Bɔ̀werà 10
10
Kɔrɔnɛɛyi ɛ́ vɔn Piɛre
1Nùún dɔ̀ ɛ́ hàarí wi Sezaree lóo hũn lɛ yèrè ɛ́ ɓɛ́ nɛ Kɔrɔnɛɛyi. À hàarí iè Rɔmu siè sɛ̃̀nɛ̀dɔ́síɓɛ́ khĩminù ɲúnsɔ dɔ̀, ɓɛ̀pe lɛ ɛ́ ɓɛ́ wóò ve nɛ «Yitalii sɛ̃̀nɛ̀dɔ́síɓɛ́». 2Àpe àá mí zũnù nìɛ ɓɛ́kùi, ɛ́ hàarí can ɓɛ́ kuò Dɔfĩn bòo hũn, ɛ̀ ɓɛ̀ hàarí wóò ɓàaní Dɔfĩn. Àpe Kɔrɔnɛɛyi ɛ́ hàarí wóò sĩiní ɓɛ́ Zuifuɓɛ nìkherà cɛ̃̀un, à lò hàarí wóò hɛ̃un Dɔfĩn fúu. 3Ɛ́ zɔn dɔ̀, lɛ kɛ́ lé wurù ɛ́ wo haa, ɛ́ Ɲunsɔ mɛlɛkɛ dɔ̀ ɛ́ ɓɛrɛ zɛ̃́niɛ míte àá ɔ́pe Kɔrɔnɛɛyi lè yìnmirà hũn, ɛ́ Kɔrɔnɛɛyi ɛ́ mɔn ɔ̀ wìée. À Mɛlɛkɛ sɔ ɛ́ van zɔn piè yíe ɛ́ zɔn bie lɛ́ à ǹ nɛ làa: «Kɔrɔnɛɛyi!» 4Á mɔ̀ mí yìe ɛ́ yòó fɛ́ à ǹ àá hɔ́ záahĩ́, à zɔn bie nɛ: «Ɲunsɔ Hɔ̀ iè ńɓuò?» Á Mɛlɛkɛ zɔn kɔ̃́niɛ ɔ̀ nɛ làa: «Dɔfĩn ɛ́ ɲɛ́ kɔ́ hɛ̃nnɛ, ɛ̀ Hɔ̀ lò loo hɔ bòo lɛ ɛ́ kɔ́ wóò hɛ̃ àá ɓɛ́ nìkherà, ɛ́ pehɔ̀ hũn ɛ́ yí ɓé kɔ ǹ wɛ̀. 5Ɛ́ kɛ̀a sáalɛ, ɛ́ kɔ́ tɔn nìnbirìe dɔ̀ nɛ ɓɛ vɛ Zopee; ɛ̀ vɛ ve nùún dɔ̀ lɛ yèrè Simɔn lɛ ɛ́ ɓɛ́ cɔ́ yèrè nɛ Piɛre. 6À làa ɔ̀ nùún dɔ̀ lɛ yèrè Simɔn lɛ wóò bĩ̀ hɔ̀ sɛ̃́hɛ̃ yíe, piè yíe ɛ́ wi hɔ ɲun-bɛhɔ́ ɲunù.» 7Ɛ́ hɔ́ lɛ á Mɛlɛkɛ lɛ ɛ́ hṹn dɛ̃̀ ɛ́ bie àá ɔ́ ɛ́ khie cɔ́, ɛ́ Kɔrɔnɛɛyi ɛ́ khie vɔn mí tɔntɛ́riè nìɛ ɓɛ̀ ɲu dɔ̀ àá mí sɛ̃̀nɛ̀dɔ́sí dɔ̀ lɛ ɛ́ tɛ́ piè viì hàarí, kɛ́ piè kuò ɛ́ can Dɔfĩn bòo hũn. 8Á munkɛa hɔ̀ bòo lɛ ɛ́ wɔ́ míkùi ɛ́ lɛ́ ɓà ǹ, à tɔrɛ ɓɛ̀ nɛ ɓɛ vɛ hɔ Zopee.
