Matiye 7

Mì bí wóo lè ɓán lìe wɛ̀

Lik 6.37-38; 7.41-42

1«Mì bí wóo lè ɓɛ̀lɛ kɛ́ lìe, ɛ́ Dɔfĩn ɛ́ ɓiɛ̀ yá lè mì lìe wɛ̀. 2Iè hɔ̀ lɛ ɛ́ bòo lɛ ɛ́ mí dàá ɛ́ wóò lè ɓɛ̀lɛ kɛ́ lìe, iè pe ɛ́ Dɔfĩn ɛ́ ɓiɛ̀ ɓén lè mì lìe kɛ̀amu. Ɛ̀ lè dìɛ lɛ ɛ́ mí wóò dàá màatɛ̃́ hɔ́ bòo ɛ̀ lɛ́ ɓɛ́ nìnbirìe ǹ, iè pe ɛ́ Dɔfĩn ɛ́ ɓiɛ̀ ɓén dàá màatɛ̃́ ɛ́ lɛ́ miɛ ǹ. 3Kɔ́ wiɛ dàa loo le kã́a-cíi lɛ wi mi ńkɔnù yìi hũn, kɛ́ kɔ́ den yí loo le zúie lɛ wi kɔpe kɔ̀ yìi hũn? 4Ɛ́ kɔ́ wo wiɛ dàa dɛ̀ ɛ́ zɔ́ bie ɛ́ lɛ́ mì ńkɔnù ǹ nɛ làa: “Dìń nɛ n leń lé kã́a-cíi lɛ wi kɔ yìi hũn,” kɛ́ kɔ́pe ɛ́ lé zúie ɛ́ lò wi yìi hũn? 5Nìhĩ́dé, leń lé zúie lɛ wi kɔ yìi hũn vé, ɛ́ kɔ́ yìe den mi bòo ɛ́ dàá leń lé kã́a-cíi lɛ wi mì ńkɔnù yìi hũn.

6Mì bí wóo kóosí hɔ́ bòo lɛ bòo sɛ̃̀ Dɔfĩn ɛ́ lɛ́ ɓɛ́ bɔhĩ́ ǹ wɛ̀. Kɛ́ dàa bòo mí, ɛ́ ɓɛ́ bĩní khũa khíi khã̀akɛ miɛ. Ɛ̀ mì bí wóo kóosí mí líɛrɔ́ ɓɛ̀ nɛ̀nbùɛhĩ́ laahĩ́ hũn wɛ̀. kɛ́ dàa bòo mí ɛ́ ɓɛ́ nàa hɔ ɛ́ yáakɛ.»

Mì wóo hɛ̃un Dɔfĩn

Lik 11.9-13; 6.31

7«Mì hɛ̃un Dɔfĩn ɛ́ Hɔ́ ɓén lɛ́ bòo miɛ ǹ; ɛ̀ mì cɛ̀ ɛ́ mí ɓén mi; ɛ̀ mì ɓánɓɛ́ lé zĩínù ɲunù ɛ́ ɓɛ́ ɓén hán lé ɛ́ lɛ́ miɛ ǹ. 8Iè hɔ̀ lɛ ɛ́ nìnbírɔ lɛ ɛ́ wóò hɛ̃un ɛ́ wóò yí, àlɛ ɛ́ wóò cɛ̀ ɛ́ wóò mi, àlɛ ɛ́ wóò ɓánɓɛ́ lé zĩínù ɲunù ɛ́ ɓɛ́ wóò hán lé ɛ̀ lɛ́ nin. 9Á wie mì tĩ́ihṹ kɛ́ piè yɛ̀nù ɛ́ hɛ̃nnɛ búrú piè viì á khíi wé sɛ̃̀nlè á mìí ɛ́ lɛ́ à ǹ? 10Tàá kɛ́ á hɛ̃nnɛ cɔ, á wé hóonú á lɛ́ à ǹ? 11Kɛ́ mípe lɛ iè ɓɛ̀ mɛkɛ̃nɲiì ɓàasiè ɛ́ ɓen dũ bòo lɛ sãa ɛ́ wóò lɛ́ mí nìɛ ǹ, ɛ̀ mì Yàá lɛ wi hɔ hóohũn ɛ́ temu yá ɓen lɛ́ hɔ́ bòo lɛ sãa ɓɛ̀lɛ ɛ́ hɔ̀ hɛ̃un pie viì?

