Ja̰ 5

Jesu poɗɨ ungo gɨ mɨray

1Kardi hɨnga ɗəndəŋ ga nee le na, Jesu say or a cay ƴaa-di-gumu di Jerusalɛm, kɨya wa cay wɔlɛ gɨ ni leen̰ kɨdɨrɛ gɨ da Jubɨ gɨ pɨna wo̰ baa mɨnde. 2A cay ƴaa-di-gumu di Jerusalɛm dɨŋ le, umboŋ gɨ kan gaɗɨge been̰ge kaŋ nee ga ni pɨlɨn̰, gɨ pɨna wo̰ woy mɨnde dan̰ kɨbɨ ƴaa gɨ da gamge. Dabaŋ won̰ bay woy kɨbɨ nee. Kan teege umboŋ gɨ kan gaɗɨge been̰ kaŋ le, dan̰ kɨbɨ əbɨro na Betjada. 3Dɨmdɨrdi kalaŋ ga ka-hɔmɨn̰ɛ bɨ, ka-bɨbe bɨ, ka-modoŋ bɨ, ka-mɨraye bɨ, woyge te dabaŋn̰əŋ gaŋ ga kɨbɨ gɨyəŋ gɨ nee gɨŋ le, dan̰ kondige. [Kan amge na kaŋ ga kɨya duroŋ daa gɨmɨsɨ gɨmɨsɨ. 4Kɨya wa ba-ƴɔbɛ gɨ daa nii gɨ da Ba-gulɔŋ kɨya jɨrbe boy kaŋ ga boy umboŋ gɨ kan gaɗɨge been̰ge kaŋ ga ni pɨlɨn̰ nee le, dɔrɛ kaŋ le daa gɨmɨsɨ gɨmɨsɨ. Ɨni na, ba-hɔmɨn̰ɛ gɨ na gɨsɨn tumɔ, kɨɗɨn̰ ga kaŋ ba duroŋ da gɨmɨsɨ gɨmɨsɨ na, hɔmɨn̰ɛ koyi naa gɨ mɨna mɨna kalɨn̰ ma, kɨya duroŋ cayi coŋ.] 5Ungo gɨ pɨna wo̰ gɨ hɔmɨn̰ɛ leeyi, ɓal ɨlge toy-sɨbɨ-cay-margɨm woy a kɨɗɨn̰ ga nee gaŋ le. 6Jesu solii te wɔyɛ a kɨɗɨn̰ ga nee gaŋ le bɨ, sol gɨ gusi leeyi kardi sɨngɨɗɨ. Ban ɨngɨrii yeyi hɨn̰: «Ji gey gɨ gusɨn̰ wɨn̰an̰ kalɨn̰ ga?» 7Ba-hɔmɨn̰ɛ le dɨbii cay nee yeyi hɨn̰: «Ba-gulonɨ, ɨŋ-bandi le, ungo hɨnge pɨna wo̰ gɨ ba ayaŋ dɔbɔŋ boy kaŋ gaŋ, kɨɗɨn̰ ga kaŋ ay te duroŋ daa gɨmɨsɨ gɨmɨsɨ le unɔ. Lee gɨ kɨɗɨn̰ ga ɨŋ mal gɨyəŋ gɨ ni gɨsɨne boy nee ƴee na, ungo gɨ ɗaŋ ba dɔgɛ tumɔnɨ gɨsɨne boy nee tumɔnɨ.» 8Jesu yeyi hɨn̰: «Sa daa, aya kuyo kon̰ bɨ, ɨran̰ daa.» 9Kɔl gɨ kɨbɨna kɛ bɨ, ban poɗɨ. Ban ay dan̰ kuyo koyi bɨ, ay te ɔrɛ daa. Ama wɔlɛ gɨ nee le, na wɔlɛ gɨ ni dorɨn̰ gɨlale gɨ da Jubɨn̰əŋ. 10Ɨni na, ka-cay Jubɨn̰əŋ yen̰ge ungo gɨ poɗɨ le, yeyige hɨn̰: «Labɨde na wɔlɛ gɨ ni dorɨn̰ gɨlale gɨ da Jubɨn̰əŋ. Na gɨyəŋdi gɨ ji kɨya aye kuyo kon̰ kɔjɛ naŋ.» 11Ama ban dɨbɨge cay nee yege hɨn̰: «Na ungo gɨ ba lɔɔ gɨ gusɨnɨ wɔyɔŋ kalɨn̰ caŋ caŋ le ba yɔŋ hɨn̰: “Aya kuyo kon̰ bɨ ɨra”.» 12Kan ɨngɨriige yege hɨn̰: «Kɛ, ungo gɨ ba yen̰ hɨn̰: “Aya kuyo kon̰ bɨ ɨra le, na waŋ ga”?» 13Ama ban gɨ Jesu poɗii le, sɨla ungo gɨ ba-poɗii le naŋ, kɨya wa Jesu kaɗɨn̰ duroy dɨmdɨrdi kalaŋ ga ba ɨrege a kɨɗɨn̰ ga nee gaŋ le.

