Ebhikorwa bhya Abhatumwa 13

Bharinaabha na Saawuri abhatuurwa ku-mirimu

1Mw-ikanisa rya Antiyokiya eyo woone, ꞉bhaariga bhariyo abharagi na abheeyigisha. Agati weebhwe bharimo Bharinaabha, Siimiyooni unu ꞉aabhirikirwaga Nigeri,#13:1 Nigeri. Insonga yeende-ko ni ati, omuunu omwirafuru. Ruko Omukureene, Manayeni unu ꞉aariga akuriiye amwi na omukama Yerode Antipa, na Saawuri. 2Bhunu ꞉bhaariga mbaramya Raatabhugenyi enu bheeyimire ebhyokurya, niwe Mwoyo Omutaakatiifu ˆnaabhabhwira ati, “Munsorere Bharinaabha na Saawuri bhabhe ku-mirimu ginu nibhabhirikiriiye.” 3Mmbe, bhunu ꞉bhaamarire okusaasaama Nyamuwanga na okwiyima ebhyokurya, mbatuura amabhoko geebhwe ku-Bharinaabha na Saawuri, mbabhatuma bhagende.

Bharinaabha na Saawuri bhari Kiipuro

4Mmbe, Bharinaabha na Saawuri mbatangasibhwa na Mwoyo Omutaakatiifu, mbagenda mu-musi gwa Serukiya. Okusooka ayo, mbakora orugendo mbaambuka iinyanja mbaja kw-isinga rya Kiipuro. 5Bhunu ꞉bhaayikire kw-isinga kuyo, mu-musi gwa Sarami, mbaraasishaga abhaanu Riingʼana rya Nyamuwanga mu-masunagoogi ga Abhayawudi. Mu-kabhaga kayo, ꞉bhaariga bhari amwi na Yowana Maariko, ari musakisi weebhwe.

6Bhunu ꞉bhaamarire okutura kw-isinga agati, mbayika mu-musi gwa Pafwo. Mbanyookana na mukaruka wumwi Muyawudi omurosi, riisiina ryaye ˆnaatogwa Bhariyeesu. Bhariyeesu uyo ꞉aariga ˆneekora ati ni muragi wa Nyamuwanga, 7na ꞉aariga agwateene na omutungi Serugiyo Pawuro. Omutungi uyo ꞉aariga ari muunu mwenge. Mmbe, ˆnaabhirikira Bharinaabha na Saawuri bhagende ewaaye, ˆnaabhabhwira ati keenda bhamutondere Riingʼana rya Nyamuwanga. 8Nawe Bhariyeesu omurosi uyo, unu riisiina ryaye mu-Kiyunaani ni Erima, ˆnaayajana na Bharinaabha na Saawuri, ˆnaasakaga na okuyinga omutungi wa kw-isinga riyo aasiga okwikirisha Yeesu.

9Nawe Saawuri, unu ꞉aatogwaga riisiina erindi ati Pawuro, enu eejuuywe Mwoyo Omutaakatiifu, ˆnaamogorera Bhariyeesu ameeso, ˆnaamubhwira ati, 10“Awe omwana wa Sitaani! Awe uri omusoko wa amangʼana amarengeresi goone kutyo mu-meeso ga Nyamuwanga! Owujimya abhandi, nuugenderera okuyindura na amangʼana aga ekimari aga Raatabhugenyi Nyamuwanga okubha ga bhubheeyi! 11Mmbe, woori ringira, riisungu rya Raatabhugenyi riri ku-awe, woori owubha muwofu, akabhaga akatura-wo utakurora esuubha.”

Kimwi Bhariyeesu, ekisuute nkimwingirira mu-meeso, ˆnaarora kisuute. ˆNaamba okwiyindayinda okwagara omuunu owa okumugwata okubhoko amutangashe. 12Bhunu omutungi uyo ꞉aarorere iingʼana iyo, ˆneekirisha Raatabhugenyi Yeesu, ˆnaagenderera okwiyigira enu ˆnaaruguuraga muno iiguru ya ameeyigisho ga Raatabhugenyi ganu ꞉oonguuywe.

