Ruuka 10

Yeesu kaatuma abharuubhirisya abhandi makumi gataanu na gabhiri na bhabhiri

1Mbe, ejo jejire jaawa, Raatabhugenyi Yeesu ˆnaawura abharuubhirisya abhandi makumi gataanu na gabhiri na bhabhiri. ˆNaabhatuma bhabhiribhiri, bhamutangatire mu‑misi na bhuri rubhaara, anu omwene aariga eendere okukinga.

2ˆNaabhabhwira ati, “Ebhigeswa ni bhyafu, nawe abhagesi ni bhatyari. Kurwa ejo, musabhwe Raatabhugenyi, omwene esambu, korereki oongesye abhakosi abhandi mw‑isambu ryaye bhaje okugesa. 3Emwe mugende, nawe mumenye ati naabhatuma rwa abhaana wa jinaama bhanu abharibhata agati ya emisege. 4Mwasiga okugega isagwa, noorwo jipirya, noorwo rifwarire erindi rya ebhiraato. Mwasiga okubhusya omwanya kwa okukeesya omuunu woonewoone ku‑njira.

5“Mukeengira mu‑nju yooneyoone irya, mukeesye abhaanu bheende‑mo kutya, ‘Omurembe gubhe na emwe.’ 6Araabha mu‑nju omwo, ari‑mo omuunu unu keenda omurembe, omurembe gwemwe gubhe omwo. Nawe, araabha atari‑mo unu kaagwenda, omurembe ogwo gubhasubhire emwe abheene. 7Mukakumwa mu‑nju imwi, mwasiga okufuruka okusooka mu‑nju imwi okuja mu‑nju eyindi, nawe mubhe mu‑nju ya okwamba eyo inu ꞉mwingiiye‑mo. Murye ebhiryo bhinu abhaja okubhayaana, kwa okubha omukosi eeyire okuyaanwa omuyeero gwaye.

8“Omusi gwonegwone gunu omuja okwingira‑mo, abheende‑mo bhaakabhakuma, murye ebhiryo bhyonebhyone bhinu abhaja okubhayaana. 9Abharwaye bhanu bhari mu‑musi ogwo, mubhawosye. Mubhwire abhaanu bhoone ati, ‘Obhukama bhwa Nyamuwanga bhwakingire kw‑imwe.’

10“Nawe omusi gwonegwone gunu omuja okwingira‑mo, na abheenengo nibharema okubhakuma, musooke‑wo, mukatura ku‑njira jeebhwe, mwayikega ati, 11‘Noorwo oruteeri rwa omusi geemwe runu ruri ku‑maguru geeswe, echirukuukumura, chibhe echibharikisyo kw‑imwe cha obhujabhi bhwemwe. Noorwo kutyo, mumenye kisi ati, obhukama bhwa Nyamuwanga bhuri yeeyi!’ 12Enibhabhwira ati, orusuku runu Nyamuwanga arisoosya indamu ku‑bhaanu bha echaaro choone, arisoosya indamu isito muno ku‑bhaanu bha omusi ogwo, okukira inu arisoosya ku‑bhaanu abhanyamusi bha omusi gwa Sodoma!#10:12 Ringira Obhwambiro 19:24‑29.

Yeesu kaagonya abhaanu bha mu‑misi bhanu bhamuremere

(Mataayo 11:20‑24)

13“Jiribhabhona emwe, abhaanu bha Korajiini! Jiribhabhona emwe, abhaanu bha Bhetisaayida! Araabha ebhiruguusyo bhinu ꞉naakorere kw‑imwe anu, naakabhikorere ku‑bhaanu bha emisi ja Tiiro na Sidooni,#10:13 Abhaanu bha Tiiro na Sidooni bhaariga bhatari Bhayawudi, bhaariga bhari bhanyamanga. Ka wone Abhayawudi ꞉bhaamenyere abhaanu abho ati ni bhajabhi muno. chimari abhaanu abho, bhaakataaye ebhibhiibhi bhyebhwe. Bhaakakorere kutyo, kwa okufwara amagunira na okwibhambaga riifu. 14Kurwa ejo, orusuku runu Nyamuwanga arisoosya indamu ku‑bhaanu bha echaaro choone, arisoosya indamu isito muno kw‑imwe okukira inu arisoosya ku‑bhaanu abhanyamusi bha Tiiro na Sidooni!

15“Emwe abhaanu bha Kaperinaawumu, omwitogera ati Nyamuwanga aribhariinyagisya abhakingye mu‑rwire? Wuri, mutarikorerwa kutyo! Nawe aribhooromosya abhakingye mu‑nyombe!”

