མ་ཏི། 26

ཡི་ཤུ་ཙུང་མེ་ག་ གནས་སྐབས་ཙ་མ༌ལ།

1ཡི་ཤུ་གི་ ཨོ་ཐ་བ་ ཐམས་ཅན་རང་ གསུངས་ཉི་ཆུམ་དེན་གེ་ རོ་ཀི་ རོ་ཀ་སློ་མ་བ་ཀ་གསུངས་མ་ལ་ 2ནོང་ཉིག་ཙིང་དག་པ་ཀབ་ཉི་ གོག་ཉི་དི་ཁཱན་ དུས་ཆེན་གི་ལ་དག་ཉི་ ན་ཤི་སེན༌ཅ། ཉི་ཨོ་ཉ་ནོང་ཀ་ སོ་ངོ་ག་ཟ་ ཁྲིམས་ཤིང་ཐུང་ཀ་ ཇཱན་མེ་ག་དེན་གེ་ རྩིས་སྤྲོད་པེ་དག༌ཉི།

3ཉི་ཨུ་ཉུ་གང་ཀ་ བླ་མ་ཆི་ལུ་བ་དང་ སོ་ངོ་ཆི་ལུ་བ་ བླ་མ་གོང་མ་ཀའི་ཡ་ཕ་ག་ གཟིམ་ཅུང་ག་ ཛོ་མ་ཅ་གི་ཝ༌ལ། 4ཉི་རོག་ཏེ་བ་ཀི་ ཡི་ཤུ་ཙང་ཀེན་ཨ་ཉི་ཙུང་ཐཱན་ བཀྲོངས་མེ་ག་གནས་སྐབས་ ཙམ་ཅ་གི་ཝ༌ལ། 5ཨ་ཤི་རོག་ དུས་ཆེན་ག་ནོང་ཀ་ ཙུང་མེ་མང་ཕ། ཙུང་མ་ད་བུ་ཨ་ནེ་ལ་ སོ་ངོ་བ་ཀི་ གནམ་མེད་ས་མེད་ ཟིང་པེ་རིག་པེ་དག་ཉི་ རོག་ཏེ་བ་ནང་དོ་ ཏུན་ཆ་དྲིག་པ༌ལ༎

བེ་ཐ་ནི་ཡ་ག།

6གོ་མ་ ཀླུ་ན་ཚ་ཁེ་ཁཱན་ སི་མོན་དག་ཁཱན་ཁེ་པ་ བེ་ཐ་ནི་ཡ་དག་ས་ག་ ཆོན་ཅ་གི་ཝ༌ལ། ཉི་ཡི་ཤུ་ རོ་ཀ་ཕའི་ག་བྱོན་ཉི་ 7ཚོགས་བཞེས་ལེ་དེན་གེ་ དོང་ཏཱན་ར་ག་ བཞུགས་པེ་གང་ཀ་ མེ་ཝག་ཙ་ཐུར་གི་ ལུང་གི་ཅོད་པ་ག་ཁོ་ནང་ཀ་ ཤེར་སུང་སུང་ནམ་ཁཱན་ སི་གནམ་མེད་ས་མེད་ གོང་ཆི་ལུ་ཆོ་ཁཱན་ཁེ་པ་ ཕ་ཉི་ཨུན་ཐཱན་ ཡི་ཤུ་ག་ དབུ་གེ་དོང་ཏ་ལུག་པ༌ལ།

8དག་པ་ཀབ་ཉི་ སློ་མ་བ་ཀི་ཐོང་མ་ཀབ་ཉི་ རོག་ཏེ་བ་ རོ་ཙིག་པ༌ལ། ཧང་ཨ་ཉི་ཨོ་ཐ་སི་ མོ་ནང་ཨན་ཅ་གི་ས། 9ཨོ་ཐ་སི་ཁེ་པ་ གོང་ཆི་ལུ་ཨ་ཉི་ཙོང་ཐཱན་ ཏི་རུ་དུག་པུ་བ་ཀ་ བི་ཝ་གི་ནེ་ལ་ དྲིག་པེ་ཆོ་ཝ་དག༌ཉི།

