Luk 10

A Iesu itap'er m'ertuan avnelsaru (70)

1Itauatah a si lera, a Mlinad iv'lair m'ertuan ml inelsaru (70) katap'er arruru itauamu ani arna v'anu lilil udlani m'a nut udlani hin irn ti ipav'a.

2 # Mat 9:37,38. Sena si lera ivr anr kavr ti a, “Tim'ah istudau iter al pitvet itier sera naran apalav'i, v'eti m'ertu na parei avdakrdau. Sena si lera, pavtu tamat asn Mlin na pitvet a ti ipatep'a m'ertu na parei apavlev' si udlani iter al pitvet. 3#Mat 10:16.Kam'i pavv'el. Pavrni, Kana ntep'a kam'i kvnep'a net sivsiv pavrav'a a p't nut nar lip'ah didi. 4Mavua pahus, v'aha naten, v'aha sus, mavvr ip'as a m'ertu kinkin arna navanel. 5Naran pavrav'a al nmah kinkin, pavvri ipatauamu kavvr ti a, ‘Nrn ti tamat ipater al nmah laha.’

6Ipavr ti dui na tamat ipalak atlera, tamatam'i ipater aranan. Ipavr ti ikahei, tamatam'i ipam'alet ml asnm'i. 7#1 Kurin 9:14; 1 Tim 5:18.Pavlak al nmah lera dav'a, kavhan sei kavm'n sei apavtu kam'i, sena ti m'ertu im'akar iviviln a ulienan. Mavln nmah kvlak a nln kavrav'a al nmah uraur nakl. 8Naran pavrav'a arna v'anu kinkin, ipavr ti hir apavlev' kam'i, pavhan si udlani apavtu kam'i. 9Pavmhmah a m'ertu avm'at atlera, kavvr ti a, ‘V'anuan Atua itmima asnm'i.’ 10#Parei 13:51.V'eti naran pavrav'a arna v'anu kinkin, v'eti ahavlev' kam'i, pavv'el arna navanel na v'anu nen kavvr ti a, 11#Mat 10:7-14; Mak 6:8-11; Luk 9:3-5.‘Nvninuan neiev' laha na v'anuam'i ip'lesda p'akm'em', kavv'iv'en si stuam'i, v'eti pavrndu mamh ti v'anuan Atua itmima asnm'i.’ 12#Ap'u 19:24-28; Mat 11:24; Mat 10:15.V'eti Kana nvr a kam'i, arna napn lera Atua iputakm a m'ertu arna v'anu lera ipasiv' m'ertu arna v'anu a Satam.

Der ipama arna v'anu la ahavvav nlr kavrn istu sena si stuar ha

(Matiu 11:20-24)

13 # Aisaia 23:1-18; Esikiel 26:1—28:26; Suil 3:4-8; Emus 1:9,10; Sek 9:2-4. Usa, kam'i kvlak a Kurasin, usa, kam'i kvlak a P'etsaita, imvr ti m'den pari lilak nani asnm'i arna nut a Taia m'ei a Saitun, amtvvav sera v'ahienar tituei, kavua selpak kavtu tih nap' arna p'akr. 14V'eti arna napn Atua ipav'ana hua m'a m'ertu udlani, iputakm a kam'i ipasiv' nut a Taia m'ei a Saitun. 15#Aisaia 14:13-15.?Kam'i ml a Kapaniam, kvv'ah ti naham'i ilil kaier nut eia? Ihei, apasran kam'i pavrav'a auei al nep'v'en. 16#Mat 10:40; Mak 9:37; Luk 9:48; Sun 13:20.M'ertu ipav'rn a kam'i, hin ipav'rn a Kana, m'ertu ikarn kam'i, hin ikarn Kana, m'ertu ikarn Kana, ikarn Hin la itep'a Kana ha.”

M'ertuan avnelsaru (70) avramam'alet kavrn ip'as istudau

17Dav'a, m'ertuan arnelsaru (70) hara avramam'alet ml kavrn ip'as istudau kavvr ti a, “Mlin, nvla ti m'im'iln stu avan sei nvvri arna naham.”

18Laha, Hin ivr anr kavr ti a, “Kana nlei a Sitan irs dan a nut eia, inep'a nav'l ilev' m'aten. 19#Npin 91:13.Pavrni, Kana ntu nut hua a kam'i a ti pavpas nmat m'a skupiun, kavsiv' nut huan a Sitan. Si kinkin ikahmk ikautakm a kam'i naran kinkin. 20V'eti mavrn ip'as a ti m'im'iln stu avan sei kvvri, v'eti pavrn ipap'as sena ti atulul sarei a naham'i arna nut eia.”