9Ɛ́ pehɔ̀ si lɛ ɛ́ tĩ, pɛ̃̀hṹ lɛ ɛ́ ɓɛ́ wi le wṹn lɔ̀n ɛ́ van lúwi hɔ̀ Zopee ǹ, ɛ́ Piɛre ɛ́ khie yòó lé lòo, lè wusɔnù hũn ɛ́ mii yòó hɛ̃un Dɔfĩn. 10Ɛ́ hɔ́ hĩni ɛ́ yòó ɛ́ ɔ̀ ɓé a wɛ ɛ́ mii ɛ̀ dí. Ɛ́ pɛ̃̀hṹ lɛ ɛ́ ɓɛ́ ɛ́ hɔ̀ dínlɔ́ ɛ̀ sĩ̀, á mɔn yìnmirà bòo dɔ̀. 11À mɔn kɛ́ hɔ́ hóohũn ɛ́ yòó hɛ́rɛ, ɛ̀ dìɛ dɔ̀ lɛ ɛ́ lɔ́ɓán àá fúrɛ́ dɛ̀bɛhɔ́ dɔ̀ lɛ ɛ́ ɓɛ́ zɛ̃nkɛanin àá mí ɲihĩ́ɛ bɔ̀nbɔ̀ nɛ́ ɛ́ yòó van lɔ́ hɔ́ hóohũn ɛ́ síɛ àá lé sṹsùnù. 12Ɛ̀ ɓɛ̀ bìlaàsiè laahĩ́ bɔ̀nbɔ̀ nɛ́nɛ́ ɓàasiè àá ɓɛ́ bìe lɛ ɛ́ wóò vɛ́sí vɛ́sílɔ́ ɓɛ́ vùkùo lɔ̀n, àá ɓɛ́ bìyíeriè ɛ́ hṹn zɔn wi pelè hũn. 13Ɛ́ tɛmu dɔ̀ ɛ́ zɔn bie lɛ́ à ǹ ɛ́ nɛ làa: «Piɛre síɛ hĩ́ní khíi ɓé ɛ̀ kɔ̀ lɛ̀!» 14Ɛ́ Piɛre ɛ́ zɔn ɛ́ bie ɛ́ nɛ làa: «Ɲunsɔ, ńɓùé dɛ́! Ń ɲɛùn yí dí bòo lɛ lɔn àá bòo lɛ ɛ́ yá ce ɛ́ yí mi wɛ̀.» 15Ɛ́ hɔ́ tɛmu ɛ́ bĩniɛ zɔn bie lɛ́ à ǹ kɛ̀a yìehɛ̃̀ ɲulán ɛ́ nɛ làa: «Dɔfĩn bòo lɛ ɛ́ Hɔ́ nɛ hɔ ɛ́ ce ɛ́ kɔ́pe ɛ́ bí líi àá bòo lɛ ɛ́ lɔn wɛ̀.» 16Ɛ́ hɔ́pe sí ɛ́ wɔ́ fúu yìehɛ̃ tĩ, ɛ́ pehɔ̀ laà hũn, ɛ̀ lè dìɛ sɔ ɛ́ khũ̀a yòó cɔ́ van hɔ̀ hóohũn.
