Mataayo 19

Okugabhura na okutaana

(Maariko 10:1-12)

1Bhunu Yeesu ꞉aamarire okwaika gayo, ˆneemuka okusooka Gariraaya ayo, ˆnaagenda mu-kyaro kya Ebhuyawudi ngʼambu ya oruuji rwa Yorodaani. 2Abhaanu bhaafu mbamuseeta eyo, woone ˆnaawosha abharwaye bhanu ꞉bhaariga bhamujiiye-ko.

3Niwe Abhafarisaayo mbamugenda-ko insonga bhamusakye. Mbamubhuusha ati, “Angu, okuriingʼaana na ebhiraagiro, eyiikirisibhwa omurume okutaana na mukaaye, rikabha-wo engʼana ryoneryone?” 4Yeesu ˆnaabhasubhya ati, “Emwe mukyariga okusoma mu-Makaamo Amataakatiifu ati okusooka ku-bhwambiro unu ꞉aabhabhumbire, ‘꞉Aabhumbire omuunu omurume na omugasi?’#19:4 Ringira Obhwambiro 1:27. 5Omubhumbi ˆnaamara ˆnaaika ati, ‘Ku-nsonga iyo, omuunu arisiga esemwene na nyiramwene, ˆnaayimbana na mukaaye, abhabhiri bhayo bharibha mubhiri gumwi.’#19:5 Ringira Obhwambiro 2:24. 6Mmbe, bhayo bhatakyari bhabhiri kweki, tari ni mubhiri gumwi. Mmbe, kinu Nyamuwanga agwatanyiishe, omuunu aasiga okukitaanya.”

7Abhafarisaayo bhayo mbamubhuusha kweki ati, “Raabhe nikwo kutyo, kubhaki Musa ꞉aaragiriiye ati omurume akeenda okutaana na mukaaye amukaamire intaraaka?” 8Yeesu ˆnaabhasubhya ati, “Musa ꞉aabheekirisisiishe mutaane na abhagasi bheemwe, ku-nsonga ya obhukomeeye bhwa emitima gyemwe, nawe ꞉gaariga gatari kutyo okusooka ku-bhwambiro. 9Enibhabhwira ati omuunu woonewoone unu kaataana na omugasi waaye, itari ati amugwatire ekiroogi, ˆnaamara ˆnaagabhura omugasi owundi, uyo kaabha ˆnaataara ameega. Unu kaagabhura omugasi unu asigirwe woone kaataara ameega.”

10Niwe abheeyigira bhaaye mbamubhwira ati, “Raabhe amangʼana ga omurume na omugasi gari kutyo, nyakara omuunu waasiga okugabhura!” 11Yeesu ˆnaabhasubhya ati, “Tari bhaanu bhoone kutyo, bhanu abhatura okuramira riingʼana riyo, tari ni bhanu era Nyamuwanga ayaaye obhuturo bhuyo. 12Enaaika kutyo, kwa okubha bhariwo abhandi ni bhajigaru bhwibhurwa. Abhandi ꞉bhaakorerwe na abhaanu okubha bhajigaru, na bhariwo abhandi bhanu bheekorere okubha bhajigaru, ku-nsonga ya obhukama bhwa mu-rwire. Omuunu woonewoone unu kaatura okuramira riyo, ariramire.”

Yeesu kaasabhira giinonkwe abhaana abhatooto

(Maariko 10:13-16; Ruuka 18:15-17)

13Mmbe, abhaanu mbareeta abhaana bheebhwe abhatooto ku-Yeesu insonga abhatuurire-ko amabhoko abhasabhire. Nawe abheeyigira bhaaye mbabhagonya.

14Yeesu ˆnaabhwira abheeyigira bhaaye ati, “Musige abhaana abhatooto bhaaje ku-anye! Musige okubhagaanya, kwa okubha, abhaanu rwa abhaana bhanu, obhukama bhwa mu-rwire ni bhwebhwe.” 15Yeesu ˆnaabhatuurira-ko amabhoko, ˆnaamara ˆneemuka ˆnaasooka ayo.

