Ja̰ 13

Jesu pɨl tɨbay ka-aye-cay-tɨbayi

1Tumoyi, wɔlɛ gɨ ni leen̰ kɨdɨrɛ gɨ ni Pakɨ gɨ da Jubɨn̰əŋ na, Jesu sol gɨ tɨwa toy ɓal. Na tɨwa di ban kɨya ɗen̰ cay gɨsəŋ bɨ, orɨn̰ gusi Bay le. Ban gɨ gey kalaŋ kayi ga a cay gɨsəŋ gaŋ le, geyge bɨrɨŋ dɨɗɨn̰ kɨbi. 2Kɨɗɨn̰ ga kan somge diige dɔɔ gɨ ni kɨdɨrɛ Pakɨ na, Haban̰ gɨsɨ ɨrɨme gɨ ni aye cay Jesu bɨ dobii kobɨ kalaŋ a kuduroy Judasɨ Isikarɨyɔt kurɨn̰ Simo Isikarɨyɔt. 3Jesu sol gɨ Bay na ɗe hɨnga nɔm duroy kobi gɨŋ bɨ, gɨ ɗi na sayga naa gusi Kumu bɨ, ɗi na kɨya jɔgɛ ɔrɛ naa gusi Kumu bɨ. 4Ban say kɨbɨ hɨnga ga ni dɔɔ gaŋ bɨ, dor badɨge kayi ga cay kamdɨge gaŋ coŋ bɨ, ay badɨge ga kan handɨn̰ge hɨnga saɗɨn̰ te wɨrɨndi daa. 5Kardi nee ban bee kaŋ a boy hɨnga ga ni been̰ kaŋ gaŋ bɨ, ay te pɨle tɨbay ka-aye-cay-tɨbayi bɨ, handɨge dan̰ badɨge ga ni hanɨn̰ hɨnga ga ban saɗɨn̰ te wɨrɨndi le. 6Kɨɗɨn̰ ga ban bugoŋ a cay Simo Pɨyɛr ɨni na, Pɨyɛr yeyi hɨn̰: «Ba-gulɔŋ, ji-bandi ba geye pɨləŋ tɨbanɨ ga?» 7Jesu dɨbii cay nee yeyi hɨn̰: «Hɨnga ga ɨŋ ba lee ɨrɨn̰ kɛ le, ji kɨya ɓale sɔlɛ toyge haw kɛ naŋ. Ama na kardi nee dɨm ma man̰ kɨya sɔlɛ toyge ƴee.» 8Pɨyɛr yeyi hɨn̰: «Naŋ! Pɨle tɨbanɨ ɨŋ-bandi naŋ bɨrɨŋ!» Jesu dɨbii cay nee yeyi hɨn̰: «Hɨn̰ gɨ ɨŋ na pɨl tɨban̰ naŋ na, hɨnga ga dayna pɨna unɔ.» 9Simo Pɨyɛr yeyi hɨn̰: «Ba-gulɔŋ, naa hɨn̰ wo̰ na, na tɨbanɨ ƴɔbɨ naŋ, ama kɔbɔŋ bɨ, canɨ nee bɨ.» 10Ɨni na, Jesu yeyi hɨn̰: «Ungo gɨ pɨl gusi ɨni le, kɨya pɨle kaŋ ɗaŋ naŋ, ama na tɨbayi ƴɔbɨ, kɨya wa gusi arɨn̰ cərərə ɨni. Kɨŋ-gandi kɨŋ arɨn̰daŋ, ama na kɨŋ nɔm naŋ.» 11Kɨya wa ban sol ungo gɨ ba kɨya aye cayi bɨn̰ kalaŋ le. Na toy di hɨn̰ wo̰ ma, ban ye hɨn̰: «Kɨŋ arɨn̰a nɔm naŋ.»

