Yowana 8

1[Mbe, abhatangasya abho bhoone nibhasooka awo, bhuri muunu ˆnaasubha iika ewaaye. Yeesu wone ˆnaasooka mu‑rubhuga rwa Riyekaru, ˆnaagenda ku‑chiima cha Emijeyituuni.

Omugasi unu ꞉aagwatirwe echiroogi

2Bhwejire bhwacha katondo, Yeesu ˆnaagenda rindi ˆneengira mu‑rubhuga rwa Riyekaru. Abhaanu bhoone nibhamuuja‑ko, omwene ˆneenyanja, ˆnaamba okubheeyigisya. 3Abheeyigisya bha ebhiraagiro bhya Muusa#8:3 Abheeyigisya bha ebhiraagiro bhya Muusa. Ku‑meeresyo amaafu, ringira mu‑Meeresyo inguru ya Emisango Emikomeeye. na Abhafarisaayo, nibhamusirira omugasi unu ꞉aagwatirwe echiroogi, nibhamutuura agatigati ya echise cha abhaanu. 4Nibhabhwira Yeesu ati, “Omwiyigisya, omugasi unu, aagwatwa echiroogi. 5Woori, Muusa mu‑bhiraagiro bhyaye, ꞉aachiragiriiye okubhuma na amabhuyi omugasi rwa unu okukingira afwe.#8:5 Ringira Abharaawi 20:10; Orwichuko rwa Ebhiraagiro 22:22‑24. Mbe, awe owaayika ki inguru ya omusango ogwo?” 6Abhaanu abho ꞉bhaabhuusiisye Yeesu kutyo kwa okumuregeeja, korereki bhabhone omusango gwa okumusitaaka. Nawe Yeesu ˆneenama, ˆnaamba okukaama aasi na echaara chaaye. 7Bhejire bhaagenderera okumubhuusya, omwene ˆneemereeguru, ˆnaabhasubhya ati, “Araabha ari‑wo umwi mw‑imwe unu achaariga okukora echibhiibhi noorwo chimwi, oyo abhe wa okwamba okubhuma omugasi unu na ribhuyi.” 8Mbe, Yeesu ˆneenama rindi, ˆnaagenderera okukaama aasi na echaara chaaye. 9Bhejire bhoongwa ejo, emitima jeebhwe nijibharamura,#8:9 Emitima jeebhwe nijibharamura. Emisango jinu jitari‑mo mu‑Nyabhurira ejindi ja Echiyunaani. nibhaamba okusooka‑wo umwiumwi, okwambira abhakaruka okukingira abhasigaji. Ku‑bhuteero, ˆnaasigara Yeesu eenyere, na omugasi oyo eemereeguuyuga imbere yaaye. 10Niwo Yeesu ˆneemereeguru, ˆnaamubhuusya ati, “Maayi, bhari aaki bhanu abhakusitaaka? Angu, atari‑wo omuunu woonewoone unu aasigara korereki akuramure?” 11Omugasi oyo ˆnaamusubhya ati, “Mwami, atari‑wo noorwo umwi wa okundamura.” Mbe, Yeesu ˆnaamubhwira ati, “Noorwo anye nitakukuramura. Genda, nawe okwambira reero, usige okukora ebhibhiibhi rindi.”]

