Luk 1
1
A Luk ivr ip'as an a Tiuvilas, kavr sei ipavruri arna puk laha
1Ip'as Tiuvilas. M'ertu istudau atvandina sarei a ti apavulul a si udlani la itu hin asnm'em' ha. 2Hir avsapa v'nenar m'ertu avla si lera naran itudina hin itauamu, kavv'i m'ertu na m'akariena v'nen p'as. 3Sena si lera, mlin lil, kana nv'ah ti ip'as a ti p'ulul a v'nen lera ipaviviln, sena ti kana nrndu mamh si udlani lera naran itudina hin. 4A ti nakm parndu mamh ti v'nen udlani atvr sarei anh iviviln.
Ensel lil ivr an a Sakaraia ti a natn ipaiak
5 #
1 Krun 24:10. Naran a Erut iv'i mlin lil a Sutia, pris iamk, nahan iv'i a Sakaraia, ilak arna nl nam'elan Apaisa. A naun iv'i tav'et ilak a nl nam'elan a Erun, nahan iv'i a Lisp'et. 6Hir arru arviviln arna nahn Atua karsapa v'nen hua udlani m'a navanelan a Mlin Eia, ahala si stu aranar. 7Hir a natr ihei, sena ti a Lisp'et iv'i ptm't, arru hilaha kartrtarep' dau.
8Dav'a ier naran na ti nl nam'elan a Sakaraia avan paria pris, hin ien parian arna nahn Atua. 9Hir avsapa p'klr arpris kavan hlhal kavpasla ti a Sakaraia ipav'i pris ipav'a al nmah tamatan a Mlin Eia kal sida p'as. 10M'ertu udlani avlak av'aran kavtu tamat naran ial sida p'as. 11Laha, enselan a Mlin Eia iamk iv'iv'en hin ani kap'tir arna m'ldu nev'etet a nut al sida p'as aranan. 12Naran a Sakaraia ilei, irdus nln kadedrn istudau.
13V'eti ensel lahara ivr ani, kavr ti a, “Madedrn, Sakaraia, sena ti Atua itrn sera tamatam. Dav'a, a naum iv'i a Lisp'et, ipalev' a natm dui ipamk. Nakm patu nahan ipav'i a Sun. 14Nakm parn ipap'as ani ipastudau, laha, nelnal apavrn ipap'as naran ipaiak. 15#Nut Kaka 6:3.Sena ti hin ipalil arna nahn a Mlin Eia. Ikam'n naui m'iel v'aha naui hua kinkin, v'eti ipalini a M'im'iln P'as naran idlak uam al v'atn a unian. 16Laha, hin ipavav v'ahienar m'ertu a Isrel ipastudau a ti apavv'ah a Mlin Eia, iv'i Atuar. 17#Mal 4:5,6.Hin ipatauamu an a Mlin Lilad. P'kln m'a nut huan ipanap'ei a Ilaitsa, a ti ipavav nlr a tatei a ti apavlap'as an a natr, kavav nl m'ertu ahavsapa v'nen p'as a ti apavsapa v'nenar m'ertu p'as, a ti ipandedp' m'ertu a ti apavrama kavv'i m'ertuan a Mlin Eia.”
18V'eti a Sakaraia ivr an ensel kavr ti a, “?Kana p'erndu si laha arna v'ata? Sena ti nttrtarep', a nauk itv'i sera v'nm'aran.”
19 #
Taniel 8:16; 9:21. V'eti ensel ivrprani, kavr ti a, “Kana nahak iv'i a Kepriel. Np'tir nakl arna nahn Atua. Hin ittep'a sera kana a ti p'ev'ana m'ah kav'iv'en v'nen p'as lera anh. 20Parni, nakm pav'i napt, mkarndu ti pavr si kinkin ml ipaier napn na ti si udlani lera ipatu hin. Sena ti kaav'ah v'nenak la ipatu hin arna naran nen ha.”
21Laha, m'ertu avlak av'aran kavtrah a Sakaraia avtah ani istudau, sena ti ilak p'arei al nmah tamat. 22V'eti naran ima av'aran, iav'anadau m'er ml, laha, avrndu ti itla sera si lil kinkin al nmah tamat, sena ti iv'iv'en sei anr a lm'an uaki, iavrdu si kinkin.
23Dav'a dav'a, naran napn na parian al nmah tamat ihiris, iv'el kadahau. 24Itauatah a si lera, a naun, iv'i a Lisp'et, itkar kaliliak nal ilm'. Laha, ivr ti a, 25“Si laha iv'i parian a Mlin Eia. Hilaha ilap'as a kana kalev'la mamihienak arna nah m'ertu.”
