Epotor i 11

Piyeer n'ásafin bakate ku Serusalem kéeyilene ku

1*Epotor i ni *kéeyilene ku kéeyemie ku *Súde ni kajam kaanuku bakaake keenooto Esuwif kajoka yooŋ hirim hite Atambatun. 2Hi Piyeer áreeŋina hu Serusalem, Esuwif i kéeyilene ku ni kawatano 3kaano:

—A̱yoosayooso ti kéeyilenut ku *keeteyit ku karam, abe yooŋ n'a̱ñoofo nu boko!

4Náami Piyeer eekamiin beebaje bu akuur but huta hu ti bíjabina du. N'aaniin:

5—H'íyemie hu ti hikinu hihi kaane Sope, ibinabina íyemi ti kalawu, ija kajuku, náami bike bifeeñam. N'ijuk dike doon tu bufor bu tu búwaneina dúsooñanein nu búuma, dija kanokoor n'ebara yómbokun, abe wulaajen wu t'ebaakiir te wo wujokeejok. Ni dibin kaagoroor n'íñje. 6N'ijondoman afiyo tu doon déeyemie du toko, n'ijuk bíndakakureŋ, nu sunuk, nu ñuroon, ni bilele. 7Náami ijama kaaji ni keenam: «Piyeer, a̱rito; a̱yool, abe n'a̱teŋ!» 8Bare n'ísafin eene: «At'a̱jam mo Atemit, ábuki doon déeñeyie, man yooŋ *deekuurut dúmusut buyooso tu butumam.» 9Kaaji ku nu kusooñ kíhaminn t'etiir bufor bu keene: «Doon d'Atambatun aane du dukuurakuur, atum'a̱ane dukuurut.» 10Bondu ni bibaj kireeŋ kíhaaji, abe doon dondu fe ni diñakee t'etiir bufor bu. 11T'ewahatu yendu yooŋ, háyine bákahaaji ni káreeŋin t'enuuf i t'íriyemie du, kánuutin Sesare. Boko káboñinee t'íñje. 12Búwejet Beenabe bu ni beenam iriboor nu boko, hikawam itim hiteyoor. Bokonde hutok n'afeeneŋ u kéeyilene ku ni kásilimbanam, abe n'iriyooso t'enuuf ite ániine éeboñiniin u. 13N'asok uni naane ajuke i amalaka n'áŋaasin t'enuuf te o abe n'aano: «A̱boñ bakan Sope bite Simoŋ ii kaane Piyeer. 14O kasokii kirim kite kafakani, awe ni bakate ku t'awe kareyi fe.» 15N'ísit báhamin bu, Búwejet Beenabe bu nu búwanein toko-toko tu boko naane bibine i búwanein t'úne ti kátiyar ku. 16Náami íbaŋinaa b'Anahaan u abine bu asok aane: «Saaŋ abostaboste ésuk i nu móhujo, bare aruun, aruun *kabostee nu Búwejet Beenabe bu#11.16 A̱juk Epotor i 1.5..» 17Ijukajuk kaanuku doon d'Atambatun awune du úne h'úyilene hu t'Anahaan u Yesu *Kiris, do yooŋ d'awuniin fu. Náami íñje ítumbe fu íyemi aañ kaanuku iijeeŋoor ne o?

18H'aamo hu kajama bondu, náami kabeba. Ni kasokoroor Atambatun kaane:

—Kame fu Atambatun awuna yooŋ keenooto ku Esuwif bítim kaanuku keewatanooro wuhoofoor wooniin, keebaj buroŋ bite nu múniyo.

Bakate ku Antiyoos kéeyilene ku

19H'aamo hu Eejen ayoolee ahaban, *kéeyilene ku ni káhihinooree kayak kayisaloolo#11.19 A̱juk Epotor i 8.1-4.. Bakaake tu boko ni katey bija Fenisi, ni Siipur, n'Antiyoos, iŋi kakaro kawaare kep hirim heesoke hu iŋ'ite hu Yesu, bare t'Esuwif i t'ifi karaan. 20N'abaj bare bakaake bakate Siipur ni Siren kéeyilene keeje Antiyoos, abe ni kasok keenooto ku Esuwif Hirim Heetoofe hite h'Anahaan u Yesu. 21Sembe site Atemit súmoomi nu boko, abe bakan keehooje-hooj ni káyilen, abe ni kayooso ti bítim bite Anahaan u.

22Bakate ku Serusalem kéeyilene ku ni kajam bondu. Náami keeboñ Barnabas bija Antiyoos. 23H'areeŋe hu bo ayak ajuk naane Atambatun ásoniyane i kéeyilene ku, nu hutoofo dómbokun. N'ayaŋgananiin kikaw kareyi fe aaniin kajok alit tip t'Anahaan u nu suhol séehabaneina. 24Múniyo Barnabas an eejake, eehooje bib nu Búwejet Beenabe bu, abe n'abaj yooŋ káyilen kómbokun. Bakan keehooje-hooj ni káwutiyenee ti bítim bite Anahaan u.

25Ahaban, Barnabas n'aja Taris hiŋes Sóol. 26H'ajuko hu, n'abin ne o Antiyoos. Ni kariiko bo emit ñeeba ni kéeyilene ku, abe n'iŋi kaliiken bakan keehooje-hooj. Antiyoos bi kéeyilene ku kaanee fu Ekarjen hítiyar.

27Tu kunak kondu, bakaake *eyiŋana yite Atambatun ni kanuut Serusalem keeja Antiyoos. 28Ake tu boko huruwu hoone Agabus#11.28 A̱juk Epotor i 21.10. n'arito asiiŋo, abe Búwejet Beenabe bu ni bitiŋgo eesok kaanuku bujoñjol bómbokun kabaju t'etaam i ereyi fe. (Múniyo ni bibin bibaj hu Kúlod áyemie hu *áyi ómbokun eeemo u Rom.) 29H'asoke hu bondu ahaban, kéeyilene ku ni kaane boko kasaan huruw doon d'áyinie du, kaanuku man ni kaboñ t'áyokunan kéeyilene ku keekine ku *Súde. 30Múniyo ni káhin bo. Ni kasaan sírirem su Barnabas nu Sóol, kaaniin kaja kasaan *sifaaf site kéeyilene ku.

Currently Selected:

Epotor i 11: cwt

Highlight

Copy