16Niwo, Yeesu ˆnaabhabhwira abharuubhirisya bharya ati, “Omuunu unu kaabhategeresya emwe, kaategeresya anye. Omuunu unu kaabharema emwe, noorwo anye wone kaandema. Omuunu unu kaandema anye, kaarema noorwo unu ꞉aantumire.”

Abharuubhirisya abhasubha ku‑Yeesu

17Bhejire bheeya, abharuubhirisya abho makumi gataanu na gabhiri na bhabhiri, nibhasubha keenu nibhakondererwaga. Nibhabhwira Yeesu ati, “Raatabhugenyi weeswe, noorwo amasambwa omwanya gunu echigagonya kw‑isiina ryawo, agachigayuka.”

18Yeesu ˆnaabhasubhya ati, “꞉Naarorere Syetaani ˆneeka rwa orurabhyo okusooka mu‑rwire. 19Mbe, mumenye ati, naabhayaaye obhuturo bhwa okuyiga amanaga goone ga omusoko oyo. Ku‑bhuturo obhwo, muribhaga nimutaja jinjoka na jinge, na chitari‑wo choonechoone chinu chiribhawutaasya wuri.

20“Noorwo kutyo, musige okukondererwa kwa okubha ati amasambwa agabhagayuka. Tari mukondererwega omusango gunu ati, amasiina geemwe gakaamirwe mu‑rwire.”

Yeesu kaakonderwa

(Mataayo 11:25‑27, 13:16‑17)

21Omwanya ogwoogwo, Yeesu ˆnaakondererwa muno ku‑bhuturo bhwa Mwoyo Mweru. ˆNaayika ati, “Raata awe, Raatabhugenyi wa orwire na echaaro choone! Enikusiima kwa okubha, emisango jinu, ꞉waakorere okubha mbisike ku‑bhaanu abha obhwengeeso na abhamenyi, wajisweruuye abhwerubhweru ku‑bhaanu bhanu bhari na eriikirisya rwa abhaana abharera. Yee Raata, nikwo kutyo jaakukondera.” 22Neeya Yeesu ˆnaabhwira abhaanu ati, “Raata waani anaaye bhyone. Atari‑wo omuunu unu kaamenya kutyo anye Omwana wa Nyamuwanga niri, tari Raata wenyere. Ka wone, atari‑wo omuunu unu kaamenya Raata kutyo ari, tari anye Omwana waaye era, na bhuri muunu unu Omwana waaye keenda okumuswerurira.”

23Awoawo, Yeesu ˆnaaringira abheeyigisibhwa bhaaye, ˆnaabhabhwira bhumbise ati, “Muri na ribhando emwe, kwa okubha ameeso geemwe agarora emisango ejo! 24Enibhabhwira ati, abharagi bhaafu na abhakama, bheendaga okurora jinu omurora, nawe ꞉bhataajirorere. Bheendaga okuungwa jinu emwe omuungwa, nawe ꞉bhataajuunguuwe.”

Echijekekanyo cha Omusamaariya wa ekisi

25Rusuku rumwi, omwiyigisya umwi wa ebhiraagiro bhya Muusa ˆneemereeguru, ˆnaabhuusya Yeesu omusango gwa okumuregeeja ati, “Omwiyigisya, nikore kutiki korereki nibhone obhuwanga bhwa akajaanende koone?”

26Yeesu ˆnaamusubhya ati, “Jikaamirwe kutiki mu‑bhiraagiro bhya Muusa? Owubhisombookerwa kutiki?”

27ˆNaamusubhya ati, “Jikaamirwe ati, ‘Wendega Raatabhugenyi, Nyamuwanga waawo, kwa omwoyo gwawo gwone, kwa omutima gwawo gwone, kwa amanaga gaawo goone, na okwa obhwenge bhwawo bhwone.’#10:27a Ringira Orwichuko rwa Ebhiraagiro 6:5. ‘Wendega wone oweejaanyu rwa kutyo owiyenda omwene.’#10:27b Ringira Abharaawi 19:18.” 28Yeesu ˆnaamubhwira ati, “Waasubhya kisi! Kora kutyo, owuja okubhona obhuwanga.”

29Nawe, omwiyigisya oyo, eendaga okweresya ati omwene ni murengeresi imbere ya Nyamuwanga, nikwo okukora ꞉aabhuusiisye Yeesu ati, “Oweejaasu niga?”