10དག་པ་ཀབ་ཉི་ ཡི་ཤུ་གི་ ཨོ་ཐ་ཀོར་གེ་མཁྱེན་ཉི་ སློ་མ་བ་ཀ་གསུངས་མ་ལ་ ན་ཤི་ རོ་ཀ་ཧང་ཨ་ཉི་ ཁ་ཏང་ཅ་ཡ། རོ་ཀི་ ཇ་ག་དེན་གེ་ ལའི་གནམ་མེད་ས་མེད་ ལེག་པུ་ཐུར་ཨ་ཝ། 11ཧང་ཡ་དག་ནེ་ལ་ ན་ཧ་བ་ཀབ་ཉི་ ཧ་ལ་ཨ་ནེ་བུ་ དུག་པུ་སོ་ངོ་བ་ཨོ་ཕེ། དག་པ་ཀབ་ཉི་ ཇང་ཤོ་ ན་ཧ་བ་ཀབ་ཉི་ ཏ་བུ་ཆོ་ལེ་མང་གི། 12རོ་ཀི་ ཇ་ག་ཐུང་ཀ་ སི་ལུག་པེ་དེན་ཁུངས་ཤོ་ ཇང་ཤི་དེན་གེ་ ཇ་ག་ལུས་པུ་ཁེ་པ་ དུར་ག་ཙུག་པེ་དེན་གེ་ ཅམ་པ་གི༌ལ། 13ཇི་གི་ ན་ཧ་ཐྲང་ཉི་ཡེག་པེ་ ཨོ་ཐ་འཐེན་ལེག་པུ་ཁེ་པ་ འཛམ་གླིང་ ཐམས་ཅན་རང་ ཆ་པ་ཨ་ཉི་ ཨོ་ག་བཤད་པ་ཐུར་ རོག་ཡིད་ཀ་ཨ་ལེ་དེན་གེ་ རོ་ཀི་ཨ་ཁཱན་ག་ཀོར་གེ་བུ་ སོ་ངོ་བ་ཀ་ཡེག་པེ་དག༌ཉི༎

ཡ་ཧུ་ད་གི་ ཡི་ཤུ་ཙུང་མེ་བི་ཝ༌ལ།

14ཨོ་ཉ་ཚི་ངེ་ སློ་མ་སོང་ཉིག་ཙིང་ག་པོང་ཀེ་ ཡ་ཧུ་ད་ཨིས་ཀ་རི་ཡོད་དག་ཁཱན་གི་ བླ་མ་ཆི་ལུ་བ་ཀ་བཱརང་ཀ་ དིན་ཐཱན་ 15ཇི་གི་ཡི་ཤུ་ ན་ཧ་ག་དང་ག་སྤྲོད་ནེ་ལ་ ན་ཤི་ ཇ་ག་ཧང་ག་ལེ་ཡ་དག་ཉི་ ཇི་མ༌ལ། ཉི་རོག་ཏེ་བ་ཀི་ དངུལ་ག་ཏི་རུ་ 30 བི་ཝ༌ལ། 16ཨོ་ཉ་གེ་ག་ཏཱན་ ཡ་ཧུ་ད་གི་ ཡི་ཤུ་ཙུང་མེ་བི་ལེ་ག་ གོ་སྐབས་ལ་མེ་གང་ཅ་གི་ཝ༌ལ༎

གཙོ་བོ་ག་ཚོགས།

17བི་ཏོ་ མ་ཁཱན་ཀེབ་ཏང་ག་ དུས་ཆེན་ག་གོ་མ་ནོང་ཀ་ སློ་མ་བ་ཨུན་ཐཱན་ ཡི་ཤུ་ག་ཞུ་ཝ་ལ་ ཨ་ཤི་ ན་ག་དེན་གེ་ གོག་ཉི་དི་ཁཱན་ག་ཚོགས་ ཨོ་ག་ཅམ་ཅོ་ཡ་དག༌ཉི།

18ན་ཧ་བ་ ཁྲོམ་ཆེན་ནང་ཀ་ དིན་ཅ་ཨ་ཉི་ ན་ཤི་སོ་ངོ་ཐུར་རུ༌མེ། ཉི་ན་ཤི་ རོ་ཀ་ཡེག་ཅོ་ སློབ་དཔོན་གི་ རོ་ཀ་དུས་ཙུན་རེན་པ་ཨ་དེན་གེ་ རོ་ཀ་སློ་མ་བ་ཀབ་ཉི་ གོག་ཉི་དི་ཁཱན་ག་ ཚོགས་ཁེ་པ་ ན་ག་ཕའི་ག་བཞེས་ལེ་དག་ཉི་ གསུངས་ཆོ་ཝ་ཨ༌ཉི། 19ཉི་སློ་མ་བ་ཀི་ ཡི་ཤུ་གི་ གསུངས་མ་ད་བུ་རང་ཨ་ཉི་ གོག་ཉི་དི་ཁཱན་ག་ཚོགས་ ཅམ་པ༌ལ།

20མིང་མེར་དེན་གེ་ ཚོགས་བཞེས་ལེ་དེན་གེ་ ཡི་ཤུ་ རོ་ཀ་སློ་མ་སོང་ཉིག་ཙིང་ཀབ་ཉི་ དོང་ཏཱན་ཀོ་ལོ་ལོ་བཞུགས་པ༌ལ། 21ཉི་རོག་ཏེ་བ་ བཞེས་ལེ་གང་ཀ་ ཡི་ཤུ་གི་གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ ན་ཧ་པོང་ཀེ་ཐུར་གི་ ཇ་ག་མགུ་སྐོར་ཕི་ལེ་དག༌ཉི།

