Yowana 4

Yeesu kaasimura na omugasi Omusamaariya

1Mbe, Yeesu ꞉oonguuwe ati Abhafarisaayo ꞉bhaabhwiriiywe ati kaabhatiija, ka wone ati kaabhona abheeyigisibhwa bhaafu okukira Yowana. 2Noorwo kutyo, echimari ni ati, Yeesu omwene ꞉ataabhatiijiisye omuunu woonewoone, tari bheeyigisibhwa bhaaye nibho bhaariga nibhabhatiija. 3Yeesu ejire oongwa kutyo, ˆnaasooka mu‑mukoowa gwa Yuudeya aamwi na abheeyigisibhwa bhaaye, ˆnaasubha mu‑mukoowa gwa Gariraaya. 4Omwanya gunu bhaariga nibhagenda Gariraaya, ꞉jeenderwe bhature mu‑mukoowa gwa Samaariya. 5Mbe, nibhakinga mu‑ruguuyo rumwi rwa Abhasamaariya runu rwariga nirutogwa ati Sikaari. Oruguuyo orwo rwariga rusijeene na risambu rinu Yakobho ꞉aasoosiisye kara okubha omwanjuro ku‑Jejefu omwana waaye.#4:5 Ringira Obhwambiro 48:21‑22. 6Mu‑ruguuyo omwo nimwo ryariga riri rijibha rya Yakobho. Yeesu ˆneenyanja ku‑mbari ya rijibha eryo, kwa okubha aariga ayigirwe na orugendo. Omwanya ogwo yaariga iri wuti saa etaanu na imwi mu‑mwisi.

7Neeya, omugasi umwi Omusamaariya, ˆnaaja okutaya amanji mw‑ijibha omwo. Yeesu ˆnaamubhwira ati, “Maayi, naana‑ko amanji ninywe.” 8Omwanya ogwo, abheeyigisibhwa bha Yeesu bhaariga bhagendere mu‑ruguuyo okugura ebhiryo. 9Mbe, omugasi oyo ˆnaamusubhya ati, “Awe uri Muyawudi, anye niri Musamaariya. Ejibha kutiki unsabhwe nikuyaane amanji ga okunywa?” ꞉Aayikire kutyo, kwa okubha Abhayawudi bhaariga bhatakusaasikana aamwi na Abhasamaariya. 10Yeesu ˆnaamusubhya ati, “Araabha ukabheeye nuumenya echiyaanwa cha Nyamuwanga, na unu kaakusabhwa amanji ga okunywa, waakamusabhirwe, na omwene aakakuyaaye amanji ganu agasoosya obhuwanga.” 11Omugasi oyo, ˆnaasubhya Yeesu ati, “Mwami, awe utari na echiinu cha okutayira amanji, ka wone, rijibha rinu ni reera. Woori owuja okubhona aaki amanji ganu agasoosya obhuwanga? 12Saaja weeswe Yakobho niwe ꞉aachiyaaye rijibha rinu, omwene wone aariga ˆnaanywa amanji ga munu aamwi na abhaana bhaaye na ebhitunganwa bhyaye. Angu woori, awe owirora wuti uri mukuru okumukira?” 13Niwo Yeesu ˆnaamusubhya ati, “Omuunu woonewoone unu kaanywa amanji ganu, kaja okuungwa obhwiro rindi. 14Nawe omuunu unu kaanywa amanji ganu anye enimuyaana, atakuja okuungwa obhwiro noorwo na akatyari kajaanende koone. Amanji ganu enija okumuyaana, agaja okubha rwa omumiro gwa amanji mu‑mwoyo gwaye ganu agabhogomera obhuwanga bhwa akajaanende koone.”#4:14 Ringira Iisaya 58:11. 15Niwo omugasi oyo ˆnaabhwira Yeesu ati, “Mwami, enisabhwa unaane amanji ago, korereki nisige okuungwa obhwiro rindi, na nisige okuuja okutaya amanji rindi mw‑ijibha rinu.” 16Yeesu ˆnaamubhwira ati, “Genda ubhirikire omurume waawo, uuje nage anu.” 17Omugasi oyo, ˆnaamusubhya ati, “Anye nitari na omurume.” Yeesu ˆnaamubhwira ati, “Waayika echimari ati utari na omurume, 18kwa okubha wakingiisye abharume bhataanu, na omurume unu wikaaye nage woori, wone atari murume waawo. Waayika echimari.” 19Omugasi oyo, ˆnaamubhwira ati, “Mwami, enirora ati, awe uri muragi. 20Bhasaaja weeswe bhaariga nibharamya Nyamuwanga ku‑chiima chinu cha Gerejimu, nawe emwe Abhayawudi omwayika ati, ni bhusibhusi chigende okuramya Nyamuwanga mu‑Yerusareemu.”#4:20 Ringira Orwichuko rwa Ebhiraagiro 11:29; 2 Emisango ja Emyanya 6:6. 21Yeesu ˆnaamusubhya ati, “Maayi, nuunyiikirisye, omwanya guriija gunu mutariramya Raata Nyamuwanga ku‑chiima chinu amwi mu‑Yerusareemu erya. 22Emwe Abhasamaariya omuramya Nyamuwanga unu mutakumenya. Nawe eswe Abhayawudi echiramya Nyamuwanga unu chimenyere, kwa okubha Nyamuwanga arichungura abhaanu okutura ku‑Bhayawudi.#4:22 Ringira Obhwambiro 12:3. 23Omwanya oguuja, ka wone, gwakingire, gunu abhaanu bhanu abheenda okuramya Raata Nyamuwanga mu‑chimari, bharimuramyaga kwa Mwoyo na echimari. Raata Nyamuwanga keenda abhaanu rwa abho, nibho bhabhega nibhamuramya. 24Nyamuwanga ni Mwoyo. Abhaanu bhanu abhamuramya, bheenderwe bhamuramirisyega kwa Mwoyo na echimari.” 25Omugasi oyo ˆnaabhwira Yeesu ati, “Nimenyere ati Masiya kaaja, unu kaatogwa ati Kirisito. Ka wone nimenyere ati, omwanya gunu ariija, arichibhwira emisango joone.” 26Niwo Yeesu ˆnaamusubhya ati, “Anye, unu eniroma na awe, naanye Masiya.”

