YUHANI 9
9
Insa asuzihira mutru adzalwa mufa-matso
1Insa uv̄ira yahe ndziani, aono mutru adzalwa mufa-matso. 2Ɓas, maswihaɓa yahe yamudzisa: «Fundi, uv̄i ɗe ãswi, mutru unu au ɗe wadzaɗe wahe, ata adzalwa mufa-matso?»
3Insa adjiɓu: «Kaisi amba ɗe waye au ɗe wadzaɗe wahe ɗe waãswi, ɓadi pare zitrendro za Mungu ziv̄enuhe haheju. 4Raha rilio mutsana, irilazimu rifanye hazi za Ule aniv̄eleha. Uku usuja, ulio amba kav̄u ata mutru atsoshindrao afanye hazi. 5Wakati ulio amba tsa ulemenguni, wami ɗe inuru ya ulemengu.»
6Ɓaanda arongoa trongo zile, atri mare v̄otsi, afanya ɗongo na mare yahe yale, aliv̄aha matsoju ha kaono ule, 7amwesa amuambia: «Endra wawauso hari mwa iɓirika ya Siloamu.» (Mana ya dzina lilo «uv̄elehwa.») Ɓas, andre awauso, amwesa aregea, aono.
8V̄ale madjirani na watru wasalia wakomuona hale akofanya akrimasikini wakorongoa: «Afa unu mwa tsi ɗe ule akoketsi v̄ale, akofanya akrimasikini?» 9Ɓaãdhwi wakorongoa: «Ɗe waye.»
Wasalia wakorongoa: «Ãhã, ɓadi asufana na waye.»
Na waye monyewe akorongoa: «Ɗe wami!»
10Ɓas, v̄ale wamudzisa: «Ha namuna jeje ata matso yaho yaɓuha?»
11Adjiɓu: «Mutru ule ahiriwao Insa afanya ɗongo, aliv̄aha matsoju hangu, amwesa aniambia: ‹Endra Siloamu, wawauso.› Ɓas tsendre, tsiwauso, amwesa tsiono.»
12Wamudzisa: «A hav̄i mutru uwo?»
Awadjiɓu: «Tsisujua.»
13Wakati ule wav̄ingi mutru ule aka afa yamatso ha watru wa ishama ya Mafarisayo. 14Na v̄ale ika Suku ya Uv̄umuzi ɗe Insa afanya ɗongo, amuɓua yamatso. 15Mafarisayo wao wajau wamudzisa raha namuna jeje ashindra aona. Sa ile awaambia: «Av̄aha ɗongo matsoni hangu, tsendre tsiwauso, ɓas nisuona.»
16V̄ale ɓaãdhwi ya Mafarisayo yarongoa: «Mutru uwo kala ha Mungu, mana kasustehi iSuku ya Uv̄umuzi.»
Ɓadi wangina warongoa: «Ha namuna jeje muãswifu ashindrao afanye ãlama za midjuza mauri ɗe zizo?» Ɓas, mufaraka ungia hari mwawo.
17Amwesa waambia raha mufa-matso ule: «V̄anu wawe, usurongoa trini yahusu uwo ahuɓua yamatso?»
Adjiɓu: «Waye mutrume.»
18Mayahudi v̄ale kawaamini amba ule aka mufa-matso ɗe ashindra aona, ata mupaka wahiri wadzaɗe wahe. 19Wawadzisa: «Unu ɗe umwana wanyu murongoao amba adzalwa mufa-matso? Ɓasi ha namuna jeje av̄asa aonao?»
20Wadzaɗe wahe wadjiɓu: «Risujua amba unu ɗe umwana watru, tsena adzalwa mufa-matso. 21Ɓadi ha namuna jeje ata aonao av̄asa, au mbani ɗe amuɓua yamatso, karisujua. Namumudzise monyewe, madza aɓalihi, atsorongoa trongo zamuhusu.» 22Wadzaɗe wahe warongoa zile mana wakoria yaMayahudi, iv̄o waka waafikiana amba mutru atsomukuɓalio Insa amba ɗe Mutsahuliwa, atsoɓalidziwa iNyumba ya Uswali. 23Iyo ɗe imana wadzaɗe wahe warongoa: «Madza aɓalihi, namumudzise monyewe.»
24Ɓas, Mafarisayo yahiri mara ya v̄ili mutru ule aka mufa-matso, wamuambia: «Lav̄a na Mungu amba utsorongoa kweli. Risujua amba mutru uwo muãswifu.»
25Awadjiɓu: «Neka waye muãswifu, wami tsiji. Ɓadi trongo moja niijuao, tsika mufa-matso, na av̄asa nisuona!»
26Ɓasi wamudzisa: «Ahufanyia trini? Namuna jeje aɓua matso yaho?»
27Awadjiɓu: «Madza tsimuambiani, ɓadi kamwavulishia. Manatrini mutsahao muikiye raha? Musutsaha wajau mufanyihe maswihaɓa yahe?»
28Sa ile wamuruhana na urongoa: «Wawe ɗe ulio swihaɓa wa mutru uwo! Wasi, maswihaɓa ya Musa! 29Risujua amba Mungu alagua na Musa, ɓadi mutru uwo, wasi kariji v̄ahanu ala.»
30Ule awadjiɓu: «Isushangidza amba kamuji v̄ahanu ala, ne ɗe aniɓua yamatso. 31Risujua amba Mungu kavulishia maãswifu. Ɓadi mutru amuhishimuo, afanyao mav̄endzeleo yahe, uwo ɗe amuvulishiao. 32Kav̄waparokilihana amba mutru aɓua matso ya mutru adzalwa mufa-matso. 33Neka mutru uwo kala ha Mungu, katsoshindra afanya trongo itsokao yotsi.»
34Wamudjiɓu: «Udzalwa ha ukamilifu waho hari mwa madhambi, ɗe urisomedzao?» Ɓas, wamuĩdzia.
35Insa akia amba wamuĩdzia. Sa ile andre amupara, amudzisa: «Hali usuamini uMwana wa Mwanadamu|Mwana wa Mwanadamu?»
36Adjiɓu: «Uwo ɗe uv̄i, Mutukufu, pare nimuamini?»
37Insa amuambia: «Usumuona; unu alaguao na wawe, ɗe waye.»
38Sa ile arongoa: «Nisuamini Raɓi.» Amwesa amusudjudia.
39Ɓas Insa arongoa: «Tsija ulemenguni v̄anu pare hukuma ike: ile wao kawaono, waone, na wao waonao, wafanyihe wafa-matso.»
40Ɓaãdhwi ya Mafarisayo yaka v̄ale na waye ukia yawo marongozi yale, wamudzisa: «Hali wasi wajau, ne wafa-matso?»
41Insa awadjiɓu: «Na djeli muka wafa-matso, kamwatsokana dhambi. Ɓadi av̄asa murongoao: ‹Risuona›, dhambi lanyu la v̄av̄o.»
Currently Selected:
YUHANI 9: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
