MAV̄INGIZI-RISALA 25

Ɓaulusu mbeli za Festusi

1Suku traru ɓaanda Festusi awaswili hari mwa liɓavu lile, ahea Yerusalemu ha ulawa Kaisariya. 2Matolezi Maɓole ya Masadaka|Mutolezi-Masadaka na makizi-mbeli wa Mayahudi waja wamushitaki Ɓaulusu mbeli zahe. Wamurayi ha djitihadi 3awakuɓaliye ihadja amba amuv̄elehe Ɓaulusu Yerusalemu; na v̄ale wakopanga wamuule ndziani. 4Ɓadi Festusi awadjiɓu: «Ɓaulusu a shiv̄ani Kaisariya, na wami wajau tsi hale nitsoregea oho. 5V̄av̄o makizi-mbeli yanyu nawaniɗunge, na neka amba mutru uwo akoso, wamushitaki.»

6Festusi aɓaki na wao suku nane ata upara kumi jauleni, amwesa ashuku Kaisariya. iSuku yaɗunga arenge ɓandza moni na lipa la mahakama, amwesa atowo ãmuri Ɓaulusu av̄ingwe. 7Uwaswili yahe, Mayahudi yale yalawa Yerusalemu wamuzingidzia, amwesa wamusingidza trongo ndziro nyengi zilio amba kawakoshindra uzidhiɓitisha.

8Sa ile Ɓaulusu arongoa ha udziwania: «Tsakosa iSharia ya Mayahudi, wala iNyumba Ndzitwaharifu, wala Kaiswara#25:8 Kaiswara: Yaãni, ɗe umufalume wa Romu..»

9Ɓadi Festusi ha utsaha ajiv̄idze yaMayahudi, amuambia Ɓaulusu: «Utsokuɓali uheye Yerusalemu wahukumulwe na trongo zizo mbeli zangu?»

10Ɓaulusu amudjiɓu: «Tsa hari mwa lipa la mahakama la Kaiswara, v̄anu ɗe nalazimu nihukumulwe. Tsakosa Mayahudi na trongo itsokao yotsi, mauri ɗe iheli ujuao ha uzuri tu. 11Neka amba tsikoso, au tsifanya trongo yastahiki niulawe, tsisuhara naulawa. Ɓadi neka masingidzo yawo ya trambo, kav̄u ata mutru aliona ruhusa aniv̄elehe mbeli zawo. Nisutsaha nihukumulwe na Kaiswara.»

12Festusi ɓaanda atsaha mashauri watru wahe, amuambia Ɓaulusu: «Usutsaha uhukumulwe na Kaiswara, ɓasi utsendra mbeli za Kaiswara.»

Festusi asumutsaha shauri Agripaso

13Ɓaanda ya wana suku, mufalume Agripaso na Ɓereniki waja Kaisariya, wakoja wamuone Festusi. 14Ha iv̄o ilio amba wakov̄itsa suku nyengi hule, Festusi amueledza umufalume itrongo ya Ɓaulusu. Amuambia: «V̄anu v̄wa mutru Feliksa amulisha shiv̄ani. 15Wakati naka Yerusalemu, yaMatolezi Maɓole ya Masadaka na uwatru waɓole wa Mayahudi wamushitaki, wakotsaha ahukumulwe.

16Tsiwadjiɓu amba Maromu|Romu kawasina udzevu wa uv̄eleha mutru aãdhiɓiwe kaɓula ya waye utekelezewa maswa ha maswa na wale wamushitakio, ile av̄olwe nafasi adziwaniye na yamasingidzo yale. 17Ɓas waja v̄anu, amwesa tsalatsa wakati, isuku yaɗunga tsirenge ɓandza moni na lipa la mahakama, tsitowo ãmuri mutru ule av̄ingwe. 18Ɓadi wale wakomusingidza, kawamurongolea na mashitaka ya zimbovu nakozilindrilia, 19ɓadi wakana trongo kinyume na waye zahusu idini yawo na mutru fulani ahiriwao Insa alio amba afu, na Ɓaulusu waye akorongoa amba a hayi. 20Ha iv̄o tsakojua inamuna ya unamua trongo zizo, tsimudzisa Ɓaulusu neka atsov̄endza andre Yerusalemu, ahukumulwe nazo. 21Ɓadi Ɓaulusu amia alishwe shiv̄ani, alindre unamuzi wa Kaiswara Augusti|Kaiswara. Ɓas, tsitowo ãmuri alishwe shiv̄ani ata nimuv̄elehe ha Kaiswara.»

22Sa ile Agripaso amuambia Festusi: «Natsov̄endza nimuvulishiye mutru uwo wami monyewe.»

Amuambia: «Utsomukia meso.»

Ɓaulusu mbeli za Agripaso

23Ata isuku yaɗunga, Agripaso na Ɓereniki waja na ushangirifu muɓole, wangia moni na lipa ɓole la mungulidzano v̄umoja na madhwamana ya madjeshi na makizi-mbeli wa liɗago. Wakati ule Festusi atowo ãmuri Ɓaulusu av̄ingwe, 24amwesa arongoa: «Mufalume Agripaso na piyanyu mwahudhuria v̄anu na wasi, musuona mutru uwo alio amba piya djimlani wa Mayahudi wamushitaki hangu, rangu Yerusalemu ata hunu, na ulatsa keme amba kalazimu aẽshi. 25Ne ɗe hanguju, tsimaizi amba kafanya trongo yalazimu aulawe, ɓadi rangu waye monyewe atsaha ahukumulwe na Kaiswara, tsirenge satua ya umuv̄eleha. 26Ɓadi tsisina trongo ya kusudi ya umuangishia mutukufu yahusuana na waye. Iyo ɗe yatsonga namutekeleza mbeli zanyu, na hususwani mbeli zaho, wawe mufalume Agripaso, ile nipare trongo ya uangiha mutafitisho unu wamokoma. 27Mana tsisuona amba iyo trongo yalazimu wami uv̄eleha mufungwa wala tsi ha ujudza yamashitaka yalio kinyume na waye.»

Currently Selected:

MAV̄INGIZI-RISALA 25: swb

Highlight

Copy