Ja̰ 15

Jesu na hɨyadi suru gɨ cɨndi

1Jesu ye ɗaŋ coŋ: «Ɨŋ na hɨyadi suru gɨ cɨndi bɨ, Banɨ na Ba-gulɔŋ yagedi suru bɨ. 2Kobɨ hɨyadi suru gɨ ani ani, gɨ na jɨbɨ tɨlanɨ ma na wɔɔ karɨndi naŋ na, Ban kɨya sɨdɨrde bɔgɛ coŋ. Ama kobɨ hɨyadi suru gɨ ani ani gɨ na wɔɔ karɨndi na, Ban kɨya n̰ane ɗe na wɔɔ karɨndi orɨn̰ jɨn̰ tumɔ tumɔ coŋ. 3Ama haw kɛ na, kɔl gɨ ɨŋ ba yəgɨŋ le n̰angɨŋ ɨni. 4Bugoŋgɨŋ pɨna danaŋ hɨn̰ gɨ ɨŋ ba bugoŋ pɨna danagɨŋ wo̰ bɨ. Kobɨ hɨyadi suru kɨya wɔɔ karɨndi cay gusi naŋ. Ama kɨya wɔɔ karɨndi na kɨɗɨn̰ ga ban na bugoŋ pɨna dan̰ hɨyadi suru dɨm. Hɨn̰ wo̰ na kɨŋ kalɨn̰ ma, kɨŋ na bugoŋ pɨna danaŋ naŋ na, kɨŋ kɨya wɔyɛ na hɨn̰ hɨyadi suru gɨ ɓala wɔɔ karɨndi cay gusi naŋ wo̰ bɨ.

5«Ɨŋ-bandi, ɨŋ na hɨyadi suru bɨ, kɨŋ na karɨn̰ kobi bɨ. Ungo gɨ na bugoŋ pɨna danaŋ bɨ, ɨŋ na bugoŋ pɨna danayi bɨ na, kɨya wɔyɛ na hɨn̰ hɨyadi suru gɨ wɔɔ karɨndi tɔgɨ wo̰. Kɨya wa dɨle ɨŋ-bandi na, kɨŋ kɨya ɓale lɔɔ hɨnga pɨna cay gusɨgɨŋ naŋ. 6Hɨn̰ gɨ ungo na bugoŋ pɨna danaŋ naŋ na, kan kɨya dɨbiige coŋ kardi yagedi suru gɨŋ ɗe hay. Karɨn̰ kobɨ hɨyadi suru ga hayi le, kan kɨya lɔbɛge dayege daa ulege mɨɗɔgɨ mɨɗɔgɨ coŋ. 7Hɨn̰ gɨ kɨŋ na bugoŋ pɨna danaŋ bɨ, kɔl hɨnge nɔm na bugoŋ pɨna danagɨŋ bɨ na, ɨngɨrgɨŋ hɨnga ga kuduroygɨŋ gey ƴɔbɨ, kɨŋ kɨya wɔɔ. 8Hɨn̰ gɨ kɨŋ naa ka-aye-cay-tɨbanɨ leen̰ cɨndi na, kɨŋ kɨya wɔyɛ naa hɨn̰ hɨyadi suru gɨ wɔɔ karɨndi kondɨ bajag bajag wo̰. Hɨn̰ wo̰ na gusoŋ-tɔgɛ gɨ da Banɨ kɨya andaŋ cɨn̰ kalaŋ nɔm. 9Hɨn̰ gɨ Banɨ ba geyəŋ ɓɨragɨ ɓɨragɨ le, ɨŋ-bandi kalɨn̰ ma ɨŋ geygɨŋ bɨ. Sɨmagɨŋ duroy geye hɨnge gɨŋ. 10Hɨn̰ gɨ kɨŋ na aya te tumɔ tɨnge laan̰ gɨye na, Kɨŋ kɨya sɔmɛ duroy geye hɨnge gɨŋ bɨ. Hɨn̰ gɨ ɨŋ-bandi kalɨn̰ ma, ɨŋ ba ay te tumɔ nɔm di da Banɨ leen̰ gɨye, ma maŋ ba somɨn̰ duroy geye koyi gɨŋ wo̰ bɨ. 11Ɨŋ yəgɨŋ kɔl gɨ nee le, na ɗe gɨ gusi-mɔwa tɨnge na ƴee gusɨgɨŋ bɨ, ɗe gɨ gusi-mɔwa togɨŋ na duroŋ cɨrɛɗ bɨ. 12Sɨlagɨŋ te tumɔ tɨnge le ba kɛ: Geygɨŋ gusɨgɨŋ hɨn̰ gɨ ɨŋ ba geygɨŋ wo̰ bɨ. 13Geye gɨ gumu ɗɨn̰ geye gɨ ungo gey ka-pogɨn̰ii bɨrɨŋ ɗen̰ gusi bɨn̰ tɨma le unɔ. 14Hɨn̰ gɨ kɨŋ na laa te tumonɨ di ɨŋ ba ay bɨgɨŋ le na, kɨŋ na ka-pogɨn̰ɨnɨ. 15Ɨŋ kɨya togɨgɨŋ marɨne ka-gɨye naŋ bɨrɨŋ ɨni. Kɨya wa marɨna ba gɨye le, sɨla gɨye-lɔɔ gɨ da ba-gulondi naŋ. Ama ɨŋ tegɨŋ na ka-pogɨn̰ɨnɨ, kɨya gɨ hɨnga nɔm ga ɨŋ je koldɨge gusi Banɨ le, ɨŋ wɨsa cayge dugo danagɨŋ naŋ. 16Na kɨŋ-gandi ba dɔrɔŋ naŋ, ama na ɨŋ-bandi ba torgɨŋ. Ɨŋ sɨgɨŋ ɗe gɨ kɨŋ na ɨra bɨ, kɨŋ na wɨya hɨn̰ hɨyadi suru gɨ wɔɔ karɨndi bɨ, ɗe gɨ wɔɔdi kardi na sɨngɨɗɨ bɨ. Kɨɗɨn̰ ga nee le, Banɨ kɨya bɨgɨŋ hɨnga nɔm ga kɨŋ kɨya ɨngɨrii dan̰ gusoŋnɨ. 17Te tumɔ di ɨŋ ba bɨgɨŋ ba kɛ: Geygɨŋ gusɨgɨŋ.»

