Luk 16

A Iesu isran v'nen ivrur m'ertu na m'akarien p'kln iaviviln

1Hin a Iesu ivr anr arm'ertuan ml kavr ti a, “Dui iamk sian istudau, m'ertuan iamk iak ip'aur sian udlani. V'eti avr ani kavr m'ertuan ti iutakm ani uaki. 2Laha, iv'ara ani, kavr ti a, ‘?Inap'i hin nrn v'nen lera ivrurh? Pav'iv'en a kana nut kp'aur siak inap'ei, sena ti mkav'i dui ipap'aur siak ml.’

3Sarei, dui lera iv'hv'ahi arna nln kavr ti a, ‘?P'en v'ata, sena ti a mlinak ipasran kana arna pariak? Kana nahua a ti p'ehl nadep', kamamih a ti p'emiman nav'et asnr m'ertu. 4Kana nrndu sei p'ani, a ti, naran a mlin ipasran kana arna pariak, m'ertu apavrndu ti apavlev' kana uam a ti p'av'a al nmahar.’

5Laha, iv'ara anr m'ertu udlani la avkaun asn a mlinan ha, avrama asnn kavr a nki itauamu kavr ti a, ‘?Nakm kaunam iv'a asn a mlinak?’ 6Laha, ivr ti a, ‘Tram na ueil aukuk ani inelnal iv'amk.’ (100) Laha, ivr ani, kavr ti a, ‘Pav'a ser kalev' ruplet na kaunam kalak kulul aranan kavr ti inellm' (50) uaki.’ 7Sarei, kavr a tv'aln, kavr ti a, ‘?Nakm kaunam iv'a?’ Ivrprani, kavr ti a, ‘Pak na uit inelnal iv'amk.’ (100) Laha, ivr ani, kavr ti a, ‘Palev' ruplet na kaunam kulul aranan kavr ti inelsatl uaki.’ (80) 8Sarei, a mlinan ivr ti dui stu lahara, ptn iak, sena ti m'ertu na nadep' laha avrndu sia nadep' ip'as isiv' m'ertu na nut ren.

9Nvr a kam'i ml, pavani ti m'ertu apavv'i tv'elm'i, a nav'et na nadep' stu laha, sena ti naran pavram'a apavlev' kam'i pavlak arna nut p'as ikahiris naran. 10M'ertu iv'ahur mamh si papa nakl irndu ti ipav'ahur mamh si lilil, v'eti m'ertu iav'ahur mamh si papa nakl, ikav'ahur mamh si lilil. 11?Sena si lera, ipavr ti kam'i kaavv'ahur mamh nav'et na nadep' stu, hin ak ipatu si p'sp'as dau al lm'am'i? 12?V'aha ipavr ti kaavp'aur mamh sia m'ertu uraur, hin ak ipatu sei a kam'i ipav'i nkam'i?

13 # Mat 6:24. M'ertu ikav'i m'ertu na m'akarienar mlin ikahru, sena ti ipalep'la tv'aln kalap'as a tv'aln. Mkavsapei Atua ikv'amk m'a nav'et.”

V'nen huan a Musis, v'nenar pruvet m'a v'anuan Atua

(Matiu 11:12,13; 5:18)

14Arvarisi, la avrn nam'er a nav'et ha, avrn v'nen udlani lera kavsip'lani. 15V'eti ivr anr kavr ti a, “Kam'i kvani ti m'ertu avv'ah ti kvviviln, v'eti Atua irndu nlm'i. Sena ti sei m'ertu avv'ah ti ip'as istudau iv'i si stu lil arna nahn Atua.

16 # Mat 11:12,13. V'nen huan a Musis m'a v'nenar pruvet arp'tir ier naranan a Sun Paptais. Arna naran lera dav'a ier dika, avrp'ep'a v'anuan Atua, laha, m'ertu udlani avhua a ti apavrama arna nut lera. 17#Mat 5:18.Ihua a ti nut eia m'a nadep' ipahiris, v'eti ihua mau a ti si papa arna v'nen hua ipamln.

18 # Mat 5:32; 1 Kurin 7:10,11. Dui ipasran tav'etan kan lheien m'a tav'et uraur, hin iv'nahi, v'aha dui ien lheien m'a tav'et la a naun itsran sarei ha, hin iv'nahi.

Dui sian istudau m'ei a Lasaras

19Dui iamk sian istudau. Iua klus p'sp'as nakl, im'ielm't katva, kahan tim'ah ip'as istudau arna napn udlani. 20Dui uraur sian ihei, nahan iv'i a Lasaras, ataui im'atr asn pn liuan, hin p'akn itp'tp'. 21Irn ti ipahan tk tim'ah irs a nv' tiv'an dui lil lahara. Laha, lip'ah avrama nakl kavhalim'a nut p'akn itp'. 22Dav'a, dui sian ihei im'a. Sarei, ensel avlav'i kavrmani kavtaui asn a Epraham. Laha, dui sian istudau, hin ml im'a, laha atini. 23Laha, naran ilak al nep'v'en karn istu istudau, iklau kalei a Epraham iv'iv'a, m'ei a Lasaras ilak mima asnn.

24Laha, iv'ara ani, kavr ti a, ‘Tatei Epraham, parn istu a kana katap'ei a Lasaras ipav'a kadi ual nirh lm'an al nauei kataui arna nm'k ipahaha, sena ti nrn istu istudau al nep'v'en laha.’ 25V'eti a Epraham ivr ani, kavr ti a, ‘Natk, parndu naran kdsilv' uam, klev' si p'sp'asam udlani, v'eti a Lasaras, ilev' si stustu, v'eti hilaha hin irn ip'as, v'eti nakm krn istu istudau. 26Si uraur ml, tah p'arei iamk itater sarei a p't nut nad, a ti m'ertu atlaha ikav'alet asnm'i, v'aha m'ertu atlera ikaluvn ani kadama asnm'em'.’

27Laha, ivr ti a, ‘Tatei, nmiman anh ihua, patap'ei a Lasaras ipav'a a utan a tetiak. 28Sena ti kana tv'alk arlm', ip'as a ti ipav'a kavrp'ep'ei anr, imahei ti hir apavrama a nut stu laha.’ 29A Epraham ivr ani, kavr ti a, ‘Hilaha v'nenan a Musis m'a v'nenar pruvet itater sarei asnr tv'alm. Ip'as a ti apavv'rn ani.’ 30V'eti ivr ani, kavr ti a, ‘Ihei, tatei Epraham, v'eti ipavr ti m'ertu kinkin ipathal ml arna m'ien kadav'a asnr, apavvav nlr.’ 31V'eti ivr ani, kavr ti a, ‘Ipavr ti akavv'rn a v'nenan a Musis m'er pruvet, akavv'ah v'nena m'ertu ithal ml arna m'ien.’ ”

Currently Selected:

Luk 16: nmb

Highlight

Copy