17Ɛ́ Piɛre ɛ́ yòó dɛ̃̀ cɔũn ɛ́ míte ɛ̀ dìenin nɛ hɔpe yìnmirà bòo sí ɛ́ mí mɔn ɛ́ wo ɲún iè hɔ̀ hɔ́sɔ́. Hɔ́rɔsí ɛ̀ pehɔ̀ yìi hũn, ɛ̀ ɓɛ̀ nìnbirìe lɛ á Kɔrɔnɛɛyi ɛ́ tɔrɛ ɛ́ ɔ̀ Simɔn yíe bòo ɛ̀ dìe, ɛ́ ɓɛ́ wo hṹn ɓɛrɛ dɛ̃̀ pelè zĩínù. 18Ɛ́ ɓɛ́ zɔn vɔn ɛ̀ ɓɛ̀ ɛ́ dìe ɛ́ nɛ làa: «Hɔ̀ iè hũ̀nún á Simɔn lɛ ɛ́ ɓɛ́ wóò ve nɛ Piɛre ɛ́ làa hũn?» 19Ɛ́ hɔ́ lɛ á Piɛre ɛ́ mí hũn ɛ̀ vɛ̀ mí yìnmirà bòo hũn, ɛ́ lé Mɛkɛ̃n-Sãanu ɛ́ bie lɛ́ à ǹ ɛ́ nɛ làa: «Húi, nìnbirìe bìɛ tĩ dɔ̀ ɛ́ wi hũ̀nún ɛ́ kɔ̀ cɛ̀. 20Hĩ́ní vɛ síɛ bè peɓɛ̀ máahṹ kɛ́ kɔ́ bí titikɛ wɛ̀; ie hɔ̀ lɛ ɛ́ hɔ́ iè ǹpe te ɓɛ tɔrɛ.» 21Ɛ́ Piɛre ɛ́ hĩ́nà van síɛ ɓɛ̀ nìɛ ɓɛ̀ tĩ sɔ viì à bie lɛ́ ɓà ǹ ɛ́ nɛ làa: «Ń lɛ, hɔ̀ iè ǹpe ɛ́ mí cɛ̀. Hɔ̀ wan ɛ́ mí dàa ɓɛrɛ hũ̀nún?» 22Ɛ́ ɓɛ́ zɔn nɛ: «À iè ɔ̀ sɛ̃̀nɛ̀dɔ́síɓɛ́ ɲúnsɔ Kɔrɔnɛɛyi ɛ́ te kie ɛ́ tɔrɛ. À iè nìnbírɔ lɛ ɛ́ cã̀aní, à ɛ́ Dɔfĩn ɛ̀ ɓàanínin, ɛ́ ɓɛ́ Zuifuɓɛ ɓɛ́kùi ɛ́ ɔ̀ mɛndɛ̃. Ɛ́ Dɔfĩn ɛ́ tɔrɛ mí mɛlɛkɛ dɔ̀ á van bie lɛ́ à ǹ nɛ a ve kɔ ɛ̀ dàá vɛ mí yíe à vɛ ɲí hɔ́ bòo lɛ ɛ́ kɔ́ dàa ɛ́ kɔ ɛ̀ bie lɛ́ à ǹ.» 23Ɛ́ Piɛre ɛ́ bie lɛ́ ɓà ǹ nɛ ɓɛ yòó zɔ. Ɛ́ ɓɛ́ zɔn cãa yán. Ɛ́ sí van tɛ̃un á siɛ hĩ́nà bɔ̀ɓán àá ɓɛ́. Ɛ́ hɔ́ Zopee lóo ńdɛsĩ̀riè nìɛ ɓɛ̀ yìɛní dɔ̀ ɛ́ níiniɛ ɔ̀ dàa van.