Omuniibhi wumwi keenda obhurame bhunu bhutakuweera

(Maariko 10:17-31; Ruuka 18:18-30)

16Niwe muunu wumwi ˆnaaja ku-Yeesu, ˆnaamubhuusha ati, “Ee Mwiyigisha, nikore engʼanaki ejomu insonga ninyoore obhurame bhunu bhutakuweera?” 17Yeesu ˆnaamusubhya ati, “Kubhaki owumbuusha anye engʼanaki ejomu? Nyamuwanga niwe omukosi wa amajomu era! Nawe raabhe oweenda okwingira mu-bhurame bhunu bhutakuweera, kora kutyo ebhiraagiro bhya Nyamuwanga ebhyenda.” 18Omuunu uyo ˆnaamubhuusha kweki ati, “Bhiraagiroki?” Yeesu ˆnaamusubhya ati, “Waasiga okwita omuunu, waasiga okutaara ameega, waasiga okwibha, waasiga okubheeyeresha omuunu, 19uyaane ekibharo abheebhusi bhaawo, na wende omwikashaanya waawo, rwa kutyo owiiyenda omwene.”#19:19 Ringira Obhungʼaanyi 20:12-16; Ekiyiityo kya Ebhiraagiro 5:16-20; Abharaawi 19:18.

20Omuunu uyo ˆnaaika ati, “Ebhiraagiro bhiyo bhyone kutyo nibhigwatirega. Nikoreki ekindi kinu nisuuyiiywe?” 21Yeesu ˆnaamubhwira ati, “Raabhe oweenda okubha murengeresi, genda ugushe ebhiinu bhyawo bhyone kutyo. Ukanyoora giiyera, ugabhire abhatobhu. Ukabhagabhira, owubha wiibhiikiiye mu-rwire ku-Nyamuwanga. Ukamara okukora kutyo uuje unseete.” 22Omuunu uyo ꞉eejire oongwa kutyo, ˆnaasooka-wo asurumbaaye, kwa okubha ꞉aariga ari muniibhi muno.

23Niwe Yeesu ˆnaabhwira abheeyigira bhaaye ati, “Kimari enibhabhwira ati, eyiija okukomeera muno omuniibhi okwingira mu-bhukama bhwa mu-rwire. 24Enibhabhwira kweki ati, iwuuyire muno ku-ngamiya okutura mw-iwundu rya insindani, okukira omuniibhi okwingira mu-bhukama bhwa Nyamuwanga!”

25Bhunu abheeyigira bhaaye ꞉bhoonguuywe kutyo, mbaruguura muno, mbamubhuusha ati, “Mmbe woori, ni niga unu aritura okwerusibhwa?” 26Yeesu ˆnaabharingira, ˆnaabhabhwira ati, “Riyo abhaanu bhatakuritura, nawe ku-Nyamuwanga goone kutyo agaturikana.”

27Peetero ˆnaabhwira Yeesu ati, “Iitegeeresha, eswe kisigire ebhiinu bhyone kutyo, nkikuseeta! Ekiija okunyooraki?” 28Yeesu ˆnaabhasubhya ati, “Kimari enibhabhwira, bhunu Omwana wa Adaamu, ariikara ku-kitebhe kyaye ekya obhugungyo mu-kyaro ekiyaaya,#19:28 Ringira Daniyeri 7:9. emwe bhanu munsetere mwone, muriikara ku-bhitebhe ebhya ekikama ekumi na bhibhiri, enu muramuriraga amayito ekumi na gabhiri aga Abhaijirayeeri. 29Na omuunu woonewoone unu asigire iinyumba, abhamura bhaabho amwi ati abhasubhaati bhaaye, abheebhusi bhaaye, asigire abhaana amwi ati amasambu gaaye ku-nsonga ya riisiina ryani, ariramira kaafu muno okukira bhiyo, na ekindi, arinyoora obhurame bhunu bhutakuweera. 30Nawe abhaanu bha okwamba woori anu, bharibha bha ku-bhuteero. Na abhandi bhanu bhari ku-bhuteero woori anu, bharibha abha okwamba.”

Currently Selected:

Mataayo 19: kya

Highlight

Copy