Kalaŋ ga cay gɨsəŋ gaŋ kɛ kan̰ge Jesu dan̰ kalaŋ kayi

18«Hɨn̰ gɨ kalaŋ ga a cay gɨsəŋ gaŋ kɛ na ƴɨmagɨŋge dan̰ kuduroyge na, sɨlagɨŋ gɨ kan ƴɔmɔŋge na ɨŋ-bandi dan̰ kuduroyge cay wase dɨm ma, kan ƴɔmgɨŋge kɨŋ-gandi dan̰ kuduroyge ƴee. 19Tumɔ kɨŋ ni naa kalaŋ kage na, kan ni kɨya geygɨŋge, kɨya wa kɨŋ na kage. Ama kɨŋ na kalaŋ kage naŋ, kɨya wa ɨŋ torgɨŋ na duroyge. Na toy di hɨn̰ wo̰ ma, kan ƴomgɨŋge dan̰ kuduroyge. 20Kɨŋ hɨn a cay kɔl gɨ ɨŋ ba yəgɨŋ ye hɨn̰: Marɨna ba-gɨye gumu ɗɨn̰ ba-gulɔŋ di naŋ le. Hɨn̰ gɨ kan na gɨləŋge cɨn̰-n̰age na, kan kɨya gɨlgɨŋge cɨn̰-n̰age bɨ. Hɨn̰ gɨ kan na aya kɔl hɨnge laan̰ gɨye na, kɨŋ kalɨn̰ ma, kan kɨya ayege kɔl kogɨŋ loon̰ gɨye bɨ. 21Ama hɨnga ga nee le nɔm, kan kɨya ləgɨŋge na kɨya cay gusoŋnɨ. Kɨya wa kan sɨlage ban gɨ ba gɨyigəŋ le naŋ. 22Tumɔ ɨŋ ni na ɨre yage kɔl naŋ na, ɨsɨna ni kɨya ƴɔmɛ cayge naŋ. Ama haw kɛ na, kol ɨsɨna koge kɨya duroŋ cayge naŋ. 23Waŋ waŋ gɨ na ƴɨmaŋ dan̰ kuduroyi na, ƴom Banɨ dan̰ kuduroyi bɨ. 24Tumɔ ɨŋ ni na laa gɨye nɔm gɨ ungo gɨ ɗaŋ laa duroyge naŋ ƴee na, kɔl ni kɨya ƴɔmɛ cayge naŋ. Ama haw kɛ na, kan solge gɨye-lɔɔnɨ nɔm dan̰ cɨndɨge bɨ, kan ƴomnige ɨŋ-bandi bɨ Banɨ bɨ dan̰ kuduroyge cɨndɨge tumɔ tumɔ. 25Ama na kɨya gɨ ɗe kɔl gɨ kan walge duroy magtubu gasɨn̰-kɔl koge gɨŋ ye hɨn̰: “Kan ƴɔmɔŋge dan̰ kuduroyge kalɨn̰ wo̰ dugo le”#15:25 Ayge na duroy: Psaumes 35:19; 69:5., ɗe na or kɨɗɨn̰dɨge gaŋ.

26«Kɨɗɨn̰ ga ɨŋ kɨya bugoŋ gusi Banɨ na, ɨŋ kɨya gɨygɨn̰ dan̰ Ba-ƴɔɔ caygɨŋ gɨ kɨya sayga na gusi Banɨ. Turnɔ di da kɔl gɨ cɨndi le, andɨgaŋ na gusi Banɨ. Kɨɗɨn̰ ga Ban kɨya bugoŋ na, Ban kɨya lɔɔ tɨmon̰ kol canɨ. 27Kardi nee na, na kɨŋ-gandi ba kɨya lɔɔ tɨmon̰ tɨnge bɨn̰ kalaŋ ga ɗaŋ, kɨya wa kɨŋ ay te gɨye danaŋ bɨrɨŋ gɨsɨn̰ labɨde.»

Currently Selected:

Ja̰ 15: gab

Highlight

Copy