Zefania 3
3
Jerusalem tiina taane
1Lɛɛro wo á teo kom baŋa ne!
Ko nɔn-bia bam maa ye zwabani-nyena,
de puseŋ-nyena, de nɔn-kayɛ yerane mo.
2Ba tiini ba jege yi-dɛɛre
ye ba ve koresem.
Ba wo ke ba wo-dedoa de ba Tu Baŋa Wɛ wom
naa ba sale o yera ne.
3Teo kom nakwa bam yeini ba fugi nɔɔna
nenɛɛne nywonnu na ŋuuri tei to mo.
Ko dedɛɛra bam jege wo-loŋo
ne wiira na ba di ba daara se tega poore-ko tei to mo.
4Ba sampwori sem maa ye kampin-nyena na jege nia yalei to.
Ba kaanem tiina bam ve Wɛ nia yam
pa se ba chɔge Wɛ diga kam chullu tem.
5 Baŋa Wɛ nam ta wo teo kom wone.
O maa jege chega yerane
ye o ba tusa de fenfee de.
Tega ná yeini ka poore dɛ maama wone o toŋa
se chega kam mo jeini ka pa o nɔɔna,
ye o ba yaga.
Puseŋ-nyena bam nam ta toŋe lwarem mo
ye chaveera ba jege-ba.
Baŋa Wɛ maa we:
6“Amo chɔge logo baŋa dwi tiina dedɛ,
pa se ba dam jei sem to buru-tu-tu.
Nɔɔn-nɔɔno daa tera ba teene dem wone.
Nɔɔna maa ba tɔge de chwei sem ba via.
Ba te-fwaaro tem maama tigi mo zɛɛra,
ye nɔɔno de dedoa de wo daare.
7A nam ya boŋe we abam laam wó taa kɔre amo
ye á sɛ a koresem dem.
A nɔɔna bam ya ná ke konto,
ba sam dem ya bá na chɔgem,
ye a waarem dem bá yi-ba.
Ba nam yɔɔre ba kwaane mo ba toŋe lwarem
ba dɛ dɛ totoŋa baŋa ne.”
8 Baŋa Wɛ ta ma ta o we:
“Konto ŋwaane cheigi-na se a laam ba abam tei.
Dɛ dem konto ne amo wó zaŋe a bere we
logo baŋa dwi tiina bam ba jege chega.
Amo boŋe a ja se a la logo baŋa dwi tiina bam
de balo na zoore teene dem maama ne to mo a ke daane,
se a pa ba lɔre a ban-lom na ye tei to.
Amo wó pa se a bane tiini de zaŋe ba baŋa ne
ye logo kom maama wó chɔge zɔŋ-zɔŋ,
ne mini na zwɛ wonnu tei to.
9Amo laam wó leiri nɔɔna bam ni-taana,
pa se ba maama taa lwoori amo Baŋa Wɛ
ne ko na maŋe se ba ke tei to.
Ba maama wó tɔge daane ba zuli-ne de ni dedwe.
10Ko ta ná ye amo nɔɔna balo na jage ba vo ba gaale Kusi bwi sem,
ye ba zoore teo konto yiga yiga wone ba zuli-ne to,
banto wó ja ba pɛɛra ba jwoori ba ba ba pa-ne.
11Kanto maŋa kam ná yia, abam daa bá taa wo chaveera wone
de á na nwoŋi a kwaga ne tei to ŋwaane.
Kokuri to, amo wó le balo maama na bere ba tete kamunim to á wone.
Nɔɔna daa bá taa jege teera
peo kolo amo na zoore da to baŋa ne.
12Ko ná ye nɔɔna balo na wó daare á wone to,
banto wó taa ye nabwona balo na gwooni ba tete to.
Ba ta wó taa sale amo Baŋa Wɛ yera ne.
13Isarele dwi tiina balo ta na daare to bá ke nɔɔn-nɔɔno lwarem.
Ba bá fɔ vwa, ye ba nam bá gane ba dwonna.#Gurim 14:5
Ba wó na peiga jei ye ba sii.
Nɔɔn-nɔɔno daa bá fugi-ba.”
14Zion tiina bam, ta‑á leeni-na!
Isarele tiina bam maama, ke-na sɔɔ na ywona to!
Jerusalem teo kom tiina, ta‑á jege-na wopwolo
ye á chaka lanyerane!
15Kokuri to, Baŋa Wɛ lage o le abam á waarem dem maama wone.
O ta wó zeili á dona bam maama o yage.
Baŋa Wɛ wom na ye Isarele tiina pɛ to wo abam tei ne.
Foone daa ba jege se ko ja abam daga.
16Dɛ dem konto ná yia,
ba wó ta de Jerusalem tiina bam we:
“Zion tiina bam, yé ta‑á kɔre-na foone.
Nam yé pa-na á vɔna pare.
17Abam Tu Baŋa Wɛ wom wo abam tei ne.
O jege dam ne babea tei se o ma o vere abam.
Baŋa Wɛ yiga wó taa wo abam baŋa ne,
ye á jwoori á na dam o swono kom ŋwaane.
O daa ta wó puli seinim lei á ŋwaane,
18nenɛɛne nɔɔna na di kuri ye ba jege wopwolo tei to.”
Baŋa Wɛ maa we:
“Amo lage a le lɛɛro telo na wo á baŋa ne to a yage.
Chaveera daa ba jege se ya ja abam.
19Nii-na! Maŋa kam ná yia,
amo wó waare balo na bɛɛse abam to.
A ta wó jwoŋi balo na ye gwaaro to,
a daare a la balo maama na jage to a ke daane.
Amo wó pa se ba chaveera leiri ya ji zula,
pa se ba na yere logo baŋa jei maama ne.
20Maŋa kam konto ne, a lage a la abam a ke daane,
pa se á jwoori sɔŋɔ mo.
A ta wó pa se á na zula ye á yere zaŋe
logo baŋa dwi maama tei ne,
ye á jwoori á ta‑á jege yu-ywoŋo.
Abam yia wó na amo keim dem konto.”
Baŋa Wɛ na tage kolo to mo konto.
Currently Selected:
Zefania 3: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