Ensel Lil ivr an a Meri a ti a Iesu ipaiak asnn
26Arna lm'sei na nalan, Atua itep'a enselan, iv'i a Kepriel lahara, iv'a arna v'anu iamk a Kalili, nahan iv'i a Nasaret. 27#Mat 1:18.Kadav'a asn vitar iamk idam'atr m'a dui naran kinkin. Atturan sarei a ti ipav'i a naun a Susev' ilak arna nl nam'elan a Divt. Naha vitar lera iv'i a Meri. 28Laha, ensel ima asnn kavr ani, kavr ti a, “Ip'as, Atua itmhmah sarei anh istudau. A Mlin Eia ilak asnm. Atua imhmah anh asnr tav'et udlani.”
29V'eti naran ilei, karn v'nen lera, v'ahienan idv, kav'ahur sei v'nen lera ipav'iv'ani. 30V'eti ensel ivr ani, kavr ti a, “Meri, madedrn, sena ti Atua irn ip'as a ti ipamhmah anh. 31#Mat 1:21.Parn, nakm patkar kalev' a Natm dui. Patu nahan ipav'i a Iesu. 32#2 Sam 7:12,13,16; Aisaia 9:7.Hin ipalil, apavr ti iv'i a Natn a Mlin Eia Dau. A Mlin Atua ipani ti ipav'i Mlin Lil kalak arna napl p'asan a tetian iv'i a Divt. 33Hin ipav'i mlinar nl nam'elan a Sikup dav'a ikahiris naran, v'anuan ikahiris naran kinkin.”
34Laha, a Meri ivr an ensel kavr ti a, “?Ipanap'i? Sena ti kana naliliak m'a dui naran kinkin.”
35V'eti ensel ivrprani, kavr ti a, “M'im'iln P'as ipama aranam, nut huan a Mlin Eia Dau ipauakarh a m'lkn. Sena si lera si p'as la palav'i ra, apavr ti iv'i a Natn Atua. 36Parni ml, tv'alm iv'i a Lisp'et, itrtarep', v'eti katkar an a natn dui. Tav'et la avr ti iv'i ptm't ha, hilaha nalan itlm'sei. 37#Ap'u 18:14.Sena ti si kinkin iahmk ihua par asn Atua a ti ikahani.”
38Laha, a Meri ivr ti a, “Palei, nv'i tav'et na m'akarienan a Mlin Eia. Nrn ti ipatu hin asnk ipanep'a nut kvri inap'ei.” Laha, ensel iruh asnn.
A Meri iv'a kalei a Lisp'et iv'i a naun a Sakaraia
39Arna naran lera, a Meri iv'el karada kadav'a arna v'anu iamk arna ptha iter a Sutia. 40Kadav'a al nmahan a Sakaraia, kavr ip'as an a Lisp'et. 41Naran a Lisp'et irn v'nenan a Meri, mardel idul kaspa v'atn. Laha, hin a Lisp'et ilini a M'im'iln P'as. 42Kavrp'ep'ei eia kavr ti a, “!Atua imhmah anh asnr tav'et udlani kamhmah a mardel nakm palav'i! 43?Inap'i hin a unian a Mlin Lilak ima asnk? 44Sena ti parn, iv'amk m'a ti nrn drlm, mardel idul kaspa v'atk sena ti irn ip'as istudau. 45Nakm la kv'ah Atua ha, parn ipap'as, sena ti si udlani a Mlin Eia itvr sarei anh ipama katu hin.”
Npinan a Meri
46Laha, a Meri ivr ti a,
“Arna nlk nani ti nahan a Mlin Eia iv'a eia. 47Arna v'ahienak nrn ip'as an Atua la ilev'la kana ha.
48 #
1 Sam 1:11. Sena ti Hin iv'ahur kana nv'i tav'et na m'akarienan kasusupa uaki.
Sena ti, parni, itudina hin hilaha dav'a ikahiris naran, m'ertu udlani apavr ti Atua imhmah a kana.
49Sena ti Atua, la ihua istudau ha, iten sera si lilil asnk.
Nahan ip'as istudau.
50Hin irn istu a m'ertu udlani avdedrn ani
m'er a natr m'er a natn a natr dav'a.
51Hin iv'iv'en nut huan arna lm'an
kani ti m'ertu avukl hir arna nlr avamkma.
