MARKUSI 8
8
Insa asulisa dunia ya watru zaidi ya alifu nne
(Mat 15:32-39)
1Hari mwa zisuku zile, dunia ya watru ika ingulidzana tsena, na ha iv̄o kawakana shitru ya uɗya, Insa ahiri maswihaɓa yahe, awaambia: 2«Tsiremwa na poreho na idunia ini, mana madza ina suku traru rangu walio v̄anu na wami, na kawasina ata shitru ya uɗya. 3Namowav̄eleha hawo na ndza, watsovuliha ndziani. Mana wasalia mengoni mwawo walawa mbali.»
4Maswihaɓa yahe yamudjiɓu: «Ɓasi hav̄i mutru atsoparao madipe ya ukurisa watru wanu padzaju v̄anu?»
5Sa ile Insa awadzisa: «Madipe mangav̄i ɗe mulionayo?»
Wamudjiɓu: «Saɓa.»
6Ɓas, aketsisa idunia ile v̄otsi, arenge madipe saɓa yale, na ɓaanda ahimidia, ayakutrua-kutrua, av̄ayo maswihaɓa yahe wayaelesheye; ɓasi wayaeleshea idunia. 7Wakana tsena wana fi, na Insa ɓaanda ahimidia, awaambia wazielesheye raha. 8Watru wale waɗyi ata wakura, tsena wajadza mahanga saɓa na magudru yaka yaɓaki. 9Waka indadi ya alifu nne. Amwesa Insa awav̄eleha malagoni hawo. 10Ɓaanda ya v̄ale apashia djahazi v̄umoja na maswihaɓa yahe, wandre hari mwa umukaɓala wa Dalmanuta.
Mafarisayo wasutsaha waone ãlama ya midjuza
(Mat 16:1-4)
11Ɓas, watru wa ishama ya Mafarisayo waja, waandrisa urongoa na Insa. Ha umudjereɓu, wakotsaha awaonese ãlama ya midjuza yalawa ha Monyewe ziMbingu. 12Insa atri pumu ha kusudi rohoni, amwesa arongoa: «Manatrini lidunia la leo lini litsahao ãlama ya midjuza? Nisumuambiani ha kweli, lidunia la leo lini kalitsoonesewa ãlama!» 13Amwesa awalawia v̄ale, apashia tsena lidjahazi, ashia nyambo ya lidzia.
Mufahamisho kinyume na ilalive ya Mafarisayo na ya Hirudu
(Mat 16:5-12)
14Maswihaɓa ya Insa waka waɗela uv̄inga madipe, moja tu ɗe wakanalo djahazini. 15Ɓas, Insa awav̄a mufahamisho unu: «Namudzitahadharishe ha kusudi na ilalive ya Mafarisayo na ya Hirudu.»
16Sa ile maswihaɓa yahe yaambiana wao na wao: «V̄av̄o ɗe iv̄o karisina madipe.»
17V̄ale Insa uwaelewa yahe, awaambia: «Manatrini mudzishahilisao na itrongo ya ukosefu madipe? Raha kamusuona tu, wala kamusuelewa? Roho zanyu za ndziro uelewa ne? 18Muna matso, wala kamusuona? Muna makio, wala kamusukia? Kamusunahana? 19Wakati nakutrua madipe matsano yale, nayalisa watru alifu tsano, mahanga mangav̄i ya magudru mwayav̄inga?»
Wamudjiɓu: «Kumi na maili.»
20«Ẽhẽ wakati nakutrua madipe saɓa yale ha watru alifu nne, mahanga mangav̄i yajaya magudru mwayav̄inga?»
Wamudjiɓu: «Saɓa.»
21Sa ile awadzisa: «Raha kamusuelewa tu?»
Insa asuzihira mufa-matso ɗagoni Ɓaitisaida
22V̄ale wawaswili Ɓaitisaida. Sa ile watru wamuv̄ingia Insa mufa-matso, wamumia amukadze yimihono ha umuv̄onesa. 23Ɓas, asiki mufa-matso ule umuhono, amuv̄ingi v̄ondze na liɗago. Amutria mare hari mwa yamatso, amukadza yimihono, amwesa amudzisa neka asuona shitru.
