Lukas 21

Sadhakaano bhihinanda mokaeno

21:1-4

Mrk 12:41-44

1Weo Lambuno Lahataꞌala Yesus nofowanu fotuno, gahaꞌa nowohamo mie hangkaea dofopesua sadhakaando ne sohongano sadhakaa. 2Tanowohamo dua seemie bhihinanda mokaeno nofopesua sadhakaano haa kepe weo sohonga naꞌa. 3Nopugaumo Yesus ambano, “Amohatokoomu inia, kotu-kotuꞌu nobhahi kafopesuaꞌano bhihinanda mokaeno ini bhe kosasawiꞌae kafopesuaꞌando mie sigaoꞌano. 4Kapaꞌamo mie bhahi maitu dosadhakaaꞌao labhino kanandoodo, tamaka bhihinanda aini weo kakaeno nofowaꞌao kosasawiꞌae so kadadiꞌano.”

Yesus nokowambaꞌao so kahansuruꞌano Lambuno Lahataꞌala

21:5-6

Mat 24:1-2; Mrk 13:1-2

5Nandoo mie detula-tulaꞌao Lambuno Lahataꞌala, domenteꞌao kakesano dolegasiane sabhaha kontu mokesa bhe sabhaha bara kafoampendo mie. Tamaka Yesus nopugaumo ambano, 6“Sabhaha newohamiu itu, nahumato tempono bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue.”

Katandaꞌano kakadee-dee

21:7-19

Mat 24:3-14; Mrk 13:3-13

7Dofeenamo anaguhuꞌino ne Yesus ambado, “Guru, naefie bhahaa kosasawiꞌae naꞌa nakumadhadhia? Maka o ae so katandaino ane nahumato tempono?” 8Ambano Yesus, “Kodhagaomu, bhahasaa dofokolilino totono lalomiu. Kapaꞌamo dobhahi mie so maino damake neaku bhe dapugau, ‘Idimo ini Mesias, tempono nomaꞌomo.’ Koise angkafidaomua. 9Ane meꞌawaomu bhihitano popahisaꞌa tawa kahunggano liwu koise koheduomua, kapaꞌamo kosasawiꞌae maitu tetewei nakumadhadhia deki. Ampamo kaowu miina nakomaꞌana putae nahumatomo dua aitu kafetompaino dhamani.” 10Nofohatodamo dua ambano, “Liwu dapoewangi bhe liwu, kakolakiꞌa dapoewangi bhe kakolakiꞌa. 11Neꞌamai-neꞌamai nandumandoo luali bhalano, hopu bhe gaba. Nakumadhadhia dua katikendaꞌa lalo bhe tanda-tanda timoteꞌi te lani. 12Ampamo kaowu paeꞌo nakumadhadhia kosasawiꞌae naꞌa, dahumakokoomu maka damodee-deekoomu, dabhitahakikoomu weo lambu kasambaheaꞌa bhe datumohongkukoomu. Datumondakoomu ne wisendo kabhalano liwu bhe kafeompuꞌa mbaꞌinomo kaparasaeamiu ne Idi. 13Anoa naꞌa somo katolalamiu membaliomu sakusiiku.

14Dadiꞌanomo fotohoomu lalomiu, koemo paꞌindulu nekenda-kenda handamiu nada amai potunduꞌao wutomiu. 15Kapaꞌamo wutoku so maꞌangkoomu pugau kotimbangi, sampe kosasawindo kaewamiu paise damondoiꞌea dapoewangiane tawa dagumagai pugaumiu. 16Kamungkulaꞌimiu damowakoomu ne limando kaewa, pedamo dua kakutaꞌamiu, bhahitieꞌimiu bhe sabhangkaꞌimiu, sampe seemie hodua ne olotamiu itu damongkoda. 17Hintimiu dabansikoomu sabhaha mie hampano kaparasaeamiu ne Idi. 18Tamaka bhe nasetangke wuluno fotumiu pae namiinaea. 19Ane potaamiomu, sumalamatiomu bhe meꞌawaomu dadi sakotuꞌuno.”

