MAV̄INGIZI-RISALA 13

Ɓarnaɓasi na Saulusu wasutsahulwa wandre wajudze iHaɓari Ndjema

1Hari mwa iDjama Ndziwaminifu ya Antiyokiya, v̄uka watru wakoshukidziwa marongozi ya shi mutrume, tsena v̄uka amba wakosomedza: Ɓarnaɓasi, Sameana akohiriwa Muɗu, Lukiyusu wa shi Kureniya, Manayinu aka alelwa na wakala Hirudu, na Saulusu. 2V̄uka suku, wakati wakoãɓudu Mola na ufunga, iRoho Ndzitwaharifu iwaambia: «Namunihetsiye Ɓarnaɓasi na Saulusu ha ihazi nawahira nawo.» 3Ɓas, ɓaanda wafunga na ufanya mamilio, wawakadzia yimihono, wawalishi wandre.

Ɓarnaɓasi na Saulusu shisiwani Kupro

4Ɓas, uv̄elehwa yawo na iRoho Ndzitwaharifu, Ɓarnaɓasi na Saulusu washuku Salukiya, watreke ata shisiwani Kupro. 5Uwaswili yawo Salamina, wakojudza Urongozi wa Mungu moni na ziNyumba za Uswali za yaMayahudi|Mayahudi. Tsena, Yuhani wajau akowasaidi.

6Amwesa, wazingidza piya ishisiwa ata ɗagoni Pafusu. Oho, wapara Muyahudi mugangi akohiriwa Ɓar-Insa, akodzifanya amba mutru akoshukidziwa marongozi ayajudze. 7Na waye aka v̄umoja na Sergiyusu Ɓaulusu, wakala mutaãlamu. Ɓas, wakala ule amuhiri Ɓarnaɓasi na Saulusu, akotsaha avulishiye Urongozi wa Mungu. 8Ɓadi Elimasi umugangi, iyo ɗe imana ya lidzina lilo, akowakanyusha na utsaha amuziye asuamini. 9Ɓas Saulusu, ule akohiriwa tsena Ɓaulusu, ajaya iRoho Ndzitwaharifu, amureme matso, amwesa amuambia: 10«He wawe wajaya kula hali ya udjandja na upeu, mwana wa Iɓilisa, ãduwi wa kula ilio haki! Hali v̄anu kutsolisha upoteza zindzia zaondzoha za Mola? 11Ɓas av̄asav̄anu, tsio hukuma ya Mola isuhushukia, utsoka mufa-matso hari mwa muda, amba kutsoona tsena lijua.»

Sa na isa ile shidza na uɗu zimushukia, ata akov̄av̄atsa kula v̄ahanu amba apare mutru amusike umuhono, amuv̄inge. 12Uona yahe itrongo yahidjiri, wakala ule aamini, ha ikiasi aremwa na ushangavu na umusomo wahusu Raɓi.

Ɓaulusu na Ɓarnaɓasi ɗagoni Antiyokiya ya Pisidiya

13Ɓaulusu na wanyahe watreke ulawa ɗagoni Pafusu, wandre Perga ya Pamufiliya. Ɓadi Yuhani awalishi, arudi Yerusalemu. 14Ɓasi rangu Perga, waendrelea na indzia yawo ata wawaswili ɗagoni Antiyokiya ya Pisidiya. Wangia moni na iNyumba ya Uswali iSuku ya Uv̄umuzi|Suku ya Uv̄umuzi, waketsi. 15Ɓaanda ya umusomo wa iSharia na yimitrume, yamakizi-mbeli ya iNyumba ya Uswali wawav̄eleshea haɓari ini: «Wananyatru, neka muna wana marongozi wa utria ɓari idjama, mutsojua murongowe.»

16Wakati ule Ɓaulusu ahimi, adzua umuhono, arongoa: «Wanyu Maisraila, na wanyu wasalia mumuriao Mungu, namuvulishiye. 17Mungu wa umati wa Israila uwo atsahua yamaɓaɓatru. Wakati umati unu waka Miswiri, auhudza, amwesa autowo oho ha ushindzi wahe. 18Awastahamilia padzaju mukaɓala wa maha aruɓaini. 19Ɓaanda aangamidza nishani saɓa hari mwa itsi ya Kanaani, awav̄a v̄ahanu v̄ale v̄uke v̄wawo. 20Ɓaanda ya v̄ale hari mwa mukaɓala wa maha aruɓamiya wa hamsini, awav̄a mahakimu, ata upara mutrume Samueli.

21Amwesa waja watsaha wav̄olwe mufalume, na Mungu awav̄a hari mwa maha aruɓaini Saulu, mwana wa Kishi wa udjama wa Ɓenyamini. 22Ata umutoa yahe Saulu, awav̄a Daudu ake mufalume wawo, ule amutolea ushahidi unu: ‹Tsimupara Daudu, mwana wa Yesi, mutru alingana na iroho yangu alio amba atsotsimidza piya mav̄endzeleo yangu.›

23Ɗe hari mwa zizilembwe za Daudu ɗe Mungu, ha ulawana na uwahadi wahe, av̄ingia Israila Muhuyifu, ne ɗe Insa. 24Kaɓula ya umujilio wahe, Yahaya|Yahaya Muɓaĩshizi akojudza piya umati wa Israila wandre toɓa na uɓaĩshiwa|uɓaĩsha. 25Wakati akomalidza urumishi wahe, Yahaya arongoa: ‹Wami tsi ɗe uwo mumufikirio, ɓadi v̄wa tsuwo ajao mengoni mwangu alio amba tsastahiki ata uɓulia ngwe za kaɓwa zahe.›