22ཉི་སློ་མ་བ་ གནམ་མེད་ས་མེད་ ཤོ་ནང་མ་ཕེ་ལཱན་ ཐུར་ག་ཚིང་ཚིང་ཐུར་གི་ ཡེག་པེ་གོ་ཙུག་པ་ལ་ གཙོ་བོ་ ཨོ་ཉ་སོ་ངོ་ ཇང་ཏ་མང་གི་དུ་དག༌ཉི།

23རོ་ཀི་ལན་གནང་ཉི་ ཇང་ཀབ་ཉི་གུར་བུ་ནང་ཀ་ ག་དང་ཙུག་ཁཱན་གི་ ཇ་ག་མགུ་སྐོར་ཕི༌ལེ། 24སོ་ངོ་ག་ཟ་རང་ཏ་ རོ་ཀ་ཀོར་གེ་གསུང་རབ་ནང་ཀ་ འབྲི་བ་དང་ཏུ་ཉི་དི༌ལེ། དག་པ་ཀབ་ཉི་ སོ་ངོ་ག་ཟ་ག་ མགུ་སྐོར་ཕི་ཁཱན་སོ་ངོ་ཁེ་པ་ གནམ་མེད་ས་མེད་ ཀ་ལུ་ཨོ་ཕེ། ཨོ་ཉ་སོ་ངོ་གི་ནེ་ལ་ མ་ཀེ་ཝ་གི་ནེ་བུ་ དྲིག་པེ་ཆོ་ཝ་དག་ཉི་ གསུངས་མ༌ལ།

25རོ་ཀ་མགུ་སྐོར་ཕི་ལེ་ཅམ་ཁཱན་ ཡ་ཧུ་ད་གི་ སློབ་དཔོན་ ན་ག་མགུ་སྐོར་ཕི་ཁཱན་ ཇང་གི་ལ་སྨོ་ཨ་ཉི་ ཞུ་ལ་ཀབ་ཉི་ ནཱན་ནཱན་ཏེན་གི་རང་ ཡེག་ལ་དག་ཉི་ ཡི་ཤུ་གི་ རོ་ཀ་གསུངས་མ༌ལ།

26རོག་ཏེ་བ་ བཞེས་ལེ་གང་ཀ་ ཡི་ཤུ་གི་ཀེབ་ཏང་ རོ་ཀ་ཕྱག་ཀ་བསྣམས་ཐཱན་ དཀོན་མཆོག་ག་ བཀའ་དྲིན་བསམ་མ༌ལ། ཉི་རོ་ཀི་ རོ་ཀ་སློ་མ་བ་ཀ་གནང་ཉི་ གསུངས་མ་ལ་ ཨུ་ཐུ་བུ་ཉི་ཟའི། ཨུ་ཐུ་ཤོ་ ཇ་ག་ལུས་པུ་གི་ལ་དག༌ཉི།

27ཉི་རོ་ཀི་བཞེས་ཆ་ རོ་ཀ་ཕྱག་ཀ་བསྣམས་ཐཱན་ བཀའ་དྲིན་བསམ་དེན་གེ་ རོག་ཏེ་བ་ཀ་གནང་ཐཱན་ གསུངས་མ་ལ་ ན་ཧ་བ་ ཐམས་ཅན་རང་ ཨོ་ཐ་གེ་ཇམ༌ཤོ། 28ཨུ་ཐུ་ཤོ་ སོ་ངོ་མང་པུ་ཐུར་ག་ སྡིག་པ་བ་ བཀའ་དྲིན་བསྐྱང་མེ་དེན་གེ་ ལུག་ཉི་འགན་རྒྱ་ཅོད་ཁཱན་ ཇ་ག་ཞི་གི༌ལ། 29ཇི་གི་ ན་ཧ་ཐྲང་ཉི་ཡེག་ཅ་ ཇ་ག་ཡབ་ག་ རྒྱལ་སྲིད་ནང་ཀ་ ན་ཧ་བ་ཀབ་ཉི་ལོག་ཉི་ སེ་ག་རི་སིང་མ་ མ་ཇ་མ་སག་པུ་ ཇང་ཨོ་ཐ་སེ་ག་རི་ ལོག་ཉི་ཧ་ལ་རང་ མ་ཇ་མ་དག་ཉི་ གསུངས་མ༌ལ།

30ཉི་གེ་ རོག་ཏེ་བ་ཀི་ མགུར་མ་ཕུལ་ཐཱན་ ཨོ་ལིབ་ཤིང་ཕུ་ག་ཏཱན་ བྱོན་མ༌ལ༎

པ་ཏྲུས་གི་ གུམ་མ་ཡེ་ལ་ཨ་ཉི་ཡེག་པེ་དག་ ཡི་ཤུ་གི་གསུངས་མ༌ལ།

31ཡི་ཤུ་གི་ རོག་ཏེ་བ་ཀ་གསུངས་མ་ལ་ ཐི་ནོང་བི་ནང་ག་ ན་ཧ་བ་ ཐམས་ཅན་གི་ ཇང་ཐུབ་ཐ༌ལེ། ཧང་ཡ་དག་ནེ་ལ་ གསུང་རབ་གེ་ཤོན་ཅ་

