Luk 13

Parn istu a si stuam v'aha pam'a

1Arna naran lera m'ertu kinkin avrama asnn kavvrur ti a Pailat itrp sera m'ertu a Kalili kinkin, kuha dir m'a di si slm atvtrp'n sarei kavtau an Atua. 2Laha, a Iesu ivr anr kavr ti a, “?Kvv'ah ti ardu a Kalili lera avstu kavsiv' ardu a Kalili udlani, sena ti si stu lera iarr? 3Nvr a kam'i, ihei, v'eti ipavr ti kam'i mkavvav nlm'i, kam'i pavram'a ipanap'ar. 4?V'aha m'ertu arnal lman isatl (18), la nmah p'arei a Sailuam irs katevp'nr hara, kvv'ah ti hir avstu kavsiv' m'ertu udlani avlak a Serusalem? 5Nvr a kam'i, ihei, v'eti ipavr ti kam'i mkavvav nlm'i, kam'i pavram'a ipanap'ar.”

A Iesu isran v'nen ivrur p'alak navan ihei

6Sarei, isran v'nen laha ml kavr ti a, “Dui iamk, p'alak isi al pitvetan. Laha, hin ima a ti ipasva navan kinkin, v'eti iapasla ki. 7Sarei, ivr a dui ip'aur pitvetan kavr ti a, ‘Parn, Kana ntama sarei asn p'alak laha pai itatl, sena ti nrn p'esva ki, v'eti nala navan kinkin. Pav'a katrusi. ?Inap'i hin itukar nadep' lera?’ 8V'eti dui ip'aur pitvet ivrprani, kavr ti a, ‘Mlin, palni ipater pai mau ipamk. Kana p'ehl nadep' ipatalu ani katu ns pluk aranan. 9Sarei, ipavr ti navan ipaiak, ipap'as, v'eti ipavr ti navan ikahei, patrusi atah.’ ”

A Iesu imhmah a tav'et p'akn ihapr

10Dav'a, arna Sapat iamk ivrp'ep'a v'nen p'as al nmah tamat iamk. 11Laha, pavrni, tav'et iamk ilak atlera, m'im'iln stu iamk iani pai inal lman isatl, dun ihapr, iavivilndri. 12Naran a Iesu ilei, iv'ara ani a ti ipama asnn, kavr ani, kavr ti a, “Tav'et, m'etienam ikauah ml.” 13Laha, a Iesu itu lm'an aranan. Iv'amk m'a ti ip'tir kaviviln kapatei Atua.

14 # Avruh 20:9,10; TVH 5:13,14. V'eti dui ip'aur nmah tamat, nln irer ani sanan, sena ti a Iesu itmhmah sera m'ertu iamk arna Sapat. Laha, ivr anr nelnal kavr ti a, “Iviviln a ti p'vm'akar arna napn ilm'sei arna uik udlani. Ip'as a ti pavrama arna napn lera a ti ipamhmah a m'etienam'i, v'eti mavrama arna Sapat.”

15Laha, a Mlinad ivrprani, kavr ti a, “Nakm kp'ip'en lamuru. Kam'i udlani kvuln plukam'i v'aha tukiam'i nakl arna Sapat kalev'lar asn kis na suadar kavv'av'ar avrav'a asn nut apavm'n nauei. 16Tav'et lera iv'i a natn a Epraham. Pavrni, a Sitan ithuda sarei pai itnal lman isatl. ?Kv'ah ti iap'as a ti p'elev'lei arna sei iuadei, kulni arna Sapat?” 17Naran ivr si lera, m'ertu udlani la avmlani hara, avmamih. Laha, nelnal udlani avrn ip'as sena pari p'sp'as udlani Hin iani.

A Iesu isran v'nen ivrur m'et na m'adak varavar

(Matiu 13:31,32; Mak 4:30-32)

18Sarei, ivr ti a, “?V'anuan Atua inap'i? ?P'evr v'ata kav'iv'en nut v'anuan Atua inap'ei? 19Inep'a m'et na m'adak varavar la dui iamk ilav'i kasrani al pitvetan ha. Dav'a isi kadama kav'i nai lil. M'anh na p'knaran avlak arna ranan.”