A Iesu irn ip'as kapatei a Mlin Eia

(Matiu 11:25-27; 13:16,17)

21Arna naran nen lera, M'im'iln P'as iani ti a Iesu irn ip'as kavr ti a, “U Tatei, Kana npatah, kv'i Mlin na nut eia m'a nadep', sena ti kttutuan sera si lera asnr m'ertu avrndu sei m'er m'ertu ptr ivrvr, v'eti kv'iv'en anr mardel papa uaki. Au, Tatei, sena ti si lera iviviln m'a v'ahienam. 22#Sun 3:35; Sun 10:15.A Tetiak ittu sera si udlani arna lm'ak. M'ertu kinkin ihei irndau a Natn, v'eti a Tatei uaki irndaui. M'ertu kinkin ml ihei irndau a Tatei, v'eti a Natn uaki irndaui m'er m'ertu a Natn ipav'iv'en anr.”

23Sarei, ivav hin kav'ana m'er m'ertuan avududl uaki kavr ti a, “M'ertu la avla sei kam'i kvlei ha, apavrn ipap'as. 24Sena ti Kana nvr a kam'i, pruvet m'er mlin istudau atvrn sarei ti apavla si udlani kam'i kvlei, v'eti ahavlei, katvrn sarei ti apavrn si udlani lera kam'i kvrni, v'eti ahavrni.”

25 # Mat 22:35-40; Mak 12:28-34. Laha, pavrni, dui na v'nen hua iamk ip'tir kandinei kamiman v'nen hapr iamk ani, kavr ti a, “?Tisa, kana p'en v'ata kalev' silv'ien ikahiris naran aranan?”

26Laha, ivr ani, kavr ti a, “?V'nen huan Atua ivr v'ata? ?Kla v'ata arna Paivul?”

27 # TVH 6:5; Livai 19:18. Ivrprani, kavr ti a, “Palap'as an a Mlin Eia iv'i Atuam arna nlm udlani, arna silv'ienam udlani, arna nut huam udlani m'a v'ahienam udlani, kalap'as a tv'alm inep'a ti iv'ih.”

28 # Livai 18:5. Laha, a Iesu ivr ani, kavr ti a, “Kvrdaui, pan si lera kasilv' aranan.”

29V'eti aulera irn ti ipav'iv'en ti hin iviviln, kavr an a Iesu kavr ti a, “?V'eti hin ak iv'i tv'alk?”

30A Iesu ivrprani, kavr ti a, “Dui iamk idan a Serusalem kadav'a auei a Seriku, laha ardu na v'nv'nahien kinkin avuadei, kavhsla klusan kavrpi dav'a dav'a nut pa ti ipam'a, kavruh kavlni ki. 31Arna naran nen, itu hin a ti pris iamk isapa navanel lera. Naran ilei, isapa tv'eliel na navanel uaki kav'siau. 32Inap'i lera ml, dui iamk arna nl nam'elan a Livai ima atlera kalei, kav'siau arna tv'eliel na navanel. 33#2 Krun 28:15.V'eti dui a Sameria iamk iv'el kadama a nut ilak kala dui lera karn istu ani. 34Kadav'a asnn katu m'erasin iv'i ueil m'a naui m'iel arna nut p'akn imaur kahaui kataui arna tukian kauirv'a asn nmaha v'anudl kap'auri. 35M'ih nen, naran iln nut lera, ilev' 2,000 vatu katau a dui na nmah lera kavr ani, kavr ti a, ‘Nakm pap'aur mamahi. Ipavr ti pasran nav'et ipasiv' nki la ntau anh ha, p'etu m'lnen ml anh naran p'em'alet.’ 36?Kv'ah ti hin ak asnr dui la artl ra iv'i tv'el dui la ardu na v'nv'nahien avuadei hara?”

37Hin ivr ti a, “Dui la irn istu ani hara.”

Laha, a Iesu ivr ani, kavr ti a, “Nakm pav'a kani ipanap'i lera.”

A Iesu iv'a asn nmahar a Meri m'ei a Mata

38 # Sun 11:1. Avv'el dav'a, a Iesu iv'a arna v'anu iamk. Laha, tav'et iamk nahan iv'i a Mata ilav'i iv'a al nmahan. 39Hin tv'aln iak, nahan iv'i a Meri. Hin ima kalak asn tln a Iesu kav'rn a v'nenan. 40V'eti a Mata irn istu sena ti im'akar istudau, kadama asnn kavr ti a, “?Mlin, Nakm kaav'ahur ti tv'alk iln kana p'emamk kam'akar? Pavr ani ti ipama kasr lm'ak.”

41V'eti a Iesu ivrprani, kavr ti a, “Mata, Mata, nakm krn istu kav'ahur sei istudau, 42V'eti si iamk uaki iv'i si lil. A Meri itv'li sera sei ip'as mau, la m'ertu kinkin ikalev'luei asnn ha.”

Currently Selected:

Luk 10: nmb

Highlight

Copy