Ruuka 1

Obhutangati

1Tewofiiro owa echibharo, abhaanu bhaafu bhaariga bheekomeesiisye, okukaama inguru ya emisango jinu ꞉jaakorekeene agati yeeswe. 2꞉Bhaakaamire rwa kutyo ꞉bhaatondeeywe na abhaanu bhanu ꞉bhaarorere emisango ejo okusookerera ku‑bhwambiro bhwa obhurame bhwa Yeesu. Nibho bharya bhaaraasyaga omusango gwa Yeesu, ka wone ꞉bhaachitondeeye eswe emisango jaaye. 3Anye wone ꞉neeyenjeye kisi kutyo ꞉jaakorekeene okusookerera ku‑bhwambiro, nindora ati nikukaamire emisango ejo, kwa obhwisombooro bhwa ekisi, 4korereki ubhone echimari ku‑jinu ꞉oonguuwe.

Obhuragi bhwa okwibhurwa kwa Yowana Omubhatiija

5Omwanya gunu Yeroode#1:5a Yeroode. Ku‑meeresyo amaafu, ringira Yeroode Omukuru mu‑Meeresyo inguru ya Emisango Emikomeeye. aariga ari mukama wa omukoowa gwa Yuudeya, aariga ari‑wo omugabhisi#1:5b Omugabhisi. Ku‑meeresyo amaafu, ringira Abhagabhisi mu‑Meeresyo inguru ya Emisango Emikomeeye. umwi, risiina ryaye aatogwaga Jaakariya, wa echise cha Abhiya. Omugasi waaye aatogwaga Erijaabheeti. Aariga ari wa mu‑ruganda rwa omugabhisi Aruuni. 6Abhaanu bhanu ku‑bhubhiri bhwebhwe, bhaariga bhari bharengeresi mu‑meeso ga Nyamuwanga. Ka wone bhaariga nibhagayuka ebhiraagiro bhyone bhya Raatabhugenyi, nibhabhiruubhiriraga, okubhisiga wuri. 7Nawe bhaariga bhachaari okubhona omwana, kwa okubha Erijaabheeti aariga ari mugumba ka wone bhoone bhaariga bhakokoowe muno.

8Orusuku rumwi, Jaakariya aariga ari mu‑bhukosi bhwa emirimu jaaye ja obhugabhisi imbere ya Nyamuwanga. Okubha gwariga guri omwanya gwa eriikofyanyo ryaye. 9Ku‑mwanya ogwo, ˆnaawurwa kwa okwitongya, okwingira Ayeeru mw‑Iyekaru rya Raatabhugenyi,#1:9 Ayeeru mw‑Iyekaru rya Raatabhugenyi. Ku‑meeresyo amaafu, ringira Riyekaru mu‑Meeresyo inguru ya Emisango Emikomeeye. korereki amwotere obhubhaani omwo. Obhwawusi obhwo, ꞉bhwakorerwe okuruubhana na jitungwa jeebhwe ja okubha na obhubharanywa, bhwa okukora emirimu ja obhugabhisi imbere ya Nyamuwanga. 10Omwanya gwa okwotera obhubhaani obhwo, abhaanu bhaafu bhaariga nibheekofyanya anja, nibhasabhwaga Nyamuwanga.

11Awoawo, Jaakariya ˆnaasoromokerwa na maraayika#1:11 Maraayika. Ku‑meeresyo amaafu, ringira mu‑Meeresyo inguru ya Emisango Emikomeeye. wa Raatabhugenyi. Maraayika oyo, aariga eemereeguuyu orubhaara rwa ebhuryo rwa echigabhiro cha okwotera‑ko obhubhaani. 12Jaakariya ejire aamurora, ˆnaakanguka, ˆnoobhaya muno! 13Nawe maraayika oyo, ˆnaamubhwira ati, “Awe Jaakariya, siga okuubhaya! Risabhwa ryawo ku‑Nyamuwanga inguru ya okubhona omwana, aryungwa. Woori omugasi waawo Erijaabheeti, kaja okukwibhurira omwana wa echirume. Risiina ryaye umutoge Yowana. 14Omwana oyo, niwe arikora usandabhe na okukonderwa. Okwibhurwa kwaye, kurikora abhaanu bhaafu bhakonderwe, 15kwa okubha, aribha omukuru imbere ya Raatabhugenyi. Omwana oyo, okwambira mu‑nda ya nyiramwene, aribha ˆneejurwa Mwoyo Mweru. Kurwa ejo, atarinywa echifuufu#1:15 Echifuufu. Ku‑meeresyo amaafu, ringira mu‑Meeresyo inguru ya Emisango Emikomeeye. sirisiri noorwo ebhindi bhyone bhinu ebhikora. 16Arisubhya Abhayisirayeeri bhaafu ku‑Nyamuwanga, Raatabhugenyi weebhwe. 17Aritangata imbere ya Raatabhugenyi, aritangasibhwa na obhuturo bhwa omwoyo rwa ogwa omuragi Yeeriya. Arikora abhaana na bheesemwene bhoongwane, arikora bhanyatagayuka bhabhe na obhwiganirisya bhwa obhurengeresi na kwa okukora kutyo keeraabhira Raatabhugenyi abhaanu bhaaye.”

