Parei 14

A Pul m'ei a Panapas arlak arna nut a Ikuniam

1Arna nut a Ikuniam, inap'i lera ml. Arru arv'a al nmah tamatar ardu a Isrel karv'ana ihua dav'a ti nelnal avv'ah a Iesu, avv'i m'ertu a Isrel m'er m'ertu a Kris. 2V'eti nelnal a Isrel la ahavv'ah a Iesu ha, avv'ana m'er v'anudl kavuv'en tv'ald kavani ti avlep'lar kavmlanr. 3Sena si lera, hir arlak ip'arei atlera karv'ana ihua arna nut huan a Mlin Lilad, ahardedrn a si kinkin. A Mlin Lilad iv'iv'en a ti v'nenar iv'i v'nen na vtmienan kataui a ti aran pari lilil iv'iv'en sei m'a pari lilil m'ertu avtah ani.

4V'eti nelnal arna v'anu lera avtupr hir, pnen avsapar ardu a Isrel, pnen avsapar arapusel. 5Laha, v'anudl m'er ardu a Isrel m'er mlinar avp'lt kavandinei a ti apavsip'lanr kavnesp'nr. 6V'eti hir arru arma karrndu si lera karruh karv'a arna v'anu a Listra m'ei a Tepi, arna nut a Likunia, karv'a arna nut itertalu ani. 7Karvrp'ep'a v'nen p'as atlera.

Ardu a Listra avpatadinar a Pul m'ei a Panapas inep'a ti arv'i Atua

8Arna nut a Listra, dui iamk tln istu ilak. Tln istu naran iak, iahv'el naran kinkin. 9Hin iv'rn a v'nenan a Pul, laha, a Pul ip'ei ihua kala ti hin v'ahien p'asan iak a ti ipama kap'as ml. 10Kavr a nadl lil kavr ti a, “Pap'tirviln arna tlm.” Laha, isihavs kap'tir kav'el. 11Naran nelnal avla sei a Pul iani, avv'ana eia arna v'nen a Likunia kavvr ti a, “Atuad atvrama sarei kavnep'a m'ertu kavrama a nadep' asnd.” 12Kavtu nahan a Panapas iv'i a Sius, kavtu nahan a Pul iv'i a Hemis, sena ti hin iv'i v'nenar. 13Laha, prisan a Sius, la nmah tamatan iter a nah v'anu lil lera ha, hin iuirma pluk m'a plaua kinkin adri, asn pn liu na v'anu lil, sena ti hir udlani avrn ti apavtrp'nr kavtau anr.

14V'eti naran arapusel, a Panapas m'ei a Pul arrn si lera, ariapr klusar karvrvr a p't nut na nelnal karv'ara eia karvr ti a, 15#Avruh 20:11; Npin 146:6.“?Ardu, inap'i hin kvan si lera? Kam'em' nrv'i m'ertu karrn sei inep'a kam'i uaki. Kam'em' nrma karvrp'ep'a v'nen p'as asnm'i sena ti pavvav nlm'i kavln si stu lera kavsapei Atua la isilv' ha. Hin ien p'knaran, nadep' m'a si udlani iter a nlr. 16Tituei im'ahu a ti v'anu udlani apavsapa navanelar uaki. 17V'eti ien sei iv'iv'en nut huan, sena ti ien si p'as katep'a nu idan eia, katu naran na ti p'vlev' nava sei al pitvet, katu tim'ah istudau kani ti nvrn ip'as arna nld.” 18Arvr v'nen lera, v'eti nut pa ti ahartukar m'ertu a ti apavtrp'n sei kavtau anr.

Ardu Isrel avnes a Pul, v'eti arruh karv'a a Tepi

19Laha, ardu a Isrel kinkin avandan Antiuk m'ei a Ikuniam kavrama atlera kavani ti nelnal avsapa v'nenar. Kavnes a Pul kavrv'titahi kavuirv'a av'aran a v'anu lil, sena ti avv'ah ti itrhap'ni. 20V'eti naran arm'ertuan a Iesu avrama kavp'tirtalu ani, hin ithal ml kadav'a ml arna v'anu lil. M'ih nen hir m'ei a Panapas arruh karv'a a Tepi.

A Pul m'ei a Panapas armhmah a m'ertuan a Iesu karm'alet ml Antiuk

21Laha, arvrp'ep'a v'nen p'as arna v'anu lera karani ti m'ertu istudau avrama kavv'ah a Iesu. Sarei, karm'alet ml karv'a a Listra, a Ikuniam m'ei Antiuk. 22Karani ti m'ertuan a Iesu avp'tir ihua kartu v'nen anr karvr ti apavsapa mamh v'ahien p'as karvr ti a, “Der ipastudau ipaier nakd arna navanel na ti p'vrav'a arna v'anuan Atua.” 23Naran atrtu sera elta arna sas udlani karln tim'ah kartu tamat, artaur al lm'an a Mlin Lilad, la avv'ahi ha. 24Naran atrtpeia sarei arna nut a Pisitia, arier nut a Pamvilia. 25Karvrp'ep'a v'nen p'as arna v'anu a Peka, karv'a auei arna v'anu Atalia. 26Arln nut lera arna nauak karv'a ml Antiuk, iv'i nut ataur itauamu arna vtmienan Atua, sena parei ap'hrhiris ani.

27Naran arma atlera, arv'ara a nelnal arna sas karvrp'ep'a si udlani Atua iani m'er, karvrp'ep'a nut ien navanel na ti v'anudl avrama kavv'ah a Iesu inap'ei. 28Laha, hir avlak atlera m'er m'ertuan a Iesu ip'arei.

Currently Selected:

Parei 14: nmb

Highlight

Copy