26He wananyangu, wanyu zilembwe za Iɓrahima na wanyu mumuriao Mungu, ɗe hanyuju ɗe urongozi wa uhuyifu uwo wav̄elehwa. 27Mana wakazi wa Yerusalemu na waɓole wawo kawamuelewa Insa, amwesa ha umusingidzia, watsimidza yamarongozi ya yimitrume yasomwao kula Suku ya Uv̄umuzi. 28Wala ukana amba kawamupara na trongo itsokao yotsi yatsongeshea waye uulawa, wamumia Ɓilatusa aulawe. 29Ɓaanda watsimidza piya trongo zaangihwa haheju, wamushukidza muriju v̄ale, wamuladza moni na kaɓuri. 30Ɓadi Mungu amuregeza hayi ulawa ufaju. 31Av̄enushia wale waka wahea na waye rangu Galilaya ata Yerusalemu, walio amba ɗe mazahidi yahe leo mbeli za uumati.

32Na wasi risumujudzani iHaɓari Ndjema ini amba uwahadi Mungu atoleawo maɓakoko watru, 33aritsimidziawo wasi wana wawo ha umuregeza hayi Insa, mauri ɗe inamuna yaangihwa moni na utende wa v̄ili:

‹Wawe Mwana wangu,

ileo ini wami tsifanyiha Ɓaɓaho.›

34Na hari mwa itrongo ya waye umuregeza hayi ulawa ufaju, ha namuna amba katsorudi hari mwa uolefu, Mungu arongoa:

‹Nitsomuv̄ani zineema ndzitwaharifu zaswafishiha

zatolewa wahadi Daudu.›

35Ha izo, arongoa tsena v̄ahanu v̄wangina:

‹Kutsoruhusu Mutwaharifu waho aola.›

36Ne Daudu, ɓaanda atsimidza yamav̄endzeleo ya Mungu hari mwa wakati wahe, afariki, andre apara wadzaɗe wahe, amwesa aolo. 37Ɓadi ule Mungu amuregeza hayi kaola.

38Ɓas wananyangu, namujuwe amba ha waye uwo ɗe mujudziwao umuswamaha wa madhambi. 39Na ha waye tsena ɗe kula mutru aaminio uhakishiwa na piya zilio amba ha ndzia ya iSharia ya Musa, kamwashindra mwahakishiwazo. 40Ɓasi ha izo, namudzitahadharishe mwasuparwe na itrongo ini yarongolwa na yimitrume:

41‹Namuangaliye, wanyu wendza udhuluma,

namushange, mwendre mwangamiye,

mana nisuja nifanye shitrendro hari mwa uwakati wanyu,

shitrendro ilio amba kamutsoiamini ata hata

neka musutolewayo hadisi.› »

42Ulawa yawo v̄ale, watru wale wawamia amba waregeye tsena iSuku ya Uv̄umuzi yaɗunga, waje wawasomedze tsena trongo ɗe wizo zile. 43iDjama ile wakati yatsapuha v̄ale, wengi wa Mayahudi na watru wasalia watuĩvu wakuɓali idini ya Uyahudi, wamuɗungu Ɓaulusu na Ɓarnaɓasi walio amba wakohadisi na wao na uwatria ɓari waketsi na ineema ya Mungu.

44iSuku ya Uv̄umuzi yaɗunga, wengini mwa watru wa liɗago waka wangulidzana, pare wavulishiye Urongozi wa Mungu. 45Uona yawo idunia ile, yaMayahudi yaremwa na uwivu. Wakokanyusha zitrongo Ɓaulusu akozirongoa, na umuruhana.

46Ɓas, ha dhwahiri Ɓaulusu na Ɓarnaɓasi wawaambia: «Ɗe hanyu kadimu ɗe yaka yalazimu Urongozi wa Mungu ujudziwe. Ɓadi rangu muuharao, amwesa mudzionao wanyu wenyewe amba kamwastahiki uhayati wa daima, ɓasi risulekedza ha zinishani zangina. 47Mana zini ɗe Mola ariãmurisha:

‹Tsihulishi uke mwenge wa zinishani,

uv̄inge uhuyifu ata hari mwa yimipaka

ya mwiso ya lidunia.› »

48Ɓas, watru wa zinishani zangina wale ukia yawo itrongo ile, wajiv̄iwa, watukuza Urongozi wa Mola. Na piya wale waka watsahulwa wapare uhayati wa daima waamini.

49Ata v̄ale, Urongozi wa Mola wakoenea na piya itsi. 50Ɓadi Mayahudi yakotsotsoa watruwashe wendza sheo watuĩvu na yamakizi-mbeli ya liɗago. Watsongo umani kinyume na Ɓaulusu na Ɓarnaɓasi, ata wawaĩdzia hari mwa liɓavu lawo lile. 51Ɓas, wav̄arusa lidjifu la yimindru yawo, amwesa wandre ɗagoni Ikoniyumu. 52yaMaswihaɓa, uv̄andre wawo, waka amba wajaya furaha na iRoho Ndzitwaharifu.

Currently Selected:

MAV̄INGIZI-RISALA 13: swb

Highlight

Copy