12Hɔ̀ bòo lɛ ɛ́ mí wɛ nɛ ɓɛ nìnbirìe ɛ̀ wé lɛ́ miɛ ǹ míkùi ɛ́ mí ɓiɛ̀ wóo wé hɔ́ ɓà ńmàa ɛ̀ lɛ́ ɓà ǹ, sí iè hɔ̀ bòo lɛ á Moyiize làndɛ́ àá ɓɛ́ Dɔfĩn bɔ̀háaníriè ɛ́ wɛ̃́.»

Lè zĩínù ɲunù lɛ mìniɛ bòo

Lik 13.24

13«Mì zɔ àá lé zĩínù ɲunù lɛ mìniɛ. Iè hɔ̀ lɛ ɛ́ hɔ́ húmú zĩínù ɲunù ɛ́ temu ɓàń, ɛ̀ lè wṹn lɛ ɛ́ wóò bè ɛ̀ dàá vɛ yán ɛ́ bènlɔ́ tĩ. Ɛ́ nìnbí-kuì iè lèpe ɛ́ ɓɛ́ wɛ ɛ́ wóò bè. 14Kɛ́ lé mɛkɛ̃nì zĩínù ɲunù ɛ́ pe mìniɛ, ɛ̀ lè wṹn lɛ wóò bè ɛ̀ dàá vɛ yán ɛ́ bènlɔ́ lɔ̀nbiè wi. Ɛ́ ɓɛ́ nìnbirìe lɛ wóò mi le wṹn sɔ ɛ̀ bè ɛ́ yí buò wɛ̀.»

Ɓɛ̀ ɓúo Dɔfĩn bɔ̀háaníriè bòo

Lik 6.43-44

15«Mì wóo pɛ mite àá ɓɛ́ ɓúo Dɔfĩn bɔ̀háaníriè. Ɓɛ̀ wóò ɓen mì viì kɛ̀a ɓɛ piriè, kɛ́ ɓɛ́ den zɔn iè mɛkɛ̃nɲiì ɓàasiè ɓɛ́ tĩɛ̀ hũn kɛ̀a ɓɛ maa bɔhĩ́ bòo sí. 16Mí wóo ɓén dũń ɓɛ́ àá peɓɛ̀ bɔ̀werà kɛ̀a bòo lɛ ɛ́ lé vɛ̃̀hṹ ɛ́ dàa wóò dũń àá pelè bìe. Ɛ́ nìnbírɔ ɛ́ yáà vɛ ɲuà vuà ńɲinlɛ̀a vɛ̃̀hṹ ǹ wɛ̀, ɛ̀ nìnbírɔ ɛ́ lò yáà vɛ khé ńɲiɛ̀ ńsã̀amú vɛ̃̀hṹ ǹ wɛ̀. 17Vɛ̃̀n-sãanù ɛ́ wóò hɛ biè lɛ sãa ɛ̀ vɛ̃̀n-koohɔ́ ɛ́ wóò hɛ biè lɛ yí sãa. 18Vɛ̃̀n-sãanù ɛ́ yí dɛ̀ biè lɛ yí sãa ɛ́ yá hɛ wɛ̀, ɛ̀ vɛ̃̀n-koohɔ́ ɛ́ yí dɛ̀ biè lɛ sãa ɛ́ yá hɛ wɛ̀. 19Ɛ́ vɛ̃̀hṹ yée vɛ̃̀hṹ lɛ yáà hɛ biè lɛ sãa ɛ́ ɓɛ́ wóò ɓúu ɛ́ vɛ tɛ́ dé hɔ́ dṹn hũn. 20Ɛ́ ɓɛ́ ɓúo Dɔfĩn bɔ̀háaníriè bɔ̀werà ɛ́ temu ɓén lɛ́ ɛ́ mí dàá dũń ɓɛ́.»

