Lug 18

Kɨradi-kɔl gɨ ojɨ cay tama di kudurɔ ma dan̰ ba-bɔyɛ kɔl

1Jesu say dor kɨradi-kɔl gɨ pɨna wo̰, kɨya gɨlge gɨ kuɗa gɨ kan na ula Kumu daa daa, dɨle dɔrɛ gɨlale. 2Ban yege hɨn̰: «A boy cay ƴaa-di-gumu di pɨna wo̰, ba-bɔyɛ kɔl gɨ pɨna wo̰ som nee, ban hɨndara Kumu naŋ bɨ, bɨgan̰ kalaŋ kɔl nee naŋ bɨ. 3A boy cay ƴaa di nee le, tama di kudurɔ ma som nee. Hɨndi godɨrde dan̰ wɔlɛ pɨna pɨna a da ba bɔyɛ kɔl le yeyi hɨn̰: “Kɔgɨɗɔ! Bɨya kɔl hɨnge bəŋ jɨbɨn̰ dan̰ ba-lɔɔ kɔl danaŋ canɨ coŋ.” 4Lee wɔlɛ kondɨ ba bɔyɛ kɔl gɨ nee le kan̰ bɔyɛ kɔl le. Kardi nee na, ban say ɨrɨm kuduroy ye hɨn̰: “Na cɨndi, ɨŋ hɨndara Kumu naŋ bɨ, ɨŋ bɨgan̰ kalaŋ kɔl nee naŋ bɨ. 5Ama tama di kudurɔ ma le, naraŋ dɔrɛ gɨlale coŋ. Ɨŋ kɨya bɔyɛ kɔl kɔ bɔɔ ɗe hɨndi kayde canɨ naŋ ɨni.”»

6Ba-gulɔŋ jɨga yege hɨn̰: «Sɨlagɨŋ ba-bɔyɛ kɔl gɨ kɛ le na ungo gɨ laa gɨye koyi dan̰ durɔ ɗɨngar naŋ, ama ban boy kɔl bɨn̰ tama di kɛ le! 7A boy ɨrɨme kogɨŋ gɨŋ kɛ, Kumu kɨya bɔyɛ kɔl bɨn̰ kalaŋ kayi ga Ban torge ɗege dan̰ cɨndɨge ga ɨlege kɨbi duroy son̰do dan̰ kɨɗɨn̰ ga woli bɨ naŋ ga? Kɛ Ban kɨya aye cay gɨ ni dɨle jɨbe toyge ga 8Aŋ yəgɨŋ da waŋ: Ban kɨya bɔyɛ kɔl haw wo̰ bɨge. Ama kɨɗɨn̰ ga ɨŋ-bandi Kurɨn̰-ungo ɨŋ kɨya caga le, ɨŋ kɨya wɔɔ aye kudurɔ a cay gɨsəŋ gaŋ hange ga?»

