwufooriino káaroŋin. 42Bondu ni bijamo ti hikinu hite Sope fe, abe bakan keehooje ni káyilen t'Anahaan u. 43Piyeer n'ariiko Sope afiyo dikee t'ake ániine huruwio Simoŋ, aroka wubaŋ.

Currently Selected:

Epotor i 9: cwt

Highlight

Copy