24Mutru ule adzua yamatso, amwesa arongoa: «Nisuona watru, ɓadi nisuwaona mauri miri ɗe yendrao.»
25Ɓas, Insa amukadza raha yimihono hari mwa yamatso. Mutru ule aangalia ha uzuri, av̄ono, amwesa aono piya namuna yalazimu. 26Sa ile Insa amuv̄eleha hahe ha umuambia: «Usungiye ata hata ɗagoni.»
Monye asumukuɓali Insa amba ɗe uMutsahuliwa
(Mat 16:13-20; Luk 9:18-21)
27V̄ale Insa alawa na maswihaɓa yahe, wakongia hari mwa yamalago ya Kaisariya Filipi. Ndziani waka awadzisa suala lini: «Watru wasurongoa amba wami ɗe mbani?»
28Wamudjiɓu: «Ɓaãdhwi ya watru wasurongoa amba wawe ɗe Yahaya Muɓaĩshizi, wasalia amba ɗe Eliya, na wasalia tsena amba moja mengoni mwa yimitrume.»
29Sa ile awadzisa: «Ẽhẽ wanyu? Musurongoa amba wami ɗe mbani?»
Monye amudjiɓu: «Wawe ɗe uMutsahuliwa#8:29 uMutsahuliwa: Yaãni, ɗe uMutsahuliwa wa Mungu. Namusome tsena yamaeledzo ju la uMutsahuliwa hari mwa zikandre za mwiso za ishio ini..»
30Sa ile Insa awafahamisha ha kusudi wasuambiye ata mutru yamuhusu.
Insa asujudza ufa na umuregezeo hayi wahe
(Mat 16:21-28; Luk 9:22-27)
31Ɓas, v̄ale Insa aandrisa ujudza watru wahe amba uMwana wa Mwanadamu|Mwana wa Mwanadamu alazimu aondeshehe ha nguvu, aharwe na uwatru waɓole na yaMatolezi Maɓole ya Masadaka|Mutolezi-Masadaka, na yaMafundi ya Sharia; tsena aulawe, amwesa isuku ya raru aregeye hayi. 32Akowaambia trongo zile dhwahiri. Sa ile Monye amuhiri ɓavuni, aandrisa umurudi.
33Ɓadi Insa azingi, aangalia maswihaɓa yahe, amwesa amulagulia Monye ha umuambia: «Lawa mbeli zangu Shetwani! Mana kusuona zitrongo mauri ɗe Mungu, ɓadi fikira zaho za shi mwanadamu.»
34Amwesa Insa ahiri idunia yaka v̄ale, v̄umoja na maswihaɓa yahe, awaambia: «Neka mutru asutsaha aniɗunge, nadziɗelese iwaye yahe, adzitrihise umuri wa pawa#8:34 umuri wa pawa: uMuri wa pawa uwo, iyo ãlama ya usikitifu utsoparao mutru atsahao amuɗunge Insa. Namusome tsena yamaeledzo hari mwa zikandre za mwiso za ishio ini. wahe, iv̄o aniɗunge. 35Mana mutru atsahao avukise nafusi yahe, atsoipoteza; ɓadi mutru apotezao nafusi yahe ha siɓaɓu ya wami na iHaɓari Ndjema, uwo atsoivukisa. 36Mana tanafu trini mutru atsoiparao neka apara lidunia kamili, ne apoteza iroho yahe? 37Au mutru atsotoa trini ɓadala ya iroho yahe? 38Mutru aonao haya ha siɓaɓu ya wami na yamarongozi yangu mbeli za uwatru tsi maaminifu maãswifu wa lidunia la leo lini, ɓasi uMwana wa Mwanadamu atsoona haya wajau ha siɓaɓu ya mutru ule wakati atsojao hari mwa utukufu wa Ɓaɓahe v̄umoja na zimalayika ndzitwaharifu.»
Currently Selected:
MARKUSI 8: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