12Kɨɗɨn̰ ga ban pɨl tɨbayge ɨni na, ban ay badɨge kayi dobɨ gusi ban̰di nee bɨ, or sɔmɛ kɨbɨ dɔɔ gɨŋ, bɨ yege hɨn̰: «Kɛ, kɨŋ sol duroy hɨnga ga ɨŋ ba lee danagɨŋ kɛ le ga?» 13Kɨŋ təŋ na Ba-gɨlɨn̰ kalaŋ hɨnga bɨ, Ba-gulɔŋ bɨ. Bɨ kɨŋ ye na cɨndi hagɨŋ, kɨya wa ɨŋ na ungo ban gɨ nee le. 14Hɨn̰ gɨ ɨŋ-bandi, gɨ ni Ba-gulɔŋ bɨ, Ba-gɨlɨn̰ kalaŋ hɨnga bɨ le, ɨŋ na pɨl tɨbaygɨŋ na, ojɨ gɨ kɨŋ-gandi kalɨn̰ ma, kɨŋ pɨl tɨbay gusɨgɨŋ bɨ. 15Ɨŋ lee hɨnga ga ni gɨle ga kɛ le gɨlgɨŋ, ɗe gɨ kɨŋ kalɨn̰ ma, kɨŋ na laa dan̰ gusɨgɨŋ hɨn̰ wo̰ bɨ. 16Jagɨŋ! Aŋ yəgɨŋ daa waŋ na cɨndi, guyɔŋ le gumu ɗɨn̰ ba-gulondi naŋ bɨ, ba-gɨre-gɨye kalɨn̰ ma gumu ɗɨn̰ ba-gɨyii naŋ bɨ. 17Haw kɛ, kɨŋ sol hɨnga nɔm ga nee le. Hɨn̰ gɨ kɨŋ na aya laan̰ gɨye na, tumoy wolwa kɨya wɔyɛ kol caygɨŋ.

18Kɔl gɨ ɨŋ ba ye haw kɛ le ɨŋ ya ujan̰ na caygɨŋ nɔm naŋ. Ɨŋ-bandi ɨŋ sol kalaŋ ga ɨŋ ba torge. Ama naa wa wa kalɨn̰ ma ojɨ kɔl gɨ ba walge duroy Magtubu di da Kumu dɨŋ na ɨra kɨɗɨn̰di gaŋ. Kɔl gɨ nee le ye hɨn̰: «Ungo gɨ dii dɔɔ danaŋ le, say bɨle kardi bəŋ.»#13:18 Ayge na duroy: Psaumes 41:10. 19Ɨŋ yəgɨŋ daa haw kɛ pa dɨm ma, ɗe hɨnga ga nee le da ɨrga ƴee. Ɗe gɨ kɨɗɨn̰ ga na ɨre na, kɨŋ kɨya bogɨn̰ kuduroygɨŋ canɨ gɨ «Ɨŋ woy nee.»#13:19 Sɨlagɨŋ: Ja̰ 8:24. 20Jagɨŋ! Aŋ yəgɨŋ daa waŋ na cɨndi: «Waŋ waŋ gɨ na ƴɨma ban gɨ ɨŋ gɨyi kuɗa gusi na, ƴɔmɔŋ na ɨŋ-bandi gusi bɨ. Waŋ waŋ gɨ ƴɔmɔŋ kuɗa gusi le, ƴom na ban gɨ gɨyəŋ kuɗa gusi bɨ.»

Jesu ye gɨ ungo na kɨya aye cayi

(Matɨyo 26:20-25; Marg 14:17-21; Lug 22:21-23)

21Kardi nee, kɨɗɨn̰ ga Jesu ye kɔl gɨ nee le ɨni na, kuduroyi wɨya kɨɗɨn̰ pɨna naŋ. Bɨ ban ye daa waŋ hɨn̰: «Jagɨŋ! Aŋ yəgɨŋ daa waŋ na cɨndi, ungo pɨna duroygɨŋ kɨya aye canɨ bɨge.» 22Ɨni na, ka-aye-cay-tɨbayi solge cɨn̰ gusɨge, kɨya gɨ kan sɨlage ungo gɨ ban ba ye koldi le naŋ. 23Ba-aye-cay-tɨbayi Jesu gɨ pɨna wo̰, gɨ Jesu geyi-tɔgɨ som kɨbɨ dɔɔ gɨŋ kɨwayi. 24Ɨni na, Simo Pɨyɛr cɨngɨɗii ɗe ban na ɨngɨrii kɛ, ungo gɨ ban na ye koldi le naa waŋ ga? 25Ba-aye-cay-tɨbayi le lɨnge jɨn̰ kardi bɨrɨŋ ɨsɨbɨ gasɨbi Jesu bɨ, ɨngɨri hɨn̰: «Ba-gulɔŋ, ji ye na kol waŋ ga?» 26Jesu dɨbi cay nee yeyi hɨn̰: «Na ungo gɨ ɨŋ kɨya bɔyɛ mapa cɨlɨn̰ kɨlɨn̰ bii le.» Kɨɗɨn̰ ga nee le, ban ay kɨway mapa cɨlɨn̰ kɨlɨn̰, bɨn̰ Judasɨ Isikarɨyɔt kurɨn̰ Simo Isikarɨyɔt. 27Kɨɗɨn̰ ga Judasɨ ƴee kɨway mapa le na, Sidan andaŋ kuduroyi. Ɨni na, Jesu yeyi hɨn̰: «Bɨya gusɨn̰ cɛd laa hɨnga ga ji ojɨ lɔɔ le, laa haw!» 28Ungo pɨna wo̰ duroy kan ga ba somge kɨbɨ dɔɔ gɨŋ le, sɨla kɛ na kɨya wa ma ban ye kɔl gɨ nee le naŋ. 29Judasɨ na ba-game magɨladi gursu. Kan ga pɨna ɨrɨmge gɨ Jesu na yeyi na kol kɨle hɨnga ga ni leen̰ kɨdɨrɛ, naŋ le na moli naa gɔsɨnɛ hɨnga bɨn̰ kalaŋ ga-wɔɔdɨge-unɔ. 30Judasɨ ƴee dan̰ kɨway mapa le bɨ, kɨɗɨn̰di ga nee gaŋ le bɨ, ban de kɨɗɨn̰ andaŋ doŋ. Kɨɗɨn̰ ɨndi ɨni.