Yeesu niwe obhweru bhwa echaaro

12Mbe, Yeesu ˆnaagenderera okubhabhwira ati, “Anye naanye obhweru bhwa echaaro. Omuunu woonewoone unu kaanduubha, atakuribhata mu‑chisuute wuri, tari kaja okubha na obhweru bhunu obhumutangasya okuja mu‑bhuwanga bhwa kajaanende koone.” 13Abhafarisaayo nibhamubhwira ati, “Awe owisoosisya obhubhambaasi omwene. Obhubhambaasi bhwawo bhutari bhwa chimari!” 14Yeesu ˆnaabhasubhya ati, “Noorwo araabha eniisoosisya obhubhambaasi omwene, obhubhambaasi bhwani ni bhwa echimari. Anye nimenyere enu nisookere, ka wone nimenyere enu enija. Nawe emwe mutakumenya enu nisookere noorwo enu enija. 15Emwe omundamura okuruubhana na obhwiganirisya bhwa echinyamuunu, nawe anye nitakuramura omuunu woonewoone. 16Nawe araabha anye nikaramura omuunu, indamu yaani niyo ya echimari, kwa okubha nitari anye omwene era, tari niri aamwi na Raata unu ꞉aantumire. 17Mu‑bhiraagiro bhyemwe jikaamirwe ati, obhubhambaasi bhwa abhaanu bhabhiri ni bhwa echimari.#8:17 Ringira Orwichuko rwa Ebhiraagiro 17:6, 19:15. 18Mbe, anye eniisoosisya obhubhambaasi omwene, na Raata unu ꞉aantumire wone kaansoosisya obhubhambaasi.”

19Niwo Abhafarisaayo nibhabhuusya Yeesu ati, “Angu, Esomwana ari aaki?” Yeesu ˆnaabhasubhya ati, “Anye mutakummenya, noorwo Raata waani mutakumumenya. Araabha mukammenyere anye, Raata waani wone mukamumenyere.”

20Yeesu ꞉aayikire emisango ejo joone, omwanya gunu eeyigisyaga mw‑Iyekaru, anu ebhibhiikiro bhya echiyaanwa#8:20 Echiyaanwa. Ku‑meeresyo amaafu, ringira Echoogo mu‑Meeresyo inguru ya Emisango Emikomeeye. bhyariga bhiri. Nawe ꞉ataabheeye‑wo omuunu unu ꞉aamugwatire, kwa okubha omwanya gwaye gwariga guchaari kukinga.

Yeesu kaayika inguru ya orufu rwaye

21Mbe, Yeesu ˆnaabhwira Abhafarisaayo abho rindi ati, “Anye enigenda, na emwe omuja okunyenja. Nawe murifwa ku‑songa ya ebhibhiibhi bhyemwe. Anu enigenda, emwe mutaritura okuuja‑wo.” 22Niwo abhatangasya bha Abhayawudi nibhaamba okubhuusyanya ati, “Angu, kaja okwiyita? Okubha kaayika ati, ‘Anu kaagenda, eswe chitakutura okujaa‑wo?’” 23Yeesu ˆnaagenderera okubhabhwira ati, “Emwe muri bhaanu bhanu bhasookere emwaro ku‑chaaro anu, nawe anye nisookere inguru mu‑rwire. Emwe muri bha ku‑chaaro kunu, nawe anye nitari wa ku‑chaaro kunu. 24Nikwo okukora naabhabhwira ati, murifwa ku‑songa ya ebhibhiibhi bhyemwe. Mbe, araabha mutakwikirisya ati, ‘Anye Niwe,’#8:24 Anye Niwe. Nikwo kutyo Nyamuwanga ꞉eemenyesiisye mu‑Ndagano ya Kara. Ringira Okwimuka 3:14; Iisaya 43:10‑11. murifwa ku‑songa ya ebhibhiibhi bhyemwe.” 25Mbe, abheene nibhamubhuusya ati, “Woori, ka naawe ga?” Omwene ˆnaabhasubhya ati, “Naabhabhwira okusookerera ku‑bhwambiro ati naanye ga! 26Niri na emisango myafu jinu naakaturire okwayika inguru yeemwe na okubharamura, nawe nitakuja kukora kutyo. Okubha unu ꞉aantumire ni wa echimari, anye enibhwira abhaanu bhoone emisango jinu enuungwa okusooka ku‑mwene.”

