Epotor i 12

Saak n'ayoolee, Piyeer n'akulee

1Kóŋkeyin, áyi u *Erod n'áyemi ti káhihinoor bakaake ti *kéeyilene ku. 2N'aboñ keeyool Saak at'ute Saaŋ ni kábura. 3Abe h'ajuke hu kaanuku bondu butoofatoof Esuwif i, n'aboñ yooŋ keejok Piyeer. (Bondu bibajabaj tu kunak kite *efeet ite Kumburu Kéehinaariitee ku Élefir.) 4H'aamo hu Piyeer ajokee ahaban, áyi u n'aane kakulo, abe n'aboñ sija sibaakiir site esulaan iŋi kasawoor keejukaro. Eja-ja fe esulaan bakabaakiir. Ámaŋamaŋi kajoonano hágila ésuk i kane *efeet ite Kánuutina ku Esipt ehabano. 5Náami iŋi kajukar Piyeer t'ekulu i, bare kéeyilene ku n'iŋi káñiŋkaan kep keelaw Atambatun bija te o.

Piyeer n'anuutanee t'ekulu i

6Káajiim ku, h'aamo hu naane kuwaatu *n'Erod awaro fu kajoonan, Piyeer n'aŋot t'etut esulaan bákasuba. Kakobokob ni ñaasel ñúsuba, abe esulaan ni káyemi ti karuŋ kite ekulu i keejukar. 7Amalaka ite Atemit n'ahaŋ áŋaasin toko-toko, abe n'ajaaŋ t'ekulu i wililil. Amalaka u n'ámiñ Piyeer ti kaaheeh éeniyaro abe n'aano:

—A̱rito ahilee!

Ñaasel ñeekobe ñu sumoŋio ni ñihaŋ ñiney. 8Abe amalaka u n'aano:

—A̱kob nibaŋ núuwe, abe n'a̱sol sikaku súuwe.

Piyeer n'áhin bo. Amalaka u n'aano:

—A̱sol éfartuus íiwe, abe n'á̱seinam ti hiñaawu.

9Piyeer n'anuut eesao ti hiñaawu. Bare ánandinut kaanuku b'amalaka u bamb'áhin iyu bite nu múniyo: aŋ'aane man bike bifeeño. 10Iyu i kareeŋe fii t'esulaan i étiyar i káyemie du ti kajukar ku, n'ésooboriyan i, abe ni kareeŋ ti karuŋ kite mañ mu kite buyooso bu ti hikinu hu. Nu kunoŋk kéefeŋginooro hágilaiin. Ni kanuut, abe ni kaja t'eke éhuhu. Amalaka u n'ahaŋ átowuto Piyeer.

11Náami Piyeer atika áwasinooro. N'aane:

—Hahiyu ínandina kaanuku nu múniyo, Atemit áboñinoboñin amalaka oone eeramam ti sembe site Erod, ni ti b'Esuwif i kámaŋie bu yéeni t'íñje.

12H'ánandine hu beebaje bu, n'aja t'enuuf ite Mari, íñaay ite Saaŋ ii kaane Mark. Bakan keehooje-hooj kakuukanoorakuukanooro toko kéeyemi ti kalawu. 13Piyeer n'akoŋkoŋan ti karuŋ kite ku tíyaŋ, abe ake awenoora huruwu hoone Rood n'abin éejeŋgin. 14N'akeetan kaaji kite Piyeer. Hikawo fu nu hútumb hutoof asooñen n'afiil káfeŋgin; n'atey abatuko eesok kaanuku Piyeer ondu ti karuŋ ku. 15Ni kaano:

—Jaa, a̱wenawen fu!

Bare n'aŋ'ajok alit tip ti b'asoke bu. Náami keeeno:

—Kame amalaka oone.

16Boko ti báhamin bu, Piyeer ti kakoŋkoŋan kep. H'aamo hu káfeŋgina, abe ni kajuko, ni kajahale naane. 17Piyeer n'áhin emoŋio tu butumo kaanuku itim kaheñjoor. N'ayooso, abe n'asokiin buŋ b'Atemit anuutano fu t'ekulu i. N'áwutiyen aane:

—Abe n'arisok bo Saak#12.17 Saak: aamo fu at'ute Yesu. Akina an ómbokun ti bakate ku Serusalem *kéeyilene ku., ni bakaaku *kéeyilene ku.

Ahaban, n'anuut eeja tike tiŋ.

18Hi tifiite hu, esulaan i ni kátumb fu karko hitik. N'iŋi kaanoor:

—Kame fíya Piyeer ondu diin?

19Erod n'aboñ keeŋeso, bare kajukuto. N'asok t'ákandijen esulaan i, abe n'aane kayoolee. Ahaban, n'anuut *Súde eeja Sesare, abe n'ariiko bo.

Eket ite áyi u Erod

20Buñoofo bite bakate ku Tiir ni Sidon, t'ésuk ite áyi u *Erod t'ufu búnuutin. Bare makamu kóŋkeyin Erod ayiŋatayiŋat tu boko, ni kajamoor kaane keeja keejuko. Ni káhamin ni Blastus, arima ite áyi u kaanuku eebin éeyokunaniin. Kahaban, ni kaja kajuk Erod keeeno káasuumaay ki kaŋese fu.

21Hunak h'Erod asaaniin hu kaanuku eebin éehaminiin te ho hireeŋa, n'asol kájufa koone kite híyiaate hu, abe n'ariiko t'eriikeey yeene tand'ariiko eejoonan. N'áhamin toko ti hahooja hu. 22Ésuk i ni kataŋk kaane:

—Húŋgowulaniit ifi híhamin iyu. Diyu kaaji kite atambatun!

23T'ewahatu yendu yooŋ, amalaka ite Atemit n'ámiñ Erod, ábuki kániku kite Atambatun ki kásike fii kasaano, abe abatikanuto ko. Náami ñuluuha ñeejoko ti har, n'ahaŋ aket.

24Hirim hite Atambatun ti kahaŋu bijamo kep, *kéeyilene ku yooŋ ti kahaŋu kahooju.

25Hi Sóol ni Barnabas kahabane hu kuboñ kooniin Serusalem, ni kayeet kariboor ni Saaŋ ii kaane Mark.

Currently Selected:

Epotor i 12: cwt

Highlight

Copy