Te tumɔ di hɨrɨwa

31Kɨɗɨn̰ ga Judasɨ andaŋ doŋ ɨni na, Jesu yege hɨn̰: «Haw kɛ dɨbɨge gusoŋ-tɔgɛ a cay Kurɨn̰-ungo bɨ, Kurɨn̰-ungo dɨbɨ gusoŋ-tɔgɛ a cay Kumu bɨ. 32[Hɨn̰ gɨ Kumu na wa gusoŋ-tɔgɛ gusii na,] Kumu kalɨn̰ ma kɨya dɨbe gusoŋ-tɔgɛ koyi cayi bɨ. Lam nee na ban kɨya dɨbe gusoŋ-tɔgɛ cayi ɨni.» 33Ay! Karɨnɨ kange, ɨŋ kɨya sɔmɛ danagɨŋ karɨnɨ sɨngɨɗɨwa naŋ. Kɨŋ kɨya malaŋ bɨ, ama hɨn̰ gɨ ɨŋ ba yen̰ Jubɨn̰əŋ tumɔ ye hɨn̰: «Kan kɨya ɓalege dɨbege tɨbayge a kɨɗɨn̰ ga ɨŋ ba kɨya orɨn̰ nee gaŋ naŋ le, na ban ma maŋ yəgɨŋ haw kɛ bɨ. 34Ɨŋ bɨgɨŋ te tumɔ di hɨrɨwa: Geygɨŋ gusɨgɨŋ. Hɨn̰ gɨ ɨŋ ba geygɨŋ le, geygɨŋ gusɨgɨŋ duroygɨŋ hɨn̰ wo̰ bɨ. 35Hɨn̰ gɨ kɨŋ na gey gusɨgɨŋ na, na kɨɗɨn̰ ga nee le ma, kalaŋ nɔm kɨya sɔlɛge gɨ, kɨŋ naa ka-aye-cay-tɨbanɨ.»

Jesu ye gɨ Pɨyɛr na gɨ man̰e kɨbi gɨ ɗi na sɨlayi naŋ

(Matɨyo 26:31-35; Marg 14:27-31; Lug 22:31-34)

36Simo Pɨyɛr yeyi hɨn̰: «Ba-gulɔŋ, ji gɨ ɔrɛ na ani ga?» Jesu dɨbi cay nee yeyi hɨn̰: «Kɨɗɨn̰ ga ɨŋ ba kɨya ɔrɛ nee le, haw kɛ, ji kɨya ɓale kɔbɛ karɨnɨ ɔrɛ nee naŋ, ama kardi nee pa dɨm ma, mɨn̰ kɨya kɔbɛ karɨnɨ ƴee.» 37Pɨyɛr yeyi hɨn̰: «Ba-gulɔŋ, na kɨya wa ma, mɨn̰ ye gɨ ɨŋ na ɓala kɔbɛ kardɨn̰ haw kɛ naŋ ga? Naa tɨma gusoo kalɨn̰ ma, ɨŋ kɨya mare kol can̰.» 38Jesu dɨbi cay nee yeyi hɨn̰: «Na cɨndi gɨ ji gey mare kɔl canɨ ga? Jagɨŋ! Aŋ yəgɨŋ daa waŋ na cɨndi, tumɔ pa dɨm ma, kuɗa kɨya ale ƴee na, ji kɨya man̰e kɨbɨn̰ cay sɨbɨ yɔ gɨ ji na sɨlaŋ naŋ.»

Currently Selected:

Ja̰ 13: gab

Highlight

Copy