Epotor i 10

Korneyi n'aboñ bite Piyeer

1Abajeebaj Sesare ake ániine huruwio Korneyi. Akina aseef ite esulaan bakate ku Rom ite t'eja yiyi kaane «eja yite Itali». 2Ániine ondu an éejube, abe akina nu butoŋo fe kájeŋginajeŋgin Atambatun. Aŋ'áyokunan dómbokun Esuwif i keebajut ku, abe aŋ'aboo kalawu Atambatun kep. 3Hike hunak taanak tu káafesin, bike ni bifeeño: n'ajuk féet amalaka ite Atambatun tu buyooso te o abe n'aano:

—Korneyi!

4Korneyi n'áheelino ti kábitu kep abe n'aano:

—Kame naŋ nibaje?

Amalaka u n'aano:

—Atambatun asasa kalawu kúuwe nu wusarah waw'á̱hin keebajut ku, abe afiiluti. 5Hahiyu a̱boñ bakan bite Simoŋ ii kaane Piyeer. Ondu Sope 6t'ake ániine aroka wubaŋ, huruwu hoone Simoŋ. Enuuf yeene yendu kaagoroor ni han hu.

7H'aamo hu amalaka éeyemie u ti báhamin bu ne o aja, Korneyi n'aruw bákasuba t'eroka yeene, n'ake t'esulaan yeene ki kasaano ku. Asulaan ondu ájubajub. 8N'asokiin beebaje bu fe, abe n'aboñiin Sope.

9Náami keeja. Hi tifiite hu, boko ti bítim bu kep. Ni kalohen Sope taanak tu ti hikaw. T'ewahatu yendu, Piyeer n'afin asiro t'etiir enuuf i kaanuku eelaw#10.9 Kóŋkeyin, sunuuf site *Israyel iŋi sibaj suwulen naane site bitaah. Iŋi kateef so. Ésuk i iŋi kafand bisiro toko keeyih.. 10Bujoñjol nu bujoko, n'ámaŋi buñoofo. Bokondu ti kañunio kaanuku eeñoofo, n'abaj bike beefeeño. 11N'ajuk bufor bu ni bífeŋgino, abe dike doon tu búwaneina, dunokoor naane ebara, abe wulaajen wu t'ebaakiir te wo wujokeejok. 12Bíndakakureŋ bu fe bíyemie fu toko, nu ñuroon ñu, ni bilele bu. 13Abe kaaji ni keeno:

—Piyeer, a̱rito; a̱yool, abe n'a̱teŋ!

14Bare Piyeer n'ásafin aane:

—At'a̱jam mo, Atemit, ábuki ímusut mayet kateŋu doon déeñeyie man yooŋ *deekuurut#10.14 A̱juk Esaraha i 11.1-47; Esekiyel 4.14.!

15Kaaji ku nu kusooñ kíhamin keeno:

—Doon d'Atambatun aane du dukuurakuur, atum'a̱ane dukuurut.

16Bondu ni bibaj kireeŋ kíhaaji, ahaban, ebara i n'ehaŋ eñakee t'etiir bufor bu.

17Piyeer n'áyemi toko ti kayinoor, aŋ'aane kame fíya beefeeño bii beemo fu naŋ. Háyine hu ku Korneyi aboñe ku káakandijenin kahaban diin t'enuuf ite Simoŋ eemo fu. Náami kahaŋa káreeŋin ti karuŋ ku t'ewahatu yendu. 18Ni karuw, abe ni kákandijen man toko ti Simoŋ ii kaane Piyeer aamo fu.

19Piyeer toko kep ti kayinoor kite beefeeño bu, Búwejet Beenabe bu ni beeno:

—A̱jam, háyine bákahaaji bokondii ti kákandijen. 20A̱rito, a̱wano, abe n'a̱riboor nu boko. Hikawi itim hiteyoor, ábuki íñje íboñiniin fu.

21Náami Piyeer éewanein bibin ti háyine hu abe n'aaniin:

—Íñj'ende, íñje a ariŋes fu. Naŋ n'aribine fu?

22Ni kaano:

—Korneyi, aseef ite esulaan i áboñina fu uni. Ániine éejube. Ájeŋginajeŋgin Atambatun, abe Esuwif i kareyi fe iŋi kasok te o beejake. Ake amalaka ite Atambatun aanoen aruwi bija te o, eeja eejamatan naŋ n'a̱ja fu kasoku koone.

23Náami Piyeer eeeniin kayooso, abe n'arahaniin keeŋot.

Tifiit, n'ariboor nu boko keeja. Bakaake ti bakate ku Sope *kéeyilene ku ni kaja yooŋ keeriboor. 24Tifiit naane kuwaatu, ni kareeŋ Sesare. Korneyi bo ti kanahaniin, akina n'ebuke yeene, ni bákawiyo bajen k'áruwina ku. 25Piyeer áyemia ti kaanu ku eeyooso, Korneyi n'ayaajanooroo, abe n'ájiŋgitan éesukaayo. 26Bare Piyeer n'ajoko aritan abe n'aano:

—A̱rito, ábuki íñje yooŋ húŋgowulan barebare.

