Lukas 19

Yesus bhe Zakeus

19:1-10

1Yesus nopesuamo we kotano Yeriko tamaka tanolaloi. 2Ne itu nandoo seemie neangkando mealaꞌino sewa, nohangkaea sepaliꞌa. Neano Zakeus. 3Zakeus gaono mpuu namohae dua mie medando ae Yesus maitu, tamaka miina namoolia mbaꞌinomo dobhahi sepaliꞌa mie pakade nepanda fewutoino. 4Dadiꞌanomo notendemo nopaꞌinduluki mie bhahi, nekamponea ne puꞌuno ara naꞌumondo Yesus so lumalono ne itu. 5Nohato ne putaaꞌano, Yesus nototohanamo bhe nopugau ambano, “Zakeus, sampumo fekahimba, kapaꞌamo seꞌoleo itu tetewei abutu se lambumu.” 6Zakeus nosampu nofekahimba-himba maka notahima Yesus se lambuno. Kawulano maka lalono. 7Tamaka kosasawindo mie mohano kadhadhia aitu tadokomuntuꞌa ambado, “Ingka nobutu ne lambuno mie kodhosa.”

8Palusi anaꞌa Zakeus noehemo maka nopugau ne Ompu ambano, “Ompu, naselabunta kanandooku ini adumawuandae mie mokae. Pakade ane nandoo mie nebhohe-bhoheꞌiku, kahugindo abhoosie nafato lentuꞌa.” 9Ambano Yesus, “Seꞌoleo itu mieno polambu aini detahimamo kasalamati, hampano mie aini sampuꞌano dua Abraham. 10Kapaꞌamo Anano Manusia - Idimo ini - nomai naꞌumondofi bhe namosalamati mie kolilinono totono lalo.”

Kapalendano dhoi bulawa

19:11-27

Mat 25:14-30

11Tangasano mie bhahi dofetingke pugauno ini, Yesus nofokansuhumo pugauno nepake toha sehonda kapalenda. Kapaꞌamo wakutuu aitu nomaꞌomo bhe kotano Yerusalem pakade kunaꞌendomo mie bhahi naꞌa Kafopahintaꞌano Lahataꞌala napikitiwohamo. 12Ambano Yesus, “Nandoo seemie kafeompuꞌa nakumala we liwu mokodoꞌoꞌano damoehee so kolaki mowano liwuno. Namalusi kaowu nasumulimo. 13Miinaꞌo nakumalaa, kafeompuꞌa maitu nosaliꞌimo bhatuano doompulu, maka nowaꞌanda dhoi bulawa #19:13 Sakotuꞌuno: dhoi mina. sewoka seemie bhe nopugauanda ambano, ‘Podagaꞌaoꞌomu dhoi aini ampa asumuli.’ 14Tamaka saliwuno dobansie sampe detudumo mie dosunsumie deowa suahando miendo liwu, ‘Mie aini miina tamoindaloe so kolakino liwu mani.’

15Gahaꞌa palusi dofoehee nembali kolaki nosulimo. Sahatono we liwuno netudumo mie dalumoꞌoi bhatuaꞌino meꞌawano dhoi bulawa endefiꞌini. Patudhuno namandeꞌao labando dopodaga seemie-seemie. 16Mie kabhao-bhaono nomaimo bhe nopugau ambano, ‘Waompu, dhoi bulawa sewokano endefiꞌini akolabaanemo dua ompulu woka.’ 17Nopugaumo kafeompuꞌa naꞌa ambano, ‘Nokesa sepaliꞌa itu, hintu bhatua metaa, notuhu lalomu ne taka mohobu, dadiꞌanomo amaꞌangko meowa naompulu onu liwu.’ 18Nomaimo dua seemieno bhe nopugau ambano, ‘Waompu, dhoi bulawa sewokano endefiꞌini akolabaanemo dua lima woka.’ 19Ambano kafeompuꞌa naꞌa, ‘Hintu amaꞌangko meowa nalima onu liwu.’

20Nohatomo dua seemieno bhe nopugau ambano, ‘Waompu, ainiꞌae dhoi bulawa kawaꞌaomu, taꞌafeka-fekataamo weo kapusuli. 21Kapaꞌamo aoteꞌi waompu, hampano kaꞌosano lalomu. Hintu tamealamo tapa nehunsamu, kape ne kaampo tapa kamontisaꞌamu.’ 22Ambano kafeompuꞌa naꞌa, ‘Bhatua modai, abhotusiko naposahataa bhe pugaumu itu. Ingka pandeꞌa kanaumo mie moꞌosano lalo, aeala tapa nehunsaku, akape ne kaampo tapa kamontisaꞌaku. 23Ane peda naꞌa noafa dhoiku maitu miina maꞌandae mie mefowaweno dhoi? Neanomo sasuliku atumahimae bhe oeno.’ 24Nopugaumo kafeompuꞌa naꞌa ne mie meehe-eheno ne itu ambano, ‘Alaeꞌomu dhoi bulawa neintahano mie aini maka waꞌaneomu bhatua kolabaꞌano ompulu wokano saꞌituini.’ 25Ambado mie netuduno naꞌa, ‘Waompu, ingka bhemo dhoino ompulu woka.’ 26Ambano toha kafeompuꞌa naꞌa, ‘Amohatokoomu, sasuka mie kokanandoono datumabhahiane, tamaka tapa kokanandoono, o ae maka dua kanandoono damadae damalaꞌie. 27Tamaka kosasawindo kaewaku tapa moindalo kanau aembali kolakindo, owadaomu se ini maka pongkodaomu ne wiseku ini.’ ”

