MARKUSI 11
11
Insa asungia Yerusalemu na shime
(Mat 21:1-11; Luk 19:28-40; Yuh 12:12-19)
1Wakati wakuruɓia Yerusalemu, upara yawo mukaɓala wa Ɓaitifadji na Ɓaitihaniya kariɓu na uMulima wa Mizaituni|Mulima wa Mizaituni, Insa akidza mbeli waili wa maswihaɓa yahe, 2awaambia: «Namwendre hari mwa liɗago lilio maswa na wanyu v̄av̄o; mwamongia ɗagoni, mutsopara mwana pundra afungwa alio amba kav̄u mutru aparomupandra; namumuɓuliye, mumuv̄inge. 3Neka v̄wa mutru amudzisaoni: ‹Manatrini mufanyao trongo iyo?› namumudjiɓu: ‹Raɓi asuitsaha, amwesa atsoiregeza av̄asav̄anu.› »
4Ɓas wandre, wapara mwana pundra ule afungwa v̄ondze kariɓu na mulongo ndziani, wamuɓulia. 5Wasalia hari mwa wale waka v̄ale wawadzisa: «Musufanya trini? Manatrini muɓuliao mwana pundra uwo?» 6Wawadjiɓu zile Insa aka awaambiazo. Ɓas, wawalishi wandre. 7Wamuv̄ingia Insa mwana pundra ule, wamukadza nguo zawo, amwesa Insa aketsi uju. 8Watru wengi waodzo nguo zawo ndziani, na wangina marahi waka wayakutrua mazambani. 9Wao waka mbeli, na wale wakomuɗunga nyuma, wakoshelemedza:
«Hozana!#11:9 Hozana: Mana ya v̄av̄o, Nasifiwe! Naɓarikishihe uwo ajao ha lidzina la Mola!
10Nauɓarikishihe utawalizi ujao,
utawalizi wa ɓaɓatru Daudu!
Hozana hari mwa yimikaɓala ya uju rahana uju!»
11Insa angia ɗagoni Yerusalemu, moni na iNyumba Ndzitwaharifu. Ɓaanda ahisa uangalia piya zitru zaka v̄ale, alawa ha uendra Ɓaitihaniya v̄umoja na kumi na waili wale, mana lijua lakondrotswa.
Insa asuapiza koho la muri
(Mat 21:18-19)
12iSuku yaɗunga iv̄o wakolawa Ɓaitihaniya, Insa aremwa na ndza. 13Rangu mbali-mbali aono mufigiye#11:13 mufigiye: Uwo aina ya muri udzao mbia ziliona ngizi zijiv̄ao. Shifarantsa muri uwo uhiriwa «figuier», na mbia zawo «figue». Namusome tsena yamaeledzo ju la mufigiye hari mwa zikandre za mwiso za ishio ini. wakana mani. Ɓas, aukuruɓia, pare aangaliye neka atsopara shitru ya uɗya. Amowaswili kariɓu, kapara neka tsi mani, mana raha kayaka wakati wa mavuna wawo. 14Ɓas, v̄ale Insa aambia muri ule: «Ata idahari, kav̄u tsena mutru atsoɗyao mbia yaho!» Na maswihaɓa yahe yamukia.
Insa asuĩdzia maɓahazazi moni na iNyumba Ndzitwaharifu
(Mat 21:12-17; Luk 19:45-48; Yuh 2:13-22)
15Uwaswili yawo Yerusalemu, Insa angia moni na iNyumba Ndzitwaharifu. Ɓas, aandrisa uindzia watru wakoudza na wao wakonunua moni na iNyumba Ndzitwaharifu ile. Av̄indrusa meza za hazi za watru wakogausa marike, na ziziri za watru wakoudza ndiwa, 16tsena kakolisha mutru yotsi av̄inga ata shitru av̄iria iNyumba Ndzitwaharifu. 17Amwesa awasomedza ha uwaambia: «Hali kav̄waangihwa amba: ‹iNyumba yangu itsohiriwa nyumba ya mamilio ya piya zinishani›? Ɓadi wanyu muifanya gumbo la warav̄izi.»
18 Matolezi Maɓole ya Masadaka|Mutolezi-Masadaka na yaMafundi ya Sharia ukia yawo trongo zile, wakozunguha ndzia ya umuula, mana wakomuria, iv̄o watru piya wakotaãdjaɓu na yimisomo yahe.
19Mahariɓi uzinga yayo, Insa na maswihaɓa yahe walawia liɗago.
Muri ule waapiziwa uparihana amba uhumu
(Mat 21:20-22)
20Asuɓuhi iv̄o waɗunga indzia ile, yamaswihaɓa yaono mufigiye ule amba uhumu ata yimizi. 21Ɓasi v̄ale Monye anahana trongo ile yahidjiri, amuambia Insa: «Fundi, ngalia, muri ule wawapiza, uhumu.»
22Sa ile Insa awaambia: «Namuamini Mungu. 23Nisumuambiani ha kweli, neka mutru asuambia mulima unu: ‹Lawa v̄av̄o, udzipulise ɓaharini›, tsena kasina taradudu rohoni, ɓadi asuamini amba itrongo airongoao itsohidjiri, atsokuɓaliwayo. 24Iyo ɗe imana nimuambiaoni, yotsi mutsoitsahao ha mamilio, namuamini amba muipara, na wanyu mutsokuɓaliwayo. 25Na neka musuhima mufanye mamilio, ne muna trongo kinyume na mutru, namumuswamihi, ile Ɓaɓanyu alio mbinguni amuswamihini mahosa yanyu wajau. [26Ɓadi neka kamususwamihi, Ɓaɓanyu alio mbinguni katsomuswamihini wajau mahosa yanyu.»]
Suala lahusu iyezi ya Insa
(Mat 21:23-27; Luk 20:1-8)
27Waregea raha Yerusalemu. Wakati Insa akorara moni na iNyumba Ndzitwaharifu, yaMatolezi Maɓole ya Masadaka, Mafundi ya Sharia, na watru waɓole waja wamupara, 28wamuambia: «Ha yezi trini ɗe ufanyao trongo zini? Au mbani ɗe ahuv̄a iyezi uzifanye?»
29Insa awadjiɓu: «Nisumudzisani wajau suala; namunidjiɓu, na wami nitsomuambiani amba ha yezi trini ɗe nifanyao trongo zini. 30uMuɓaĩsho wa Yahaya|Yahaya Muɓaĩshizi, uka ulawa ha Monyewe ziMbingu, au ha wanadamu? Namunidjiɓu.»
31Ɓadi walana shuwara ha urongoa: «Neka ridjiɓu amba uka ulawa mbinguni, atsoridzisa: ‹Ɓasi manatrini kamwamuamini?› 32Na neka rirongoa amba ɗe ha uwanadamu, jeje v̄av̄o?» Wakoria idunia, mana watru piya wakomurenga Yahaya amba kweli aka mutrume.
33Ɓas, wamudjiɓu Insa: «Karisujua.»
Sa ile Insa awaambia: «Wami wajau tsisumuambiani amba ha yezi trini nifanyao trongo zini.»
Currently Selected:
MARKUSI 11: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
