MATIYO 17

iSuku Insa akovaga isura

(Mar 9:2-13; Luk 9:28-36)

1Ɓaanda v̄wav̄ira suku sita, Insa amurenge Monye, v̄umoja na Yakoɓu na mwananyahe Yuhani, awav̄ingi hari mwa mulima mundra, v̄ahanu waka weke. 2Na hule agauha mbeli zawo: sura yahe yakowala mauri ɗe lijua, na nguo zahe zifanyiha ndjeu, zakov̄ev̄ena mauri nuru. 3Sa ile Musa na Eliya wav̄enuha mbeli zawo, wakolagua na waye.

4Ɓasi v̄ale Monye arenge umurongo, amuambia Insa: «Raɓi, ija fetre iv̄o rilio v̄anu; neka usutsaha, nitsowaha maɓanga mararu v̄anu, moja laho, moja la Musa, na moja la Eliya.»

5V̄ale raha akorongoa trongo zile, ne v̄uwashukia vingu lakovaga, liwav̄ishidza. Na sa ile v̄ukilihana ji lalawa vinguni v̄ale, larongoa: «Unu ɗe uMwana muv̄endzewa wangu, tsena wami ujiv̄iwa halisi na waye; namumuvulishiye!»

6Ukia yawo ji lile, yamaswihaɓa yaremwa na faza ɓole ata wawu ha uso v̄otsi. 7Ɓadi Insa atsengelea, awaɓamba, amwesa awaambia: «Namuhime, mwasuriye!» 8Sa ile wadzua yamatso, kawaona mutru neka tsi ɗe Insa weke.

9Iv̄o wakoshuka mulimani hule, Insa awafahamisha zini: «Musuambiye ata mutru nida ile mwaiona, mupaka uMwana wa Mwanadamu|Mwana wa Mwanadamu aregezewe hayi ulawa ha uwafu.»

10Sa ile maswihaɓa yahe yamudzisa: «Ɓasi manatrini Mafundi ya Sharia warongoao amba Eliya alazimu aje raɓuzi?»

11Awadjiɓu: «Kweli Eliya alazimu aje pare atayarishe piya zitrongo. 12Ɓadi nisumuambiani amba Eliya madza aja, wala kawamujua, amwesa wamurendre piya izo wav̄endza. Ha inamuna iyo wajau uMwana wa Mwanadamu atsoondesheha mihononi hawo.» 13Ɓas, v̄ale yamaswihaɓa yaelewa amba akomurongoa ɗe Yahaya Muɓaĩshizi.

Insa asuzihira mwana mutruɓaɓa aliona kifafa

(Mar 9:14-29; Luk 9:37-43a)

14Wakati wawaswili kariɓu na idunia ile, v̄uja mutru adzivutsu mindruni ha Insa, 15amuambia: «Mutukufu, v̄oreha mwana wangu! Ana kifafa, tsena asutaãɓiha ha kusudi; mara nyengi waye upuliha hari mwa moro, au hari mwa maji. 16Tsimuv̄ingi ha maswihaɓa yaho, ne kawashindra wamuzihira.»

17Ɓas, Insa arongoa: «He wanyu mwalaɓiha, kamuna uaminifu wa lidunia la leo lini! Ata lini nitsokao na wanyu? Ata lini nitsomustahamilioni? Namuniv̄ingiyewo v̄anu.» 18Amwesa Insa alagulia mangavu shetwani ile; ɓasi ilawia umwana, na sa ile kamwe av̄ono.

19Ɓas, maswihaɓa yale yaja yamupara Insa weke, wamudzisa: «Manatrini karashindra raĩdzia shetwani ile?»

20Awadjiɓu: «Mana uaminifu wanyu wa mushashi. Nisumuambiani ha kweli, na djeli mukana uaminifu, wala ukana mutiti mauri ɗe ititi hari mwa zimbia#17:20 zimbia: iShigiriki v̄anu isurongoa aina ya mbia titi rahana zititi. Shifarantsa iyo uhiriwa moutarde., mwatsoãmurisha mulima unu ulawe v̄ahanu ulio, wendre v̄wangina, na uwo utsendra; kav̄u yotsi yatsomushindraoni. 21[Ɓadi shetwani mauri ɗe ini kailawa, neka tsi ha mamilio na ufunga.]»

Insa asujudza mara yangina ufa na muregezeo hayi wahe

(Mar 9:30-32; Luk 9:43b-45)

22Wakati waka v̄umoja Galilaya, Insa awaambia: «*uMwana wa Mwanadamu asendra av̄elehwe mihononi ha wanadamu. 23Watsomuula, na isuku ya raru atsoregea hayi.» Sa ile wangiliwa na hamu ya kusudi.

Fedha yakotolwa ushuru wa iNyumba Ndzitwaharifu

24Wakati wawaswili Kafarnaumu, warenga-fedha za ushuru#17:24 ushuru: Zini zaka zakofarudhwishiwa ɗe uwatruɓaɓa wazitowe kula mwaha. wa iNyumba Ndzitwaharifu waja wamudzisa Monye: «Hali fundi wanyu, waye katowo fedha za ushuru wa iNyumba Ndzitwaharifu?»

25Adjiɓu: «Ewa, waye utoa sa!» Ata amongia moni na inyumba, Insa amudzisa: «Simoni, usufikiri jeje? Wafalume wa ulemenguni v̄anu uliv̄isa latete watru wav̄i? Hali ɗe wana wawo, au watru wa v̄ondze?»

26Adjiɓu: «Ɗe wa v̄ondze.»

Insa amuambia: «Ɓasi v̄av̄o, uwana kawalazimu waliv̄a. 27Ɓadi pare rasutukize watru, shuka ɓaharini, wavutse imisi yaho, ulowe ifi ya handra itsojao; iɓuwe ihanyo, utsopara turuturu ya fedha moni; uirenge wendre wawav̄eyo, ike ushuru wangu na waho.»

Currently Selected:

MATIYO 17: swb

Highlight

Copy