Zekaria 6
6
8. Torokooro tena taane
1Amo daa ma kwoni a yuu wɛɛne a nii a na sisei-torokooro tena na nwoŋi peero telei tetare laŋa ne te maa beena. Peero tem maama yɔɔre te ye channa yerane mo. 2Sisein-nɔɔna balo na vaŋe boboa toroko kom to ye nasonno mo. Sisein-nɔɔna balo de na vaŋe torokooro telei tu wom to maa ye nazwona. 3Selo na vaŋe torokooro tetɔ tu wom to ye napwona, ko daare ye selo na vaŋe torokooro tena tu wom to ye pupweeru. Se maama nam yɔɔre se dana mo chekke. 4A ma bwei maleka kam na zege ka ŋɔɔne de amo to a we, “Amo tu, wonnu tento de kuri nam daa mo ye bɛ?”
5Ka de ma leiri-ne ka we, “Tento lage te jage te yi logo baŋa sapɛ sena sem maama. Te nam yɔɔre te nwoŋi Wɛ wom na tei logo baŋa ni maama to yiga ne mo. 6Sisein-zwonnu tem vaŋe se toroko kom se yɔɔre baŋa seeni laŋa kam mo. Kolo sisein-pwonnu tem na vaŋe to ma yɔɔre wɛ-zoore seeni, ye kolo sisein-pupweeru tem na vaŋe to de ma yɔɔre tega-kuri seeni.”
7Sisein-dɛɛro tem konto na yɔɔre se nwoŋi to, se yera nyaare mo se se vo se kare se beeri logo baŋa jei maama. Maleka kam#6:7 Maleka kam naa Baŋa Wɛ de ma pa-se ni ka we, “Véi-na tega baŋa jei maama se á nii.” Se ma nwoŋi se vo se kaare tega baŋa ni maama se pu. 8O laam ma tɔɔle o ta de amo o we, “Nii mo. Sisei selo na maa vei baŋa seeni laŋa kam ne to mo pɛ se Baŋa Wɛ bane dem zuri jei sem konto ne.”
Paare yipuga wó pu Josua yuu ne
9 Baŋa Wɛ kwora déem tu ka yi amo we:
10“Helidayi, de Tobija, de Jedaya zege Babilon teo ne ba ba ywo-seeni. Nam véi n jeeri-ba n daare n jwoŋi pɛɛra yalo ba na jaane ba ba to ba tei ne. Dento dɛ dem ne nɔɔ se n kwei ba pɛɛra yam konto n ja n vo Zefania bu Josia sɔŋɔ. 11Nmo laam wó kwei ba lu-nyenno, de ba sabu-seŋa pɛɛra yam n ma n ke paare yipuga, se n kwei-ka n pu Jehozadaki bu Josua na ye Wɛ kaanem nakwe tu to yuu ne. 12Laam ta ded‑o we, ‘Paŋwa Tu Baŋa Wɛ na tage tei to mo tento: Nii wolo ba na bwoi‑o we “Tio-naga” to.#Zekaria 3:8 O nam wó zege ywo-seeni mo o puli jei maama ne ye o fɔge o lɔ Baŋa Wɛ diga kam. 13Chega to, wonto mo wó lɔ-ka o zege. Wonto wó taa jege paare nenɔŋa mo ye o jei o paare yituŋu kom baŋa ne o tei o nɔɔna bam. Wɛ kaanem tu mo wó taa wo o yituŋu kom saŋa ne. Banto balei wó taa toŋe daane de ni-mɔrɔ.’ 14Paare yipuga kam wó maŋe Wɛ diga kam ne mo se nɔɔna taa guli Helidai#6:14 Helidai Hiburu = Helem, de Tobija, de Jedaya, de Zefania bu Josia#6:14 Josia Hiburu = Hen gula.
15Nɔɔna balo na wo sa-teo wone to wó ba ba woli se Baŋa Wɛ diga kam fɔge ka lɔ. Abam laam wó lɔre we ko seene ko ye Paŋwa Tu Baŋa Wɛ mo toŋe-ne abam tei ne. Tento nam wó seene ko ke, ne abam ná yɔɔre á sɛ á Tu Baŋa Wɛ ni dem chekke.”
Currently Selected:
Zekaria 6: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