52 #
Sup 5:11; 12:19. Kakasr mlin lilil arna m'lnar,
v'eti kani ti m'ertu avsusupa nahar iv'a eia.
53Hin itu tim'ah p'as anr m'ertu avrn nam'er,
v'eti katep'a m'ertu siar istudau avruh vn.
54Hin isr lm'ar m'ertu a Isrel avv'i m'ertu na m'akarienan,
sena ti irndu vtmienan.
55 #
Ap'u 17:7. #
1 Sam 2:1-10. Iv'iv'en an a Epraham m'er a natn udlani ikahiris naran, inep'a ti itvr sarei an a tetiad.”
56Laha, a Meri ilak m'ei a Lisp'et nal itl. Sarei, kadahau ml a utan.
A Sun Paptais iak
57Dav'a, ier naran na ti a Lisp'et ipalev' sei, laha, ilev' a natn iamk iv'i dui. 58Laha, m'ertu avlak mima asnn m'er tv'aln, avrn ti a Mlin Eia itv'iv'en sera vtmien lilan ani, kavrn ip'as m'ei.
Avan p'au nen a Sun
59 #
Livai 12:3. Dav'a, arna satl na napn avrama a ti apavan p'au nen, kavvr ti apavtu nahan ipav'i a Sakaraia, iv'i nahan a tetian. 60V'eti a unian ivrpranr kavr ti a, “Ikahei, nahan ipav'i a Sun.”
61Hir avvr ani kavvr ti a, “Duanam kinkin ihei nahan inap'i lera.” 62Laha, avmiman an a tetian arna lm'ar a ti nahan ipav'i ak.
63Laha, a Sakaraia imiman sei ipulul a sei aranan, kulul ani, kavr ti a, “Nahan iv'i a Sun.” Laha, m'ertu udlani avtah ani istudau. 64Iv'amk m'a ti pnn itetev', nm'n idul, irndu ti ipav'ana ml. Laha, iv'ana kapatei Atua. 65M'ertu udlani avlak mima asnr avtah istudau kavvrur v'nen lera udlani arna v'anu udlani arna ptha iter a Sutia. 66M'ertu udlani la avrn si lera ha avv'ahuri arna nlr kavvr ti a, “?Mardel lera ipanap'i?” Dav'a lm'an a Mlin Eia iter aranan.
A Sakaraia ivrp'ep'a v'nen Atua itau ani
67A Sakaraia, iv'i a tetian, ilini a M'im'iln P'as, kavrp'ep'a v'nenan Atua kavr ti a,
68“P'vpatei a Mlin Eia, iv'i Atuar m'ertu a Isrel,
Sena ti hin ima asnr m'ertuan kullar.
69Katu Dui iamk katu nut huan ani a ti ipalev'la nakd
La ilak arna nl nam'elan a Divt, iv'i dui na m'akarienan ha,
70Inep'a nut itvr sarei arna pnr dui p'as na v'nenan inap'ei,
Naran na ap'u ier dika.
71A ti Atua ipalev'la nakd arna nut huar m'ertu avmlen nakd,
Kalev'la nakd al lm'ar m'ertu udlani avlep'la nakd.
72A ti iparn istu a nakd, inep'a nut itturan sarei ani inap'ei asnr a tetiad,
Kav'ahur turanien p'asan.
73Ien turanien hua asn a tetiad iv'i a Epraham.
74Kavr ti ipalev'la nakd al lm'ar m'ertu avlep'la nakd,
A ti nkavdedrn, v'eti p'van parian nakl. 75Kavp'as kavviviln arna nahn
Arna napn udlani arna silv'ienad.
76 #
Mal 3:1. V'eti nakm, natk, apavr ti kv'i pruvet iv'i Mlin Lil dau.
Sena ti nakm patauamu arna nahn a Mlin Lilad kandedp' a navanelan.
77A ti m'ertuan apavrndu ti Atua ipamhmah anr,
Kalev'lar arna si stuar.
78Sena ti Atua irn istu a nakd,
Katep'a Dui ipamk ipadan eia kadama asnd,
Kanep'a sera neiel itpeia m'etav'aran.
79 #
Aisaia 9:2. A ti ipatu nut ren anr m'ertu avlak al m'alk kavlak a m'lk m'ien,
A ti ipav'ev'a nakd arna navanel na tamat.”
80Laha, mardel lera ima kalil kahua arna m'im'iln, kalak arna nut kaka dav'a ier naran na ti iv'iv'en hin anr arm'ertu a Isrel.
Currently Selected:
Luk 1: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
