Epotor i 5

Anañas ni Safira

1Bare ake ániine huruwio Anañas n'ajoohen hike hitaaŋaatiin, akina n'anaar'o Safira. 2Ni kajamoor n'anaar'o kahaban, n'ákasinan ti sírirem su anaŋ, abe n'aja ni seeŋeñene su aja asaan *epotor i. 3Náami Piyeer eeeno:

—Anañas, buŋ b'a̱sooñe fu a̱was Setani eeyooso t'eholi ayak abin áami a̱juusa Búwejet Beenabe bu, abe n'á̱nuus ti sírirem s'a̱baje su h'a̱joohene hu hitaaŋaat hu? 4Eeman kereŋ húuwe hu awe t'a̱joohenoorut ho? Abe h'a̱joohene hu ho a̱haban, sírirem su yooŋ súuwe su, bare me? Buŋ b'a̱sooñe fu a̱juker t'eholi n'a̱ane a̱anij iyu? Kúŋgowulan kíiit k'a̱juuse fu, bare Atambatun.

5H'Anañas ajame hu kirim kondu, n'aney aket. Keejame ku bo fe ni kákoleyi naane. 6Ébaakiit ni karito keehut ehunuŋ i, abe ni kayit kaja kahok.

7Bondu buwas areeŋ suwahatu síhaaji, anaar'o n'áyoosein t'ámeyiit beebaje bu áyino. 8Piyeer n'ákandijeno aano:

—A̱sokam fee, hitaaŋaat hoonuun, iye a arijoohene fu ho?

Anaare u n'aano:

—Hee, iyu i irijoohene fu ho.

9Náami Piyeer eeeno:

—Buŋ b'ariyino fu kajamoor t'ésubauun kaanuku ariiŋes kabuutu Búwejet bite Atemit? A̱jam, keehoke ku áyini káreeŋino ti karuŋ ku, abe boko kayitii yooŋ keeja n'awe.

10Toko-toko yooŋ, n'aney bite wuwot wute Piyeer, abe n'aket. Húbaakiit hu ni kayooso, abe ni kajuko káaketin. Ni kaja ne o kaja kahok kaagoroor n'áyino. 11*Kéeyilene ku ni bakaaku fe keejame ku bondu ni kákoleyi dómbokun.

Buroon beehooje beehaŋe ésuk i kikaw

12*Epotor i n'iŋi káhin buroon beehooje-hooj beehaŋe ésuk i kikaw. *Kéeyilene ku kareyi fe iŋi kafand bukuukanooro *t'Enuuf ite Atambatun, ti káwuwoor kite *Salomoŋ. 13An éeyilenut akañenut bija aŋaabeiin, bare ésuk i eŋ'esok kajaku kooniin. 14Bakan keehooje-hooj, háyine ni haare ni káyilen t'Anahaan u, abe ni kaŋaabeiin. 15Náami ésuk i n'eŋ'eja ni bakan kéesomute, abe n'iŋi kanaŋiin ti bilal man yooŋ ñifeŋk tu búhuhu bu kaanuku man Piyeer n'áyemi ti bija, ésamunan yeene n'ékumbalool bakaake tu boko. 16Bakan keehooje-hooj n'iŋi kánuutin tu músuk meeemo mu inde Serusalem keebin n'ésomuta yeeniin, ni bakan ki birab bu bujoke ku, abe kareyi fe iŋi kákoyi.

Eseef ite Esuwif i ni káhihinoor epotor i

17Náami *asaraha ómbokun u, ni bakan koone fe keeriboore ku *n'Esaduseyeŋ i ni kahiñan *epotor i, abe ni káhabanein kaane kéerahan tu boko. 18Ni kajokiin, abe ni kakuliin. 19Bare káajiim ku, ake amalaka ite Atemit n'áfeŋgin wuruŋ wute ekulu i, éenuutanniin abe n'aaniin:

20—Arija *t'Enuuf ite Atambatun, abe n'arisok ésuk i bite buroŋ bíyeni bu fe.

21Epotor i ni káhin naane asoke i: nu bújom bu bib, ni kayooso t'Enuuf ite Atambatun, abe ni káyemi toko ti kaliiken ésuk i.

Asaraha ómbokun u, ni kéesiiŋooreina ku ne o ni kakuukan *sifaaf site Esuwif i fe. Boko kaamo fu *sifaaf site ejoonana i. Kahaban, ni kaboñ bite epotor i t'ekulu i. 22Bare h'esulaan i kareeŋe hu, kajukutiin toko. Ni kabatuko, kareeŋ ni kasok bonde:

23—Iriŋaabaŋaabo ekulu i káakulinee ayan faŋ, esulaan i yooŋ ti kasiiŋee tu wuruŋ wu ti kajukar. Bare h'írifeŋgine hu, irijukut an níbahindaa.