ཇི་གི་ ཤི་ཤ་དི་པ་ཤེ༌ལེ། ཉི་ཤི་ཤ་བ་ ཏོར་ཉི་དི་ལེ་#26:31 ཇ་ཀ་རི་ཡ་ག་དཔེ་ཆ་ 13:7 དག༌ཉི།

32དག་པ་ཀབ་ཉི་ ཇང་ཤི་ཝ་གེ་ ལོག་ཉི་ཝུ་དེན་གེ་ ཇང་ན་ཧ་གུམ་གུམ་ ག་ལིལ་ག་ཏཱན་དི་ལེ་དག༌ཉི།

33པ་ཏྲུས་གི་ཞུ་ཝ་ལ་ བཱརའ་ཐམས་ཅན་གི་ ནཱན་ཐུབ་ཐ་ནེ་བུ་ ཇི་གི་ཏ་ཏི་ངེ་རང་ ཐུབ་མ་ཐ་ལ་དག༌ཉི།

34དག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ཇི་གི་ ན་ག་ཐྲང་ཉི་ཡེག་ཅ་ ཐི་ནོང་བི་ནང་ག་ གོ་ག་མ་ཇིག་པེ་གོ་མ་ ནཱན་གི་ ཇང་གུམ་མ་ཡེ་ལ་ཨ་ཉི་ ཤེབ་སམ་ཡེག་པེ་དག༌ཉི།

35པ་ཏྲུས་གི་ཞུ་ཝ་ལ་ ཇང་ནཱན་ཀབ་ཉི་ ཤི་ལེ་ཁེ་ནེ་བུ་ ཇི་གི་ ནཱན་གུམ་མ་ཡེ་ལ་ཨ་ཉི་ མ་ཡེག་པ་དག༌ཉི། ཉི་བཱརའ་སློ་མ་བ་ཀི་བུ་ ཨོ་ཉེན་རང་ཞུ་ཝ༌ལ༎

གེད་ས་མ་ནི་ག་ སྨོན་ལམ་ཏ་པ༌ལ།

36ཡི་ཤུ་ རོ་ཀ་སློ་མ་བ་ཀབ་ཉི་ གེད་ས་མ་ནི་དག་ས་ག་ཏཱན་བྱོན་ཐཱན་ རོ་ཀི་ རོག་ཏེ་བ་ཀ་ གསུངས་མ་ལ་ ཇང་ལེང་དིན་ཐཱན་ སྨོན་ལམ་ཏ་པེ་གང་ཀ་ ན་ཧ་བ་ ཨོ་ཐ་ག་ལང་ཉི་ཆོའི་ན་དག༌ཉི། 37ཉི་རོ་ཀི་ པ་ཏྲུས་དང་ ཇབ་དི་ཡ་ག་ཟ་ཉིག་ཙིང་ རོག་ཀབ་ཉི་བསྣམས་པ༌ལ། ཉི་རོག་ གནམ་མེད་ས་མེད་ ཐུགས་ཕམ་ཉི་ ཐུགས་དོག་པེ་གོ་ཙུག་པ༌ལ། 38ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཇང་གནམ་མེད་ས་མེད་ སེམས་ཤོག་ཉི་ ཤི་ལེ་ད་བུ་རང་རི་ཝ༌ཅ། ན་ཧ་བ་ ཨོ་ཐ་ག་ཆོ་ཉི་ ཇང་ཀབ་ཉི་གོད་ཅོ་ན་དག༌ཉི།

39ཉི་ཨོ་ཉ་གེ་ ད་སུར་ལེང་བྱོན་ཐཱན་ ཞལ་ས་ག་ཏེས་ཉི་ སྨོན་ལམ་ཏ་པ༌ལ། ཇ་ག་ཨ་པ་ རེན་ཐཱན་ཨ་ནེ་ལ་ ཨོ་ཐ་དཀའ་ཝ་ཅཱད་པེ་ཁེ་ཁཱན་གུར་བུ་ ཇང་གེ་བསྣམས་ཅོ། དག་པ་ཀབ་ཉི་ ཇ་ག་སེམས་དང་ཏུ་ཉི་མང་གི་ཝ་ ན་ག་ཐུགས་དང་ཏུ་ཉི་གི་ལ་དག༌ཉི།

