LUG 17

Joŋ ɓlagge wa

(Mat 18.6-7,21-22; Mark 9.42)

1Yeso raw riŋ jar ma wer ɓen wo ga : Re ma srog jar joŋ ɓlagge joŋ yaŋ mbe wo ti nawn wo hãã tum, ama re yaŋ ti je maga srog wer jar joŋ ɓlagge sen wo mono. 2Ɗawa ɓen á mo saʼ man niini ne hẽn soole, á mo ɓoʼn go nen maaroge nen maga á mo kaŋ wer weere wo go joŋ ɓlagge wa. 3Koɗ we see ɓay de ele.

Hayga hẽn ɓo joŋ mo we de ɓlagge no, ni ndo ruu ne ti ɓe desãy, day hayga á coo ɗiggi ɓe ma de ɓlaggen we de deele tigriŋ no, ni ndo men ɗig re ɓlagge ɓen go ne hẽn ti. 4Hayga hẽn ɓo joŋ mo we de ɓlagge ɓaale renam wurpo boŋ, day se yaŋ le ferge le ceɓ riŋ mo ge ga : Re sen cee se we, re sen cee se we no, ni ndo men ɗig re ɓlagge ɓen go ne hẽn ti.

Hã ɓil ɓo go ne Baa

5Jar peele Yeso raw wo riŋ gi ɓe ga : Kay wùr hã ɓil wùr go ne Baa de egre ɗa ɓa. 6Yeso raw riŋ rage ga : Hayga hãge see ɓay go ne Baa yaŋ de day ge doo mbèere yeg no maʼ no, nday mo riŋ bà koo gwarga ma kaʼ ga á mo naa see ɓe le go mo wo go coʼ ge nen maarog layblaʼ, á yãã jag ɓay.

Joŋre maga wejõõ jobo joŋ ne mono

7Wose yaŋ yoo ɓay la ga je joŋre ɓe le de jee pay noga de koɗ horoge, á wo we le ferge ɓi pay le liŋ se raw riŋgi ɓe ga : See le rege la? 8Á joŋ no ga : á raw riŋgi ɓe diŋ ga : Kneʼ rege ɓin go me, blam sen ni ndo mo coo õõbe joŋre ɓon ti ɓo, ndi hay we rege, ndi hay we jo ge no, ni ndo á le lag fẽẽre re gen wo me pele, blam sen ni ndo re, jo ɓon kway. 9Á joŋ suseʼ ne wejõõ ɓen ti joŋre maga á riŋ ti ɓe mo ga gà yawla? 10Yeso ga nday doo sen no lay, wur maga nday wo we joŋ joŋre maga á riŋ we ti ɓe we go ɓuy no, ni nday mo wãã ga : Nday diŋ weere jõõre jobo de koɗ koɗe, nday joŋ go diŋ nen joŋre ɓay no.

Yeso fãã jar cíi wo go hwale

11Yeso de wo ge Jerusalem, á raw hee ge ti yoo Samari wo de Galile. 12Á raw kalge ɓi leege po, jar cíi wo hwal, raw wo caa pel ɓe le, raw wo lagge le go hãã ɗawa, 13raw wo ɗe Yeso ga : Yeso Waŋ, ko decoo wùr ɗa la.

14Yeso raw ko rage, raw riŋ rage ga : See we wii nen see ɓay ne jar ma siɗ jag wo. Á raw wo mbuɗ nen raw ge mokay, á raw wo fãã ge go ɓuy. 15Jobo boŋ yoo ɓaara wo ko ge ga se fãã we go mokay, á raw ferge le blam ɓe togoɗ Baa de gẽẽge ɓe ciŋ kloŋ, 16raw leʼ monɗra maʼ pel ɓe gesiŋ pel Yeso, raw joŋ suseʼ ne hẽne. Bloo sen diŋ je Samari lay. 17Yeso raw riŋgi ɓe ga : Nday bay go de fãã ge hwal ɓuy wa. Day jar ma kaawaʼn wo gen ne? 18Jobo bay de ɗig gi yoo ɓaara boŋ maga se mo joŋ suseʼ ne Baa wa, say diŋ je dehãyn mo yeʼ tawa? 19Blam sen Yeso raw riŋgi ɓe ga : Ur go ciŋ, see, hãge ɓil ɓo ne Baa pẽẽ mo we go.