27Mbe, omwanya ogwo, abheeyigisibhwa bhaaye nibhasubha okusooka mu‑ruguuyo. Nibharuguura muno okurora ati Yeesu aariga ˆnaasimura na omugasi.#4:27 Nibharuguura muno okurora ati Yeesu aariga ˆnaasimura na omugasi. Abheeyigisya bha Abhayawudi bhaariga bhatakuroma na abhagasi bhari abheene era, chimwichimwi bhaariga bhatakusimura na abhagasi abhagenyi. Nawe atari‑wo omuunu noorwo umwi unu ꞉aabhuusiisye Yeesu ati, “Owumwenda‑ko ki?” amwi ati, “Kurwa ki owuroma nage?”

28Mbe, omugasi oyo ˆnaasiga echituumo chaaye cha amanji awo, ˆnaagenda mu‑ruguuyo. Ejire aakinga, ˆnaabhwira abhaanu ati, 29“Chigende, murore omuunu unu aambwira emisango joone jinu nirakorere! Angu, eyiturikana wuti niwe Kirisito?” 30Abhaanu bhejire bhoongwa ejo, nibhasooka mu‑ruguuyo omwo, nibhagenda ku‑Yeesu.

31Omwanya gunu abhaanu abho bhaariga bhachaari kukinga ku‑Yeesu, abheeyigisibhwa bhaaye nibhamusabhwa ati, “Omwiyigisya, nuurye ebhiryo.” 32Nawe omwene ˆnaabhasubhya ati, “Anye niri na ebhiryo bhinu emwe mutakumenya.” 33Niwo abheeyigisibhwa bhaaye nibhaamba okubhuusyanya ati, “Angu, ari‑wo omuunu unu aamureetera ebhiryo?” 34Yeesu ˆnaabhasubhya ati, “Ebhiryo bhyani ni kukora okwenda kwa Raata Nyamuwanga unu ꞉aantumire, na okukuumisya emirimu jaaye. 35Emwe munarire okwayika ati, ‘Gachaari‑wo meesi gana era okugesa kukinge.’ Nawe anye enibhabhwira ati, muringire ebhirimwa mu‑masambu, bhyakomeeye, bhyeyire okugeswa. 36Omugesi kaabhona omuyeero gwaye, na kaakumanya ebhigeswa inguru ya obhuwanga bhwa akajaanende koone, korereki omubhibhi na omugesi, bhakonderwe aamwi bhoone. 37Iri‑wo inyaayika inu eyayika echimari ati, ‘Omubhibhi wa jimbibho ni wundi, na omugesi wa ebhigeswa wone ni wundi.’ 38꞉Naabhatumire okugesa bhinu emwe ꞉mutaanyaakiriiye. Abhaanu abhandi nibho ꞉bhaakorere emirimu joone emikomeeye, nawe woori, emwe neemwe omubhona omuriiro gwa emirimu jeebhwe.”