Pawuro na Bharinaabha bhari Antiyokiya ya Pisiidiya

13Pawuro na abheejaabho mbasooka Pafwo ayo, mbaambuka na iimeeri mbayika Perige mu-kyaro kya Pamufwiriya. Nawe Yowana Maariko ˆnaabhasiga ayo, ˆnaasubha Yerusareemu. 14Pawuro na Bharinaabha mbagenderera na orugendo rwebhwe bhari maguru okusooka Perige mbayika Antiyokiya mu-kyaro kya Pisiidiya. Orusuku rwa Insabhaato,#13:14 Insabhaato. Ringira riingʼana rinu mu-Mangʼana Amakomeeye. mbeengira mw-isunagoogi rya Abhayawudi, mbeekara. 15Abhaanu mbasomerwa amangʼana ga ebhiraagiro bhya Musa, na aga ebhitabho bhya abharagi. Bhunu ꞉bhaamarire okusoma, abhatangasha bha riisunagoogi riyo mbatuma omuunu ku-Pawuro na Bharinaabha, okubhabhwira ati, “Bhayiiri bheeswe, raabhe muri na riingʼana rya okukomeesha abhaanu bhanu emitima, muryaike.”

16Mmbe, Pawuro ˆnaayambaara, ˆnaabheemusisha okubhoko, ˆnaaika ati, “Emwe abhaanu bha Ijirayeeri, na abhaanu bha mu-bhyaro ebhindi bhoone kutyo, bhanu omuramya Nyamuwanga, munyiitegeereshe! 17Nyamuwanga wa abhaanu bha riiyito ryeswe erya Ijirayeeri, niwe ꞉aasorere bhaajaaji, ˆnaabhakora okubha eyito enene muno, riibhaga rinu ꞉bhaariga bheekaaye ebhugenyi mu-kyaro kya Miisiri. Kimwi ˆnaabhasoosha Miisiri ayo kwa managa gaaye aga okuruguusha, 18ˆnaamara myaka makumi gana abhajibhiriiyega era, bhari ku-nsi ya orukungu. 19Kimwi ˆnaasikya abhaanu bha mayito mungati abha ku-kyaro kya Kaanaani, ekyaro kiyo ˆnaakiyaana bhaajaaji kibhe mugabho gwebhwe. 20Amangʼana gayo goone kutyo ngabha-wo muna myaka magana gana na makumi gataanu kutya.

“Okumara gayo, Nyamuwanga ˆnaayaana bhaajaaji abharamusi bha ebhiraagiro bhabhatangashe, okuyikira anu ꞉kaayikiiye akabhaga ka omuragi Samweri. 21Kimwi mbasabha Nyamuwanga abhayaane omukama, Nyamuwanga ˆnaabhayaana Saawuri, omwana wa Kishi, wa riiyito rya Bhenjamiini. Saawuri ˆnaabha mukama ngitura myaka makumi gana. 22Nyamuwanga ˆnaasoosha-ko Saawuri ku-bhukama, ˆnaatuura-ko Dawudi okubha omukama weebhwe. Nyamuwanga ˆnaakumangya Dawudi ati, ‘Naarora Dawudi omumura wa Yese, kaanjomisha, na niwe arikuumisha goone kutyo ganu enikena.’

23“Ku-rwibhuro rwa Dawudi niwe Nyamuwanga ˆnaareetera Abhaijirayeeri Omwerusi Yeesu, rwa kutyo ꞉aariga aragire. 24Bhunu Yeesu ꞉aariga akyari okwamba emirimu gyaye, Yowana ꞉aariga ˆnaaraasisha Abhaijirayeeri ˆnaabhabhwiraga ati, bhanuge ebhikayo bhyebhwe, bhakamara okunuga ebhikayo bhabhatiisibhwe. 25Bhunu Yowana ꞉aariga arebhereeye okumara emirimu gyaye, ꞉aaikire ati, ‘Omutoga ati ni anye niga? Anye nitari Kiriisitu unu emwe omurindirira! Mwitegeereshe! Anye nikamara egyani, niwe Kiriisitu ariija. Anye niteesire, na okusurumura gingoye gya ebhikwirya bhyaye.’

