Parei 20

A Pul iv'a a nut a Masetunia m'a nut a Kris

1Naran v'lv'elien lera ihiris, a Pul iv'ara anr m'ertuan a Iesu kavr ip'as anr kalnr a ti ipav'a a Masetunia. 2Kunanut arna nut lera udlani kav'ana m'er istudau a ti apavp'tir ipahua, sarei kadav'a arna nut a Kris. 3Kalak atlera nal itl. Itv'i ti ipav'a arna nauak a ti ipav'a a Siria, v'eti ardu a Isrel avlaksrahi a ti apavutakm ani. Sena si lera hin iv'ah ti ipam'alet kav'el kasiv' nut a Masetunia. 4A Supata, iv'i dui a Peria, m'ei Aristakas m'ei a Sekadas, arv'i dui a Tesalunaika, a Kaias, iv'i dui a Tepi, m'ei a Timuti, m'er ardu a Esia, arv'i a Tikikas m'ei a Truvimas, hir udlani avsapei. 5Hir avv'el kavtauamu kavtrah kam'em' a Truas. 6Naran napn na tim'ah ahan p'ret iis nen ihei ihiris, nvaan a Vilipai arna nauak. Napn ilm' iv'siau, nvier asnr a Truas kavlak atlera napn isaru.

A Pul iv'ana ip'arei arna nut a Truas

7Arna napn itauamu na uik, arm'ertuan a Iesu avp'lt a ti apavkaus p'ret. Hin a Pul ivrp'ep'a v'nen p'as asnr kav'ana ip'arei dav'a ier p't lihat, sena ti irn ti ipahau m'ih nen. 8Lait istudau iv'en al rum na nmah iter eia, avlakp'lt a nln. 9Malakal iamk, nahan iv'i a Iutikas, ilak arna uidua. Naran a Pul iv'ana ip'arei dav'a, m'aten a Iutikas idv ihuadau, dav'a im'atr, kadars a nadep' dan arna nitla hatahat na nmah lera. Naran avlav'i, itam'a sarei. 10Laha, a Pul iv'a a nadep' asnn kadars aranan karev'dei kavr ti a, “Mavrn istu kavtakal ani. Idsilv' uam.” 11Kadav'a ml arna hatahat eia kakaus p'ret kahani kav'ana ip'arei dav'a nut iren kalnr. 12Laha, avrahau m'a malakal la isilv' ra, kavrn ip'as istudau ani.

A Pul iln a Truas kadav'a a Mailitas

13A Pul itu v'nen a kam'em' a ti hin ipav'el uaki kadav'a Asus, v'eti kam'em' p'vtauamu arna nauak kavlav'i atlera. 14Nvier Asus kavlav'i arna nauak kavrav'a kavier a Mitilini. 15Kavaan atlera kavier asn nut a Kius m'ih nen. Paua nen nvier a Samus kavlak a Trukilian. Pn itl nen nvier a Mailitas. 16A Pul ivr ti ipav'siau kaln nut a Evases, sena ti iarn ti ipakanut arna nut a Esia. Irakn a ti ipaier nut a Serusalem arna napn na tim'ah na Pedikus.

A Pul iv'ana mamh m'er elta udlani a Evases, kalnr

17Naran ilak a Mailitas, itep'a v'nen kav'ara anr elta na sas arna nut a Evases. 18Naran avrama asnn, ivr anr kavr ti a, “Naran nma a Esia itauamu kalak m'a kam'i, iel kvla p'klk arna napn udlani. 19Nm'akaran a Mlin Lilad, naukl kana sanan. Iel ntakal sanam'i, der ier kana istudau, sena ti ardu a Isrel avtala a navanel na ti apavutakm a kana. 20Kvrndu ti natutuan si kinkin la irndu ti ipasr lm'am'i ha, v'eti nvrp'ep'ei kav'iv'en a kam'i arna nah nelnal m'ei al nmaham'i udlani. 21Kavrp'ep'ei anr arm'ertu a Isrel m'er m'ertu a Kris kavr ti apavvav nlr kavrama asn Atua kavv'ah a Mlinad, a Iesu Kristu. 22Hilaha, pavrni, M'im'iln P'as iuada kana a ti p'av'a a Serusalem, narndu sei ipaier kana atlera. 23V'eti nrndu si iamk uaki, M'im'iln P'as ivrp'ep'ei a kana arna v'anu lil udlani kavr ti p'resin m'a der ipaier kana. 24#2 Tim 4:7.V'eti nav'ah par a si udlani lera, nav'ah ti silv'ienak ilil asnk, v'eti nrn ti p'ehiris a navanelak arna nl p'as kahiris a parei a Mlin a Iesu itu kana, a ti p'evrp'ep'a v'nen p'as na vtmienan Atua.

25Hilaha, pavrni, kana nrndu ti kam'i udlani, la nunanut kavrp'ep'a v'anuan Atua asnm'i ha, mkavla nahk ml naran kinkin. 26Sena si lera nvrp'ep'ei a kam'i dika, ipavr ti m'ertu kinkin silv'ienan ipamln, ikavr ti iv'i pariak. 27Sena ti kana nadedrn, v'eti ntvrp'ep'a sarei a kam'i si udlani Atua irn ti pavrndaui. 28Sena si lera, pavv'ah kam'i m'er sivsiv udlani la M'im'iln P'as iani ti kvp'aurr ha, a ti pavmsnen sasan Atua, la iullar a din dau ha. 29Sena ti nrndu si laha ti, naran p'eruh, m'ertu apavnep'a lip'ah didi apavrama a p't nut nam'i kavutakm a sivsiv. 30M'ertu kinkin asnm'i apavp'tir kavvr sei iaviviln, kavrv'la m'ertuan a Iesu kinkin a ti apavsapar. 31Sena si lera, pavv'ah kam'i kavv'ahur ti pai itatl sarei, lihat, ren, nv'ana hua m'a kam'i, narnrn kana, ui m'atak irarev' nakl sanam'i.

32Tv'alk udlani, hilaha ntu kam'i al lm'an Atua m'a v'nena vtmienan. V'nen lera nut huan iak a ti ipani ti pavp'tir ipahua, katu kam'i si p'sp'as udlani la a Mlin Eia itturan sarei a ti ipatau a m'ertu p'asan ha. 33Kana narn nam'er a nav'etar m'ertu kinkin, v'aha kular, v'aha klusar. 34V'eti kam'i kvrndu ti kana nten sera parei a lm'ak laha kapasla nav'etak iviviln m'a kana m'er m'ertu avsapa kana. 35Ntv'iv'en sera navanel udlani lera a kam'i, sena ti pavan parei ipanap'i lera kavsr lm'a m'ertu iahua, kavv'ahur v'nenan a Mlin a Iesu, ivr ti a, ‘M'ertu ituvn a sei a m'ertu uraur iparn ipap'as ipasiv' m'ertu ilev' sei asn m'ertu uraur.’ ”

36Naran itv'ana sarei inap'i lera, isisihpu katu tamat m'er udlani. 37Hir udlani avtakal istudau, kavrev'da natavnan kavsm pla nhan kavvr ip'as m'ei. 38Kavrn istu ihuadau sena v'nen la ivri ra, ti akavla p'akn ml naran kinkin. Laha, avv'av'ei iv'a asn nauak.

Currently Selected:

Parei 20: nmb

Highlight

Copy