Kɨradi-kɔl gɨ ojɨ cay Parɨsɨn̰a dan̰ ba-hɔgɛ lambo

9Jesu say dor kɨradi-kɔl ɗaŋ coŋ, kɨya bɨn̰ kalaŋ ga pɨna ga sol gusɨge leen̰ kalaŋ ga ka-lɔɔ hɨnga ga dan̰ durɔ ɗɨngar bɨ, sɨlage kamdige nɔm laan̰ hɨnga naŋ. 10Wɔlɛ gɨ pɨna wo̰: «Kalaŋ won̰ sɔɔ nayge jɨn̰ duroy ƴaa-di-da-Kumu dɨŋ, kɨya ɔlɛ Kumu: Pɨna na Parɨsɨn̰a bɨ, pɨna na ba-hɔgɛ lambo bɨ. 11Parɨsɨn̰a le de say ɨre daa bɨ, ol Kumu dan̰ kuduroy ye hɨn̰: “Ay Kumu, ɨŋ hɨramɨn̰ kɨya gɨ ɨŋ wɨya hɨn̰ kalaŋ ga ɗaŋ wo̰ naŋ. Kan na ka-hase bɨ, ka-lɔɔ hɨnga ga ɨsɨnde bɨ, ka-yɔyɛ kandɨ ga da kamdɨge wala ban̰aŋ ga da kamdɨge bɨ. Wala hɨn̰ ba-hɔgɛ lambo gɨ ba kɛ le naŋ. 12Boy wɔlɛ jurgum le, ɨŋ hay kɨbɨnɨ cay sɔɔ bɨ, ɨŋ gosɨn hɨnga wɔɔnɨ nɔm dugo kɨɗɨn̰ mɔjɨ maŋ ay kɨbɨge pɨna bɨn̰ Kumu bɨ.” 13Ama ba-hɔgɛ lambo le, say ɨre daa hen̰ sɛdɨ. Tɨdi kalɨn̰ ma gey aye daa solɨn̰ gɨɗɨgɨ-Kumu naŋ. Ama ban de kuduroy dan̰ kobi rab rab ye hɨn̰: “Ay! Kumu, sɨla cɨn̰ n̰age tɨnge ɨŋ-bandi gɨ ba-lɔɔ ɨsɨna.” 14Aŋ yəgɨŋ daa waŋ, duroy kalaŋ ga sɔɔ le, ungo gɨ kɛ le jogɨ ɨndi tayi, hɨn̰ ungo gɨ dan̰ durɔ ɗɨngar wo̰. Ama Parɨsɨn̰a le jogɨ ɨndi tayi hɨn̰ ungo gɨ dan̰ durɔ ɗɨngar naŋ wo̰. Kɨya wa waŋ waŋ gɨ na laa gusi laan̰ ungo gɨ gumu na, Kumu kɨya bɨlii loon̰ ungo gɨ dḛ, ama ungo gɨ na laa gusi laan̰ ungo gɨ dḛ na, Kumu kɨya bɨlii loon̰ ungo gɨ gumu.»

Jesu dan̰ karɨn̰aŋ ga n̰ən̰əŋ

(Matɨyo 19:13-15; Marg 10:13-16)

15Wɔlɛ gɨ pɨna wo̰, kalaŋ ɨrgan̰ge dan̰ karɨn̰aŋ ga n̰ən̰əŋ gusi Jesu ɗe ban na dɨbɨ kobi cayge torɨn̰-kɨbi cayge. Kɨɗɨn̰ ga ka-aye-cay-tɨbay Jesu solge hɨn̰ wo̰ na, kan san̰ge dan̰ kalaŋ ga ɨrgan̰ dan̰ karɨn̰aŋ le ɗalge. 16Ama Jesu tee karɨn̰aŋ ga n̰ən̰əŋ le bɨ ye hɨn̰: «Ɗagɨŋ dan̰ karɨn̰aŋ le ɗe ɨrgage gusɨnɨ! Nargegɨŋ naŋ. Kɨya wa dɔɔ-ƴaa di da Kumu le na di da kalaŋ ga woy hɨn̰ kan wo̰. 17Aŋ yəgɨŋ daa waŋ na cɨndi: Waŋ waŋ gɨ na ƴa dɔɔ-ƴaa di da Kumu dan̰ kuduroyi hɨn̰ kɨye gɨ n̰əŋ wo̰ naŋ na, ban kɨya dɔbɛ cayi boy nee naŋ bɨrɨŋ.»

Jesu dan̰ Kɨlma gɨ way hɨnga tɔgɨ

(Matɨyo 19:16-30; Marg 10:17-31)

18Ba sɔmɛ cay Jubɨ gɨ pɨna wo̰, ɨngɨr Jesu ye hɨn̰: «Ba-gɨlɨn̰ kalaŋ hɨnga gɨ ba lɔɔ hɨnga ga kuɗa, kɛ ɨŋ gɨ lɔɔ na mɨna ma maŋ gɨ wan̰ sɔmɛ-bɨra gɨ dan̰ cɨnɨ ga?»