30Yeesu ˆnaamusubhya ku‑chijekekanyo, ˆnaayika ati, “Aariga ari‑wo omuunu umwi, unu ooromokaga okusooka Yerusareemu, ˆnaagendaga mu‑musi gwa Yeeriko. Omwanya gunu aariga ari ku‑njira, ˆnaarwanwa na abhasaakusi. Abhasaakusi abho, nibhamufuura emyenda, nibhamubhuma, nibhamuwutaasya muno, nibhamusiga ˆnaarwaniraga omwoyo.

31“Mbe, ebhando rya kisi ku‑njira okwo, ˆnaatura‑ko omugabhisi umwi. Nawe omugabhisi oyo, ejire aarora omuunu oyo, ˆnaatura ku‑mbari. 32Neeya, Omuraawi#10:32 Omuraawi. Abharaawi bhaariga bhari bhasakisi bha abhagabhisi mw‑Iyekaru rya Nyamuwanga. Ringira Obhukumi 3:1‑13. umwi, ˆnaatura ku‑njira okwo. Ejire aakinga awo, ˆnaarora omuunu oyo, omwene wone ˆnaakererera ku‑mbari.

33“Katungu katooto okutura, ˆnaaja Omusamaariya#10:33 Omusamaariya. Abhayawudi bhaariga bhagayire Abhasamaariya, kwa okubha ꞉bhaarorere ati Abhasamaariya bhaaramyaga Nyamuwanga ku‑bhutinge bhunu bhwariga bhutari bhwa kisi ku‑Bhayawudi. Kurwa ejo, abhaanu bha ebhyaro bhibhiri bhaariga bhasokeene. umwi unu aariga ˆnaagenda orugendo. Omwene wone ˆnaatura ku‑njira okwo. Ejire aakinga ku‑muunu oyo, ˆnaafwira echigongo omuunu oyo. 34ˆNaamufogera‑ko, ˆnaamubhambaga echifuufu na amafuta ku‑mawuta gaaye, ˆnaamusemba amawuta ago. Ejire aamara ˆnaamuriinyya inguru ku‑sikiri yaaye, ˆnaamusira mu‑nju ya abhagenyi, korereki amurwasye.

35“Mwejo yende‑ko, ˆnaasoosya jidinaari ebhiri,#10:35 Jidinaari ebhiri. Idinaari imwi yaariga niyingana na omuyeero gwa orusuku rumwi ku‑mukosi umwi wa emirimu. ˆnaayaana omwene inju oyo. ˆNaamubhwira ati, ‘Yangarira omuunu unu. Jidinaari jikambuka jinu naakuyaana, omwanya gunu nirisubha, nirikuriya.’”

36Niwo, Yeesu ˆnaabhuusya omwiyigisya wa ebhiraagiro oyo ati, “Mbe, mu‑bhwiganirisya bhwawo, ni wuuya mu‑bhaanu abhasatu abho, unu aariga ari oweejaabho mu‑kumukorera ja ekisi?” 37Omwiyigisya oyo, ˆnaamusubhya ati, “Ni unu ꞉aamufwiriiye echigongo.” Yeesu ˆnaamubhwira ati, “Awe wone nuugende, ubhe na itungwa rwa eyo!”

Yeesu mu‑nju ya Maarita na Maryamu

38Omwanya gunu Yeesu na abheeyigisibhwa bhaaye, bhaariga bhari ku‑njira nibharibhataga, nibheengira mu‑ruguuyo rumwi. Omugasi umwi, ˆnaatogwaga Maarita, ˆnaabhakuma iika ewaaye. 39Maarita oyo, aariga ari na omuyara oweejaabho, ˆnaatogwaga Maryamu. Maryamu oyo, ˆneenyanja ayeeyi na amaguru ga Yeesu, korereki abhega ˆnaategeresya Yeesu.

40Nawe, Maarita aafurubhendaga na jifurubhendo nyafunyafu. Mbe, ˆnaagenda ku‑Yeesu, ˆnaamubhwira ati, “Raatabhugenyi weeswe, utakurora ati, omuyara oweejaasu aansindikira anye omwene jifurubhendo joone? Nuumubhwire ansakire‑ko!”

41Raatabhugenyi Yeesu ˆnaamusubhya ati, “Maarita awe, Maarita awe! Ni kurwa ki owunyaaka na okusurumbasibhwa na emisango myafu kutyo? 42Nawe, guri‑wo omusango gwa ekisi gumwi era okukira joone. Omusango ogwo ni kuntegeresya anye. Ogwo nigwo omuyara oweejaanyu Maryamu eetoora. Atari‑wo omuunu woonewoone unu kaatura okumuteesya omusango ogwo.”

Currently Selected:

Ruuka 10: jit

Highlight

Copy