24Ɛ́ pehɔ̀ lɛ bĩniɛ ɛ́ van tĩ, ɛ̀ ɓɛ̀ van dɛ̃un Sezaree lóo. Hɔ́rɔsí àpe Kɔrɔnɛɛyi ɛ́ vɔn ɓá nìɛ àá ɓá pàáɓɛ́ ɛ́ koo ɓán lɔ̀n ɛ́ dàa ɛ́ ɓɛ̀ hìé. 25Ɛ́ bòo lɛ ɛ́ Piɛre ɛ́ mii yòó zɔ, ɛ́ Kɔrɔnɛɛyi ɛ́ ɓɛrɛ sɛ̃́ piè híɛhɔ́ à siɛ lúsí piè laahĩ́ hũn, ɛ́ hùerɛ̀sí ɛ́ dàa ɔ̀ fòoní. 26Ɛ́ Piɛre ɛ́ síɛ hóoniɛ ɔ̀ yòoniɛ à zɔn bie lɛ́ à ǹ ɛ́ nɛ làa: «Síɛ hĩ́ní, ǹpe kùusɔ ɛ́ iè nìnbírɔ kɛ̀a kɔpe.» 27À bɔ̀ɓán àá ɔ́ ɛ́ dàa yòó zɔn lè zũnù kɛ́ ɓɛ́ ɛ́ dìkìmú. Á zɔn yú ɓɛ́ nìnbí-kuì kɛ́ ɓɛ́ koo ɓánlɔ̀n. 28Á zɔn bie lɛ́ ɓà ǹ ɛ́ nɛ làa: «Mí dũ kɛ́ ɓɛ́ Zuifuɓɛ làndɛ́ wṹn lɔ̀n ɛ́ Zuifuɓɛ nùún ɛ́ yí fɔ́ɓán à wóo bèɓán àá nɛ̀hũnù tàá à yɛ̀rɛ́ zɔ piè zunù wɛ̀. Kɛ́ Dɔfĩn ɛ́ den zɛ̃́niɛ lɛ́ mi ǹ nɛ ń yí sãawi ɛ̀ ǹ wóo húi nìnbírɔ dɔ̀ ɛ̀ bie nɛ a lɔn, tàá ɛ̀ ǹ bie nɛ a yí nìnbírɔ lɛ ń yí sãawi ɛ̀ ǹ wóo vɛ yíe wɛ̀. 29Ɛ́ sí iè hɔ̀pe ɛ́ hɔ́ lɛ ɛ́ mí dàa vɔn mi nɛ n ɓen, ɛ́ ń yí wũ̀aní bòo ɛ̀ ǹ ɓɛrɛ. Ɛ́ ń hṹn wɛ ɛ́ nin dũń hɔ́ bòo lɛ ɛ́ mí dàa vɔn mi ɲún.» 30Ɛ́ Kɔrɔnɛɛyi ɛ́ zɔn nɛ làa: «Zooni lɛ ɛ́ wo iè pehɔ̀ wihĩ́ bɔ̀nbɔ̀ nɛ́lán, ɛ́ ń zɔn ɛ́ Dɔfĩn ɛ̀ hɛ̃nnin niǹ yíe lèpe wu-háalé lɛ ɓà ńmàa hũn. Ɛ́ nìnbírɔ dɔ lɛ zɔn tĩ̀-può pán pán ɛ́ ɓɛrɛ siɛ zɛ̃́niɛ míte mi ǹ yìncóoní lɔ̀n, 31à zɔn bie lɛ́ mi ǹ nɛ làa: “Kɔrɔnɛɛyi, Dɔfĩn ɛ́ ɲɛ́ kɔ́ hɛ̃nnɛ̀, ɛ̀ pehɔ̀ hũn ɛ́ yí ɓé hɔ́ ńsĩinín lɛ ɛ́ kɔ́ wóò lɛ́ ɓɛ́ nìkherà ǹ wɛ̀. 32Ɛ́ kɔ́ wo tɔn ɓɛ nìnbirìe dɔ̀ nɛ ɓɛ vɛ hɔ Zopee ɛ̀ vɛ vi-e Simɔn lɛ ɛ́ ɓɛ́ wóò ve nɛ Piɛre ɛ̀ dàa ɓen. À wi-e Simɔn lɛ wóò bĩ̀ hɔ̀ sɛ̃́hɛ̃ yíe, piè yíe sɔ ɛ́ wi hɔ ɲumu ɲunù.” 33Ɛ́ mí laà hũn ɛ́ ń tɔrɛ ɓɛ̀ nìnbirìe dɔ̀ nɛ vɛ ve kɔ ɛ̀ dàá ɓen, ɛ́ hɔ́ lɛ ɛ́ kɔ́ tɛ̀ ɛ́ ɓɛrɛ ɛ́ hɛ̀ sãa. Ɛ́ kɛ̀a sáalɛ, ɛ́ képe kè kùi ɛ́ wo wi Ɲunsɔ Dɔfĩn híɛhɔ́, ɛ́ wo ké ɛ̀ ɲí hɔ́ bòo lɛ ɛ́ Hɔ́ bie lɛ́ kɔ ǹ nɛ kɔ bie ɛ̀ lɛ́ kiè ǹ.»