18Niwo Jaakariya ˆnaabhuusya maraayika oyo ati, “Ni chibharikisyo ki chinu chirinyeeresya emisango ejo? Okubha anye na omugasi waani chaakokoowe muno!” 19Maraayika oyo ˆnaamusubhya ati, “Anye, naanye Gaabhuryeri, unu enimereeguru imbere ya Nyamuwanga. Nyamuwanga aantuma kw‑awe, korereki niije okukubhwira emisango ja ekisi jinu. 20Nawe, kwa okubha utakujiikirisya owuja okubha mujibhi. Utakuja okutura okwayika, okukingira ku‑mwanya gunu jinu jirikorekana. Jirikorekana ku‑mwanya gwajo!”

21Abhaanu abho bhaariga nibharindirira Jaakariya asooke Ayeeru mw‑Iyekaru. Bhejire bhaarora kutyo ꞉aakoorere okuwuruka anja nibhayaya. 22Ejire aawuruka‑mo, ꞉ataaturire okwayika nabho rindi. Niwo nibhamenya ati, aarora ebhiroro Ayeeru mw‑Iyekaru omwo. Okwambira orusuku orwo, Jaakariya ˆnaabha omujibhi, ˆnaabhayikyaga chijibhi.

23Jisiku jaaye ja obhukosi mw‑Iyekaru jejire jaawa, ˆnaasubha iika. 24Jisiku okutura, Erijaabheeti omugasi waaye ˆnaajira inda. ˆNaamara ameesi gataanu eeyibhisire, ˆnaayikaga ati, 25“Raatabhugenyi, niwe aankorera kutya! Anye wone anyichuka na okunsoosya‑ko jiswaro ja obhugumba imbere ya abhaanu.”

Obhuragi bhwa okwibhurwa kwa Yeesu

26Omwanya gunu inda ya Erijaabheeti ꞉yaakingisye ameesi gataanu na kumwi, Nyamuwanga ˆnaatuma maraayika Gaabhuryeri mu‑musi gumwi nigutogwa ati, Najareeti, mu‑mukoowa gwa Gariraaya. 27ˆNaagenda ku‑muyarajuma umwi risiina ryaye ˆnaatogwa Maryamu. Omuyarajuma oyo, aariga ari‑ko obhuko na omuunu umwi risiina ryaye ˆnaatogwa Jejefu. Jejefu unu, aariga ari wa mu‑ruganda rwa omukama Dawudi.

28Maraayika oyo ˆnaagenda ku‑Maryamu, ˆnaamubhwira ati, “Enikukeesya, awe unu uyaaywe ribhando muno! Raatabhugenyi ari aamwi naawe.” 29Maryamu ejire oongwa emisango ja maraayika oyo, omwoyo gwaye nigunyaaka muno, ˆneebhusya ati, “Nibhukeesya ki bhunu?”

30Nawe maraayika oyo ˆnaamubhwira ati, “Awe Maryamu, siga okuubhaya, kwa okubha uyaaywe ribhando na Nyamuwanga. 31Yungwa, owuja okujira inda na uriibhura omwana omusigaji. Risiina ryaye urimutoga Yeesu. 32Aribha omukuru na aribhirikirwaga ati, ‘Omwana wa unu ari Inguru ya Bhyone.’ Raatabhugenyi Nyamuwanga arimukora okubha omutungi ku‑chitebhe cha ingʼoma cha omukama Dawudi, saaja waabho. 33Aribha omukama wa abhaanu bha oruganda rwa Yakobho akajaanende koone. Obhukama bhwaye, bhutariwaa‑wo wuri.”