27Bhejire bhoongwa ejo, ꞉bhataasombookeeywe ati aariga ˆnaayika nabho inguru ya Esemwene wa mu‑rwire. 28Mbe, Yeesu ˆnaabhabhwira ati, “Omwanya gunu murinsunga inguru ku‑musarabha, awo niwo murimenya ati anye naanye Omwana wa Omuunu. Ka wone murimenya ati joone jinu enikora, nitakujikora ku‑bhuturo bhwani omwene, tari naayika jinu Raata ꞉aanyiyigisiisye. 29Unu ꞉aantumire ari aamwi na anye. Achaariga okunsiga eenyere, kwa okubha omwanya gwone enikora jinu ejimukondisya.”

30Omwanya gunu Yeesu aariga ˆnaayika emisango ejo, abhaanu bhaafu nibhamwikirisya.

Nyamuwanga kaatuura abhaanu mu‑bhwitaage

31Mbe, Yeesu ˆnaabhwira Abhayawudi bhanu ꞉bhaamwikirisiisye ati, “Araabha omuja okugenderera okuruubha ameeyigisyo gaani, omuja okubha abheeyigisibhwa bhaani bha echimari. 32Ka wone omuja okumenya echimari, na echimari echo, echija okubhakora mubhe abheetaage.” 33Abheene nibhamubhuusya ati, “Eswe chiri rwibhuro rwa Bhurayimu. Chichaariga okubha abhagaya bha omuunu woonewoone urya. Kurwa ki owaayika ati echija okukorwa abheetaage?” 34Yeesu ˆnaabhasubhya ati, “Ni chimari enibhabhwira ati, omuunu woonewoone unu kaagenderera okukora ebhibhiibhi, oyo ni mugaya wa ebhibhiibhi.#8:34 Ringira Abharuumi 6:12‑23. 35Omugaya atakwikara mu‑nju ya omwami waaye siku joone, nawe omwana keekara‑mo siku joone. 36Kurwa ejo, araabha anye Omwana wa Nyamuwanga nibhasoosiisye mu‑bhibhiibhi bhyemwe, mutaribha abhagaya rindi, tari muribha abhaanu abheetaage kata. 37Nimenyere ati, emwe muri rwibhuro rwa Bhurayimu. Nawe omwenda okunyita, kwa okubha muremere okwikirisya jinu enibheeyigisya. 38Anye enibhabhwira jinu nirorere okusooka ku‑Raata waani, nawe emwe omukora jinu ꞉mweeyigisiibhwe na esomwana.” 39Abheene nibhamusubhya ati, “Bhurayimu niwe raata!” Yeesu ˆnaabhabhwira ati, “Araabha chimari mukabheeye muri bhaana bhaaye, mukakorere jinu omwene aariga ˆnaakora. 40Nawe woori, omuyenja injira ya okunyita, noorwo kutyo naabhabhwira echimari chinu ꞉noonguuwe okusooka ku‑Nyamuwanga. Bhurayimu ꞉ataakorere kutyo emwe omwenda okukora woori. 41Ebhikorwa bhinu emwe omukora, ebhisooka kw‑isomwana owundi.” Niwo nibhamusubhya ati, “Eswe chitari bhaana bha mu‑masanga. Nyamuwanga eenyere niwe Raata!” 42Yeesu ˆnaabhasubhya ati, “Araabha Nyamuwanga akabheeye ari Somwana, mwakanyendere, kwa okubha nisookere ku‑mwene, ka woori niri anu. Anye ꞉niteejire ku‑bhuturo bhwani, tari Nyamuwanga niwe ꞉aantumire. 43Kurwa ki mutakusombookerwa jinu enaayika? Mutakutura okujisombookerwa kwa okubha mutakwenda okutegeresya emisango jinu enibhabhwira. 44Emwe muri bhaanu bha Syetaani, oyo niwe esomwana! Niyo isonga omwenda okukora jinu esomwana keegomba. Syetaani ni mwiti okusookerera ku‑bhwambiro. Atakwenda echimari kata, kwa okubha echimari echo, chitari‑mo mu‑mwoyo gwaye. Omwene ni mubheeyi, na akatungiiywe kaaye ni kubheeya, ka wone niwe esemwene orubheeyi. 45Nawe, kwa okubha anye enibhabhwira echimari, niyo isonga mutakunyikirisya. 46Niga mw‑imwe unu kaatura okusoosya obhubhambaasi ati anye niri mukosi wa ebhibhiibhi? Araabha enibhabhwira echimari, kurwa ki mutakunyikirisya? 47Omuunu woonewoone wa Nyamuwanga, oyo kaategeresya emisango jaaye. Emwe mutakutegeresya jinu Nyamuwanga kaayika, kwa okubha mutari bhaanu bhaaye.”