Yesus doꞌia-iaꞌe we kotano Yerusalem

19:28-44

Mat 21:1-9; Mrk 11:1-10; Yoh 12:12-15

28Nopalusi nopugau peda naꞌa Yesus nopaꞌindulukidamo, nofopansuhu kala-kalano we Yerusalem. 29Nohato we owano Betfage bhe Betania we laano kabhawo nekonando kabhawono Zaitun, Yesus netudumo dohodua anaguhuno damaꞌindulu. 30Andoa ini nofohatoda, “Kalaomu we liwu te wise watu. Samesuaꞌomu weo liwu mohaomu seꞌulu anano keledai dotapue, miinaꞌo sepaliꞌa natisawikia. Lenseꞌomu katapuno maka tondaeꞌomu we ini. 31Ane bhe so meenakoomu, ‘Noafa lenseaneomu?’, fohatodaomu putae, ‘Nofaraluuꞌe Ompu.’ ” 32Pada aitu anaguhuno netuduno dokalamo, nepoꞌawaꞌaondo nopobutu bhe pugauno Yesus. 33Tangasano dolense katapuno keledai aitu, dofeenadamo kokeledaino naꞌa ambado, “Noafa lenseaneomu?” 34Ambado toha, “Nofaraluuꞌe Ompu.” 35Keledai anaꞌa dotondaemo ne Yesus, towuno dolempesiane pakeando mbali kaengkohaꞌano maka dofosawi Yesus te wawono. 36Wakutuuno Yesus nolalo nosawi ne keledai naꞌa, mie bhahi dobhakesaane pakeando ne kaangkaꞌa. 37Nohato we owano Yerusalem, ne kainsibuluno kabhawono Zaitun, mie bhahi mangkafie naꞌa dopokakei-keiꞌaomo kaꞌia dopudhi Lahataꞌala, hampano sabhaha tanda tapa mentela newohando. 38Ambado,

“Nobarakati omputo maino weo neano Ompu,

katohopo te surugaa,

kakalabhiano Lahataꞌala te wawono wawo.” #Mzm 118:26

39Seemie hodua miendo Farisi mangkafino mie bhahi naꞌa dopugaumo ne Yesus ambado, “Guru, tududa anaguhuꞌimu ini koe dokodiua!” 40Notobhoosimo Yesus, “Amohatokoomu, ane andoa ini pae dakadiu-diu, tetewei o kontu ini so pokakei-keino.” 41Nohato we owano kota, nowoha Yerusalem, Yesus noꞌaefiemo. 42Ambano, “Kaꞌasimu hintu kotano Yerusalem, naetaa mpuu ane seꞌoleo itu lumosangie o ae maraluuꞌano so kataa bhe katohopono ngkoha-ngkohamu! Ampamo kaowu anaꞌa notifebuni, miina mohaea. 43Kapaꞌamo mada kaowu dahumato kaewamu dakumalibuangko bente maka dakumombuko bhe dasumekehiko damai fato wala. 44Andoa naꞌa damohansuruko bhe kosasawindo mie meatefiko. Ne kahondomino bentemu pae daehunsaangko kontu so potapiꞌano nahaa poi, mbaꞌinomo miina motindae wakutuuno Lahataꞌala nofotiwohaangkomo kaasino.”

Yesus nofekangkilo Lambuno Lahataꞌala

19:45-48

Mat 21:12-13; Mrk 11:15-18; Yoh 2:13-16

45Pada anaꞌa Yesus nopesuamo weo kadeteno Lambuno Lahataꞌala maka nogihasi sabhaha podaoano ne itu. 46Ambano Yesus, “Nandoo notibuhi weo Kitabi peda ini, ‘Lambuku lambu kasambaheaꞌa, tamaka hintimiu habueꞌomu mbali lia kaꞌonuꞌando mie modai.’ ” #Yes 56:7; Yer 7:11

47Seꞌo-seꞌoleo Yesus nofofoinaꞌu weo Lambuno Lahataꞌala. Neangkaꞌindo imamu, pande-pande Kitabi bhe neangkaꞌindo miendo Yahudi deꞌondofi akala damongkoe. 48Ampamo kaowu miina damandeꞌaanea nada amai dhalano, kapaꞌamo kosasawindo raꞌeati notihela lalondo dametingke kafoinaꞌuno.

Currently Selected:

Lukas 19: mnbSD

Highlight

Copy