34Maryamu ˆnaabhuusya maraayika oyo ati, “Jiribha kutiki jinu? Okubha nichaariga okumaama na omurume!” 35Maraayika oyo ˆnaamusubhya ati, “Mwoyo Mweru arikwikira na obhuturo bhwa unu ari Inguru ya Bhyone bhurikwijira inguru yaawo rwa rirengesi. Kurwa ejo, omwana unu uriibhura, aribha musorwa. Aribha ˆnaabhirikirwa ati, ni Mwana wa Nyamuwanga.#1:35 Mwana wa Nyamuwanga. Ku‑meeresyo amaafu, ringira Omwana wa Nyamuwanga mu‑Meeresyo inguru ya Emisango Emikomeeye. 36Mbe yungwa, omuyiri waawo Erijaabheeti ari na inda! Ari na inda ya ameesi gataanu na kumwi noorwo kutyo akokoowe. Unu aayikwaga ati ni mugumba nawe kaja okwibhura omwana wa echirume. 37Ku‑Nyamuwanga, gutari‑wo gunu gutakuturikana.”

38Maryamu ˆnaamusubhya ati, “Anye niri mukosi wa Raatabhugenyi, jibhe kw‑anye rwa kutyo waayika.” Neeya maraayika oyo ˆnaagenda.

Maryamu kaagenda okukeesya Erijaabheeti

39Mu‑siku ejoejo, Maryamu ˆnaagenda bhwangu ku‑Erijaabheeti, mu‑musi gumwi gwa mu‑bhiima bhya Yuudeya. 40Ejire aakinga mu‑nju ya Jaakariya, ˆnaakeesya Erijaabheeti. 41Erijaabheeti ejire oongwa era obhukeesya bhwa Maryamu, omwana ˆnaagoma mu‑nda yaaye. Awoawo, Erijaabheeti ˆneejurwa Mwoyo Mweru, 42ˆnaamura obhuraka, ˆnaayika ati, “Mu‑bhagasi bhoone, awe naawe uyaaywe ribhando! Omwana unu uriibhura, wone ayaaywe amabhando. 43Naanye ga, okukingira nyiramwene Raatabhugenyi waani, aaje okunkeesya? 44Omwanya gunu noongwa obhukeesya bhwawo, awoawo omwana aagoma mu‑nda yaani, kwa rikonderwa. 45Uri na ribhando awe, kwa okubha jinu Raatabhugenyi ꞉aakubhwiriiye weekirisiisye ati, jirikorekana!”

Orwimbo rwa Maryamu

46Maryamu ˆnaayika ati,

“Omutima gwani, ogukusya Raatabhugenyi,

47na omwoyo gwani, ogukondererwa Nyamuwanga, Omuchungusi waani.

48Okubha, anyichuka anye omukosi waaye,

noorwo kutyo niri omuunu wa obhurame bhwa emwaro.

Okwambira woori,

abhaanu bha mayimbo goone abhaja okunyayika ati,

niri omuunu wa ribhando.

49Nyamuwanga owa obhuturo bhwone, aankorera emisango ja okuruguusya.

Risiina ryaye ni Ryeru,

rwa omwene kutyo ari!

50Kaagenderera okubha na echigongo,

ku‑bhaanu bha bhuri eyimbo bhanu bharibhaga nibhamugayuka.

51Akorere emisango emikuru ku‑bhuturo bhwa mabhoko gaaye.

Aanyarambura abhaanu abha echigundu mu‑myoyo jeebhwe.

52Asoosiisye abhatungi ku‑bhitebhe bhyebhwe bhya obhutungi,

nawe abha obhurame bhwa emwaro, abhakusiisye.

53Abha omweko abhegutiisye kisi,

nawe abhaniibhi, ꞉aabhabhirimiisye ngaro nyeru.

54Aasakira omukosi waaye Yisirayeeri,

eechuka okumufwira echigongo.

55Kurwa ejo aakora rwa kutyo aariga aragire bhasaaja weeswe, Bhurayimu,

na abhaanu bhoone bha mu‑rwibhuro rwaye, akajaanende.”

56Mbe, Maryamu ˆnaamara wuti meesi gasatu ewa Erijaabheeti, niwo ˆnaasubha ewaaye.

Okwibhurwa kwa Yowana Omubhatiija

57Orusuku rwa okwibhura kwa Erijaabheeti nirukinga, ˆneebhura omwana wa echirume. 58Abheekasyanya na abhayiri bhaaye, ꞉bhaakondeeywe aamwi nage bhejire bhoongwa ati, Raatabhugenyi aamufwira echigongo, kwa okumuyaana omwana mu‑bhukwekuru bhwaye.

