Nahum 2
2
Ninevɛ teo na wó to tei to
1Ninevɛ tiina bam, á dona bam zege á baŋa ne mo se ba jage abam yera yera. Konto to, zaŋe-na wɛɛne, á ke-na á tete á ke daane. Fɔge-na á dam jei sem. Ta‑á yere-na chwoŋa kam. Ke-na dam á ke á tete kuri ne se á ke jara! 2Baŋa Wɛ lage o jwoori o pa Isarele tiina de Judah tiina mo na nenɔŋa ne ka déem na ye tei to, de ba dona bam na maŋe ba chɔge ba tega kam de ba wodiiru tem tei maama to de.
3Jar-keira balo na tu abam baŋa ne to jege nantane de gwaaro telo na seene chwɛ-chwɛ to mo. Ba ti ba yiga se ba ke jara yam! Ba jara-keim torokooro luuru tem pepele yia ne min-vogo mo tei. Ba maa zei ba chichwoa ba yaare wɛɛne. 4Torokooro tem tiini te duri mo pempala yam baŋa ne. Te maa duri te vei yiga dedaane kwaga teo kom pwooni ne. Te pepela jei maama nenɛɛne min-zwonnu mo tei. Te wurigim dem maa nye de doa pepelem dwoŋi tei. 5Ba ma bwoŋi jar-keira dedɛɛra bam se ba ba. Ba na duri ba maa vei to mo ba chɔɔle ba to tega ne. Ba ma vo ba yi teo kom kabira kam yera, ye ba daare ba kwoli ba yum se ba wane ba bwori manchwoŋo ni dem ba zo teo kom. 6Woŋo kolo ya na chege buga kam to mo bwori. Na bam ma chuuri ba yigi pɛ sɔŋɔ kom ba de tega ne.#2:6 naa pɛ sɔŋɔ tiina bam kɔre foone. 7Ninevɛ teo nɔn-bia jege se ba viiri de chaveera! Ba lage ba kale-ba mo ba ja ba kɛ. Pɛ sɔŋɔ kaba-kane sem laam ma keeri wo-chechɔgɔ ŋwaane. Ba maa ŋuura nenɛɛne kunkwona na ŋuuri tei to, ye ba daare ba mage ba takeira ŋwaŋa yerane. 8Ninevɛ teo kom nye de buga kalo na na duri ba nwoŋi yɔɔ tei to mo! Ko nɔn-bia bam nwoŋi ba maa kɛa. Ba ma bage-ba ba we, ‘Zege-na! Zege-na!’, ye nɔɔn-nɔɔno wo pipiri o jwoori.
9Vere-na ba lu-nyenno wonnu tem, de ba sabu-seŋa wonnu tem á ja á viiri! Teo kom su mo dedaane wo-laaro. Ba jejegero tem tiini te jege lonne se ko gaale. 10Lɛɛro mo yi teo kom! Ko chɔge mo ko daare di-dwonnu yerane. Ko nɔn-bia bam bochara dia, ye foone zo-ba. Ba yera maa sae pɔm-pɔm, ye ba yibia tiini ya nyɔne lanyerane.
11Bɛ laam mo ke á teo kom? Ko déem nye dedaane nywonnu tiga jei, ye nywon-bia mo nɛ ba wodiu da ba di. Nywon-bɛ de nywon-kane déem tigi da de ba bia ba sii ye foone tera. 12Nywon-bɛ yeini se go ga-vara ye se ja nɔna se pa se bia de se kaana se ba di ba su. Teo kom maama déem su de jejegero dedɛ.
13Paŋwa Tu Baŋa Wɛ nam tage o we, “Amo done abam mo. A lage a zwɛ á jara-keim torokooro tem mo. Á nɔn-donno tem maa wó te jara wone. Jejegero telo á na vere nɔɔna tei ne to daa bá daare. Abam daa bá toŋe á tontoŋena bam se ba ja á kwora ba vo jei jei.”
Currently Selected:
Nahum 2: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