19Jesu dɨbii cay nee ye hɨn̰: «Kɛ na kɨya wa ma mɨn̰ təŋ ungo gɨ kuɗa ga? Ungo pɨna wo̰ gɨ kuɗa unɔ, na Kumu pɨna hayi ƴɔbɨ ma na ungo gɨ kuɗa. 20Ji sol te tumɔ da Kumu di ye hɨn̰: “Ji na gɨ yɔyɛ tam mɨgan̰ wala bara gɨ da mɨgɛɛ naŋ bɨ, dɨɗe ungo naŋ bɨ, hase naŋ bɨ, bɔyɛ kɔl ɗɔɔ cay mɨgan̰ naŋ bɨ, aya cay ban̰ dan̰ ƴon̰ daa bɨ.”#18:20 Ayge na duroy: Exode 20:12-16; Deutéronome 5:16-20.»

21Ungo le dɨbii cay nee ye hɨn̰: «Hɨnga ga nee le nɔm ɨŋ ay toyge lee kɨɗɨn̰ ga ɨŋ ban̰ dan̰ marɨnanɨ hange bɨrɨŋ labɨde.»

22Kɨɗɨn̰ ga Jesu ba je kɔl gɨ da ungo le hɨn̰ wo̰ na, ban yeyi hɨn̰: «Ji baa lɔɔ hɨnga pɨna ƴee. Saa ɨra kɨle hɨnga kan̰ nɔm coŋ bɨ, aya gursudɨge gusɨnan̰ kan ga wɔɔdɨge unɔ, ɨni na ji kɨya wɔɔ hɨnga wɔɔ a daa nii. Kardi nee ɨni na mɨn̰ ɨre kɨba karɨnɨ.»

23Kɨɗɨn̰ ga ungo le je kɔl gɨ nee le na, cɨndi say kula kɨya gɨ hɨnga wɔɔdi kondɨ tɔgɨ 24Jesu ba sol gɨ tɨdi lee n̰age na, ye hɨn̰: «Dojɨ tɔgɨ gɨ ɗe kalaŋ ka-wɔɔ hɨnga na andaŋge boy dɔɔ-ƴaa di da Kumu dɨŋ! 25Dojɨ tɔgɨ ɗe jambal na andaŋ boy umboŋ libɨra gɨŋ, ama ɗe ba-wɔɔ hɨnga na andaŋ boy dɔɔ-ƴaa gɨ da Kumu na, na hɨnga ga osɨ cɨla ƴee.»

26Kan ga ba jege kɔl le yege hɨn̰: «Naa hɨn̰ wo̰ na, na waŋ ba kɨya ɓale wɔɔ pɔɗɛ le ga?»

27Jesu jɨga dɨbege cay nee ye hɨn̰: «Hɨnga ga mɨyɨn̰ kalaŋ le, mɨn̰ɨn̰ Kumu naŋ.»

28Ɨni na, Pɨyɛr yeyi hɨn̰: «Ja! Ma ni-gandi ga ni ba ɗe hɨnga wɔɔ di ni nɔm coŋ kobɨn̰ kardɨn̰ kɛ le, koni kɨya wɔyɛ na mɨna bɨ ga?»

29Jesu dɨbɨge cay nee yege hɨn̰: «Aŋ yəgɨŋ daa waŋ na cɨndi: Waŋ waŋ gɨ na ɗa ƴaadi dan̰ tamdi bɨ, karmii dan̰ kandi bɨ, karɨndi bɨ kɨya cay dɔɔ-ƴaa di da Kumu na, 30Kumu kɨya bii cay kobi haw kɛ, boy wɔlɛ gɨ haw kɛ gɨŋ bɨ, kɨya wɔɔ sɔmɛ-bɨra gɨ dan̰ cɨndi boy wɔlɛ gɨ kɨya caga gɨŋ bɨ.»