26“Bhayiiri bhaani, emwe abhaanu bha oruganda rwa Bhurayimu na abhaanu bha mu-bhyaro ebhindi bhoone kutyo, bhanu omuramya Nyamuwanga, ni eswe kireeteeywe amangʼana ga obhwerusha ganu okusooka ku-Nyamuwanga. 27Abhaanu bha Yerusareemu na abhakuru bheebhwe ꞉bhataamenyere ati Yeesu niwe Omwerusi, na ꞉bhaataamiibhwe okusombookerwa amakaamo ga abharagi, ganu ꞉bhaariga mbasoma ku-nsiku gyone kutyo egya Insabhaato. Bheeki mbaramurira Yeesu okwitwa. Okumukorera kutyo, ꞉bhaakuumisiishe amangʼana ganu ꞉gaariga gaaikirwe mu-bhitabho bhya abharagi ati garikoreka. 28꞉Bhaariga bhatari na engʼana rya ekimari erya okweresha ati Yeesu eesire okwitwa, nawe mbasabha Piraato eekirishe Yeesu eetwe. 29Bhunu ꞉bhaamarire okukora goone kutyo ganu Yeesu ꞉aakaamiiywe, mbamwisha okusooka ku-musarabha, mbamutuura mu-mbiiyira. 30Nawe Nyamuwanga ˆnaamusuura, ˆnaamusoosha mu-bhafuuye. 31Nsiku nyafu ngitura, Yeesu ˆnaajaga ku-bhaanu bhanu ꞉bhaariga bhari amwi nawe okusookerera Gariraaya, okuyika Yerusareemu. Bhayo woori nibho abharori na abhaaiki bha amangʼana gaaye mu-meeso ga abhaanu bhaasu, Abhaijirayeeri.

32“Eswe kyone ekibharaasisha emwe Amangʼana Amajomu ati, ganu Nyamuwanga ꞉aaragire bhaajaaji, 33gakuumiiye kw-iswe abhaana bheebhwe. ꞉Aasuurire Yeesu, rwa kutyo ikaamirwe mu-Jabhuri ya akabhiri ati,

‘Awe uri Mwana waani,

reero anye naakwibhura naabha esomwana.’#13:33 Ringira Ijabhuri 2:7.

34“Amangʼana ganu ꞉gaariga ngeeresha ati Nyamuwanga ꞉aasuurire Yeesu okusooka mu-bhafuuye, insonga aasiga okubhora kajaanende, nigo ganu,

‘꞉Naaragire Dawudi giinonkwe gya ekimari.

Giinonkwe giyo, nigyo niribhayaana emwe.’#13:34 Ringira Isaaya 55:3.

35“Kweki, riingʼana riyo rikaamirwe ayandi ati,

‘Utakuuja okwikirisha ati omubhiri gwa Omutaakatiifu waawo gubhorere eyo.’#13:35 Ringira Ijabhuri 16:10.

36“Mumenye ati, bhunu Dawudi ꞉aariga ayikiishe goone kutyo ganu Nyamuwanga ꞉aariga amwendeeye mu-kabhaga ka orwibhuro rwaye ˆnaafwa, ˆnaabhiikwa ayeeyi na bhaajaaji waabho, ˆnaabhora. 37Nawe unu Nyamuwanga ꞉aasuurire, omwene ꞉ataabhorere.

38“Mmbe woori bhayiiri bhaani, mwitegeereshe mumenye kujomu ati, okuturira ku-Yeesu omuraasishwa amangʼana ga okwabhirwa ebhikayo bhyemwe. 39Na okuturira ku-mwene uyo, omuunu woonewoone akamwikirisha kaabhirwa ebhikayo bhyone kutyo. Riingʼana riyo ritakaturikeene okuriingʼaana na ebhiraagiro bhya Musa. 40Mmbe woori mwiyangarire muno, mutaaja okugwatwa na amangʼana ganu ꞉gaakaamirwe mu-kitabho ekirebhe ekya abharagi ngaaikaga ati,

41‘Emwe bhanu omurora mujeera, muringire!