40རོག་ལོག་ཉི་ རོ་ཀ་སློ་མ་བ་ཆོ་ས་ག་བྱོན་ཉི་ གཟིགས་པ་ཀབ་ཉི་ རོག་ཏེ་བ་ ཡིབ་ཉི་ཆོ་ཝ་ཅ་གི་ཝ༌ལ། ཉི་རོ་ཀི་པ་ཏྲུས་ག་ གསུངས་མ་ལ་ ན་ཤི་ ཇང་ཀབ་ཉི་ གཱན་དྲ་ཐུར་བུ་གོད་ཉི་ ཆོ་ལེ་རེ་བུ་མ་ལ་སྨོ། 41ན་ཧ་བ་ བར་ཆད་ནང་ཀ་ མ་ཚུད་ཅེན་དག་པ་གི་ གོད་ཐཱན་ སྨོན་ལམ་ཏབ་ཅོ། ཧང་ཡ་དག་ནེ་ལ་ རྣམ་ཤེས་གི་རང་ཏ་ སེམས་ཨ་ན། དག་པ་ཀབ་ཉི་ ལུས་པུ་གི་ གོ་ཆོད་པུ་མ་ལ་དག༌ཉི།

42ཉི་ཨོམ་ཆང་རང་ ཤེབ་ཐུར་ རོག་བྱོན་ཐཱན་ ཇ་ག་ཨ་པ་ ཇི་གི་མ་ཇ་མ་སག་པུ་ ཨོ་ཐ་གུར་བུ་ཁེ་པ་ ཇང་གེ་བུ་ལེ་མ་ན་ནེ་ལ་ ན་ག་ཐུགས་དང་ཏུ་ཉི་ ཇུང་ཆེན་དག་ཉི་ སྨོན་ལམ་ཏ་པ༌ལ། 43རོག་ལོག་ཉི་བྱོན་མ་ཀབ་ཉི་ སློ་མ་བ་ ཨོམ་ཆང་རང་ ཡི་ཕ་ཁྲ་པ༌ལ། ཧང་ཡ་དག་ནེ་ལ་ རོག་ཏེ་བ་ཀ་མིང་ གནམ་མེད་ས་མེད་ ཅིད་པུ་རི་ཝ་ཆོ་ཝ༌ལ།

44ཉི་ཨོམ་ཆང་རང་ རོག་སྨོན་ལམ་ཏ་པེ་ག་བྱོན་ཐཱན་ གོ་མ་ག་ད་བུ་རང་ཞུ་ཝ༌ལ། ཨོ་ཐ་ཤེག་པ་ སྨོན་ལམ་ཏབ་ཉི་ ཤེབ་སམ་དིན་ཅ་གི་ཝ༌ལ། 45སྨོན་ལམ་ཏབ་ཉི་ ཆུམ་དེན་གེ་ རོག་ལོག་ཉི་བྱོན་ཐཱན་ སློ་མ་བ་ཀ་གསུངས་མ་ལ་ ན་ཧ་བ་ ཨོ་མ་བུ་ ཡིབ་ཉི་ཤོང་ལཱན་ཅ་སྨོ། གོད་ཅོ་ སོ་ངོ་ག་ཟ་ སྡིག་ཅན་བ་ཀ་ ག་དང་ག་སྤྲོད་པེ་ག་ དུས་ཙུན་རེན་པ། 46ཝུའི་ ཨ་ཧ་བ་དི་ཁེ། གོད་ཅོ་ ཇ་ག་མགུ་སྐོར་ཕི་ཁཱན་ཁེ་པ་ ཨུ་ན་དག༌ཉི༎

ཡི་ཤུ་ཙུང་མ༌ལ།

47རོ་ཀི་གསུངས་ཉི་ མ་ཆུ་མེ་གོ་མ་ སློ་མ་སོང་ཉིག་ཙིང་ག་པོང་ཀེ་ ཡ་ཧུ་ད་དག་ཁཱན་ཁེ་པ་ ཤེག་པ༌ལ། རོག་ཀབ་ཉི་ གི་རིང་དང་ ཏོ་ཀང་མེན་ཁཱན་ སོ་ངོ་མང་པུ་ཐུར་ཅ་གི་ཝ༌ལ། ཉི་རོག་ཏེ་བ་ཤོ་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀི་ ཀུན་ཏི་ཝ་གི་ཝ༌ལ། 48ཇི་གི་ཅུབ་ཨ་ཁཱན་ སོ་ངོ་ཁེ་པ་ ན་ཤི་ཙུང་ཤོ་ན་དག་ཉི་ ཡ་ཧུ་ད་གི་ གོ་མ་གེ་རང་ སོ་ངོ་བ་ཀ་ད་ལེན་ཨ་ཉི་ ཐ་ཝ་ཅ་གི་ཝ༌ལ། 49ཉི་ཡ་ཧུ་ད་གི་ཐྲང་ཉི་རང་ ཡི་ཤུ་ག་སྐུན་མདུན་ག་ཨུན་ཐཱན་ སྐུ་གཟུགས་བཟང་པོ་ སློབ་དཔོན་དག་ཉི་ ཞུན་ཐཱན་ ཅུབ་ཨ་ཝ༌ལ།

50ཡི་ཤུ་གི་ རོ་ཀ་གསུངས་མ་ལ་ ཇ་ག་ཇ་རོ་ ནཱན་གི་ ཨ་ལེ་ག་དེན་གེ་ ཨུ་ཁཱན་ཁེ་པ་ཨའི་དག༌ཉི།

