Lukas 23
23
Yesus ne wiseno Pilatus
23:1-7
Mat 27:1-2, 11-14; Mrk 15:1-5; Yoh 18:28-38
1Kosasawindo Sahano Agama naꞌa doehemo maka doowa Yesus se Pilatus. 2Dohato dosangkatiemo ambado, “Tahatofie mie aini nefekakolilino raꞌeati mani, pakade noꞌeleꞌa kainsami tatumanduao sewa ne Omputo Kaisar. Anoa nokona dua wutono Kristus, maꞌanano Omputo Fosalamatino.” 3Pilatus nofeenamo ne Yesus ambano, “Hintumo ini omputo miendo Yahudi?” Ambano Yesus, “Pedamo pugaumu naꞌa.” 4Nopugaumo Pilatus ne meangkaꞌindo imamu bhe ne mie bhahi ambano, “Miina sepaliꞌa aepoꞌawaꞌao kaꞌalano mie aini.” 5Tamaka andoa maitu dhulu kaꞌosa dowadhumpae ambado, “Anoa ini nehabu kahunggano liwu, raꞌeati ne Yudea kosekadieꞌae nowudhuanda kafoinaꞌuno, notanda we Galilea ampa we ini.” 6Sanofetingke peda maitu Pilatus nofeenamo bhahaꞌi Yesus maitu mieno Galilea. 7Nopandeꞌaane kaowu Yesus nomaiꞌao we kadie neowano Herodes, Pilatus nofotudumo daowae te wiseno Herodes. Wakutuu anaꞌa kolaki Herodes nandooꞌe dua we kotano Yerusalem.
Yesus ne wiseno Herodes
23:8-12
8Sanowoha Yesus, kolaki Herodes noꞌia sepaliꞌa, kapaꞌamo nomponamo gaono namohae. Nentuhumo nofetingke bhihitano bhe gaono mpuu namoha Yesus naehabuane tanda timenteꞌaono. 9Nobhahi nefeenaꞌaono ne Yesus, tamaka Yesus miina sepaliꞌa natumobhoosiea. 10Tangasano nofee-feenae naꞌa, neangkaꞌindo imamu bhe pande-pande Kitabi dodhulumo te wise dokeiꞌao sabhaha kasangkatindo. 11Notanda ne itu Herodes bhe tantaraꞌino dofekaꞌaebumo Yesus bhe doele-elee, pada anaꞌa dofokanaanemo dhubano kolaki maka dofosulie se Pilatus. 12Notandamo oleo aitu Herodes bhe Pilatus doposabhangkamo; kumundoꞌano sadhia dopowengke.
Yesus nosuli ne wiseno Pilatus
23:13-25
Mat 27:15-26; Mrk 15:6-15; Yoh 18:38—19:16
13Pada anaꞌa Pilatus nofohompumo neangkaꞌindo imamu, kamungkulaꞌi bhe raꞌeati, 14maka nopugau ne andoa ambano, “Mie aini owaeꞌomu ne wiseku, ambamiu nefekakolilino raꞌeati. Ingka padamo apahakesaaꞌe ne wisemiu, tamaka miina sepaliꞌa apoꞌawaꞌao kaꞌalano mie aini peda nesangkatimiu itu. 15Pedamo dua naꞌa kolaki Herodes, sampe mie aini nofosuliemo toha ne insaodi. Sakotuꞌuꞌano miina nakonihabua so mantasiꞌano damongkoe. 16Dadiꞌanomo amepekie maka amolapae.”