24H'aseef ite esulaan i kiŋki kajukar Enuuf ite Atambatun, n'eseef ite esaraha i kajame hu bondu, kámeyiit yooŋ naŋ ni kaware fu kayinoor, nu buŋ bu bondu bija fu bihabano. 25Ake n'ahaŋ áreeŋin abe n'aaniin:

—Arijamatan! Háyine hu k'arikule ku bokondu t'Enuuf ite Atambatun ti kaliiken ésuk i.

26Náami aseef ite esulaan i n'aja ni bakan koone, abe ni kajok epotor i kéebatikein nu boko. Bare káhinut bo sembe, ábuki kákolakoleyi kaanuku man ésuk i n'eŋ'émiñiin nu bujuju. 27Hi kabine hu n'epotor i kahaban, ni kayoosaniin ti báajoonanum bu. Asaraha ómbokun u n'aaniin:

28—Irikamoorut kereŋ t'aruun irienuun atum'aŋk'ariliiken ésuk i tu huruwu hite ániine ondu? Náami bare arihoojana Serusalem fe ni bamb'ariliikeniin, abe n'árimaŋi kasejan uni eket yeene#5.28 A̱juk yooŋ Májiye 27.25.!

29Piyeer n'epotor i bakaaku ni kásafin kaane:

—Atambatun i iriware fu kájeŋgin bala írijeŋgin kúŋgowulan ku. 30Atambatun ite sifaaf úne aritanaritan t'eket i Yesu a ariyoole u h'aritibo hu *t'ekuruwa. 31Atambatun n'ayito inde *baatoso, abe n'áhino éeyemi Aseef *n'Afakana, kaanuku man *Israyel n'éyini buwatanooro kinij kooniin keejakut ku, wuhoofoor wooniin weeboŋketee. 32Uni iriemo fu eseede yite buroon bondu, uni nu Búwejet Beenabe bu b'Atambatun awune bu kéejeŋgino ku.

33Hi kéeyemie ku ti kajoonan ku kajame hu bondu, ni kátumb fu kayiŋat naane kayak kámaŋi kayoolu epotor i. 34Bare abajeebaj toko ake Afarisiyeŋ huruwio Gamaliyel, *ámuse ite *Eluwa yite Moyis. Ésuk i ereyi fe eŋ'ejoko naane. N'arito asiiŋo t'etut, abe n'aane esulaan i kanuutan epotor i tíyaŋ diŋgilis. 35Ahaban n'aane:

—Aruun bakate ku Israyel, áriwasiyoor ti b'arija bu káhinu háyine hondu. 36Afiyeitee naane Túdas áŋaasina i, aŋ'aane akina an ómbokun, abe bakan keereeŋe síteemeer sibaakiir ni kasao ti hiñaawu. Bare n'ayoolee, abe keesao ku ti hiñaawu fe ni kayisaloolo. Iyu yooŋ i bondu bútowutee fu hiraanu. 37Bondu buwas, *Suda ite u *Gálile n'áŋaasin, kóyin kakiñju kite kuruwu kite ésuk i bakate hikinu hu. N'añak yooŋ bakan keehooje-hooj. Bare n'ayoolee yooŋ, abe keesao ku ti hiñaawu fe ni kayisaloolo. 38Hahiyu iisokuun: arinuut ti háyine hondu, ariwasiin keeja. Ábuki arko bi kaŋes bu, bija yooŋ burok booniin fe tu kúŋgowulan ku tu búnuutina, bo bútowuto. 39Bare arko t'Atambatun tu búnuutina, at'áriyini kábuju bo. Káhinu iyu, n'aŋ'arijendan kalobu n'Atambatun!

Kéeyemie ku ti kajoonan ku ni kajok ti bite bu Gamaliyel. 40Ni karuw epotor i, abe ni káhiniin kéemiñee ni hikarawas. Kahaban, ni káhaminiin ayan, kaaniin itim iŋki káhamin tu huruwu hite Yesu, abe ni kawasaniin. 41Epotor i ni kanuut ti báajoonanum bu, kikawiin káatoofin ti naane Atambatun ajokiin i kaanuku kéelafatinee uŋu huruwu hite Yesu. 42Abe húnakonak fe, t'Enuuf ite Atambatun man yooŋ tu sunuuf su, káwasaariit kaliiken ésuk i, man yooŋ kawaare Hirim Heetoofe hite hu Yesu Afakana u.

Currently Selected:

Epotor i 5: cwt

Highlight

Copy