A Iesu isran v'nen ivrur iis

(Matiu 13:33)

20Ivri ml kavr ti a, “?P'evr v'ata kav'iv'en nut v'anuan Atua inap'ei? 21Inep'a iis la tav'et iamk itaui al pakit ilini a vlaua ha. Iter dav'a kasrsru udlani.”

Pavandan arna pn liu pa

(Matiu 7:13-14; 7:21-23)

22Laha, iv'el kadav'a arna v'anu lilil m'a v'anu papa kav'iv'en v'nen p'as nakl, kasapa navanel a ti ipav'a a Serusalem. 23Laha, m'ertu iamk ivr ani, kavr ti a, “?Mlin, Atua ipalev'la m'ertu uaki apavdakr?”

Ivr anr kavr ti a, 24“Pavm'akar ipahua a ti pavandan al pn liu pa, sena ti nvr a kam'i, m'ertu ipastudau apavtala a navanel na ti apavrav'a eim v'eti akavrav'a. 25Naran mlin na nmah lera ipilaph kap'leskar liu, kam'i pavp'tir av'aran, kavspspa liu kavvr ti a, ‘Mlin, mlin, paiela liu a kam'em'.’ V'eti ipavrpren kam'i kavr ti a, ‘Kana narndu nut kvandan.’ 26Laha, kam'i pavvr ti a, ‘Kam'em' nvhatat kavm'nm'n asnm. Nakm kv'iv'en v'nen p'as arna navanel arna v'anuam'em'.’ 27#Npin 6:8.V'eti hin ipavr ti a, ‘Nvr a kam'i, Kana narndu nut kvandan. Pavruh asnk, kvv'i m'ertu kvan si stu nakl.’ 28#Mat 22:13; 25:30.#Mat 8:11,12.Arna nut lera pavtakal kavhaha lum'i, naran pavlar a Epraham m'ei Aisak m'ei a Sikup m'er pruvet udlani apavlak arna v'anuan Atua, v'eti apasran kam'i av'aran. 29M'ertu apavandan arna Is, kavandan arna Ues, kavandan arna Nut, kavandan arna Saut ml, kavlakp'lt asn tim'ah arna v'anuan Atua. 30#Mat 19:30; 20:16; Mak 10:31.Pavrni, m'ertu kinkin la avtauatah ha, apavtauamu, v'eti m'ertu kinkin la avtauamu ha, apavtauatah.”

Varisi kinkin avvr an a Iesu kavvr ti a Erut irn ti iparpep'ni

31Arna napn nen arvarisi kinkin avrama kavvr ani kavvr ti a, “Paruh arna nut laha kadav'a arna nut uraur, sena ti a Erut irn ti iparph.”

32V'eti ivr anr kavr ti a, “Pavrav'a kavvr a lip'ah didi lera kavvr ti a, ‘Parn, p'esran m'im'iln stu kamhmah a m'ertu si ianr dika m'a m'ih, sarei, arna nitla napn p'ehiris a pariak.’ 33V'eti nkv'el pr dika, m'ih m'a paua, sena ti pruvet kinkin ikahm'a arna nut uraur. Ikam'a a Serusalem pr.

A Iesu itakal sanar arm'ertu a Serusalem

(Matiu 23:37-39)

34U, Serusalem, Serusalem, kam'i kvrpep'nr pruvet nakl, kavmhrp'nr m'ertu Atua itap'er avrama asnm'i. Iel nrn ti p'etup'lten kam'i ipanep'a nut ntu iuav'kar natn a nv' nil heian inap'ei, v'eti kaavrni. 35#Npin 118:26.Pavrni, nmaham'i Atua itln sarei. Nvrdaui, nvr a kam'i, mkavla Kana ml dav'a ipaier naran pavvr ti a, ‘P'vpata Dui la ima arna nahan a Mlin Eia ha.’ ”

Currently Selected:

Luk 13: nmb

Highlight

Copy