17[Ne oleono hohaeaꞌa pedando naꞌa Pilatus tabeano sadhia nefolapaanda seemie katohongku.] 18Tamaka kosasawindo dosikei-keiꞌamo ambado, “Pongko mie aitu, folapa kainsami Barabas!” 19Gahaꞌaitumo Barabas ini dotohongkue mbaꞌinomo neangkafi kahungga weo kota bhe nofopongko. 20Nofendua toha Pilatus nopugau nofekahaa-haaꞌie ne mie bhahi, hampano gaono namolapa Yesus. 21Tamaka andoa tadokei ambado, “Kantaiꞌe te sau salipu! Kantaiꞌe te sau salipu!” 22Tolu pakuꞌaomo aini Pilatus nopugau ambano, “Tamaka habu modai medando ae gahaꞌa nehabuno mie aini? Ingka miina sepaliꞌa apoꞌawaꞌao kaꞌala so mantasiꞌano damongkoe. Dadiꞌanomo amepekie maka amolapae.” 23Tamaka dowadhumpae kansuhu bhe dokei desalo Yesus dakumantaiꞌe te sau salipu. Panda-pandano dofotaloꞌaomo keindo. 24Dadiꞌanomo Pilatus nobhotusiemo damangkafi kamesalondo. 25Katohongku saꞌituini, mie mehabuno kahungga bhe fopongkono naꞌa, nofolapaandaemo peda kamesalondo, tamaka Yesus noowaandae dahumabue ampa kapoindalondo.
Yesus dowowoꞌoe we sembalino kota
23:26-32
26Wakutuuno dowowoꞌo Yesus we sembalino kota, detaangimo seemie koneaꞌano Simon miendo Kirene maka dofotongkuane sau salipuno Yesus bhe dotudue namangkafie. Anoa ini kaneꞌo nosuli maiꞌao we simbalino kota. 27Dobhahi sepaliꞌa mie mangkafino Yesus, ne olotando mie bhahi maitu dobhahi dua hobhineꞌi doꞌaefie bhe dekangkoꞌae. 28Gahaꞌa Yesus tanodolikida bhe nopugau ambano, “Alee hobhineꞌino Yerusalem, koise moꞌaefiomu Idi, tamaka moꞌaefi wutomiu bhe anaꞌimiu. 29Kapaꞌamo mada kaowu nahumato tempono o mie dapugau, ‘Nokodawua mpuu hobhine moꞌafano, tapa mefolenteno anaꞌi bhe tapa fofotitino.’ 30Ne naꞌa mie dapugau ne gunu, ‘Mosansa tabuhiki kainsami,’ bhe ne kabhawo, ‘Hohawu kainsami.’ #Hos 10:8; Pow 6:16 31Kapaꞌamo ane sau moꞌuhi dohabue peda ini, damafaꞌiane bhahaa sau kamateno?” #23:31 Patudhuno sau moꞌuhi kaꞌibahatino mie pata kokaꞌala, wutono Yesus; sau kamateno kaꞌibahatino mie kokaꞌalano. 32Nandoo dua dohodua mie modai newowoꞌondo so damongko dapoowa-owa bhe Yesus.
Yesus dokantaiꞌe te sau salipu
23:33-43
Mat 27:33-44; Mrk 15:22-32; Yoh 19:17-24
33Dohato te kabhawo koneaꞌano Kaꞌuada, Yesus dokantaiꞌemo te sau salipu. Pedamo dua anaꞌa mie modai hoduano, seemie we suanano, seemieno we kemano. 34Nopugaumo Yesus ambano, “Ama, amponida kapaꞌamo miina damandeꞌaanea nehabundo.” O tantara dodawu-dawumo pakeano, dopodaduane mbali notipandeꞌaoane dawuno seemie-seemie. 35Mie bhahi deehe-ehe ne itu doꞌondo-ondo sabhaha kumadhadhiaꞌano. Kamu-kamungkulaꞌi doele-elee ambado, “Mie sigaoꞌano nofosalamatida, ane kotu-kotuꞌu anoa ini Mesias, Omputo Fosalamatino nepilino Lahataꞌala, ingka naetaamo namosalamati wutono.” 36O tantara doele-elee dua bhe domai dowaꞌane angguru mokolo. 37Ambado, “Ane hintu ini omputo miendo Yahudi fosalamati wutomu.” 38Te wawo, ne potalaꞌano fotuno, notibuhi “ Anoamo ini Omputo miendo Yahudi.” 39Seemie ne olotando mie modai tikantaino maitu nofekaꞌaebumo dua Yesus ambano, “Kunaꞌekumo hintu ini Mesias. Soba fosalamati wutomu bhe insaodi dua.” 40Tamaka notangahiemo dua seemieno ambano, “Miina moteꞌi gahaꞌa ne Lahataꞌala? Kahukumu neꞌawamu ingka nopototo bhe anoa. 41Ampamo kaowu intaodi ini nopantasimo detahima kahukumu hampano kabhoosinomo habunto, tamaka mie aini miina sepaliꞌa nakokaꞌalaa.” 42Pada anaꞌa nopugaumo ne Yesus ambano, “Yesus, feꞌulai kanau humato membali Omputo.” 43Nopugaumo Yesus ambano, “Amohatoko, seꞌoleo itu dua hintu pobhai kanau te surugaa.” #23:43 Sakotuꞌuno Firdaus, kaeateꞌando mie dumadino suhue dhamani.