27Náami aŋ'áhamin nu Korneyi kep, boko tu buyooso bu t'enuuf i. N'ajuk toko bakan keehooje-hooj ti kakuukanooree. 28N'aaniin:

—Árimoomi kaanuku Eluwa yite y'uni eenaan Asuwif awarut kariboor n'an eenooto Asuwif, man yooŋ n'ayooso te o. Bare Atambatun áwufooramwufoor kaanuku iwarut kajuku an n'eene akuurut, man yooŋ áñeyañeyi. 29Bondu bíkinineŋe fu, h'áriruwinam hu n'ibin t'isokut doon. Hahiyu arisokam baŋka b'áriruwinam fu.

30Korneyi n'aano:

—Abajee hahiyu kunak kíhaaji, ímoomi ti kalawu t'enuuf diye t'ewahatu yende, taanak tu káafesin. Ija kajuku, náami ániine eesiimee wañ weesilane asiiŋaa hágilaam 31abe n'aanam: «Korneyi, Atambatun ajamajam kalawu kúuwe, abe afiilut yooŋ naane aa á̱yokunan keebajut ku. 32Hahiyu a̱boñ bakan Sope bite Simoŋ ii kaane Piyeer. Ondu t'ake ániine aroka wubaŋ, huruwu hoone Simoŋ. Enuuf yeene yendu kaagoroor ni han hu.» 33N'ihaŋ íboñin búuwe, abe á̱hinahin áwariee naane a̱bine i. Hahiyu uni bokondu diye irireyi fe hágila Atambatun, kaanuku iriijamatan bireyi fe b'Atemit asaani bu kaanuku a̱asok uni.

Báhamin bi Piyeer asoke bu t'enuuf tu Korneyi

34Piyeer n'áhamin aane:

—Hahiyu ijoka kaanuku múniyo t'Atambatun ésuk i erare#10.34 A̱juk yooŋ Buluwa bu 10.17.. 35Tánotan fe t'etaam ye, an af'ájeŋgino abe n'aŋ'áhin beejake bu, atoofotoof. 36Atambatun áboñinoboñin *t'Israyel Hirim Heetoofe hite káasuumaay ku, éeŋaasann káasuumaay kondu ti Yesu *Kiris eeemo u Anahaan ite ésuk i ereyi fe. 37Árimoomi beejabe bu bibaj *Gálile, abe ni bibaj yooŋ *Súde ereyi fe hi Saaŋ aa awaare ésuk i, aaniin káhin keebostee. 38Árimoomi yooŋ buŋ b'Atambatun ahoojane fu Yesu ite u *Nasaret nu Búwejet Beenabe bu, abe n'awuno yooŋ sembe. Yesu añaahoorañaahoor ésuk i fe ti káhinu meejake, abe n'aŋ'aritan ki Setani ajoke ku kareyi fe, ábuki Atambatun ámoomi ne o. 39Uni iriseede fu b'áhine bu fe Serusalem, ni ti kaaku kikinu kite Esuwif i. Ni kayoolo hi katibo hu *t'ekuruwa, 40bare Atambatun n'ábatikanno tu buroŋ bu hunak híhaajiyan hu. N'áhino éeŋaasin, 41káanukiiit t'ésuk i ereyi, bare t'eseede i k'Atambatun asoŋke ku bijifan. Boko kaamo fu uni. Iriñoofañoofo abe n'írihujo ne o h'aamo hu aritaa t'eket i. 42N'áhamin uni ayan, aane iriwaare ésuk i, abe n'irisok kaanuku akina aamo fu an u a Atambatun asiiŋane u kaanuku eejoonan keeroŋe ku ni keekete ku. 43*Eyiŋana yite Atambatun fe kasokasok uŋu hoone hu; kaanaan an fe éeyilene ti Yesu, ti sembe site huruwu hondu t'Atambatun aja fu kaboŋketo wuhoofoor wu#10.43 A̱juk Esayi 53.5-6; Seremi 31.34..

Búwejet Beenabe bu nu búwanein ti keenooto ku Esuwif

44Hi Piyeer áyemie hu ti báhamin bu, Búwejet Beenabe bu nu búwanein ti kéeyemie ku ti bajamatan bite hirim hu. 45Esuwif i *kéeyilene ku kéeriboorina ku ni Piyeer ni kajahale dómbokun naane Atambatun awune i keenooto ku Esuwif Búwejet Beenabe bu. 46Múniyo iŋi kajamiin ti káhamin kíhaminiin kuway, abe n'iŋi kasok yooŋ naane Atambatun ahahe i. Náami Piyeer eeene:

47—An fíya áyinooni biteñeko *kaboste tu móhujo bokonde keebaje ku Búwejet Beenabe bu naane úne?

48Abe n'asok aane kabostee tu huruwu hite Yesu *Kiris. Kahaban, ni kalaw Piyeer kaano ariiko nu boko kike kunak.

Currently Selected:

Epotor i 10: cwt

Highlight

Copy