Epotor i 6

Háyine hutok ni bákasuba ni kajifanee

1Kóŋkeyin, naane aamo i *kéeyilene ku bokondu ti kahaŋu kahooju kep, Esuwif i kiŋki káhamin *kigerekaay ku ni kasok t'Esuwif i keebukee ku *Israyel. Kaanaan haare hite hu tu boko ki bákayiniin kakete ku káhinaariitee áwariee ti káruboor kite buroon bu kiŋki kibaj húnakonak. 2Náami *epotor i sumoŋu ni bákasuba ku ni karuw bakaaku kéeyilene ku kareyi fe abe ni kaaniin:

—Iriwarut kawasan kawaare hirim hite Atambatun, t'áami iŋ'íriruboor ésuk i buroon bu. 3Kújakuwe, iŋ'ite ho aamo fu arijifan t'aruun háyine kaamo hutok ni bákasuba kéewoore, keehooje bib nu Búwejet Beenabe bu, abe ni káwesinato yooŋ, iriisaaniin burok bondu. 4Uni n'iŋ'íriyini kajoŋoor ni kalawu ku, ni kawaare kite hirim hu.

5Kareyi fe ni kakontaan ti hirim hondu. Ni kajifan Eejen. Abajabaj káyilen kómbokun, abe aŋ'ahooj bib nu Búwejet Beenabe bu. Ni kajifan yooŋ Filip, nu Prokoor, ni Nikanoor, ni Timoŋ, ni Parmenas, ni Nikola#6.5 Kuruwu kondu fe *kigerekaay. Mánoman bokondu kéeyemie ku ti kajifan ku kaanaan keejifan ti bakan keeene ku haare hooniin iŋi káwiinianee ti káruboor kite buroon bu., ake ániine ite Antiyoos eeyoosee bítim bite Esuwif i. 6Kahaban, ni kaja nu boko t'epotor i. Epotor i ni kalaw, abe ni kásit sumoŋiiin tu boko.

7Hirim hite Atambatun ti kahaŋu bijamo kep. Kéeyilene ku yooŋ ti kahaŋu kahooju Serusalem, abe keehooje *t'esaraha i ni kajok bítim bite *Kiris.

Eejen n'ajokee

8Eejen a Atambatun ásoniyane u, abe n'ahoojano bib ni sembe, n'aŋ'áhin tu buhooŋu ésuk i buroon úkaan beehaŋiin kikaw. 9Bakaake ni kájeeŋoorin ne o; boko kaamo fu bakate ti *báalawum bimbi kaane «Báalawum bite keeroŋut ku búsukateen». Abajeebaj tu boko Esuwif bakate Siren n'Aleksandiri, n'Esuwif bakate Silisi n'Asi. 10Bare kayinaato kajoku ti báhamin, ábuki Búwejet Beenabe bu buwunowun aŋ'áhamin nu búwesinato. 11Náami keejaam bakan kaanuku keebin keeene: «Irijamojam ti kálafatin *Moyis n'Atambatun!» 12Iyu i katiŋge fu ésuk i, ni *sifaaf su, *n'émuse yite Eluwa yite Moyis. Ni kálif Eejen keejoko, abe ni kaja ne o bija ti *sifaaf site ejoonana i. 13Ni kabin yooŋ ni bakan kaanuku keejuus kasaano. Bokondu ni kaane:

—Áyin ondu áwasaariit kasoku beejakut *t'Enuuf ite Atambatun yeenabe i, ni *t'Eluwa yite Moyis! 14Ábuki irijamojam ti kaanu áyin ondu Yesu ite u *Nasaret kawelej Enuuf ite Atambatun, abe n'atit ejoosan yu Moyis asaane i úne.

15Sifaaf site ejoonana i kareyi fe ñíkiniin t'Eejen, abe ni kajuk kaanuku buhooŋio naane bite amalaka.

Currently Selected:

Epotor i 6: cwt

Highlight

Copy