39Mbe, Abhasamaariya bhaafu bha mu‑ruguuyo orwo, nibheekirisya Yeesu, kwa okubha ꞉bhoonguuwe obhubhambaasi bhwa omugasi oyo ati, “Omuunu oyo aambwira emisango joone jinu nirakorere.” 40Abhasamaariya bhejire bhaakinga ku‑Yeesu, nibhamusabhwa eekare aamwi nabho. Niwo ˆneekara mu‑ruguuyo orwo siku ebhiri. 41Abhaanu bhaafu muno nibheekirisya Yeesu inguru ya emisango jinu aayikaga. 42Nibhabhwira omugasi oyo ati, “Woori cheekirisya omuunu unu jitari ku‑misango jinu waachibhwira. Tari kwa okubha eswe abheene cheeyungwirwa emisango jinu kaayika. Woori chimenyere chimari ati, omuunu unu niwe Omuchungusi wa echaaro.”

Yeesu kaawosya omwana wa omusakisi wa omukama

(Mataayo 8:5‑13; Ruuka 7:1‑10)

43Jejire jaatura siku ebhiri, Yeesu ˆnaasooka mu‑ruguuyo rwa Sikaari, ˆnaagenda mu‑mukoowa gwa Gariraaya. 44Yeesu aariga aamarire okwayika ati, “Omuragi atakuyaanwa echibharo mu‑chaaro cha ewaabho.” 45Mbe ejire aakinga Gariraaya, abhaanu bheende‑yo nibhamukuma kisi, okubha bhaariga bhaarorere joone jinu Yeesu ꞉aakorere Yerusareemu arya mu‑chikukuru ya Okwambuka, kwa okubha abheene wone, bhaariga bhari‑wo.

46Yeesu ˆnaagenda rindi mu‑musi gwa Kaana, mu‑mukoowa gwa Gariraaya, anu aariga ayinduuye amanji okubha echifuufu. Mu‑musi ogwo, aariga ari‑mo omusakisi umwi wa omukama okusooka mu‑musi gwa Kaperinaawumu. Omusakisi oyo, omumura waaye aariga ari murwaye. 47Omusakisi oyo, ejire oongwa ati Yeesu ꞉aasubhire Gariraaya okusooka Yuudeya, ˆnaamuuja‑ko. ˆNaakinga ˆnaamwirembeeresya ati aaje Kaperinaawumu, awosye omwana waaye, kwa okubha aariga arwaye muno ari yeeyi okufwa. 48Yeesu ˆnaamusubhya ati, “Emwe, mukarema okurora echibharikisyo na ebhiruguusyo, mutakunyikirisya chimwi!” 49Omusakisi oyo ˆnaamusubhya ati, “Mwami, enikusabhwa, chigende ku‑mumura waani, achaari okufwa.” 50Nawe Yeesu ˆnaamusubhya ati, “Genda, omumura waawo aaworere.” Omusakisi oyo ˆneekirisya emisango jinu Yeesu ꞉aamubhwiriiye, ˆnaasubha iika ewaaye.

51Mwejo yende‑ko, omwanya gunu aariga achaari ku‑njira, ˆnaabhugana na abhakosi bhaaye bhagenderega okumuramira, nibhamubhwira ati, “Omumura waawo aaworere.” 52Niwo ˆnaabhabhuusya omwanya gunu ꞉aambire okubha kisi. Abheene nibhamusubhya ati, “Omuswija gwamamusooka‑ko rigoro, saa etaanu na ebhiri mu‑mwisi.” 53Mbe, esemwene omumura oyo, ˆnaasombookerwa ati, aamawora omwanya guryagurya gunu Yeesu ꞉aamubhwiriiye ati, “Omumura waawo aaworere.” Kurwa ejo, omusakisi oyo aamwi na abhaanu bhoone bha iika waaye, nibheekirisya Yeesu. 54Echo chaariga chiri chibharikisyo cha kabhiri chinu Yeesu ꞉aakorere mu‑mukoowa gwa Gariraaya, omwanya gunu ꞉aasubhire okusooka mu‑mukoowa gwa Yuudeya.#4:54 Ringira Yowana 2:11.

Currently Selected:

Yowana 4: jit

Highlight

Copy