Yeesu ni mukuru okukira Bhurayimu

48Abhayawudi nibhabhuusya Yeesu ati, “Chitakwayika echimari ati, awe uri Musamaariya, ka wone uri na risambwa?” 49Yeesu ˆnaabhasubhya ati, “Anye nitari na risambwa, tari niyaana Raata waani echibharo, nawe emwe mutakunaana echibharo. 50Anye nitakwiyenjera rikusyo, tari ari‑wo unu keenda okunaana rikusyo, ka wone niwe aribha omuramusi wa echimari. 51Ni chimari enibhabhwira ati, omuunu woonewoone unu kaagayuka ameeyigisyo gaani, atarifwa wuri.” 52Mbe, Abhayawudi abho nibhamubhwira Yeesu ati, “Woori echimenya ati, awe uri na risambwa! Bhurayimu ꞉aafuuwe, na abharagi wone ꞉bhaafuuwe. Nawe awe owaayika ati, ‘Omuunu woonewoone unu kaagayuka ameeyigisyo gaani, atarifwa wuri.’ 53Angu, owikora okubha omukuru okukira saaja weeswe Bhurayimu? Omwene arafuuwe, na abharagi wone bharafuuwe. Woori, owikora ati, naawe ga?” 54Yeesu ˆnaabhasubhya ati, “Araabha eniikumangya anye omwene, okwikumangya kwani kutari na obhugajuro bhwonebhwone. Nawe Raata waani, unu emwe omwayika ati ni Nyamuwanga weemwe, niwe kaankumangya. 55Emwe mutakumenya Nyamuwanga, nawe anye enimusombookerwa. Araabha nikaayikire ati nitakumusombookerwa, mbe naakabheeye omubheeyi rwa emwe. Nawe anye enimusombookerwa, ka wone enigayukaga jinu kaayika. 56Bhurayimu, saaja weemwe, ꞉aakondeeywe muno okurora orusuku rwa okuuja kwani. Ejire aarurora, ˆnaasandabha muno.”

57Mbe, Abhayawudi nibhabhwira Yeesu ati, “Awe uchaari kukingya emiguuga makumi gataanu. ꞉Waarorere aaki Bhurayimu?” 58Yeesu ˆnaabhasubhya ati, “Ni chimari enibhabhwira ati, anye niri‑wo#8:58 Anye niri‑wo. Anu Yeesu kaakorera emirimu risiina rya Nyamuwanga rwa kutyo rikaamirwe mu‑chitabho cha Okwimuka 3:14 na Iisaya 43:10‑11. okusookerera omwanya gunu Bhurayimu aariga achaari kwibhurwa.” 59Abhayawudi bhejire bhoongwa ejo, nibhabhooja amabhuyi korereki bhamubhume nago na okumwita.#8:59 Abhayawudi ꞉bheendere okwita Yeesu, kwa okubha bheetogeraga ati kaafuma Nyamuwanga inguru ya okukorera emirimu risiina rya Nyamuwanga. Nawe Yeesu ˆneeyibhisa, ˆnaasooka mu‑rubhuga rwa Riyekaru.

Currently Selected:

Yowana 8: jit

Highlight

Copy