Ɓɛ̀ nìnbirìe lɛ ɓén zɔ Dɔfĩn bɛ́záanú bòo

Lik 13.25-27

21«Ɓɛ̀ yí ɓɛ́ nìnbirìe lɛ wóò ve mi nɛ “Ɲunsɔ, Ɲunsɔ” ɓɛ́kùi ɛ́ temu ɓén zɔ Dɔfĩn bɛ́záanú hũn wɛ̀. Kɛ́ ɓɛ́ iè ɓɛ̀lɛ ɛ́ wóò wi-e pe ǹ Yàá lɛ wi hɔ hóohũn tĩì bòo ɓɛ́ dòonún. 22Hɔ̀ lìe lènlɔ́ zɔǹ ɛ́ nìnbí-kuì ɛ́ wóò ɓén bie lɛ́ mi ǹ nɛ làa: “Ɲunsɔ, Ɲunsɔ, ké hàaníkɛa kɔ̀ bòo ɛ́ lɛ́ ɓɛ́ nìnbirìe ǹ kɔ̀ yèrè lɔ̀n, ɛ̀ kè ɲɛun ɓɛ̀ ɲíkĩ́nìɛ ɛ́ líeniɛ ɓɛ̀ nìnbirìe ǹ kɔ̀ yèrè lɔ̀n, ɛ̀ ké wɔ́ yéréké bòo bɔ̀kuì kɔ̀ yèrè lɔ̀n.” 23Ɛ́ ń den ɛ́ zɔ́ bie ɛ́ lɛ́ ɓà ǹ nɛ làa: “Ń yí dũ miɛ wɛ̀, ɛ́ mí khɛ̃̀ún vɛ sɔ́n sɔ́n, mípe bɔ̀konwériè lɛ!”»

Ɓɛ̀ zũteriè bìɛ ɲu wĩì

Lik 6.47-49

24«Ɛ́ sí iè hɔ̀ pe, kɛ́ nìnbírɔ ɛ́ ɲɛ́ hɔ́ bòo lɛ ɛ́ nín bie à tɛ̀ ɛ́ hɔ̀ wé, à dɛ̃̀ kɛ̀a bɔ̀dũmunù ɓàasɔ lɛ tɔn mí zũnù lè lɛnù lɔ̀n. 25Ɛ́ hɔ́ hóo ɛ́ ɓɛrɛ tɔ̀, ɛ́ hɔ́ vṹuhɛ̃ ɛ́ túkɛ ɛ́ cáa, ɛ́ lé pinpi-bɛhɔ́ ɛ́ zɔ̀ ɛ́ ɓen lɔ́ lé zũnù sɔ lɔ̀n, kɛ́ lé zũnù sɔ ɛ́ yí ɓúu wɛ̀. Iè hɔ̀ lɛ ɛ́ pelè fìi ɛ́ síɛ ɲɛ̀ lè lɛnù lɔ̀n. 26Ɛ̀ nìnbírɔ lɛ ɛ́ ɲɛ́ hɔ́ bòo lɛ ɛ́ nín bie, kɛ́ á pɛ̃́ ɛ́ yá hɔ̀ wé, à dɛ̃̀ kɛ̀a bɛ̃́nbṹ lɛ tɔn mí zũnù hɔ̀ hã̀anì lɔ̀n. 27Ɛ́ hɔ́ hóo ɛ́ ɓɛrɛ tɔ̀, ɛ́ hɔ́ vṹuhɛ̃ ɛ́ túkɛ ɛ́ cáa, ɛ́ lé pinpi-bɛhɔ́ ɛ́ zɔ̀ ɓɛrɛ lɔ́ lé zũnù lɔ̀n, ɛ́ lé ɓúo khie síɛ. Ɛ́ pe hɔ̀ bɔ̀yàarè ɛ́ ɓàaniɛ cɛ̃̀un.»

Yiezu bienù pànkɛ́ bòo

28Ɛ́ hɔ́ lɛ ɛ́ Yiezu ɛ́ bie hɔ̀ pe biehĩ́ sí míkùi vɔ́, ɛ́ ɓɛ́ nìnbí-dũmu ɛ́ piè kɛ̀ránlɔ́ sɔ ɛ́ hɛ̀ zɔnnin, 29iè hɔ̀ lɛ á yáà wé kɛ̀a Moyiize làndɛ́ kɛ̀ránliè, kɛ́ á wóò kɛ̀rán ɓɛ́ nìnbirìe kɛ̀a nìnbírɔ lɛ ɛ́ pànkɛ́ ɛ́ ɲɛ̀.

Currently Selected:

Matiye 7: bwj

Highlight

Copy