14Kardi nee ɨni na, Jesu jɨga wayi duroy ƴaa-di-da-Kumu dɨŋ bɨ, yeyi hɨn̰: «Haw kɛ na sɨla ji poɗɨ ɨni, lɔɔ ɨsɨna naŋ bɨrɨŋ gajanaŋ, naŋ na hɨnga ga ɗɨn̰ ga ba kɛ, kɨya da andaŋ can̰ ɗaŋ coŋ.» 15Ungo le or wan̰ ka-cay Jubɨn̰əŋ bɨ, yege gɨ ungo gɨ ba-poɗii le naa Jesu. 16Ayɨn̰ toy boy wɔlɛdi gɨ nee gɨŋ le, Jubɨn̰əŋ san̰ge danayi, kɨya wa ban lee hɨnga ga nee le, na boy wɔlɛ gɨ ni dorɨn̰ gɨlale gɨ da Jubɨn̰əŋ gaŋ. 17Ama Jesu dɨbɨge cay nee yege hɨn̰: «Bɨrɨŋ gɨsɨn̰ labɨde, Banɨ som na kɨbɨ gɨye gɨŋ, lee gɨ ɨŋ-bandi kalɨn̰ ma, ɨŋ som na kɨbɨ gɨye gɨŋ bɨ.» 18Ayɨn̰ toy kɨɗɨn̰ ga nee gaŋ na, Jubɨn̰əŋ malge jɨn̰ tumɔ tumɔ gɨ ni dɨɗii. Kɨya wa ban hangɨɗa na cay wɔlɛ gɨ ni dorɨn̰ gɨlale gɨ da Jubɨn̰əŋ ƴɔbɨ naŋ, ama ban te Kumu naa Bay koyi nee coŋ. Leen̰ gusi ɓalɨn̰ dan̰ Kumu.

