MATIYO 19

Musomo wahusu ufungua ndrolo

(Mar 10:1-12)

1Ɓaanda Insa amalidza marongozi yale, alawia iGalilaya, andre hari mwa liɓavu la Yudeya, nyambo ya Jurdani. 2Dunia nyengi ya watru imuɗungu, na waye akowazihira hule.

3Ɓas, watru wa ishama ya Mafarisayo wamujilia ile wamudjereɓu. Wamudzisa: «Hali iruhusiwa mutru ufungua mushe wahe ha siɓaɓu itsokao yotsi?»

4Adjiɓu: «Kamwasoma hari mwa uMuangishio amba Mungu aumbu rangu mwandro mutruɓaɓa na mutrumama? 5Amwesa arongoa: ‹Iyo ɗe imana mutruɓaɓa atsomulisha ɓaɓahe na mayahe, adzifunge na mushe wahe, na wao waili watsofanyiha mwili moja.› 6V̄av̄o kawasi tsena waili, ɓadi mwili moja. Ɓasi izo Mungu azitsanganisa, mwanadamu asuzitsapuwe.»

7Sa ile wamudzisa: «Ɓasi manatrini Musa aãmurisha amba mutru av̄e mutrumushe ɓarua la twalaka, amomufungua?»

8Awadjiɓu: «Musa amuruhusuni mufunguwe watruwashe wanyu ha siɓaɓu ya uangavu wa roho zanyu. Ɓadi mwandroni kayaka namuna iyo. 9Wami nisumuambiani amba mutru afunguao mushe wahe wala tsi ha siɓaɓu ya uzani, alola wangina, v̄av̄o asufanya zina.»

10Ɓas maswihaɓa yahe yamuambia: «Neka iyo ɗe inamuna yalazimu mutru ake na mushe wahe, v̄av̄o ɓorwa mutru asulole.»

11Awadjiɓu: «Tsi piya uwatru ɗe watsoshindrao wakuɓali urongozi uwo, ɓadi ɗe wao tu wadjaãliwa uikuɓali. 12Mana v̄wa ɓaãdhwi amba kawashindri ulola, ha inamuna yawo wadzalwa; v̄wa kawashindri ulola ha siɓaɓu ya shitrendro wanadamu wawafanyia; ɓaãdhwi iv̄o, wadzifanya wao wenyewe amba kawasulola, ha siɓaɓu ya Utawalizi wa Monyewe ziMbingu. Mutru ashindrao aɗunge trongo iyo, naiɗunge.»

Insa asuv̄ingiwa wanatsa awaɓariki

(Mar 10:13-16; Luk 18:15-17)

13Ɓas, Insa av̄ingiwa wanatsa pare awakadziye yimihono na uwafanyia mamilio. Ɓadi yamaswihaɓa yakotsaha yawaziye.

14Sa ile Insa arongoa: «Namulishe uwanatsa, musuwaɓalidze waja wanipara; mana Utawalizi wa Monyewe ziMbingu, wa watru mauri ɗe wao.» 15Ɓas, awakadzia yimihono, amwesa alawa v̄ale.

Hadisi yahusu shaɓaɓi tadjiri

(Mar 10:17-31; Luk 18:18-30)

16Suku, Insa ajiliwa na mutru amudzisa: «Fundi, ndjema trini ɗe yalazimu niifanye, ile nipare uhayati mukamilifu wa daima?»

17Amudjiɓu: «Manatrini unidzisao yahusu trongo ndjema? Moja tu ɗe mwema. Neka usutsaha ungiye hari mwa uhayati wa daima, tuĩ ziãmuri.»

18Amudzisa: «Ɗe ziv̄i?»

Ɓasi Insa adjiɓu: «Kutsoula, kutsofanya zina, kutsohiɓa, kutsolawia ushahidi wa trambo. 19Muhishimu ɓaɓaho na mayaho, tsena umuv̄endze munyaho mauri ɗe iwawe yaho.»

20Shaɓaɓi ule amuambia: «Tsiɗungu piya trongo izo; trini ɗe yaniɓakia raha?»

21Insa amudjiɓu: «Neka usutsaha ike amba urahara, endra waudze izo ulionazo, uv̄e ifaida zimasikini, na v̄av̄o utsokana utadjirifu mbinguni; amwesa uje uniɗunge.»

22Ɓadi shaɓaɓi ule ukia yahe marongozi yale, andre dzahe na huzuni, mana akana mali nyengi.

23Wakati ule Insa aambia maswihaɓa yahe: «Nisumuambiani ha kweli, itsoka ndziro ya mutru tadjiri ungia moni na Utawalizi wa Monyewe ziMbingu. 24Nisumuambiani raha amba iyo ndzangu zaidi ngamia uv̄ira hari mwa foro la sindzano, rahana mutru tadjiri ungia hari mwa Utawalizi wa Mungu.»

25Maswihaɓa ukia yawo marongozi yale, washanga ha kusudi ata wakodzisana: «Ẽhẽ v̄av̄o mbani ɗe ashindrohuyiwao?»

26Insa awaangalia, amwesa awaambia: «Ha uwanadamu, iyo kaimukinishiha, ɓadi ha Mungu, piya umukinishiha.»

27Ɓas, v̄ale Monye arenge umurongo, amuambia: «Tsasi, rilishi piya zatru, ne rihuɗunge. Trini ɗe ritsoiparao?»

28Insa awaambia: «Nisumuambiani ha kweli, wakati wa uMuumbio Muv̄ia, uMwana wa Mwanadamu amoketsi hari mwa ishiri ya yezi ya utukufu wahe, wanyu mwaniɗunga mutsoketsi wajau hari mwa ziri za yezi kumi na mbili, ile muhukumu zingudjama kumi na mbili za Israila. 29Na mutru yotsi itsokao amba alishi ha siɓaɓu ya lidzina langu nyumba, wananyahe watruɓaɓa na watrumama, ɓaɓahe, mayahe, [mushe wahe], wana wahe, au mazamba, atsopara ata mara miya, atsopara na uhayati mukamilifu wa daima. 30Wengi walio wa handra, watsoka wa mwiso, na wengi walio wa mwiso, watsoka wa handra.»

Currently Selected:

MATIYO 19: swb

Highlight

Copy