Kamateꞌano Yesus
23:44-49
Mat 27:45-46; Mrk 15:33-41; Yoh 19:28-30
44Hambi-hambi ompulu haa mata pana oleo, kosekadieꞌae nodapoe kahohondo ampa hambi tolu mata kamaꞌoleono, 45kapaꞌamo oleo miina nakotilangaa. Kai bhalano mbali kahondomi weo Lambuno Lahataꞌala nopobhensi nopofelabunta. #Kel 26:31-33 46Pada anaꞌa Yesus nokei nofekandii-ndii, “Ama, inawaku aposahunaꞌaanemo ne handano limamu.” Pada nopugau peda naꞌa nobhotumo. 47Nowoha kadhadhia anaꞌa neangkando tantara nopudhi nofekakalabhia Lahataꞌala ambano, “Kotu-kotuꞌu anoa ini mie banara!” 48Dobhahi mie sihompuno ne itu doꞌondo-ondo kumadhadhiaꞌano. Dowohae kaowu peda anaꞌa, kosasawindo dosulimo bhe dotofa mbadhando kaꞌosano sosondo. 49Kosasawindo mie popandeꞌaono bhe Yesus tadeehe-ehemo we kodoꞌoꞌano, pedamo dua naꞌa hobhineꞌi mangkafie notanda we Galilea. Bhahi-bhahiꞌae kadhadhia anaꞌa dowohae.
Yesus dokobuhue
23:50-56a
Mat 27:57-61; Mrk 15:42-47; Yoh 19:38-42
50Nandoo seemie koneaꞌano Yusuf, nopesua dua ne Sahano Agama. Anoa ini mie metaa bhe mie banara, 51sampe miina namangkafie kabhotusi bhe habundo Sahano Agama maitu. Yusuf ini nomaiꞌao we Arimatea, liwundo dua miendo Yahudi. Anoa neanta-antagi dua kahatoꞌano Kafopahintaꞌano Lahataꞌala. 52Anoa nokalamo nopoꞌawaꞌao Pilatus nesalo maeatino Yesus. 53Pada nofosampue, maeatino Yesus nowaluanemo bhalatu moꞌalusu maka nofondolee weo lia kafokobuhuꞌa neselindo ne kabhawono kontu. Kobuhu aitu miinaꞌo sepaliꞌa natipakea. 54Oleo anaꞌa oleono Dhumaa, #23:54 Sakotuꞌuno: oleono kaefotokaꞌa so oleono Sabat. oleono Sabat nomaꞌomo nahumato. 55Hobhineꞌi poowa-owaꞌano Yesus domaiꞌao we Galilea doangkafimo Yusuf. Kobuhu anaꞌa dowohae, bhe dowohae dua peda amai maeatino Yesus dofondolee we lalo. 56aHato dosuli defontaa-ntaamo sabhaha kagule bhe mina-mina kawondu so daminakiꞌao maeatino Yesus.
Kawanuꞌano Yesus
23:56b-24:12
Mat 28:1-10; Mrk 16:1-8; Yoh 20:1-10
56bNe oleono Sabat dofewulemo doangkafi tubhono agamando.
Currently Selected:
Lukas 23: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