Dɔnɔ di Kumu bɨn̰ kurondi

19Jesu jɨga ay kɔl bɨ yege hɨn̰: «Jagɨŋ, ɨŋ yəgɨŋ na kɔl gɨ cɨndi. Kuroŋ kɨya ɓale lɔɔ hɨnga dan̰ cay gusi naŋ. Ban kɨya lɔɔ na hɨnga ga ban sol bayi te lɔɔdɨge gɨŋ ƴɔbɨ. Kɨya wa hɨnga nɔm ga kɨye bay lee le, kuroŋ kɨya lɔɔ na hɨn̰ wo̰ bɨ. 20Kɨya wa kɨye bayi gey kurondi bɨ, gɨli hɨnga nɔm ga ban lee bɨ. Ban kɨya gɨli na gɨye ga gɨmdəŋ ga ɗɨn̰ ga nee ɗaŋ, ɗe gɨ kɔl na kaygɨŋ bɨrɨŋ coŋ. 21Hɨn̰ gɨ kɨye bayi boy kalaŋ ga madɨrdaŋ lɨbge bɨ, lee gɨ kan somin̰ge-bɨra bɨ le, na hɨn̰ wo̰ ma, Kurɔŋ kalɨn̰ ma lee gɨ ɗe kan ga kuduroyi geyge le, na sɨman̰ge-bɨra bɨ. 22Kɨye bayi bɨya kɔl gɨ da ungo naŋ, ama bɔyɛ kɔl nɔm na, ban bɨn̰ na kurondi ɗe wal, 23ɗe gɨ kalaŋ nɔm been̰ge hurɔmɔ cay kuroŋ hɨn̰ gɨ kan ba been̰ge Kumu hurɔmɔ le. Ungo gɨ na dɨbɨn̰ kuroŋ hurɔmɔ naŋ na, kɨya dɨbɨn̰ Kɨye bayi gɨ gɨygɨn̰ dan̰ kuroŋ le hurɔmɔ naŋ bɨ. 24Jagɨŋ ɨŋ yəgɨŋ na kɔl gɨ cɨndi, waŋ waŋ gɨ na ja kɔl hɨnge bɨ, bɨga kuduroyi cay ban gɨ ba gɨyigəŋ na, orɨn̰ dan̰ sɔmɛ-bɨra gɨ dan̰ cɨndi. Kan kɨya bɔyɛ kɔl cayge naŋ, ama ban andaŋ na duroy tɨma dɨŋ coŋ bɨ, orɨn̰ duroy sɔmɛ-bɨra gɨ dan̰ cɨndi gɨŋ. 25Jagɨŋ ɨŋ yəgɨŋ na kɔl gɨ cɨndi, tɨwa di kalaŋ ga madɨrdaŋ kɨya jen̰ge noy Kurɨn̰-Kumu le bugoŋ ɨni bɨ, caga ɨni bɨ. Bɨ kan ga kɨya jɔɔge tumoyi boy wɔlɛdi gɨ nee le, kan ga ba kɨya jɔɔge noy le, kɨya sɔmɛge dan̰ cɨndɨge. 26Kɨya wa hɨn̰ gɨ Kɨye bayi orɨn̰ dan̰ sɔmɛ-bɨra le, na hɨn̰ wo̰ ma ban bɨn̰ Kuroŋ ɗe gɨ ban kalɨn̰ ma na ɨran̰ dan̰ sɔmɛ-bɨra bɨ. 27Kɨye bayi le, bii dan̰ dɔnɔ gɨ ni bon̰ kɔl cay kalaŋ, kɨya wa ban na Kurɨn̰-ungo. 28Ɗɔɔgɨŋ kɔl kaygɨŋ sɛl sɛl kɨya cay kɔl gɨ nee le naŋ, kɨya wa wɔlɛ tɨlga nee gɨ kalaŋ nɔm ga woyge boy umboŋ kamɨn̰aŋ gaŋ le, kɨya jɔɔge noyi bɨ, kɨya andɨgaŋge. 29Kan ga leege hɨnga ga kuɗudaŋ le, kɨya bɔyɛge lɨbe gɨ ni somɨn̰-bɨra dan̰ cɨndɨge, ama kan ga leege hɨnga ga ɨsɨndəŋ le, kɨya bɔyɛge lɨbe ɗe gɨ kan na bon̰ kɔl cayge.» 30Ɨŋ-bandi, ɨŋ mala na gɨ ni lɔɔ kuduroy geye hɨnge naŋ, ama ɨŋ boy kɔl na dan̰ gɨyəŋdi kɔl gɨ ɨŋ je. Kɔl gɨ ɨŋ boy le na dan̰ gɨyəŋdi, kɨya gɨ ɨŋ mala na lɔɔ hɨnga ga dan̰ kuduroy geye hɨnge naŋ. Ama na dan̰ gɨyəŋ gɨ da kuduroy-geye gɨ da ban gɨ gɨyigəŋ.