Twaywaŋ mani Baa no

(Mat 24.23-28,37-41)

20Farisiyẽẽ raw wo wii Yeso ga : Ɓa twaywaŋ mani Baan hay nen age nà hun ɓa? Se kal riŋ rage ga : twaywaŋ mani Baan a ge bay maga jobo daʼ faage ɓe go de nen ɓe wa. 21Á wããge ga : á yaŋ la, noga : á yaŋ wo mo wa. Ko we nen ɓay twaywaŋ mani Baan go yoo ɓay yaw.

22Blam sen á raw riŋ jar ma wer ɓen wo ga : Wur po a ge yaŋ le maga nday da ge ga nday mo ko naw wel je táabay no, ama nday kon ge gà. 23Jar riŋ gi wo yaŋ ga : Ko we nen ɓay wo mono. Noga Ko we nen ɓay la. Ama wo we wo ni wa, ɗee we wo ni wa lay. 24Doo sag ge Baa maga sag le gesiŋ kaʼ hãã go ti jag sir ɓaŋ lan no, ferge wel je táabay le joŋ ge doo sen no lay. 25Ama nen da ga ndi mo joŋ bon debaŋ ɗa, nen maga jar ma waran mo tob me wo go. 26Re maga hay joŋ le nen Nowe, joŋ ge wur a ge wel je táabayn le doo sen no degaʼ lay. 27Jar hay wo rege, jo ge, da wo naare, noga hã wo mayre ɓaara go ne werpiiri, hãã wo day ge ti wur maga Nowe wo kal ge ɓi daagen mokay, bii maŋ ge ma kluu raw age, raw bas jar sen wo go ɓuy. 28Á joŋ ge doo ma nen Lod no lay, jar hay wo rege, jo ge, yeɗ wo fẽẽre le, yeɗ wo fẽẽre wo go lay, jeɗ wo lay, bor wo tiŋri lay. 29Ama wur maga Lod wo go men Sodom mokay, Baa raw cwaa wùu le de fen ma haɓ se debaŋ le ciŋ, raw bas jar sen wo go ɓuy. 30Á joŋ ge doo sen no degaʼ ti wur maga wel je táabay naa ge nen le mo lay.

31Ti wur sen, wosela maga hay we le go ciŋ ti tiŋ ɓe mo ɗii gesiŋ horge fẽẽre ɓe ma tiŋman wo wa so. Je maga hay we le go ɓi pay, mo fer le liŋ wa lay. 32Ɗig we diŋ se wãy Lod. 33Je maga kiɗ we ga se mo bas go wa mono, bas ge go so yaw, day je maga men see ɓe we go bas ge ti re ɓi mono, ni je sen joŋ ge tenen caw so yaw. 34Ndi de riŋ we ge ga wur sen de suŋ ni, jar joŋ ge wo yaŋ de suuli faale kããra ɓoge, á maŋ ge yoo ɓaara boŋ, á men go boŋ lay. 35Naare joŋ ge wo yaŋ naŋ ge ɓiŋ kããra ɓoge, á maŋ ge yoo ɓaara boŋ, á men go boŋ lay. [36Werpiiri ɓog joŋ wo yaŋ ɓi pay po boŋ, á maŋ ge yoo ɓaara boŋ, á men go boŋ lay.] 37Jar ma wer Yeson raw wo wii gi ɓe ga : Waŋkluu, re sen wo ge joŋ ge nà wur hon ɓa? Yeso raw ga : Ti ngel maga húulí mopo yaŋ ni no, gebegre tay wo ti ni lay.

Currently Selected:

LUG 17: TUP

Highlight

Copy