59Omwana oyo ejire aakingya siku etaanu na esatu, nibhagenda okumutenda#1:59 Okumutenda. Ku‑meeresyo amaafu, ringira Okutenda mu‑Meeresyo inguru ya Emisango Emikomeeye. korereki akuumisye jitungwa jeebhwe. Nibheenda bhamuyaane risiina rya Jaakariya esemwene, 60nawe nyiramwene ˆnaarema, ˆnaabhabhwira ati, “Wuri! Kaatogwa Yowana.” 61Abheene nibhasubhya ati, “Mbawo, mu‑bhayiri bhaanyu atari‑mo owa risiina eryo?”

62Mbe, nibheeresya esemwene chijibhi kwa amabhoko, korereki abhabhwire risiina rinu keenda okutoga omwana waaye. 63ˆNaabhasabhwa akabhaawu. ˆNaakaama ku‑kabhaawu okwo ati, “Risiina ryaye niwe Yowana.” Bhoone nibharuguura. 64Ku‑mwanya ogwoogwo, orurimi rwaye nirutaana. ˆNaamba okwayika rindi, ˆnaasiimaga Nyamuwanga. 65Abheekasyanya bhaaye bhoone, nibhayaya muno. Omusango ogwo niguswirana muno mu‑chaaro choone cha mu‑bhiima bhya Yuudeya. 66Bhoone bhanu ꞉bhoonguuwe, nibheebhuusya mu‑myoyo jeebhwe na okwayika ati, “Omwana unu aribha wa mbaga ki?” ꞉Bheebhuusiisye kutyo kwa okubha obhuturo bhwa Raatabhugenyi, bhwariga bhuri aamwi nage.

Orwimbo rwa Jaakariya

67Jaakariya esemwene omwana oyo, ˆneejurwa Mwoyo Mweru, ˆnaasoosya obhuragi ati,

68“Raatabhugenyi, Nyamuwanga wa Yisirayeeri, akusibhwe,

kwa okubha, eejire okwerura abhaanu bhaaye.

69Aachiyaana Omuchungusi owa obhuturo

okusooka mu‑ruganda rwa omukosi waaye Dawudi.

70Rwa kutyo aariga aayikire kara awo ku‑njira ya abharagi bhaaye abheeru.#1:70 Abheeru. Ku‑meeresyo amaafu, ringira Iinyeru mu‑Meeresyo inguru ya Emisango Emikomeeye.

71꞉Aachiragire ati,

arichichungura okusooka mu‑mabhoko ga abhasoko bheeswe,

na mu‑mabhoko ga bhoone bhanu abhachisoka.

72꞉Aayikire ati,

aribhafwira echigongo bhasaaja weeswe,

na okwichuka indagano yaaye iinyeru.#1:72 Indagano yaaye iinyeru ni okwikirisyanya kwa Nyamuwanga na abhaanu bhaaye. Nyamuwanga niwe wa okwamba okuta‑wo indagano inu. Ku‑meeresyo amaafu, ringira Indagano mu‑Meeresyo inguru ya Emisango Emikomeeye.

73Indagano eyo ꞉aayiteeye ku‑saaja weeswe Bhurayimu kwa echirayiro ati,

74arichiwonʼya okusooka mu‑mabhoko ga abhasoko bheeswe.

Niwo chimukorere emirimu, chitari na echibhabhuko wuri.

75Chiribha abheeyikanyibhwa na abharengeresi,

mu‑meeso gaaye na mu‑bhurame bhweswe bhwone.

76Woori awe omwana waani, uribha nuwaayikwa ati,

uri muragi wa Nyamuwanga unu ari Inguru ya Bhyone,

kwa okubha, uritangata imbere ya Raatabhugenyi,

korereki asongʼane wamwirabhiiye injira yaaye.

77Uribhwira abhaanu bhaaye kutyo bharichungurwa,

kwa okufwirwa echigongo ebhibhiibhi bhyebhwe.

78Ku‑njira ya obhwafu bhwa echigongo cha Nyamuwanga weeswe,

obhuchungusi okusooka mu‑rwire bhwachiija‑ko, rwa obhweru bhwa risuubha,

79ka wone bhumurikire abhaanu bhoone bhanu bheekaaye mu‑chisuute,

na mw‑irengesi rya orufu.

Arichitangasya okutura ku‑njira ya omurembe.”

80Mbe omwana oyo Yowana, ˆnaakura, ˆnaabhona amanaga mu‑mwoyo gwaye. ˆNaagenda okwikara mw‑ibhara, okukingira ku‑mwanya gwa okwibhuurisya ku‑Bhayisirayeeri.

Currently Selected:

Ruuka 1: jit

Highlight

Copy