Tɨmon̰n̰əŋ ga Kumu lee cay Jesu

31Hɨn̰ gɨ ɨŋ-bandi gusɨnɨ ni na ba laa tɨmon̰ kɨya cay gusɨnɨ na, tɨmon̰ di nee le na dan̰ gɨyəŋdo naŋ. 32Ama na ungo gɨ ɗaŋ ba lɔɔ tɨmon̰ kol canɨ bɨ, ɨŋ sol gɨ tɨmon̰ di ban lee le, or pɨna dan̰ kɔl gɨ cɨndi bɨ. 33Kɨŋ gɨy kalaŋ gusi Ja̰ bɨ, ban lee tɨmon̰ ojɨ cay kɔl gɨ cɨndi bɨ. 34Hɨnge ɨŋ-bandi na, ɨŋ mala na ɗe gɨ ungo na laa tɨmon̰ kol canɨ naŋ, ama ɨŋ ye kɔl gɨ nee le, na ɗe gɨ agɨŋ na wan̰ pɔɗɛ. 35Ja̰ le woy na hɨn̰ lamba di talge tɨwa boy nee bɨ, asɨn̰ kɨɗɨn̰ wo̰ bɨ, kɨŋ gey lɔɔ gusi-mɔwa kardi tɨwa toyi dɨŋ dḛ bɨ. 36Ama ɨŋ-bandi ɨŋ orɨn̰ dan̰ tɨmon̰ di gumu ɗɨn̰ di da Ja̰. Tɨmon̰ di nee le: Na gɨye nɔm ga Banɨ bəŋ gɨ ɨŋ na laa dɨɗɨn̰ kɨbi. Gɨye gɨ nee le ɨŋ lee nɔm, na ban ba lɔɔ tɨmon̰ tɨnge, 37ama Banɨ gɨ gɨyigəŋ le, ban gusi koyi ba lɔɔ tɨmon̰ kol canɨ. Kɨŋ ja noyi naŋ bɨrɨŋ bɨ, kɨŋ sɨla cɨndi naŋ bɨrɨŋ bɨ, 38kɔl koyi sɨma kuduroygɨŋ naŋ bɨ, kɨya wa kɨŋ bɨga kuduroygɨŋ cay ban gɨ ba gɨygəŋ le naŋ bɨ. 39Kɨŋ madɨlde te kɔl duroy Magtubu di da Kumu di kan walge jɨne dɨŋ, kɨya wa kɨŋ ɨrɨm gɨ kɨŋ na kɨya sɔmɛ-bɨra dan̰ cɨndɨgɨŋ naa kol caa. Na magtubu di nee ba lɔɔ tɨmon̰ kol canɨ. 40Ama kɨŋ kan̰ ɨrga gusɨnɨ ɗe gɨ agɨŋ na wan̰ sɔmɛ-bɨra gɨ dan̰ cɨndɨgɨŋ gɨ cɨndi coŋ.

41«Ɨŋ mala gusoŋ-tɔgɛ gɨ saa gusi kalaŋ naŋ.» 42Ama ɨŋ solgɨŋ kuɗa gɨ ƴɔmɛ wandɨ da Kumu unɔ kuduroygɨŋ. 43Ɨŋ ɨrga dan̰ guson̰ Banɨ, ama kɨŋ ƴɨmaŋ gusɨgɨŋ naŋ. Hɨn̰ gɨ ungo gɨ ɗaŋ na ba ɨre dan̰ gusondi koyi na, kɨŋ kɨya ƴomii gusɨgɨŋ. 44Kɨŋ ga kɨŋ gey wɔɔ gusoŋ-tɔgɛ gɨ sayga gusi kamdɨgɨŋ, ama kɨŋ mala gusoŋ-tɔgɛ gɨ sayga gusi Kumu pɨna ɗɔɔ ƴɔbɨ naŋ le, kɛ kɨŋ kɨya bɔgɛ kuduroyigɨŋ cay nee na mɨna ga? 45Kɨŋ ɗɔɔ ba ɨrɨme gɨ naa ɨŋ-bandi na ba kɨya dɨbe kɔl caygɨŋ tumoyi Banɨ naŋ. Ban gɨ ba kɨya dɨbe kɔl caygɨŋ le na Moyis, ban gɨ kɨŋ bee ɨrɨmedɨgɨŋ cayi le. 46Hɨn̰ gɨ leen̰ cɨndi kɨŋ na bɨga kuduroyigɨŋ cay Moyis na, kɨŋ ni kɨya bɔgɛ kuduroyigɨŋ canɨ bɨ. Kɨya wa na kɔl gɨ ojɨ canɨ ma ban wal duroy magtubu dɨŋ le. 47Ama kɨɗɨn̰ ga kɨŋ ba bɨga kuduroyigɨŋ cay kɔl gɨ Moyis ba wal le naŋ na, kɛ kɨŋ kɨya bɔgɛ kuduroyigɨŋ canɨ na mɨna ga?

Currently Selected:

Ja̰ 5: gab

Highlight

Copy