Jesu ye kol tɨmaydi ɗaŋ coŋ

(Matɨyo 20:17-19; Marg 10:32-34)

31Jesu te ka-aye-cay-tɨbayi ga mɔjɨ-cayge-sɔɔ gusi yege hɨn̰: «Sɨlagɨŋ! Nɔɔ dɨnagɨŋ gɨ na ba kɨya nɔɔgɨŋ jɨn̰ Jerusalɛm le, hɨnga nɔm ga ka-yɔɔ-kɔl-gɨ-Kumu-ba-yɔɔ ba walge duroy magtubu dɨŋ ojɨn̰ canɨ ɨŋ-bandi kurɨn̰ ungo le, kan kɨya lɔɔ ɗe or kɨɗɨn̰dɨge gaŋ. 32Kan kɨya ƴɔmɔŋge dɔbɔŋ kobɨ kalaŋ ga toyge na Jubɨ naŋ bɨ, kan kɨya asaŋge bɨ, kan kɨya yagɨdaŋge bɨ, kan kɨya tɨbege kale canɨ bɨ. 33Kan kɨya sɔmdɔŋ dan̰ bɨraw bɨ, kan kɨya dɨɗəŋge bɨ. Ama wɔlɛ sɨbɨdi gɨŋ le, ɨŋ kɨya bɔyɛ lɨbe duroy kalaŋ ga madɨrdaŋ.»

34Ama ka-aye-cay-tɨbayi sɨlage duroy kɔl le naŋ. Kɨya wa na kɔl gɨ cɨndɨge hangaŋ cay nee naŋ. Ban ye na koldi wa kalɨn̰ ma kan sɨla duroy naŋ.

Jesu haŋgɨ ti ba-bɨbe

(Matɨyo 20:29-34; Marg 10:46-52)

35Kɨɗɨn̰ ga Jesu bugoŋ mɨnde dan̰ Jerigo ɨni na, ba-bɨbe gɨ pɨna wo̰, som a bongi gɨyəŋ gɨŋ ɨre olɨn̰ kalaŋ hɨnga. 36Kɨɗɨn̰ ga ban je noy dɨmdɨrdi kalaŋ ga ba pɨdege ɨni na, ban ɨngɨr kalaŋ ye hɨn̰: «Na wa ba lɔɔ hɨnga ga?» 37Kalaŋ le jɨga dibiige cay nee yeyige hɨn̰: «Na Jesu gɨ Najarɛt ba pɨde.» 38Ɨni na, ban ye dan̰ tumoyi di daa ye hɨn̰: «Jesu, Kungay Dabid, Sɨla cɨn̰-n̰age tɨnge.»

39Kalaŋ ga ba or tumoy Jesu le san̰ge dan̰ ba-bɨbe ɗe na lɨgɨ kɨbi, ama na nee dɨm ma ban dor noyi jɨn̰ daa ɗɨn̰ gɨ tumɔ coŋ ƴee ye hɨn̰: «Kungay Dabid, sɨla cɨn̰-n̰age tɨnge.»

40Jesu jɨbɨ ɨre dugo bɨ ay noy bɨge ɗe kan na ɨren̰ danayi. Kɨɗɨn̰ ga ba-bɨbe le ɨrga mɨnde gusi Jesu ɨni na, Jesu ɨngɨrii ye hɨn̰: 41«Kɛɛ na wa ma man̰ gey gɨ ɨŋ na laa bɨn̰ ga?» Ba-bɨbe le dɨbii cay nee ye hɨn̰: «Ba-gulɔŋ, ɨŋ gey sɔlɛ kɨɗɨn̰.»

42Jesu ye hɨn̰: «Kuɗa, ɗe cɨndɨn̰ hangaŋ. Aye kudurɔ kon̰ poɗɨn̰.»

43Kɨɗɨn̰di ga nee gaŋ le bɨ, cɨn̰ ba-bɨbe le hangaŋ bɨ, ban kobɨ kardɨ Jesu hɨramɨn̰ Kumu. Dɨmdɨrdi kalaŋ nɔm kalɨn̰ ma, kɨɗɨn̰ ga solge hɨnga ga nee le, ayge te hɨrame Kumu bɨ.

Currently Selected:

Lug 18: gab

Highlight

Copy