Piɛre bòo lɛ á ɛ́ bie ɔ Kɔrɔnɛɛyi yíe
34Ɛ́ Piɛre ɛ́ siɛ mɔ̀ lè bienù à zɔn nɛ làa: «Àá bɔ̀bín, ń hɛ̀ wo dũ sãaniɛ kɛ́ Dɔfĩn ɛ́ yàá wiekɛ ɓɛ nìnbirìe wɛ̀: 35Nìnbírɔ yée nìnbírɔ, ɛ̀ ɓàasɔ ɓà dàa yɛ̀rɛ́ hṹn dɛ̃̀ kɛwiɛ, kɛ́ á ɛ́ Dɔfĩn ɛ̀ mɛ̀ndɛ̃, à lò wóò wé hɔ́ bòo lɛ ɛ́ cã̀aní, ɛ́ ɓàasɔ bòo ɛ́ tĩìní Dɔfĩn. 36Hɔ̀pe Dɔfĩn ɛ́ hàarí tɔniɛ mí bienù ɛ́ lɛ́ ɓɛ́ Yizarayɛɛle nìɛ ǹ, lèpe Bentĩnu lɛ ɛ́ zɛ̃́ní kɛ́ ké dɛ̀ hũn-wiɛ̀ ɛ́ yí àá Dɔfĩn Yiezu Kirisa yènsénín, àpe lɛ ɛ́ iè ɓɛ̀ nìnbirìe ɓɛ́kùi Ɲunsɔ. 37Mí dũ hɔ bòo lɛ ɛ́ wɔ́ hɔ́ Zudee pɛ̃̀hɛ̃ míkùi hũn, hɔ̀pe lɛ ɛ́ fìi ɓɛ́ hɔ́ Kalile hũn, pɛ̃̀hṹ lɛ á Zãn ɛ́ dàa ɛ́ buie lè Bentĩnu à líiníkɛa ɓɛ̀ nìnbirìe hɔ̀ ɲumu hũn vɔ́. 38Ɛ́ mí dũ hɔ bòo lɛ ɛ́ Dɔfĩn ɛ́ dàa síɛniɛ mí Mɛkɛ̃ni àá mí pànkɛ́ à Nazarɛɛte Yiezu lɔ̀n, á dàa hàarí hĩ́nà bɔ̀ hɔ̀ cɛ̃̀mɛ̀náa ǹ ɛ́ hɔ́ bòo lɛ ɛ́ sãa ɛ̀ wé àá ɓɛ́ nìnbirìe, kɛ́ á ɛ́ ɓɛ̀lɛ ɛ́ ɓɛ́ ńɲíkĩ́nìɛ ɛ́ lɔ̀n ɛ̀ biení ɓɛ́kùi ɛ̀ wɛní, iè hɔ̀ lɛ ɛ́ Dɔfĩn hàarí wi àá ɔ̀. 39Kè kùrú yìe ɛ́ mɔn hɔ̀ bòo lɛ á wɔ́ míkùi hɔ̀ Zerizalɛɛmu hũn, àá ɓɛ́ Zuifuɓɛ cɛ̃̀mɛ̀nɛ́ lɛ kɛ́ míkùi hũn. Ɛ́ ɓɛ́ ɓáa ɔ̀ lé ɓáalén dãanù lɔ̀n ɛ́ ɓɔ́. 40Kɛ́ Dɔfĩn ɛ́ vìeniɛ ɔ̀ pehɔ̀ wihĩ́ bɔ̀nbɔ̀tĩlán zɔǹ, ɛ̀ Hɔ̀ lɛ́ á zɛ̃́ní míte ɓɛ̀ nìnbirìe ǹ. 41Kɛ́ ɓɛ́ den yí ɓɛ́ nìnbirìe ɓɛ́kùi á zɛ̃́niɛ míte nin, kɛ́ hɔ́ iè kèpe lɛ ɛ́ Dɔfĩn hàarí sɛ̃̀nɛ́hã̀ munɛ nɛ ke teń hɔ́ ɛ̀ buie, iè pe á zɛ̃́niɛ míte nin. Ɛ́ hɔ́ lɛ ɛ́ Dɔfĩn vìeniɛ ɔ̀ vɔ́, ɛ́ ké páaníɛ dú ɛ̀ kè ɲun àá ɔ́. 