ཉི་སོ་ངོ་བ་ཨུ་ཉི་ ཡི་ཤུ་ཙུང་ཐཱན་ དམ་དམ་ཨ་ཉི་ཐ་ཝ༌ལ། 51ཡི་ཤུ་ཀབ་ཉི་ཆོ་ཁཱན་བ་ཀ་པོང་ཀེ་ ཐུར་གི་ཆོ་ཝང་ཤོ་ཝ་ཐྲེ་ཀེ་རང་ བླ་མ་གོང་མ་ག་ གཡོག་པ་ཐུར་ག་ ན་ཅཱད་ཉི་གེ་མ༌ལ།

52དག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ན་ག་ཆོ་ཝང་ལོག་ཉི་ རོ་ཀ་ཤུམ་ནང་ཀ་ཙུག་ཅོ། ཧང་ཡ་དག་ནེ་ལ་ ཆོ་ཝང་ཤོ་ཁཱན་སོ་ངོ་ ཐམས་ཅན་རང་ ཆོ་ཝང་ག་ཐུང་ཀེ་ཨ་ཉི་རང་ ཇཝ་ཆུ༌མེ། 53ཇི་གི་ ཇ་ག་ཨ་པ་ག་ཞུ་ནེ་ལ་ ཇ་ག་ཨ་པ་གི་དམག་ཕི་ཁཱན་ ཞིང་ཁམས་ག་འཐེན་པ་ 72000 གེ་ལག་ཉི་ ཀུན་ཏི་ལེ་དག་ཉི་ ན་ཤི་སེ་ལུ་མ་ལ་སྨོ། 54དག་པ་ཀབ་ཉི་ ཇི་གི་ཨུ་ཉུ་ད་བུ་ཨ་ནེ་ལ་ ཨུ་ཐུ་ད་བུ་ཇུང་མེ་དག་ཉི་ ཤོ་ཁཱན་གསུང་རབ་ཁེ་པ་ ཧང་ཏེན་ཨ་ཉི་ དེན་ཐ་འགྲུབ་ཕེ་རེ་བེ་ཡ་དག༌ཉི།

55ཨོ་ཉ་ཚི་ངེ་ ཡི་ཤུ་གི་ སོ་ངོ་མང་པུ་ཨ་ཉི་ ཛོམ་ཁཱན་བ་ཀ་ གསུངས་མ་ལ་ ཇང་ཁྲིམས་གེ་ གེ་བ་ལའི་ཨ་ཁཱན་ གི་ཝ་པུརུས་ཀིན་ཨ་ཉི་ ཇང་ཙུང་མེ་དེན་གེ་ ན་ཧ་བ་ གི་རིང་དང་ ཏོ་ཀང་བ་ཕ་ཉི་རང་ ཨོ་ཕེ་ཁེ་ཝ་སྨོ། ནོང་དྲང་རང་ ཇང་མཆོད་ཁང་ནང་ཀ་ སོ་ངོ་བ་ཡེ་ཉི་ཆོ་ལེ་གང་ཀ་ ན་ཤི་ ཇང་མ་ཙུང་ཤི། 56དག་པ་ཀབ་ཉི་ ཨོ་ཐ་བ་ ཐམས་ཅན་རང་ ཇུང་ཁཱན་ཤོ་ ལུང་བསྟན་པ་བ་ཀི་ གསུང་རབ་ནང་ཀ་འབྲི་ཁཱན་བ་ དེན་ཐ་འགྲུབ་ཕེ་དེན་གེ་ ཇུང་ཅ་གི་ལ་དག༌ཉི། ཉི་སློ་མ་ཐམས་ཅན་གི་ རོག་ཐུབ་ཐ་ཉི་ གཱན་ཇོང་མ༌ལ༎

ཡི་ཤུ་ཚོགས་འདུ་ཆི་ལུ་ག་གུབ་ཀ།

57ཉི་གེ་ ཡི་ཤུ་ཙུང་ཁཱན་བ་ཀི་ རོག་བླ་མ་གོང་མ་ ཀའི་ཡ་ཕ་ག་གཟིམ་ཅུང་ག་ཏཱན་ བུ་ཝ༌ལ། ཉི་བླ་མ་གོང་མ་ག་གཟིམ་ཅུང་ག་ བཀའ་ཁྲིམས་ག་ སློབ་དཔོན་བ་དང་ སོ་ངོ་ཆི་ལུ་བ་ ཛོ་མ་ཅ་གི་ཝ༌ལ། 58དག་པ་ཀབ་ཉི་ པ་ཏྲུས་གི་ ཇང་ཀིན་གེ་ཨ་ཉི་ ཡི་ཤུ་ག་ཚིང་ཚིང་དི་ཉི་ བླ་མ་གོང་མ་ག་ཕའི་གུབ་ཀ་ ཝུང་ག་སག་པུ་ཤེག་པ༌ལ། ཉི་རོག་ནང་ཀ་དིན་ཐཱན་ ཧང་ཇུང་ལ་སྨོ་ གོད་པེ་དེན་གེ་ སྲུང་རྒྱབ་པ་བ་ཀབ་ཉི་ ལང་མ༌ལ།

59ཉི་བླ་མ་ཆི་ལུ་བ་དང་ ཚོགས་འདུ་ཆི་ལུ་ག་ ཚོགས་པ་ཐམས་ཅན་གི་ ཡི་ཤུ་བཀྲོངས་མེ་དེན་གེ་ སོ་ད་ཕི་ཉི་ འཛོམས་དཔང་ཨ་ཁཱན་ སོ་ངོ་ལ་མ༌ལ། 60སོ་ད་ཕི་ཉི་ འཛོམས་དཔང་ཨ་ཁཱན་ སོ་ངོ་མང་པུ་ཐུར་ གུབ་ཀ་ཨུན་ཐཱན་རང་གི་ནེ་བུ་ ཁུངས་ཀེ་བེ་རེ་ཁཱན་ སོ་ངོ་ཐུར་རང་མ་ཤོ་ཝ༌ལ། ཇུ་ཀ་དག་པ་ཀབ་ཉི་ སོ་ངོ་ཉིག་ཙིང་ཨུན་ཐཱན་ 61ཡེག་པ་ལ་ དཀོན་མཆོག་ག་ མཆོད་ཁང་ཁེ་པ་ དེད་གེམ་ཐཱན་ ངམ་སམ་ག་ ལོག་ཉི་བཞེངས་པེ་རེ་བེ་དག་ཉི་ ཨོ་ཐ་སོ་ངོ་གི་ ཡེག་ཆོ་ཝ་ཨ༌ཉི།

62བླ་མ་གོང་མ་ ག་བཞེངས་ཐཱན་ ཡི་ཤུ་ག་ཇི་མ་ལ་ ནཱན་གི་ ཨོ་ཐ་ཆཱས་ག་ ལན་བི་ལེ་ག་ ཧང་རང་མཱན་ཅ་སྨོ། ནཱན་གི་ ནཱན་ནཱན་ཏེན་ག་རྒྱབ་ཨ་ཉི་ ཧང་ཡེག་པེ་ཅ་ཡ་དག༌ཉི། 63དག་པ་ཀབ་ཉི་ ཡི་ཤུ་གི་ ཧང་རང་མ་གསུངས་མ༌ལ། ཉི་བླ་མ་གོང་མ་གི་ རོ་ཀ་ཇི་མ་ལ་ གསོན་པོ་དཀོན་མཆོག་ག་མཚན་ག་ ཇི་གི་ ན་ག་ཇིམ་ཅ་ ནཱན་དཀོན་མཆོག་ག་སྲས་ ཁིརིས་གི་ལ་སྨོ་ཨ༌ཉི།

64ཡི་ཤུ་གི་ རོ་ཀ་གསུངས་མ་ལ་ ཇང་གི་ལ་ཨ་ཉི་ ནཱན་གི་རང་ཡེག༌ལ། དག་པ་ཀབ་ཉི་ ཇི་གི་ ན་ག་ཡེག་ཅ་ ཨོ་ཐ་གེ་ག་ཏཱན་ ནཱན་གི་ སོ་ངོ་ག་ཟ་ ཐམས་ཅན་གེ་ ཤུག་ཅཱན་དཀོན་མཆོག་ག་ ལ་ཉོང་ལོ་ཀ་ལང་མ་ཐོང༌མེ། ཉི་ཞིང་ཁམས་ག་ མུག་པ་ཐུང་ཀ་ ལོག་ཉི་ཨོ་ཕ་ཐོང་མེ་དག༌ཉི།

65ཉི་བླ་མ་གོང་མ་གི་ རོ་ཀ་ནམ་བཟའ་རེད་གེམ་ཐཱན་ གསུངས་མ་ལ་ ཨོ་ཐ་སོ་ངོ་གི་ སྐུར་པ་ཞུ་ན། ཨོ་ཐ་གེ་ལག་ཉི་ ཧང་ཁུངས་ཀེ་བེ་ཁེ་ལེ་ཡ། ཨོ་མ་ཤ་ སྐུར་པ་ཞུ་ཝ་ག་ ན་ཤི་ ན་ཐ་ཝ་དག༌ཉི། 66ན་ཤི་ཨ་ནེ་ལ་ ཨ་ཤི་ རོ་ཀ་ཧང་ཨ་ལེ་ཁེ་ལེ་ཡ་དག་ཉི་ ཇི་མ་ཀབ་ཉི་ རོག་ཏེ་བ་ཀི་ཡེག་པ་ལ་ རོག་ཤེ་ལེ་ཁེ་ལེ་དག༌ཉི།

67ཉི་གེ་ རོག་ཏེ་བ་ཀི་ རོ་ཀ་ཞལ་ག་ ཐོབ་ཏང་ཚེན་ཐཱན་ མུ་ཏྲུ་མེ་ཕིན་བི་ཝ༌ལ། ཉི་ཚེ་བང་གི་ དེན་ཇ་ཀི་ཕིན་བིན་ཐཱན་ 68ཡེག་པ་ལ་ དབའི་ཁིརིས་ ནཱན་ཨི་བི་གི་ཀོང་མ་ཡ། ཨ་ཧ་ཏཱན་ལུང་བསྟན་ཤོ་དག༌ཉི༎

པ་ཏྲུས་གི་ ཡི་ཤུ་གུམ་མ་ཡེ་ལ་ དག་ཉི་ཡེག་པ༌ལ།

69པ་ཏྲུས་ ཕིས་ཀ་ཕའི་གུབ་ཀ་ ཝུང་ག་ལང་ཉི་ ཆོ་ལེ་གང་ཀ་ གཡོག་ཨ་ཁཱན་ ཟ་མིན་ཐུར་ཨུ་ཉི་ ཡེག་པ་ལ་ ནཱན་བུ་ ག་ལིལ་ག་ ཡི་ཤུ་ཀབ་ཉི་ཆོ་ཝ་དག༌ཉི།

70དག་པ་ཀབ་ཉི་ རོ་ཀི་ རོག་ཏེ་བ་ ཐམས་ཅན་ག་གུབ་ཀ་ ཁ་མ་དོག་པཱན་ ཡེག་པ་ལ་ ནཱན་གི་ ཧང་ག་ཀོར་གེ་ ཡེག་ཅ་གི་ལ་སྨོ་ ཇི་གི་ཧ་མ་གོན་ཤི་དག༌ཉི།

71ཉི་གེ་ རོག་ཕིས་ཀ་ སྒོ་རེ་ཁ་ར་ག་དི་ཉི་ཆོན་ཅ་ཨ་ཉི་ ཨོ་ཉ་ག་བུ་ གཡོག་ཨ་ཁཱན་ བཱརའ་ཟ་མིན་ཐུར་གི་ཐོང་ཉི་ རོ་ཀ་ཀོ་ལོ་ལོ་ ཐིང་ཉི་ཆོ་ཁཱན་བ་ཀ་ ཡེག་པ་ལ་ ཨོ་ཐ་སོ་ངོ་ ནཱས་རི་པ་ ཡི་ཤུ་ཀབ་ཉི་ཆོ་ཝ་དག༌ཉི།

72ཉི་ཨོམ་ཆང་རང་ རོ་ཀི་ན་ཟ་ཉི་ཡེག་པ་ལ་ ཇི་གི་ ཨོ་ཐ་སོ་ངོ་ གུམ་རང་མ་ཡེ་ལ་དག༌ཉི།

73རེབ་ཀིན་ཐུར་ག་ཚི་ངེ་ ཨོ་ཉ་ག་ཐིང་ཉི་ཆོ་ཁཱན་ སོ་ངོ་བ་ཀི་ པ་ཏྲུས་ཆོ་ས་ག་དིན་ཐཱན་ ཡེག་པ་ལ་ ནཱན་ཏེན་ཏེན་རང་ རོག་ཏེ་བ་ཀ་པོང་ཀེ་ ཐུར་གི༌ལ། ཧང་ཡ་དག་ནེ་ལ་ ན་ག་ཆཱས་ཨ་ཐང་ག་གོད་ཉི་ ཨ་ཤི་སེ་ལེ་དག༌ཉི།

74ཉི་པ་ཏྲུས་གི་ན་ཟ་ཉི་ ཇང་གིན་ཐཱན་ཨ་ནེ་ལ་ ཇི་གི་ཁྲིམས་ཉོང་ཅེན། ཧང་ཡ་དག་ནེ་ལ་ ཇི་གི་ ཨོ་ཐ་སོ་ངོ་ གུམ་རང་མ་ཡེ་ལ་དག་ཉི་ ཡེག་པ༌ལ། ཉི་ཨོ་ཉ་ཐྲེ་ཀེ་རང་ གོ་ག་ཇིག་པ༌ལ།

75གོ་ག་མ་ཇིག་པེ་གོ་མ་ ནཱན་གི་ ཇང་གུམ་མ་ཡེ་ལ་ཨ་ཉི་ ཤེབ་སམ་ཡེག་པེ་དག་ཉི་ ཡི་ཤུ་གི་གསུངས་ཁཱན་ཁེ་པ་ པ་ཏྲུས་གི་ ཡིད་ཀ་ཨ་ཝ༌ལ། ཉི་རོག་ཕིས་ཀ་དིན་ཐཱན་ གནམ་མེད་ས་མེད་གེ་ཕ༌ལ༎

Currently Selected:

མ་ཏི། 26: TNTB

Highlight

Copy