Muruguure na muweerere,

kwa okubha enikora amangʼana mu-nsiku gyemwe ginu,

amangʼana ganu mutakuuja okugeekirisha,

raabhé omuunu akabheekasha ˆnaabhatondera muno.’#13:41 Ringira Abhakuki 1:5.”

42Kimwi, Pawuro na Bharinaabha, mbasooka mw-isunagoogi. Bhunu ꞉bhaariga mbasooka-mo, abhaanu mbabheesaasaama bhasubhe kweki ku-rusuku orundi orwa Insabhaato inu yaajaga, insonga bhaaikane iiguru ya amangʼana gayo. 43Mmbe, Pawuro na Bharinaabha mbagenda iika. Niwe Abhayawudi bhaafu, bhari amwi na abhaanu bha ebhyaro ebhindi bhanu ꞉bhaariga mbeekirisha iidiini ya Ekiyawudi, mbabhaseeta. Pawuro na Bharinaabha mbaaikana nabho, mbabhabhwiraga bhagenderere okwikara mu-nema ya Nyamuwanga.

44Orusuku rwa Insabhaato inu ꞉yeejire, bhaanu bhaafu abha omusi guyo ꞉bheejire mw-isunagoogi okwitegeeresha Riingʼana iiguru ya Raatabhugenyi Yeesu. 45Nawe bhunu Abhayawudi ꞉bhaarorere ati abhaanu bhaafu muno bhasangiiye ayo, mbabha na orwango, mbaamba okubhambaara ku-ganu Pawuro ꞉aariga ˆnaaika enu mbamufumaga. 46Niwe Pawuro na Bharinaabha mbabhasubhya bhari na riibhaasi, mbaaikaga ati, “꞉Yeenderwe kyaike na emwe Riingʼana rya Nyamuwanga okwamba. Nawe kwa okubha muriremere, mwirora ati emwe muteesire okunyoora obhurame bhunu bhutakuweera, woori kyone ekiyindukira abhaanu bha ebhyaro ebhindi. 47Nikwo kutyo Raatabhugenyi Nyamuwanga ꞉aakibhwiriiye,

‘Nikutuuye ubhe obhweru bhwa abhaanu

bha ebhyaro ebhindi,

insonga ubhareetere obhwerusha okuyikira

ku-bhuteero bhwa ekyaro.’#13:47 Ringira Isaaya 49:6.”

48Abhaanu bha ebhyaro ebhindi, ꞉bheejire okuungwa amangʼana gayo, mbajomerwa, mbagungya Riingʼana rya Raatabhugenyi Yeesu. Na bhoone kutyo bhanu ꞉bhaariga bheendeeywe obhurame bhunu bhutakuweera, mbeekirisha Raatabhugenyi.

49Mmbe, Riingʼana rya Raatabhugenyi ndiswerana mu-kyaro kiyo kyone kutyo. 50Nawe Abhayawudi mbasooyeresha abhagasi bha ekibharo bhanu ꞉bhaariga mbaramya Nyamuwanga, na abhakuru bha mu-musi guyo. Abhaanu bhayo mbaamba okunyansha Pawuro na Bharinaabha, kimwi mbabhabhirimya okusooka mu-kyaro kyebhwe. 51꞉Geejire gaabha kutyo, Pawuro na Bharinaabha mbabhakuukumurira oruteeri rwa amaguru geebhwe, okubhagonya, mbagenda mu-musi gwa Ikooniyo. 52Nawe, amwi na gayo, abheeyigira bha Yeesu abha Antiyokiya mbeejurwa amajomerwa, mbeejurwa na Mwoyo Omutaakatiifu.

Currently Selected:

Ebhikorwa bhya Abhatumwa 13: kya

Highlight

Copy