அப்போஸ்தலர் 3

சலன் முஸுனா மெனிக் பரொ ஹோரெஸ்

1ஒண்டெதி துபார் தீ²ன் கெ³ண்டொ ப்ரார்தன கெரரிய கெ⁴டி பேதுருகின், யோவான் த⁴வ்ராக் ஜியாஸ்.

2தெப்பொ, உஜுதாம்ரீ: சலன் முஸுனாஸ்த ஒண்டெ மெனிகுக் தெவ்டதெனு துக்கிலி அவ்யாஸ். த⁴வ்ராக் அவரிய மென்க்யான்ஜோள் பீ⁴க் மகஸ்தக், த⁴வ்ராம் ‘அலங்காரு வாட்’ லெகுத்த நிச்சு தெகொ பெல்லி அவி பிஸடன்.

3பேதுருகின் யோவான் த⁴வ்ரா பிஸ்தர் ஜாஸ்தவேளு தெங்கொஜோள் தெனொ பீ⁴க் மகெஸ்.

4தீ³தெனு தெகொ கம்சி ஸியாஸ். தெப்பொ பேதுரு, “அம்கொ ஸா’’ மெனி ஸங்கெஸ்.

5தெனு காய்தி தேன்கீ மெனி தெனொ எதுர் ஸியெஸ்.

6தெப்பொ பேதுரு தெகொஜோள், “ருப்பொகின், ஸொந்நொ மொர்ஜோள் நீ: மொர்ஜோள் ஸேஸ்தெ தொகொ தொ³வுஸ். நாசரேத் கா³ம்கெரெ ஏசு கிறிஸ்துகெ நாவ்ஹால் தூ ஹுடி சால்’’ மெனி ஸங்கரியொ மெனி மென்திகி,

7தெகொ ஜெய்னா ஹாதுக் தெரி துக்கி ஸொடெஸ். தென்னவேங்கு தெகொ பாய்ஞ்னுக்கின், பாய்ஞ் கெ³ணுகுனுக் பலம் அவெஸ்.

8தெனொ துங்கி, ஹுடி ஹிப்பி சலெஸ். தெனொ ஜுகு ஸொந்தோஷ்கன் சலி துங்கி, தேவுக் ஸ்துதி கெர்லேத் தெங்கொ ஸெந்தொ த⁴வ்ராக் ஜியெஸ்.

9தெனொ சலஸ்த, தேவுக் ஸ்துதி கெரஸ்த மென்க்யான் அஸ்கின் ஸியாஸ்.

10த⁴வ்ராம் அலங்காரு வாட் லெகுத்த பி³ஸி பீ⁴க் மகெஸ்தெனொ எனோஸ் மெனி அஸ்கின் களைளியாஸ்; தெனொ சலஸ்தெ ஸீதி அஸ்கின் ஜுகு ப்ரம்மெ லகி ஆச்சர்யம் பொட்யாஸ்.

பேதுரு கெரெ ப்ரஸங்கம்

11பேதுருகின் யோவான் சாலமோன்கெ மண்டபுக் ஜியாஸ். பரொ ஹொயெஸ்தெனொ மெளி தெங்கொ ஸெங்கொ ஜியெஸ். தெப்பொ அஸ்கின் ஆச்சர்யம் பொடி தெங்கொ ஸாஸ்தக் தமி அவ்யாஸ்.

12பேதுரு தெங்கொ ஸீ, “இஸ்ரயேல்னு, எல்லெ ஸீதி துமி ககொ ஆச்சர்யம் பொடராஸ்தெ? அம்ரெ ஸுய ஸக்திஹால்தீ, ஸுய பக்திஹால்தீ எகொ அமி சலடன் தொவெஸோன் அம்கோஸ் ககொ துமி கம்சி ஸாராஸ்தெ?

13 அம்ரெ ஒள்டுன் ஆபிரகாம், ஈசாக்கு, யாக்கோபுகெ தேவூஸ் எகொ பரொ கெரி சலட்யாஸ். தேவ் அபுல் ஸெவ்கன் ஏசுகெ நாவ் மஹிமெ பொந்தஸ்ததானுக் எகொ சலட்யாஸ். துமிகீ ஏசுக் தேஸாதிபதி பிலாத்துஜோள் ஒப்பிஞ்சி தியாஸ். பிலாத்து ஏசுக் ஸொடுவி கெரஸ்தக் தீர்மான் கெரெவேளு, துமி தெங்கொ ஸொடுவி கெரஹோனா மெனி மென்யாஸ். (யாத் 3:6,15-16)

14பரிஸுத்தம்கின், நீதி பொரெ மெனிகுக் துமி நிராகரிஞ்சிதி, ஹத்யவானுக் ஸொடுவி கெர்னொ மெனி மெல்லியாஸ். (மத் 27:15-23)

15 நித்ய ஜிவ்னம் தேரிய ஏசுக் துமி மொரட்யாஸ். தேவ்கீ தெங்கொ ஜீவ் ஸெந்தொ ஹுடட்யாஸ். தெல்லெகொ அமி ஸாக்ஷின்.