42Á lɛ́ lé ɲunù kie ǹ nɛ ke vɛ buie le Bentĩnu ɛ̀ lɛ́ ɓɛ́ nìnbirìe ǹ ɛ̀ bie nɛ hɔ iè mípe ɛ́ Dɔfĩn munɛ nɛ mí lè ɓɛ̀ nìnbirìe lɛ yìe wi àá ɓɛ́ lɛ húrun lìe. 43Ɛ́ Dɔfĩn bɔ̀háaníriè ɓɛ́kùi ɛ́ hàarí bie piè bòo nɛ nìnbírɔ yée nìnbírɔ kɛ́ á dũmuasɛ̃-à ǹ, ɛ́ ɓàasɔ bɔ̀koohɛ̃ sɛ́wɛ́rí ɛ́ dé lɛ́ à ǹ, àpe Yiezu lɛ á dũmuasɛ̃̀ nin bòo hũn.»
Ɓòo lɛ ɛ́ lé Mɛkɛ̃n-Sãanu ɛ́ dàa siɛ ɓɛ̀lɛ yí ɓɛ́ Zuifubɛ lɔ̀n
44Ɛ́ hɔ́ lɛ ɛ́ Piɛre ɛ́ dɛ̃̀ ɛ́ bie kɛ̀amu, ɛ́ lé Mɛkɛ̃n-Sãanu ɛ́ ɓɛrɛ síɛ ɓɛ̀pe lɛ ɛ́ hṹn wi yán ɛ́ piè bòo ɛ̀ ɲí ɓɛ́kùi lɔ̀n. 45Ɛ́ ɓɛ́ Zuifuɓɛ ńdɛsĩ̀riè lɛ ɛ́ hṹn bɔ̀ɓán àá Piɛre ɛ́ dàa ɓɛrɛ ɛ́ hɔ́ hɛ̀ yòokɛa lɔ̀n iè hɔ̀ lɛ ɛ́ Dɔfĩn ɛ́ síɛniɛ mí Mɛkɛ̃ni hɔ̀ dàa bìɓuà nìɛ lɔ̀n. 46Ɓɛ̀ hṹn ɛ́ ɲí kɛ́ ɓɛ́pe nìɛ sɔ ɛ́ hɔ̀ níi bɔ̀ɓuà dɔ̀ lɛ ɛ́ ɓɛ́ yí dũ ɛ̀ bie ɛ́ dàa ɛ́ Dɔfĩn ɛ̀ ɓàanínin. 47Ɛ́ Piɛre ɛ́ zɔn bie ɛ́ nɛ làa: «Ɛ́ wieni ɛ́ temu dɛ̀ ɛ́ pĩ́ ɛ́ bie nɛ ɓɛ yá líiníkɛ hɔ ɲumu hũn, kɛ́ ɓɛ́ lò dàa yú lé Mɛkɛ̃n-Sãanu vɔ́ kɛ̀a kepe kùusɔ?» 48Ɛ́ Piɛre ɛ́ lɛ́ lé ɲunù nɛ ɓɛ ɛ̀ líiníkɛ ɓɛ hɔ̀ ɲumu hũn Yiezu Kirisa yèrè lɔ̀n. Ɛ́ ɓɛ́ hɛ̃nnɛ à ǹ nɛ a wé wihĩ́ bɔ̀nbɔ̀ yiɛní àá ɓɛ́.
Currently Selected:
Bɔ̀werà 10: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation