Epotor i 17

Pool ni Silas ni kaja Tesalonik

1Pool ni Silas ni kaŋaas Amfipolis n'Apoloni, abe ni kareeŋ Tesalonik. Abajeebaj bo *báalawum bite Esuwif. 2Pool n'aja toko naane aa afiy áhin tánotan fe t'aje. Ti sirimaas site Esuwif i síhaaji, Pool n'aŋ'ajeeŋoor ti *Míkiñjin mu ni kiŋki káyemi toko. 3N'aŋ'asokiin, abe n'áwufooriin ti Míkiñjin mu kaanuku *Afakana u awarawar kajuku sílaam, abe n'arito t'eket i. N'aŋ'aaniin:

—Yesu ondu ii isokuun ii aamo fu Afakana u.

4Bakaake tu boko ni káyilen kirim kondu, abe ni kaŋaabo Pooliin ni Silas. *Egerek keehooje-hooj kéejeŋgine Atambatun, ni haare keehooje keejamee ni kaŋaabeiin yooŋ.

5Bare Esuwif i bakaaku ni kabet. Ni kakuukan bike bísambaŋ béeyemie tu búhuhu bu, abe ni katiŋg bakan keehooje keerito ayak abin áami hikinu hu hirkaa hitik. Ni kaja t'enuuf ite Saason hiŋes Pool ni Silas kaanuku keeja nu boko ti hahooja hu. 6H'aamo hu kajukutiin, ni kañak Saason ni bakaake kéeyilene keeja nu boko t'eseef ite hikinu hu, abe n'iŋi kataŋk kaane:

—Háyine honde kaamo fu ti kayeeñooran kite etaam i ereyi fe. Hahiyu káreeŋino beebe, 7abe Saason arahaniin fu! Kareyi fe iŋi kateñeko káhinu *b'áyi ómbokun eeemo u Rom asoke bu úne, ábuki iŋi kaane abajeebaj ake áyi iŋi kaano Yesu.

8Kirim kondu nu kujok hahooja hu n'eseef i fe ti sini. 9Ni káhin Saason ni bakaaku keejaam alamaan, abe ni katik kawasaniin keeja.

Pool ni Silas ni kaja Bere

10H'aamo hu tujona kep, *kéeyilene ku ni káhin Pool ni Silas keeja Bere. Hi kareeŋe hu, ni kaja ti *báalawum bite Esuwif i. 11Bakate ku bo kahaŋe Esuwif i bakate ku Tesalonik bíhandino, ábuki kajokajok hirim hite Atambatun káhabanein. Húnakonak fe, n'iŋi kajaŋga ti *Míkiñjin mu keejuk man bu Pool bamb'asok bite toko. 12Bakan keehooje-hooj tu boko ni káyilen, abe *t'Egerek i, haare úkaan keejamee ni háyine yooŋ keehooje ni káyilen. 13Bare h'Esuwif ite Tesalonik kajame hu kaanuku Pool ondu Bere ti kawaare hirim hite Atambatun, ni kabin bo yooŋ keetiŋg ésuk i ayak abin áami arkee bo hitik. 14Náami kéeyilene ku keemoken kéehin Pool eeja bija ti han hu. Bare Silas ni Timote ni kariiko Bere. 15Keeje ku nu Pool ni kaja ne o bija Aten. Kahaban, ni kábatikein nu kuboñ kite Pool, kite kaanuku Silas ni Timote kanabano ahilee.

Pool n'áhamin ni bakate ku Aten

16Hi Pool áyemie hu Aten ti kanahan kite Silasiin ni Timote, n'átumb fu átaañian dómbokun h'ajuke hu naane hikinu hu huhooje i ni kimiile. 17Náami aŋ'ajeeŋoor n'Esuwif i ti *báalawum booniin, bija ni keenooto ku Esuwif fe kéejeŋgine ku Atambatun, abe hunak heenee hunak, n'aŋ'ajeeŋoor t'efiñjan i ni kaŋk'aŋaabo toko. 18N'abaj émuse, iŋi kaane bakaake Epikuriyeŋ, bakaaku Sutoyisiyeŋ n'iŋi kajeeŋoor yooŋ ne o. Bakaake iŋi kaane:

—Kame áhamina ondu, naŋ n'ámaŋie fu kasoku?

Bakaaku keejame ku Pool ti kawaare bite bu Yesu, ni birito bite t'eket i ni kaane:

—Aŋ'a̱juk kite am aŋ'awaare etambatun k'úmeyiit#17.18 birito bite t'eket i: ti *kigerekaay, kaanuku keeene «birito bite t'eket i» iŋi kaane «Anasitasis». Hi Pool ájemenna hu bondu, n'iŋi kaane man «Anasitasis» huruwu hite ake atambatun anaare aŋ'ariboor ni Yesu..

19Náami keejoko keeja ne o t'ejoonana i kiŋki kaanee Arewopaas#17.19 Arewopaas: hike hirij hite Aten ufu huruwee iyu. Toko t'ejoonana i t'ifi kakuukanooro hítiyar hu. Hireeŋ toko, ni kásik huruwu hondu kasaaniin.. Ni kaano:

—Írinooni me kámeyi bíyeni bondu bamb'a̱liiken ii ésuk i beemo fu naŋ? 20Ábuki á̱hinahin uni iriijam báhamin b'írimusut kajamu, abe írimaŋamaŋi kámeyi buŋ bi bije fu.

21(Abe múniyo bakate ku Aten kareyi fe, n'emoosoora i keekine ku bo, burokiin banaban, man yooŋ kajamatan bíyeni kep.)

22Pool n'asiiŋo hágila Arewopaas i abe n'aane:

—Aruun bakate ku Aten, ijukajuk kaanuku arijokajok alitee t'etambatun yeenuun. 23Ábuki h'iñaahoore hu ti hikinu hoonuun, ijukajuk hike ti kimiile koonuun, abe bonde bikiñjee fu toko: «Bija t'ake atambatun éemeyiitee#17.23 Bakate ku Aten kanutanut himiile hondu, ábuki iŋi kaane man abajeebaj ake atambatun i kámeyiit, abe káhinaate iyu, atambatun ondu i kafiile u n'aŋ'átaañian tu boko, abe man ajak bija tu boko..» Bamb'árisukaay ii t'árimeyiit bo, bo b'ibine fee kasokuuun. 24Atambatun éewuwane u etaam i nu buroon beeemo bu te yo fe, akina aamo fu Atemit ite bufor bu n'etaam i, abe akinut tu sunuuf site kalawu su kúŋgowulan kanute. 25Asawuleit yooŋ atofotooree kite dike doon dondu toko d'abajut, ábuki akina humuumo af'awun kúŋgowulan ku fe buroŋ bu, ni síhiinu, ni beeŋeñene bu fe#17.25 Siferse su 24-25, a̱juk 1 Bákayi ku 8.27; Esayi 42.5; Epotor i 7.48.. 26Tu húŋgowulan hifeeneŋ t'aŋaase fu éewuwan siheet su fe kaanuku keekin t'aduna i ereyi fe. Ti káwuwanoorutee yooŋ, afinafin kunak kooniin, abe n'aliik siraju site ti kaware du kakinu. 27Atambatun n'áwuwaniin kaanuku keeŋeso, abe maske kalaalool n'iŋi kajuko, akina eeemo u múniyo akambut mayet afeeneŋ t'úne. 28Ábuki

«Akina ákinineŋe fu n'úbaj buroŋ bu,

n'uŋ'úñaah, abe n'úyemi bakan.»

Iyu yooŋ i bakaake t'ekiñja yeenuun kasoke fu kaane:

«Úne yooŋ bakañio.»

29Makamu úne bakañio, úwarut kayinoor n'úene Atambatun anokoore nu búwisenum beerokee n'éwurus, man yooŋ n'ehalis, man yooŋ nu bujuju, bu húŋgowulan anoŋke eeyinoor ti hikawo n'arok nu sumoŋio. 30Hítiyar hu, Atambatun aboŋketaboŋket bondu fe, ábuki ésuk i kámeyiit bimbi káhin. Bare hahiye áwufoora ésuk i fe bakate ku tánotan kaanuku kawarawar buwatanooro kinij kooniin keejakut ku. 31Ábuki áfiitenafiiten hunak h'aja hu kajoonan te ho ésuk i ereyi fe ajoŋooree. Awasawas bondu tu sumoŋu site an a ajifane u. Áwufoorawufoor ésuk i ereyi fe an ondu aamo fu aañ, h'aritano hu t'eket i!

32Hi kajame hu Pool n'áhamin ti karitan kite eket i, bakaake ni kásuwo, bakaaku ni kaane:

—Uni kajamatani tu bondu nimaama.

33Iyu i Pool awasiin fu toko eeja. 34Bakaake bare ni kaŋaaboo, abe ni káyilen. Abajeebaj ake tu boko huruwu hoone Denis, ite t'ejoonana yite Arewopaas i, n'ake anaare iŋi kaano Damaris, ni bakaake yooŋ.

Currently Selected:

Epotor i 17: cwt

Highlight

Copy