16தெல்லெ ஏசுகெ நாவுஸ், தும்கொ களய் சலன் முஸுனா ஹொதெ எகொ பரொ கெரி சலடன் தொவ்ரியொ. ஏசுகெ நாவ் ஹொல்லெ தொவரிய விஸ்வாஸுஸ் துமி அஸ்கின் ஸாஸ்ததானுக் எகொ பரிபூர்ணுகன் பரொ கெர்ரியொ.

17“மொர் பை⁴ பெ⁴ய்னானு, துமிகின் தும்ரெ அதிகாரின் அஞ்ஞானிகன் சல்த கெல்லி ஏசுக் மொரட்யாஸ் மெனி மொகொ களாய்.

18மேசியா ஹிம்ஸொ பொந்தி மொர்னொ மெனி தேவ் அபுல் தீர்கதரிஸின் வாட்கன் ஸங்கிரியாஸ். தேவ் ஜுகு தோ²ர்னு முல்லொ ஸங்கெ வத்தான் அத்தொ பூர்தி ஹொய்ரெஸ்.

19தேஹாலிம் துமி பாப் கெரஸ்த ஸொட்டி தேவ்ஜோள் அவொ. தேவ் தும்ரெ பாபுனுக் க்ஷமொ கெரன்.

20பகவான் தும்ரெ ஆன்மீக ஜிவ்னமுக் நொவ்வொ பலம் தேரிய காலு அவய். தெப்பொ தும்ரெகுர்சி மெனி ந்யமுன் கெர்னி பொடெ ரக்ஷகர் ஏசுக் தெனு தட்டன்.

21அத்தொ பரலோகுக் கள்ளினி பொடெ ஏசு, அஸ்கி நொவ்வொ ஹோஸ்த காலு அவஸ்த லெந்து பரலோகும் ர:னொ. தேவ் தெல்லெ நொவ்வொ காலு கொப்பொ அவய் மெனி ஆதிம்ரீ: அபுல் தீர்கதரிஸின் வாட்கன் ஸங்கிரியாஸ்.

22திஸோஸ் தீர்கதரிஸி மோசே மெளி,

‘தும்ரெ தேவ் பகவான் மொகொஸோன் ஒண்டெ தீர்கதரிஸிக் தும்ரெ ஸந்ததிம்ரீ: தும்கொகுர்சி மெனி தட்டன். தெனு ஸங்கரிய வத்தானுக் அய்குவொ.

23 தெல்லெ தீர்கதரிஸிகெ வத்தாக் அய்குனாஸ்தெனு நாஸ் ஹோன்’

மெனி ஸங்கி ஹொதெஸ்.(உபா 18:15,19)

24திஸோஸ் சாமுயேல்ரீ: கித்கதெனு தீர்கதரிஸனம் ஸங்க்யாஸ்கீ திக்கூதெனு ஏசு எல்லெ புலோகுர் உஜன் மெனி முல்லோஸ் ஸங்கிரியாஸ்.

25துமீஸ் தெல்லெ தீர்கதரிஸின்கெ ஸந்ததின். தேவ் ஆபிரகாம்ஜோள்,

‘துரெ வாட்கன் பு⁴ஞிர் ஜிவரிய அஸ்கி ஸந்ததின் ஆஸீர்வாத் பொந்தய்’

மெனி ஸங்கி ஹொத்யாஸ். தேவ் அம்ரெ ஒள்ட்யான்ஜோள் கெல்லியெ எல்லெ நியமந்துக் துமிஸ் பாத்யம். (ஆதி 22:18; 26:4)

26துமி அஸ்கின் பாப் கெரஸ்த ஸொட்டி தேவ்ஜோள் அவ்னொ மெனிகின், தெங்கொ ஆஸீர்வாத் தும்கொ பரிபூர்ணுகன் அப்புனொ மெனி தெனு அபுல் பெடாக் தும்ரெஜோள் முல்லொ முல்லொகன் தட்டியாஸ்.

Currently Selected:

அப்போஸ்தலர் 3: SAUBSI

Highlight

Copy