So kahansuruꞌano Yerusalem

21:20-24

Mat 24:15-21; Mrk 13:14-19

20“Ane mohaomu kaowu kotano Yerusalem dalumibu-libue tantara, pandeꞌaanemoomu ingka tempono so kahansuruꞌano nomaꞌomo. 21Wakutuu anaꞌa mie we kadieno Yudea tabeano damilei te kokabhawoꞌano ⸤ so dasumalamatiꞌao⸥ , mie weo kota tabeano dagumampi we simbalino kota, bhe mie we sembalino kota koemo dopesua weo kota. 22Kapaꞌamo anaꞌa temponomo kahukumu maiꞌao ne Lahataꞌala, somo nakoꞌulaꞌao kosasawiꞌae tibuhino weo Kitabi. 23Kadaino maka kolaundo hobhineꞌi fowoowano tawa fofotitino ne wakutuu anaꞌa, kapaꞌamo ne naꞌa ne kosekadieꞌae nandumandoo kasabha foliuno kabhibhiisa. Weo amahano Lahataꞌala nahumukumu miendo Israel. 24Sigaꞌa damongkoanda kampue, sigaꞌa dawowoꞌoda so katohongku ne sabhaha onuno liwu ne dhunia ini. Kotano Yerusalem dapokafindaꞌiane sabhaha bansano liwu tapa mandeꞌaono Lahataꞌala ampa nakumapo tempo nefotantuno Lahataꞌala so andoa.”

Kahatoꞌano Anano Manusia

21:25-28

Mat 24:29-31; Mrk 13:24-27

25“Mada kaowu natiwoha tanda-tanda ne wula, ne oleo bhe kulipopo. Ne dhunia ini sabhaha bansano liwu daoteꞌi sepaliꞌa bhe miinamo dakototonolaloa dawiseki guhuntumano bhe ewono teꞌi. 26Mie damateꞌaomo kateꞌi mbaꞌinomo kamihino lalondo dawiseki sabhaha kumadhadhiaꞌano ne dhunia, kapaꞌamo sabhaha waweno alamu naohungga. 27Wakutuu anaꞌa Anano Manusia - Idimo ini - damohae namai te olu, natiwoha weo kakalabhiano bhe kuasa bhalano. #Dan 7:13 28Ane mohaomu kaowu kafetompunaꞌino kadhadhia amaitu, eheomu, fowanu fotumiu kapaꞌamo nomaꞌomo tempono damosalamatikoomu.”

Kapalendano puꞌuno wohaꞌa

21:29-33

Mat 24:32-35; Mrk 13:28-31

29Pada anaꞌa Yesus nofohatoandamo kapalenda ambano, “Soba feꞌondoomu puꞌuno wohaꞌa #21:19 Sakotuꞌuno: puꞌuno ara. bhe puꞌuno sau sigaoꞌano. 30Ane mohaomu kaowu puꞌuno sau naꞌa natumawo, ingka pandeꞌaaneomu nomaꞌomo nakoꞌoleo. 31Pedamo dua naꞌa ane mohaemoomu sabhaha kadhadhia nepulaoꞌaoku saꞌituini, pandeꞌaanemoomu Kafopahintaꞌano Lahataꞌala nomaꞌomo. 32Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa. 33O lani bhe dhunia naosali, tamaka wambaku ini pae bhe kasalia.”

Katangahi dakodhaga

21:34-38

34“Dhagani wutomiu, bhahasaa totono lalomiu notahusuꞌao fekihiꞌano kahame bhe foho-fohoꞌu bhe kafaraluuno dhunia. Kapaꞌamo ane nada anaꞌa Oleono Ompu nakumahatokoomu kabeanga kabhahinta. 35Kapaꞌamo oleo anaꞌa nakumangkanai kosasawindo mie meateno te dhunia ini. 36Kodha-kodhagaomu bhe sadhia sambaheaꞌomu, neanomo meꞌawaomu kaꞌosa lumapaꞌaoꞌomu ne sabhaha so kumadhadhiaꞌano naꞌa bhe naembali meehe-eheomu te wiseno Anano Manusia.”

37Ole-oleo Yesus nofofoinaꞌu weo Lambuno Lahataꞌala, hato kohondoꞌa nokalamo noodo te kabhawo koneaꞌano kabhawono Zaitun. 38Hangko-hangkowine kosasawindo mie bhahi dohatomo ne Yesus weo Lambuno Lahataꞌala dametingkeꞌao pugauno.

Currently Selected:

Lukas 21: mnbSD

Highlight

Copy